Babel Bọọ Kẹrị Agọnọ-warị Mị

Opubeni bụọdẹmị, Noah awọụbo mọ ánị erebo mọ biin awọụ-ama ziimị. Ánị awọụbo biin ifiemị, ámịnị kiriogbo bọọ bẹbẹyọ bẹbẹyọ a mú inyenrinmị, Jehovah bịsẹ bara kị gbaa á pịrịwẹrị duonị.

Anịa zụa ziituu-ama Jehovah dọụbara mịẹgha. Ámịnị gbaamị: ‘Bo dá wó bei yọ bọọ kẹnị ama kẹrị dá, wosẹ bei yọ bọọ timi inyenrin. Omịnị kẹnị opu agọnọ-warị kẹrị mú agọnọ duosụọ mịnị. Omịnị bịsẹ bara mịẹ daba, omịnị uroupaa mịnị.’

Ánị mịẹtimi yebị Jehovah mịẹ pọwẹịmọgha, anịduonị ómịnị fịrị tịẹmọmị. Jehovah mịẹ yemị, ị́ mọ nimimị? Ómịnị á mịẹ wẹrị bẹbẹ bẹẹlị-ama fiemị. Ámịnị bá zọzọ bẹẹlị naagha duonị, ámịnị warịkẹrị fịrị tịẹmọmị. Babel ka kị ama bị tịịnmị, Babel tuubị “Zọzọ-naagha.” Zọzọ-naagha duonị, kịmịsẹsẹ kiriogbo bọọ bẹbẹyọ bẹbẹyọ a múmị. Ámịnị anị mú yọbo kpọ a seiye-seiye kị mịẹmị. Jehovah tarịwẹrị ụbọ mọkpọ timimị? Omịnị barịị tolumọyọ bọọ dọụ ẹrị mịnị.