Jehovah, Jesus Zụọbụọmọmị

Israel ibe bọọ ụraụ paabomịnị anga bọọ emi otubo, agụrabo anịghakpọ ịkịkaịbo kị ánị múmịnị yọmị akị á dịamịnị bara kị biberin wẹrịmị. Kẹnị dein, ụraụ paabomịnị anga bọọ emi oweiama agọnọtọrụ bọọ kẹnị gbenegbene kẹrịịmịnị ịkịkaị wẹnịmịnị bara ẹrịmị. Ámịnị bịsẹ “agụra anịghakpọ ịkịkaị” diiwẹnị ifiemị, á kọn Jerusalem ka múmị. Ámịnị ama bọọ emi otubo biimị: ‘Jew ibe bọọ pẹrẹ a sụọmụ tọbọụ mị te yọ k’emi a o? Omịnị tịbị-oboimọ bịsẹ tọbọụ pịrị yọ ka bo emi.’

Aya pẹrẹ ziidẹ bara Jerusalem ibe daaowei Herod mọ naa ifiemị, yemị wó a bụụdọọn kụrọmọmị. Anịduonị ómịnị tịbị-ịkịankụn otubo biimị: ‘Teyọ ka pẹrẹ ziimụ bara kị gbaawẹrị ma o?’ Ámịnị gbaa ụ pịrịmị: ‘Bethlehem ka ụ ziimụ bara kị bụrụ-otubo mọ gbaami.’ Herod ụraụ paabomịnị anga duo boemi kịmịbo tịịnwẹrị gbaa á pịrịmị: ‘Bethlehem amú tọbọụ dọụ ẹrịdá waịbo tọbọụ mị emi yọ gbaa ị pịrị. Ịmịnị kpọ mú tịbị-oboimọ ụ pịrị dọụmịnị.’ Anịa ómịnị gesii egberi gbaagha.

Bịsẹ “ịkịkaị anịghakpọ agụra” mị waị wẹnị bọlọụ a mú ifiemị, kịmịbo ịkịkaị bọọ tuuduo mú Bethlehem laamị. Bịsẹ “ịkịkaị” mị kẹnị warị agọnọ a tịẹ ifiebị, kịmịbo wẹnị bịsẹ warị duo sụọwẹrị Jesus mọ bá wó yin Mary mọ ẹrịmị. Ámịnị tịbị-oboimọ Jesus pịrịwẹrị gold, frankincense, bá myrrh tịịnmịnị dịẹpịrịye-ama akị ụ pịrịmị. Jehovah kị kọkọ mị kịmịbo fịrịmọ mú Jesus dọụ ma o? Bịsẹ baragha.

Bịsẹ dein mị, Jehovah dawaị-tọrụ a gbaa Joseph pịrịmị: ‘Herod Jesus baa kị dọụmịnị. Ị́ taa mọ bá tọbọụ mọ akịdá baịn Egypt amú. Bịsẹ yọma timi waịbo agbẹị ifie laadaba, Ịmịnị gbaa ị́ pịrịmịnị.’ Joseph mọ wó ziituu mọ bịsẹ tịẹkiri bị Egypt amúmị.

Kịmịbo waị mú Herod laa kụmọ bara Jehovah mọ gbaa á pịrịmị. Ámịnị waịbo ụ laagha fa bara Herod mọ nimi ifiemị, ómịnị boloukọn kụrọmọmị. Ómịnị Jesus dọụ ẹrịgha duonị, Bethlehem bọọ Jesus mọ kẹnị ifiea ziiwẹrịemi kala owei awọụbosẹ baa bara gbaamị. Anịa, Jesus Egypt ka dọọtimi mị, kẹnịye kpọ ụ paamọgha.

Timi kẹnị ifie laamị, Herod paakị fịịmị. Anịduonị Jehovah gbaa Joseph pịrịmị: ‘Bei tịẹkiri bị, ị́mịnị waị mú laadẹ.’ Anịduonị, Joseph mọ, Mary mọ, bá Jesus mọ waị Israel ibema Nazareth amúmị.