Ọkpọnanaowei Daabụọ kị Bible bolou bọọ yelaa dẹịn emi egberi. Jehovah wo Daabụọ mị akị kiriogbosẹ mịẹ paradise paa mịnị. Bei Daabụọ bị, te ye a o? Omịnị tebara ka kị Daabụọ bị koro daa dẹ bara nimi ma o? Mị Daabụọ mị teeki mịẹpaamọ dẹ a o? Bei bọlọụ bị, Daabụọ mị te ye kị mịẹ mịnị a o? Omịnị mị tolumọyọ mọ, barịị ye mọ, bei biibịbịmọ kẹrị ẹrẹtei mịnị.

1. Ọkpọnanaowei Daabụọ mị te ye a o, má te ụbọ kị timi daa mịnị a o?

Bei Daabụọ mị, Jehovah kị mịẹpaamọ wẹrị emi government. Jesus kị pẹrẹ a timi agọnọ duo daa mịnị (Matthew 4:17; John 18:36) Jesus gbelemọ yọmị, Bible gbaa mị: “Omịnị Pẹrẹ sụọ wẹrị daatimi . . . bẹseri bẹseri laa mịnị.” (Luke 1:32, 33) Jesus Ọkpọnanaowei Daabụọ Pẹrẹ a paa dẹ duonị, mị bọlọụ mị, omịni kịmịsẹ kị daa mịnị.

2. Te kịmịama kị Jesus mọ Daabụọ bọọ daa mịnị a o?

Jesus bẹtịbị Daabụọ daagha fa. Kịmịama “ziitubosẹ, bẹẹlịbosẹ, kịmịmọsẹ, má ibebosẹ . . . duo bo pẹrẹ a sụọ wẹrị kiriogbo daa mịnị.” (Revelation 5:9, 10) Ẹndịna kịmị kị Jesus mọ daa mịnị a o? Jesus kiriogbo bọọ timi ifie mị, million dẹịn emi kịmịama kị bo wo tuuduo-otu a paamị. Asẹsẹ Jesus mọ agọnọ a timi daagha fa. Anịa 144,000 kịmịama bẹtịbị kị Jesus mọ daa mịnị. (Revelation 14:1-4 goo.) Kọ Christtuuduo-otubosẹ mị kiriogbo ka timi inyenrin mịnị.—Psalm 37:29.

3. Ọkpọnanaowei Daabụọ mị, tebara ka kị ebi kịmịawọụ daabụọ dẹịn emi a o?

Kịmịawọụ daabụọ bọọ timi daa mịnị otubo, ebiye kị mịẹ dịsẹ emi kpọ, mịẹmụ kụrọ nanagha. Anị duonị, laa mịẹghatimi seri mịnị. Aya sụọ mịnị otubo ebiye mịẹ dịsẹgha aba, baratụa kịmịotu pịrịgha kpọ paaemi. Anịa Ọkpọnanaowei, kịmị “laa kọnsiingha fa daabụọ mịẹ tịẹmọdẹ.” (Daniel 2:44) Anị duonị kịmị laa Ọkpọnanaowei Daabụọ Pẹrẹ Jesus, deigha fa. Omịnị ọgọnọ ka timi kiriogbosẹ daa mịnị, má omịnị kẹnị-otu tarị dẹịngha fa. Jesus tarị nana wẹrị emi, ebimịẹ má gesiye kị mịẹ mịnị. Omịnị bei ebi inyenrinbụọbo nanamụ bara akị kịmịsẹ tolumọ mịnị.—Isaiah 11:9 goo.

4. Bei bọlọụ mị, kẹnị kụrọ daabụọ kị, mị kiriogbosẹ daa mịnị

Jesus Christ kụrọ nana akị akpọ daa mịnị kịmịbose dẹịn emi. Matthew 28:18 goo dá, bei biibịbị kẹrị ẹrẹtei:

• Jesus tebara ka kị kụrọ nana akpọ daa mịnị otubo dẹịn emi a o?

