Jerusalem Akpakpabo Waị Kẹrịmị

Nehemiah Israel-owei, ómịnị Persia ibe bọọ Shushan ama ka inyenrintimi mị. Ómịnị odubo-gbaan Pẹrẹ Artaxerxes kị pịrịtimi mị. Nehemiah bịnaowei Judah duobowẹrị kịmị mịẹ pọwẹịmọgha egberi gbaamị. Ụ gbaamị: ‘Waị Jerusalem a mú otubo akpotu bolou k’emi. Babylon-otubo Jerusalem bọọ gbeingọgọlọ akpakpabo mọ bá gatebo mọ naa waị kẹrịgha.’ Yemị, Nehemiah mịẹ boloukọnmị. Ómịnị Jerusalem a mú baratụa kịmịbo pịrị dọụtimi duonị, pẹrẹ mị ụ bụọmọ mú bara ómịnị mọ tẹẹmị.

Bịsẹ ifie bụọmị, pẹrẹ bị, Nehemiah bolouịmbẹlẹgha bara ẹrịmị. Anịduonị, ómịnị Nehemiah biimị: ‘Ị́mịnị naa mị bara timi ị pịrị ẹrịgha wẹrịmị. Teeki paa ma o?’ Nehemiah gbaa ụ pịrịmị: ‘Jerusalem, á mọ gbeingọgọlọ wẹrịemi bị, tetuu kị duonị ịmịnị boloukọngha fa o?’ Pẹrẹ bị ụ biimị: ‘Teeki ị mọ mịẹ ị́ pịrị kị ị́ mọ dọụwẹrịemi a o?’ Bịsẹ tịẹkirimị, Nehemiah ịkịọụ-bolou a tẹẹmị. Ómịnị tẹẹsin ifiemị, ụ gbaamị: ‘Sisei ị bụọmọ Jerusalem á múdá, waị mú Jerusalem akpakpabo kẹrị.’ Pẹrẹ Artaxerxes Nehemiah bụọmọ múmị. Bá Nehemiah dọọ mú Jerusalem duosụọmụ bara kpọ mịẹpaamọmị. Ómịnị Nehemiah akị Judah ibe daa-owei a tụamị bá gatebo kẹrịmụ tịn-ama kpọ kọn ụ pịrịmị.

Nehemiah Jerusalem laa ifiemị, ómịnị Jerusalem akpakpabosẹ dii yọrọmị. Ómịnị ịkịankụn-otubo mọ bá yọ daatimi otubo mọ bẹnịmọwẹrị gbaa á pịrịmị: ‘Jerusalem akpakpabo emibara mị dọlọ dọlọ kpọ di-ebigha. Omịnị kịalị fịrịwẹnị agbẹị-emi.’ Kịmịsẹ Nehemiah gbaa bara mịẹmụ bara biberinwẹrị Jerusalem akpakpabo kẹrịmị.

Anịa ánị egirẹn-otubo á yẹkwẹmị. Ámịnị gbaamị: ‘Kẹnị ẹdụ anịghakpọ kẹwẹ (fox) kpọ ánị kẹrịmịnị akpakpabo dịnẹmọ koromọ a paaemi.’ Fịrị wẹnịtimi otubo á peigha. Ámịnị fịrị kọn bọlọụ wẹnịmọmị. Jerusalem akpakpabo uwou bọlọụdẹịn bá kụrọ bọlọụ kpọ dẹịnmị.

Egirẹn-otubo, Jerusalem tụayọrọwẹrị á kẹrị sụụmụ iroro tọnmị. Jew-otubo ánị egirẹn-otubo tọntimi sei iroro naa ifiemị, ámịnị malafa kụrọmọmị. Anịa Nehemiah gbaa á pịrịmị: ‘Malafakụmọ. Jehovah wo mọ emi.’ Nehemiah kịmịotu fịrịmọ mú fịrị wẹnịtimi otubo leemị. Anịduonị, egirẹn-otubo laa ama duosụọwẹrị ye kọn á mịẹgha.

Ámịnị 52 erein-ama ka kị Jerusalem akpakpabo mọ bá gatebo mọ kẹrịsinmị. Nehemiah Levite-otubosẹ akị Jerusalem a bowẹrị Jerusalem akpakpabo kẹrịsindẹ oge teimị. Ómịnị á kọn maa duma tuun ikpudu dịẹmọmị. Ámịnị beni dẹsịị-koromịnị yọ duo uwou fanụ-akpakpa agọnọ bọọ múmị, bá Jerusalem bọọ ogelegban bẹbẹyọ bẹbẹyọ laamị. Ámịnị egbelegbelebo mọ, cymbalbo mọ, bá ẹkpẹtẹbo (harps) mọ farị duma tuun Jehovah tokonimị. Ezra kẹnị ikpudu mọ múmị, Nehemiah kpọ kẹnị ikpudu mọ múmị. Maa ikpudubosẹ karịwarị ka gbeleimị. Oweibo mọ, erebo mọ, bá awọụbosẹ biin ịkịan-ama kụn Jehovah pịrịwẹrị, oge teimị. Ámịnị pọwẹị kụrọmọ duonị, alaayọ-emi otuama kpọ ánị okolobo naamị.