Jesus Waị Fịịyọ Duo Lazarus Tịịn Serimị

Jesus tara ikie-otuama Bethany a inyenrintimi mị. Ámịnị Jesus mọ naịn kụrọmọtimi mị. Lazarus mọ bá wó maa bịnaotu, Mary mọ Martha mọ kị bịsẹ otubo. Kẹnị erein, Jesus Jordan bọọ kẹnị yọ a timi ifiemị, Mary mọ Martha mọ kẹnị yelaa ịsọmụ egberi fịrịmọ ụ yarịmị. Ámịnị gbaamị: ‘Lazarus dọọnmịnị. Sisei kịalị bo!’ Anịa Jesus kịalị múgha. Ómịnị múghatimi maa erein bụọdẹ ifiemị, ómịnị gbaa wó tuuduo-otubo pịrịmị: ‘Bodá wo Bethany a mú. Lazarus bụnụ kị bụnụemi, Ịmịnị ụ tịịnseri yọ ka múmịnị.’ Fịrịmọpaa-otubo gbaa ụ pịrịmị: ‘Lazarus kọkọ bụnụ kị bụnụ-emiaba, ụ bụnụemi bụnụmị, baratụa ụ pịrimịnị.’ Anịduonị Jesus gaan gbaa á pịrịmị: ‘Lazarus fịịdẹ.’

Jesus mú Bethany laa ifiemị, Lazarus dibiwẹrị nia dein baịdẹ. Biin kịmịama Martha mọ Mary mọ kụrọmọ yọ a bomị. Jesus bodẹ bara Martha mọ naa ifiemị, amịnị baịn mú ụ laawẹrị gbaa ụ pịrịmị: “Nanaowei, ị́mịnị bei yọ bọọ timiwẹrị a, ine bịnaowei fịịgha fa timi mị.” Jesus gbaa a pịrịmị: ‘Iné bịnaowei waị seriimịnị. Martha, ị́mịnị kpọ bịsẹbara biberin wẹrịemi?’ Amịnị gbaa ụ pịrịmị: ‘Fịịyọ duoserimụ ifie laadaba, ómịnị waị seriibo mụ bara ị mọ nimiwẹrịemi.’ Jesus gbaa a pịrịmị: “Ịmịnị kị fịịyọ duoseriimị bá ụndụmị.”

Martha mú Mary laawẹrị gbaa a pịrịmị: ‘Jesus bodẹ.’ Mary baịn mú Jesus laa ifiemị, yọ bọọ bẹnịịtimi kịmịbo kpọ a mọ mọ́ múmị. Amịnị wó bụọ-tọrụ yọ bọọ okoiwẹrị youmị. Amịnị gbaa ụ pịrịmị: ‘Nanaowei, ị́mịnị beiyọ bọọ timiwẹrị a, wo bịnaowei fịịgha fa timi mị!’ Yemị a gbele kụrọmọemi bara Jesus mọ ẹrịmị. Anịduonị ómịnị koro youmị. Kịmịbo Jesus youmịnị bara ẹrị ifiemị, ámịnị gbaamị: ‘Jesus Lazarus tarịwẹrị bara dii.’ Anịa zụa otu iroromị: ‘Ómịnị tetuu kị duonị, wó ikie owei zụọgha o?’ Jesus teeki mịẹmịnị a o?

Jesus Lazarus dibiwẹrị yọ bọọ múmị, kẹnị opu okuta ka kị ogugu teriwẹrịmị. Jesus gbaamị: ‘Okuta kọnsin.’ Martha gbaa ụ pịrịmị: ‘Ómịnị fịịwẹrị nia dein baịdẹ! Anịduonị, wó angọmị fọrọ mịnị.’ Mọabịkpọ, ámịnị okuta kọnsinwẹrị Jesus paakị tẹẹmị: ‘Ị Daụ, ị́mịnị ine tẹẹbịbị naa bara mị ụmbana. Ị́mịnị ifiebosẹ ine tẹẹbịbị naamịnị bara ị mọ nimiwẹrịemi. Anịa, ị́minị kị ị fịrịmọ bo bara bei kịmịbo mọ nimi mụ yọ kị duonị, ịmịnị gaan gbaa paamọmịnị.’ Jesus bịsẹ bara gbaasindẹ ifiemị, ómịnị wó okolo mị uwoumọwẹrị gbaamị: “Lazarus, paabo!” Kẹnị tamamaaye paamị: Lazarus ụ dibiwẹrị yọ duo paabomị, akị ụ mala anịghakpọ lapawẹrị bịdẹ bo kpọ, mọkpọ wo angọ bọọ timi mị. Jesus gbaamị: “Ụ fuukpọ anịghakpọ ụ kpụkpọ dá ụ bụọmọ mú.”

Bei yebị ẹrị otubo biin kịmịama peibolou akị Jesus a tụamị. Anịa zụa kịmịama mú gbaa Pharisee-otubo kị pịrịmị. Bịsẹ ifie duobosẹ, Pharisee-otubo Jesus mọ Lazarus mọ baa dọụmị. Oi-maamụ fini fịrịmọpaa-otubo kẹnị ụbọ ẹrẹ Judas Iscariot, ómịnị lẹẹ mú Pharisee-otubo laawẹrị á biimị: ‘Ịmịnị á barịị Jesus dọụ á yarị daba, ámịnị endẹ ka kị ị gbẹẹmịnị a o?’ Ámịnị 30 silver sịlị akị ụ gbẹẹmụ bara gbaamị. Anịduonị, Judas, Jesus kẹrị-akị Pharisee-otubo pịrịmụ fomuun dọụmị.