Kịmịawọụ daabụọ mị, daa mịnị otubo ifiemọsẹ zọzọ dei mịnị má kiriogbo bọọ zụa yọama kị daa mịnị. Ọkpọnanaowei Daabụọ kpọ bịsẹ bara k’emi a? Daniel 7:14 goo dá, bei biibịbịmọ kẹrị ẹrẹtei:

• Tetuu kị duonị kịmị laa Ọkpọnanaowei Daabụọ “kọnsiingha fa” yọmị, ebi emi a o?

• Tetuu kị duonị, Ọkpọnanaowei Daabụọ mị, kiriogbosẹ daamụ yọmị, ebi ma o?

5. Kịmịawọụ daabụọ seri siin mịnị

Tetuu kị duonị, Ọkpọnanaowei wo Daabụọ mị akị kịmịawọụ daabụọ dei mịnị a o? VIDIO farị dá, bei biibịbị kẹrị ẹrẹtei.

VIDIO: Teeki Ọkpọnanaowei Daabụọ Bị A O?—Dọlọyọ (1:41)

• Kịmịawọụ government wó daatimi bei laadẹ yọmị, tebara kị paadẹ a o?

Ecclesiastes 8:9 goo dá, bei biibịbịbo kẹrị ẹrẹtei:

• Ọkpọnanaowei Daabụọ bo kịmịawọụ daabụọmọ dei mụ yọmị ebi ma o? Tetuu a?

6. Ọkpọnanaowei Daabụọ bọọ timi wó daamụ otubo kịmịawọụ emibarasẹ nimi weri emi

Wó Pẹrẹ Jesus, mị kiriogbo bọọ inyenrin dẹ duonị, omịnị “wó suusụọ yọbo a sụọtuu nimi” wẹrị emi. (Hebrews 4:15) Jehovah 144,000 peibolou nana kịmịama ka kị akpọ bọọ emi “ziitubosẹ, bẹẹlịbosẹ, kịmịmọsẹ, má ibebosẹ duo” sẹlẹ wẹrị bo Jesus mọ daa mịnị.—Revelation 5:9.

• Jesus mọ 144,000 kịmịbo mọ, kịmịawọụ laa mịnị yebosẹ nimi wẹrị emi yọmị ị́ kụrọmọ ma o? Tetuu a?

7. Ọkpọnanaowei Daabụọ bọọ emi olokomọ ebi dẹịn olokoama

Government tụa mịnị olokobo, baratụa anị kịmịbo pịrị má a kekere mịnị bara kị amịnị mọ tọn wẹrị emi. Ọkpọnanaowei Daabụọ kpọ olokoama tụa wo kịmịbo pịrị wẹrị emi. Wó 1 Corinthians 6:9-11 goo dá, bei biibịbịmọ kẹrị ẹrẹtei:

• Kịmịsẹ Ọkpọnanaowei olokobo pei wẹnị daba, akpọ bị tebara kị timi mịnị a o?a

• Jehovah Daabụọ bọọ timi mịnị kịmịbosẹ wo olokobo dii wẹnịmọ agbẹị emi bara ị́ mọ tọn ma? Tetuu a?

• Omịnị tebara kị mịẹtimi olokobo kokoghatimi ụbọ kpọ waị dei a paaemi bara nimi ma o?—goo yọ 11 dii.

KỊLỌỌBARA

Ọkpọnanaowei Daabụọ mị gerede government, agọnọ kị duo bei kiriogbosẹ daa mịnị.

Waị diitụa

• Te kịmịama kị Ọkpọnanaowei Daabụọ bọọ daa mịnị a o?

• Ọkpọnanaowei Daabụọ bị, tebara ka kị ebi kịmịawọụ daabụọ dẹịn emi a o?

• Ọkpọnanaowei te yeama ka kị wo kịmịbo a dọụ wẹrị emi a o?

DIITỤA

Ọkpọnanaowei Daabụọ mị emi yọmị, Jesus mọ akị kịmị-otu tolumọ bara dii.

“Is the Kingdom of God in Your Heart?” (Web article)

Tetuu kị duonị Jehovah Iseriotu Ọkpọnanaowei Daabụọ mọ kpẹkpẹrẹẹtimi mụ yọmị, dịsẹ akị kịmịawọụ daabụọ dẹịn emi a o?

