Jehovah Angel Hezekiah Zụọbụọmọmị

Assyria ibe mị, Israel oia-ziituu daabụọ kẹrị-akịdẹ. Sennacherib, Assyria pẹrẹ bị, bá Judah maa-ziituu daabụọ kpọ kẹrị-akị dọụmị. Ómịnị Judah amabo a kẹnị kẹnị kẹrị-akịmị. Ómịnị gbẹsị Jerusalem kị kẹrị-akị dọụtimi mị. Anịa Jehovah kị Jerusalem kekeretimi bara Sennacherib mọ nimigha.

Hezekiah kị Judah pẹrẹ bị. Sennacherib Jerusalem a bụụdọọn Hezekiah mọ dọụgha duonị, ómịnị biin sịlịama akị Sennacherib pịrịmị. Sennacherib sịlịbo kẹrị-akịmị. Mọabịkpọ ómịnị mọkpọ wó soldier-otubo fịrịmọ Jerusalem a sụụ yọ a múmị. Assyria-otubo dọlọ dọlọ bo ama mọ naịntimi duonị, Jerusalem-otubo malafa kụrọmọmị. Anịduonị, Hezekiah gbaa á pịrịmị: ‘Malafakụmọ. Assyria-otubo kụrọ nanaemi kị gbaa kpọ, Jehovah akị wo pịrịmụ kụrọmị, dụba akị Assyria-otubo nana wẹrịemi kụrọ dẹịn-emi.’

Sennacherib wó ịsọmụ wẹnị-owei Rabshakeh fịrịmọ mú Jerusalem otubo yẹkwẹmị. Rabshakeh Jerusalem gate bọọ tịẹwẹrị gịamị: ‘Jehovah laa baratụa á pịrịgha fa. Hezekiah bụọmọ á lẹịmọ kụmọ. Laa wo bara duo á zụọbụọmọ mịnị kịmị fa.’

Jehovah wó mịẹ agbẹị-emi ye gbaa ụ pịrị bara Hezekiah mọ tẹẹmị. Jehovah ụ parụmị: ‘Rabshakeh gbaamịnị egberi bụọmọ in’a bụụdọọn kụmọ. Sennacherib Jerusalem kẹrị-akịgha fa.’ Bịsẹ ifie bụọmị, Sennacherib letter-ama gẹẹ Hezekiah yarịmị. Ụ gbaamị: ‘Jerusalem kọn ị pịrị. Jehovah laa ị́ zụọbụọmọgha fa.’ Hezekiah tẹẹmị: ‘Jehovah, sisei wo zụọ, anịkị kịmịsẹ ị́mịnị kị gesii Ọkpọnanaowei bara nimimịnị.’ Jehovah gbaa ụ pịrịmị: ‘Assyria pẹrẹ bị Jerusalem duo sụọgha fa. Ịmịnị ine ama zụọbụọmọmịnị.’

Sennacherib Jerusalem kẹrị-akịmụ eti nanawẹrịmị. Anịa kẹnị dein, Jehovah wó angel-owei fịrịmọ soldier-otubo timi yọ bọọ múmị. Bịsẹ angel-owei mị 185,000 soldier-ama baamị! Pẹrẹ Sennacherib soldier-otubosẹ fịịsinmị. Ómịnị bá zịnị mịẹmụ bara fa duonị, waị wó ama bọọ múmị. Jehovah wó gbaawẹrị ye mịẹbeinmọmị. Ómịnị Hezekiah mọ Jerusalem mọ zụọbụọmọmị. Ị́mịnị kpọ bịsẹ ifiemị Jerusalem a timiwẹrị a, ị́ kpọ eti akị Jehovah a tụamụ timi ma o?