Warị-Akpakpa Bọọ Yeama Gẹẹmị

Timi kẹnị ifie laamị, Belshazzar kị Babylon ibe daaowei a paamị. Kẹnị dein ómịnị ibema yelaa dẹịn-emi otubo tịịn bẹnịmọwẹrị fịyaị fịmị. Belshazzar wó odubo-otubo fịrịmọ mú, Nebuchadnezzar, Jehovah karị-warị duo sibe-akịwẹrị gold cupbo paamọbomị. Belshazzar mọ wó kịmịbo mọ bịsẹ cupbo akị wurubou bá tokoni kọn ánị orubo pịrịmị. Ámịnị fịyaị-fịmịnị mị, vurudu bị, kẹnị kịmị-bara warị-akpakpa bọọ gelekuye-ama gẹẹmị.

Belshazzar malafa kụrọmọmị. Anịduonị, ómịnị wó bụrụ-otubo tịịnwẹrị gbaa á pịrịmị: ‘Gẹẹ-wẹrịemi yebo a tuugbaa ị pịrịdẹ ụbọsẹ, Babylonma tarụ-karamọ dụbadẹịn ụbọ a paamịnị.’ Ámịnị angọtụa gẹẹ-wẹrịemi yebo a tuugbaa dọụmị. Anịa ámịnị laa yebo a tuugbaagha. Queen bị sụọbo á laawẹrị gbaa á pịrịmị: ‘Kẹnị owei emi, wó ẹrẹ mị Daniel, ómịnị kị ye a tuugbaa Nebuchadnezzar pịrịtimi mị. Ómịnị mị gẹẹ-wẹrịemi yebo a tuugbaa ị́ pịrị a paaemi.’

Daniel bo Belshazzar laa ifiemị, Belshazzar gbaa ụ pịrịmị: ‘Ị́mịnị mị gẹẹ-wẹrịemi yebo goo bá tuugbaa ị pịrịdaba, Ịmịnị gold kọọntụaye (necklace) kọn ị́ pịrịmịnị, bá ị kọn Babylon bọọ tarụ-karamọ dụbadẹịn ụbọ a tụamịnị.’ Daniel gbaa ụ pịrịmị: ‘Ịmịnị iné dịẹpịrịyebo dọụgha, mọabịkpọ ịmịnị gẹẹ-wẹrịemi yebo a tuugbaa ị́ pịrịmịnị. Ị́ daụ Nebuchadnezzar angọserimọ duonị, Jehovah ụ mịẹ angọ-iyerimọmị. Ị́mịnị kpọ ụ paamọyebosẹ nimiwẹrịemi, anịa ị́mịnị mọkpọ Jehovah diseimọ, Jehovah karị-warị bọọ timi gold cupbo akị wuruboumịnị. Anịkị duonị, Ọkpọnanaowei mị yebo gẹẹmị: Mene, Mene, Tekel, bá Parsin. Bei gẹẹ-wẹrịemi yebo Mede-otubo mọ Persia-otubo mọ Babylon gbeingọgọlọmụ bara kị gbaawẹrịemi. Bá pẹrẹ-kasị kpọ duo ị́ kọn serimịnị bara kị gbaawẹrịemi.’

Opu fanụ-akpakpa-ama ka kị Babylon fanụ yọrọwẹrịmị. Babylon ama yọrọwẹrị tọrụ kpọ olomú kụrọmọtimi mị. Anịduonị kịmị laa sụọbo Babylon gbeingọgọlọgha fa bara kị timi mị. Anịa kẹnị dein, Mede-otubo mọ Persia-otubo mọ Babylon tụayọrọmị. Persia Ibe daaowei Cyrus tọrụbeni mịẹ iyerimọwẹrị, wó soldier-otubo sụọmú ama gate laamị. Gatebo fini kị finiitimi ámịnị mú gate laamị! Soldier-otubo ama duosụọ mú ama dẹịnmọ bá pẹrẹ baawẹrị, Cyrus paakị Babylon ibe daaowei a sụọmị.

Cyrus ibe daaowei a sụọwẹrị kẹnị kụraị fa koroghatimi ómịnị gbaa ibe otubo pịrịmị: ‘Ịmịnị waị Jerusalem bọọ wó karị-warị kẹrị bara Jehovah mọ gbaa ị pịrịdẹ. Baratụa karị-warị kẹrị dọụmịnị ụbọsẹ mú karị-warị kẹrị a paaemi.’ Anịduonị Jerusalem gbeingọgọlọwẹrị 70 kụraịama bụọ ifiemị, biin Jew-otu waị Jerusalem a múmị. Jehovah gbaawẹrị yemị paabeinmị. Nebuchadnezzar karị-warị duo kọnwẹrị gold cupbo mọ bá silver cupbo mọ bá zịnị yeama kpọ Cyrus mọ kọn waị Jerusalem a múmị. Jehovah Cyrus akị baratụa Wó kịmịbo pịrị bara mị ị́ mọ dọụẹrị ma?