Angọsẹ Akị Ọkpọnanaowei Daabụọ Fịrị Kị Wẹnị Mịnị (1:43)

Jehovah sẹlẹ wẹrị Jesus mọ daa mụ 144,000 kịmịbo gbelemọ yọmị, Bible gbaa wẹrị emi egberi dii.

“Who Go to Heaven?” (Web article)

Tetuu kị duonị kẹnị ịkọlịwarị a emi ere, Ọkpọnanaowei bẹtịbị kị laa gesii ụgụla-sụọ mịnị bara pei ma o?

“How I Found the Answer to Injustice” (Awake!, November 2011)

Ọkpọnanaowei Daabụọ 1914 kọọ koro agọnọ bọọ daa mị. Bịsẹ ifie duo bo sẹ, kịmịawọụ bo fatuu ereinbo duo sụọdẹ. Omịnị tebara kị mịẹtimi bei yebo nimi ma o? 1914 duo bo sẹ, Bible bụrụ egberibo paadẹ bara mọ, akpọ bọọ paa mịnị yebo mọ má kịmịawọụ inyenrinbụọ emibara dii daba gaan k’emi.

1. Bible te bụrụ egberiama kị gbaa wẹrị emi a o?

Daniel fun bọọ gbaa wẹrị emi bara mị, “sọnọma ifie” bo bụọdẹ kị Ọkpọnanaowei Daabụọ koro daa mịnị. (Daniel 4:16, 17) Kụraị ọdọzọama bụọ bị, Jesus sọnọma ifiebo akị “ibebo pịrị wẹrị emi ifieama,” kị tịịn mị. Ifie bị naa dụụgha bara kị Jesus mọ tolumọ mị. (Luke 21:24) Kụraị 1914 bị, bei sọnọma ifiemọ bo dụụ laa mị.

2. Kụraị 1914 duo bo sẹ, akpọ mị tebara kị paa dẹ a, bá kịmịama tebara kị inyenrin mịnị a o?

Jesus tuuduo-otubo ụ bii mị: “Omịnị tebara kị mịẹtimi ị́mịnị bo dẹ bara bá kunumọ ereinbo laa dẹ bara nimi mịnị a o?” (Matthew 24:3) Jesus omịnị agọnọ ghọ koro daa daba paa mịnị yeama gbaa akị a pịrị mị. Gbaa yebo anị, sụụ, mọụn bá kirizigeiama kpọ. (Matthew 24:7 goo.) “Kunumọ ereinbo” kịmịawọụ inyenrin mịnị bara duonị, akpọ bị “inyenrin fịrị kụrọ emi.” (2 Timothy 3:1-5) Kụraị 1914 duo bo sẹ bei yebo gaan paa dẹịn dẹ.

3. Tetuu kị duonị Ọkpọnanaowei Daabụọ koro daa ifie duo bo sẹ, akpọ mị sei dẹịn mịnị a o?

Jesus koro daa bị, omịnị bọlọụ Satan mọ wo seitẹmẹbo mọ kị kẹrị sụụ mị. Jesus a dẹịnmọ mị. Satan gbelemọ yọmị Bible gbaa mị “ụ mọ wo seitẹmẹbo mọ kpotu kiriogbo ghọ bo mị.” (Revelation 12:9, 10, 12) Satan alaghatimi fịị mịnị bara nimi wẹrị emi duonị omịnị boloukọọn mịnị. Anị duonị omịnị kiriogbo bọọ timi ụya-ama mịẹpaamọ mịnị. Anị kị duonị sei yeama kiriogbo bọọ paaemi. Ọkpọnanaowei Daabụọ mị bei yebosẹ kọn siin mịnị.

