Nigna Kịmị Bẹtịbị Kị Fịịgha

Noah, wó warị-otubo mọ bá namabo mọ ark bọọ leimị. Jehovah ogiga kaị ifiemị, osuo koromị. Osuo koro kụrọmọ duonị, ark mị ofoinmị. Osuo korotimi kiriogbosẹ beni-beni kị paamị. Bolousei otubo ark bọọ leigha, anịduonị ásẹẹ fịị siinmi. Noah mọ wó ziituu mọ ark bolou ka timi duonị, kẹnịye kpọ á laagha. Jehovah gbaa bara mịẹ yọbị á mịẹ pọwẹịmọ bara bị iroro dii.

Osuo korotimi 40 erein mọ 40 dein-ama mọ baịdẹ kị pẹlẹmị. Beni mị bẹdẹbẹdẹ iyerimị. Timi kẹnị ifie laamị, ark mị ogun-agọnọ a kirikẹrịmị. Mọabịkpọ, beni bị naa iyeri siingha duonị, Noah mọ wó warị-otubo mọ mọkpọ ark bolou ka timimị.

Beni mị bẹdẹbẹdẹ iyeritimi iyeri faamị. Noah mọ wó warị-otubo mọ ark bolou bọọ timi kẹnị kụraị dẹịnmị. Ámịnị ark duo paabo, bara Jehovah mọ gbaa á pịrịmị, ámịnị ayakpọ ka sụọdẹ bara kị paamị. Jehovah á zụọbụọmọ bara mị tọrụkẹrịyọ duonị, ámịnị ịkịan-kụn Jehovah pịrịmị.

Á kụn ịkịan mị Jehovah mịẹ pọwẹịmọmị. Ómịnị bá benebene beni akị kiriogbo bọọ emiyebosẹ baa siingha fa bara Jehovah mọ gbaamị. Jehovah bá osuo-apipi akị wó gbaa yebị mịẹbeinmọ mụ lelei-tụa mị, Jehovah bịsẹ ifie ka bọlọụ-bọlọụ osuo-apipi akị agọnọ-tọrụ bọọ mịẹpaamọmị. Ị́mịnị kpọ osuo-apipi ẹrịdẹ wẹrịmị?

Noah mọ wó ziituu mọ kiriogbo bọọ awọụ-ama zii beinmọ bara Jehovah mọ gbaa á pịrịmị.