Jesus Karịwarị Mịẹ Yalịyalịmị

Kụraị 30 C.E. bị, Jesus April agọnọwei bọọ Jerusalem a múmị. Biin kịmịama kị Jerusalem bọọ Asababẹịn Oge tei yọ a bomị. Asababẹịn Oge teimịnị ifiemị, ámịnị nama-ama kpọ akị tụamọ karịwarị bọọ ịkịankụnwẹrị Asababẹịn oge teimịnị. Zụa kịmịama ánị amabo kị duo namabo kọnbomị. Zụa otu bá Jerusalem ka namabo fẹịmị.

Jesus karịwarịma mú ifiemị, kịmịotu karịwarị bọọ nama-ama yẹrịmịnị bara ómịnị mọ ẹrịmị. Ámịnị Jehovah karịwarị ka timi tubotụatimi mị! Jesus teeki mịẹ ma o? Ómịnị ịgba-ama akị dii anịghakpọ gbịsaa mịẹwẹrị karịwarị bọọ timi anịnabo mọ malubo mọ duo paamọmị. Ómịnị sịlị deitimi otu tablebosẹ dịnẹmọ koromọmị. Bá ánị sịlịbosẹ akị kiri bọọ dẹsịmị. Jesus gbaa elekpukpu yẹrịmịnị otubo pịrịmị: ‘Bei yebo kọn bei yọ duo seri! Ị Daụ warị mị akị fọụtuboyọ mịẹ kụmọ!’

Jesus mịẹ yemị, karịwarịma emi kịmịbo mịẹ tamamaamị. Wó tuuduo-otubo, Messiah gbelemọ yọ bọọ bụrụ koromọwẹrị bụrụ-egberi bị ukiemị. Bụrụ egberi bị mị bara kị gbaamị: ‘Ịmịnị Jehovah warị tarị kụrọmọ mịnị.’

Kụraị 33 C.E. laa ifiebị, Jesus waị karịwarị mịẹ yalịyalịmị. Ómịnị kịmị bụọmọwẹrị agbẹịgha bara kọn Jehovah warị mịẹgha.