EBIBARA TUUDỌỤ

4. Bible egberimọ dii daba, Ọkpọnanaowei Daabụọ 1914 kọọ koro daa mị

VIDIO: Ọkpọnanaowei Daabụọ 1914 Kọọ Koro Daa Mị (5:02)

Ọkpọnanaowei Babylon Pẹrẹ Nebuchadnezzar mịẹ bọlọụ a paamụ yeama dawaị mị. Daniel akị dawaị bọọ tuugbaa bara dii daba, dawaị bị akị Nebuchadnezzar daabụọ mọ Ọkpọnanaowei Daabụọ mọ kị tọnmọ wẹrị emi.—Daniel 4:17 goo.a

Daniel 4:20-26 goo dá, fotobo akị bei biibịbịbo kẹrị ẹrẹtei:

• (A) Nebuchadnezzar dawaị mị, omịnị teeki ẹrẹ ma o?—Gooyọ 20 mọ 21 mọ dii.

• (B) Tịn tebara kị paa ma o?—Gooyọ 23 dii.

• (C) “Sọnọma ifiebo” bụọ daba teeki paa mịnị a o?—Gooyọ 26 dii.

Bei Tịn Dawaị mị, Ọkpọnanaowei Daabụọ Gbele emi

BỤRỤ EGBERI MI (Daniel 4:20-36)

Daakụrọ

(A) Kẹnị opu tịn

Daakụrọ tịẹmọ mị

(B) “Tịn pẹlẹ koromọ,” dá “sọnọma ifie bụọ”

Waị daakụrọ bị nana mị

(C) “Waị iné daabụọ bị akị ị́ pịrị mịnị”

Bei bụrụ egberi bọlọụ paabein ifie mị . . .

• (D) Tịn bị te ụbọ kọọ tịbị-tịẹmọ wẹrị emi a o? —Gooyọ 22 dii.

• (E) Wo daabụọ bị, te ifie ka tịẹ ma o? —Daniel 4:29-33 goo.

• (F) “Sọnọma ifiebo” bo bụọ dẹ bị teeki Nebuchadnezzar paamọ ma o? —Daniel 4:34-36 goo.

BỌLỌỤ PAABEIN BARA MỊ

Daakụrọ

(D) Nebuchadnezzar, Babylon Pẹrẹ

Daakụrọ tịẹmọ mị

(E) Kụraị 606 B.C.E. bụọ bị, Nebuchadnezzar nọmụmị anị duonị omịnị daagha timi sọnọma kụraị baị mị

Waị daakụrọ bị nana mị

(F) Nebuchadnezzar angọ waị bo ebi mị, omịnị waị daa mị

Bụrụ egberi mamụkaramọ paabein ifie mị . . .

• (G) Tịn bị te ụbọ kọọ tịbị-tịẹmọ wẹrị emi a o? —1 Chronicles 29:23 goo.

• (H) Anị daabụọ bị te ifie kọọ tịẹ ma o? Jesus mị kiriogbo bọọ timi ifie mị amịnị koro daa dẹ a o? Tuugbaa —Luke 21:24 goo.

• (I) Bei daabụọ mị te ifie bá teyọ ka waị koro daa ma o?

MAMỤKARAMỌ PAABEIN IFIE MỊ

Daakụrọ

(G) Ọkpọnanaowei Daabụọ a tịbịtịẹmọ wẹrị daatimi Isreal pẹrẹbo

Daakụrọ tịẹmọ mị

(H) Jerusalem gbein gọgọlọ dẹ duonị Isreal ibe daatimi kịmịbo ba daagha timi 2,520 kụraị bụọ mị

Waị daakụrọ bị nana mị

(I) Jesus agọnọ ghọ koro Ọkpọnanaowei Daabụọ daa dẹ

5. Kụraị 1914 duo bo sẹ akpọ mị dei dẹ

VIDIO farị.

VIDIO: Kụraị 1914 Duo Bo Sẹ Akpọ Mị Dei Dẹ (1:10)

Jesus omịnị Pẹrẹ a paa daba, akpọ bọọ paa mụ yeama gbaa mị. Luke 21:9-11 goo dá, bei biibịbị kẹrị ẹrẹtei:

• Mị Bible gooyọ bọọ gbaa wẹrị emi egberibo, te yaị kị ị́ mọ naá anịghakpọ ẹrị dẹ a o?

