Benizuu-ogugu Bọọ Timi Erema

Asababẹịn Oge bụọmị, Jesus mọ wó tuuduo-otubo mọ Samaria kị duo waị yọụ Galilee a múmị. Ámịnị mú Sychar ama mọ naịn ifiemị, Jesus Jacob benizuu-ogugu bọọ embafoumị. Jesus bịsẹ yọ bọọ embafoumịnị bị, wó tuuduo-otubo ama bọọ fịyaị fẹị yọ a múmị.

Kẹnị Samaria ere bịsẹ benizuu-oguguma benizuu yọ a bomị. Jesus gbaa á pịrịmị: “Beni tụa ị pịrị bou.” Amịnị gbaa ụ pịrịmị: ‘Ị́mịnị tetuu kị duonị, ị mọ mọ́ ẹrẹmịnị a o? Ịmịnị Samaria-ere. Jew-otu Samaria-otu mọ ẹrẹgha.’ Jesus gbaa á pịrịmị: ‘Ị́mịnị Ị nimiwẹrị a, ị́mịnị ine bara beni-bii mụ timi mị. Ịmịnị ba ụndụ beni akị ị pịrị mụ timi mị.’ Amịnị ụ bii mị: ‘Teeki ị́ mọ gbaamịnị a?’ ‘Bucketị kpọ ị́ mọ nanagha.’ Jesus gbaa a pịrịmị: ‘Ine pịrịmịnị beni bị boudẹ ụbọsẹ bá benebene benibou dịsẹgha fa.’ Amịnị gbaa ụ pịrịmị: “Kịmịowei, sisei bịsẹ beni kọn ị pịrị.”

Jesus gbaa a pịrịmị: ‘Mú ị́ yei tịịn bo.’ Amịnị gbaa ụ pịrịmị: ‘Ịmịnị yei fa.’ Ómịnị ba gbaa a pịrịmị: ‘Ị́mịnị gesii egberi kị gbaamịnị. Ị́mịnị sọnran ifiea yei nanadẹ. Mị tịẹkiri mị, ị́mịnị naa ị́ nanagha owei mọ kị inyenrinmịnị.’ Amịnị gbaa ụ pịrịmị: ‘Ị́mịnị bụrụ-owei bara ị mọ ẹrịdẹ. Wo Samaria-otubo, omịnị bei ogun ka Ọkpọnanaowei karị a paaemi bara kị biberin-wẹrịemi, anịa Jew-otubo, omịnị Jerusalem bẹtịbị ka Ọkpọnanaowei karị a paaemi bara kị biberin-wẹrịemi. Messiah bodaba, ómịnị Ọkpọnanaowei karị agbẹị-emi bara mị akị wo tolumọ mụ bara ị mọ biberin-wẹrịemi.’ Amịnị bịsẹ bara gbaadẹ ifiemị, Jesus ómịnị naa gbaa akị kẹnị ụbọ kpọ pịrịgha timi ye gbaa a pịrịmị. Ụ gbaamị: ‘Ịmịnị kị Messiah mị.’

Amịnị ifie faamọgha bara ama duo wẹnịsụọwẹrị gbaa Samaria-otubo pịrịmị: ‘Ịmịnị Messiah mị ẹrịdẹ bara kị ị mọ tọn wẹrịemi. Á bo ụ dii! Ómịnị ine ụndụ bọọ paadẹ yebosẹ gbaa ị pịrịmị.’ Ámịnị anị tuuduo mú benizuu-ogugu laawẹrị Jesus pịrị tolumọmị.

Samaria-otubo Jesus ánị ama bọọ timi bara gbaa ụ pịrịmị. Jesus bịsẹ yọ bọọ maa erein akị kịmịbo tolumọmị. Anịduonị biin kịmịama peibolou akị wó a tụamị. Ámịnị gbaa Samaria ere pịrịmị: ‘Bei kịmị gbaa egberibo wo mọ peisin ifiemị, kọkọ ómịnị kị mị akpọ zụọbụọmọ mụ bara wo mọ nimidẹ.’