Ámịnị Daniel Akị Adaka-ama Emi Ogugu A Gbeintụamị

Darius Mede ama duopaa owei kpọ Babylon ibe daamị. Daniel zịnị otuama mọ bẹbẹ paaemi bara Darius mọ ẹrịmị. Anịduonị, ómịnị Daniel akị ibe bọọ yelaa-emi otubosẹ tịbịowei tụamị. Bịsẹ kịmịbo Daniel a fịọnkẹrị anịghakpọ tọrụdọọn duonị, ámịnị Daniel baa dọụmị. Daniel ereinbosẹ tara ifie akị tẹẹ Jehovah yarịmịnị bara ámịnị mọ nimi mị. Anịduonị ámịnị gbaa Darius pịrịmị: ‘O pẹrẹ, kịmịsẹ tẹẹ ị́mịnị bẹtịbị kị yarị oloko, ị́mịnị mọ tụa agbẹị-emi. Bịsẹ oloko kokogha kịmịsẹ akị adakabo emi ogugu bọọ gbeintụa.’ Oloko mị Darius pịrị dịsẹ duonị, ómịnị barapoumị.

Daniel bịsẹ aya oloko naa ifiemị, ómịnị wó warị a múmị, wó window finisin bá kiri bọọ okoiwẹrị tẹẹ Jehovah yarịmị. Daniel a fịọnkẹrịtimi otubo Daniel warị duosụọwẹrị wó tẹẹmịnị bara bị ẹrịmị. Ámịnị baịn mú gbaa Darius pịrịmị: ‘Daniel iné gbaa bara mịẹgha. Ómịnị ereinbosẹ tara ifie tẹẹ wó Ọkpọnanaowei yarịmịnị.’ Darius, Daniel tarị-kụrọmọwẹrị duonị, ómịnị Daniel baa dọụgha. Pẹrẹ bị ereinsẹ akị Daniel zụọmụ bara iroromị. Anịa pẹrẹ kpọ waị wó barapoudẹ oloko deimụ kụrọ nanagha duonị, ómịnị wó kịmịbo fịrịmọ Daniel akị adakabo-emi ogugu bọọ gbeintụamị.

Daniel paamọ mụ yemị wó ịkịọụ bọọ bụụdọọntimi duonị, Darius bụnụghatimi baịmị. Pekei mị ómịnị baịn ogugu bọọ múwẹrị, Daniel biimị: ‘Iné Ọkpọnanaowei ị́ zụọbụọmọ ma?’

Daniel, Darius parụmị: ‘Jehovah angel-owei adaka bịbịbo teri duonị, adakabo kẹnịye kpọ akị ị mịẹgha.’ Darius pọwẹị kụrọmọmị! Ogugu duo Daniel kọn paamọbo bara ómịnị mọ gbaamị. Daniel ogugu duo paabomị kẹnịye kpọ ụ laagha. Pẹrẹ bị gbaamị: ‘Daniel mịẹgha ye kọn ụ gbaịnmọ otubosẹ akị ogugu bolouma gbeintụa.’ Bịsẹ kịmịbo akị ogugu bọọ gbeintụa ifiemị adakabo ásẹẹ fị-sinmị.

Darius gbaa wó kịmịbosẹ pịrịmị: ‘Kịmịsẹ Daniel Ọkpọnanaowei mị esiin. Ómịnị adakabo bara bolou duo Daniel zụọbụọmọdẹ.’

Ị́mịnị kpọ Daniel dimịẹwẹrị ereinbosẹ tẹẹ Jehovah yarịmịnị a o?