Jesus Sabbath Ereinma Kịmị Zụọmị

Pharisee-otubo Jesus golutimi duonị, ámịnị ụ kẹrịkaị dọụmị. Jesus Sabbath erein bọọ dọọnmịnị otu zụọkụmọ bara ámịnị mọ gbaamị. Kẹnị Sabbath erein, Jesus kẹnị tọrụbaan owei ụwọụ a timi ye biitimi bara ẹrịmị. Ómịnị gbaa wó tuuduo-otubo pịrịmị: ‘Ọkpọnanaowei yalịyalị tẹmẹ bị baratụa bei owei pịrịmụ bara dii.’ Jesus wó fịlamị akị atọụ anịghakpọ atọkọ gụawẹrị akị tọrụbaan owei tọrụbo sirimị. Jesus gbaa ụ pịrịmị: ‘Siloam tọrụ bọọ mú iné tọrụbo sụrụụ.’ Kịmị mị bịsẹ bara mịẹ ifiemị, wó tọrụbo finiimị. Bịsẹ owei mị paasẹ naa yọ ẹrịgha timi mị.

Kịmịbo angọbọụmị. Anịduonị, ámịnị gbaamị: ‘Bei ifiebosẹ tịtẹtimi ye biitimi owei mị a, anịghakpọ, ụ mọ mọ́ lei-emi ụbọ a?’ Owei mị gbaamị: ‘Ịmịnị kị bịsẹ owei mị!’ Kịmịbo ụ biimị: ‘Tebara kị mịẹtimi iné tọrụbo finii ma o?’ Ómịnị ye paa barasẹ gbaa á pịrị ifiemị, ámịnị ụ kọn Pharisee-otubo yarịmị.

Tọrụbaantimi oweimị gbaa Pharisee-otubo pịrịmị: ‘Jesus fịla akị atọụ mọ gụawẹrị iné tọrụbo siriwẹrị ị fịrịmọ mú ine tọrụbo sụrụụmị. Ịmịnị wó gbaa bara mịẹ ka ine tọrụbo finiimị.’ Pharisee-otubo gbaamị: ‘Jesus Sabbath erein kpọ a kịmị zụọmịnịaba wó kụrọ mị Ọkpọnanaowei duobogha.’ Anịa zụa otu gbaamị: ‘Wó kụrọ mị Ọkpọnanaowei duoboghaba, ómịnị laa kịmịsẹ zụọ kụrọmọgha fa timi mị.’

Pharisee-otubo bịsẹ owei Daụ mọ yin mọ tịịnwẹrị á biimị: ‘Ánị tọbọụ tọrụbo tebara kị mịẹtimi finii ma o?’ Ámịnị gbaamị: ‘Omịnị nimigha. Ámịnị ụ bii.’ Karịwarị duo peibolou akị Jesus a tụadẹ ụbọsẹ gbeinpaamọ bara Pharisee-otubo mọ gbaawẹrị duonị, bịsẹ owei daụ mọ yin mọ bo malafa timi mị. Pharisee-otubo mọkpọ zịnị biibịbịama akị kịmị biimị, anịa ómịnị gbaa á pịrịmị: ‘Ịmịnị ine nimiwẹrịemi yebosẹ gbaa á pịrịdẹ. Tetuu kị duonị, ámịnị mọkpọ biibịbịama akị ị biimịnị a o?’ Pharisee-otubo boloukọnmị, anịduonị ámịnị ụ gbeinmọ paamọmị.

Jesus tọrụbaan owei dọụẹrịwẹrị ụ biimị: ‘Ị́mịnị peibolou akị Messiah bọọ tụa wẹrịemi a?’ Owei mị ụ parụmị: ‘Ịmịnị bịsẹ owei nimiwẹrị a, ịmịnị peibolou akị wó a tụamụ timi mị.’ Jesus gbaa ụ pịrịmị: ‘Ịmịnị kị Messiah bị.’ Jesus mịẹ yemị ebi-emi bara ị́ mọ tọngha? Jesus owei zụọ kụrọmọmị, bá baratụa ụ pịrịwẹrị peibolou kpọ nanamị.