Fịrịmopaaowei Paul kunumọ ereinbo laa daba, kịmịawọụ inyenrin mịnị bara gbaa wẹrị emi. 2 Timothy 3:1-5 goo dá bei biibịbị kẹrị ẹrẹtei:

• Bei tịẹkiri mị te inyenrinbụọama kị ị́ mọ ẹrị mịnị a o?

6. Ọkpọnanaowei Daabụọ mị wó kụrọmọ agbẹị emi

Matthew 24:3, 14 goo dá, bei biibịbịbo kẹrị ẹrẹtei:

• Te yelaa fịrị kị Ọkpọnanaowei Daabụọ bị koro daa dẹ bara mịẹdịa ma o?

• Ị́mịnị kpọ teeki mịẹdẹ kị sụọ bei yelaa fịrị wẹnị mịnị a o?

Ọkpọnanaowei Daabụọ mị agọnọ bọọ daa emi, kiriogbosẹ daa mịnị ifie mị naịn dẹ. Hebrews 10:24, 25 goo dá, bei biibịbị kẹrị ẹrẹtei:

• Ọkpọnanaowei “erein bị naịn mịnị bara wó mọ ẹrị mịnị mị,” omịnị teeki mịẹ agbẹị emi a o?

KỊLỌỌBARA

Bible bụrụ egberibo mọ, paa bụọdẹ yeama mọ, má akpọ bọọ paa mịnị yebo mọ Ọkpọnanaowei Daabụọ bo naịn dẹ bara kị mịẹdịa wẹrị emi. Omịnị bei egberi pei wẹrị emisẹ, wó mịẹ egberigbaa má yetolumọyọ ghọ mú mịnị.

Waị diitụa

• Daniel fun gbaa wẹrị emi sọnọma ifiemọ bụọ bị teeki paa ma o?

• Tetuu kị duonị Ọkpọnanaowei Daabụọ mị 1914 ka koro daa bara ị́ mọ pei ma o?

• Ị́ kpọ tebara ka kị Ọkpọnanaowei Daabụọ mị daa mịnị bara mịẹdịa a paa emi a o?

DIITỤA

Paa bụọdẹ egberiama gẹẹ otu mọ má zịnịotu mọ akpọ mị 1914 duo bọ sẹ dei dẹ bara gbaa mị. Anị gbaa egberi dii.

“When Morals Declined Dramatically” (Awake!, April 2007)

Matthew 24:14 bọọ emi bụrụ egberi bị kẹnị kịmị ụndụ gbele bara dii.

“I Loved Baseball More Than Anything!” (The Watchtower No. 3 2017)

Omịnị tebara kị mịẹtimi Daniel tịbịyọ 4 bị Ọkpọnanaowei Daabụọ kị gbaamọ wẹrị emi bara nimi ma o?

“When Did God’s Kingdom Begin Ruling? (Part 1)” (The Watchtower, October 1, 2014)

Omịnị tebara kị mịẹtimi Daniel tịbịyọ 4 gbaa wẹrị emi “sọnọma ifiemọ” bo 1914 kọọ dụụ bara nimi ma o?

“When Did God’s Kingdom Begin Ruling? (Part 2)” (The Watchtower, November 1, 2014)

Ọkpọnanaowei Daabụọ bị alaghatimi kiriogbo bọọ tamamaa yeama mịẹ mịnị. Daabụọ mị mịẹ wó pịrị mụ ebi yeama wó mọ diitụa.

1. Ọkpọnanaowei Daabụọ tebara ka kị dọọ mọ kịrị ị ụgụlapẹlẹ inyenrinbụọ mọ mịẹpaamọ mịnị a o?

Jesus, Ọkpọnanaowei Daabụọ Pẹrẹ mị Armageddon sụụ bọọ seimịẹ mịnị kịmịbosẹ baa siin mịnị. (Revelation 16:14, 16) Bịsẹ ifie laa daba, bei Bible kii koromọ wẹrị emi yemị paabein mịnị: “Alaghatimi, bolousei otubo bá timigha fa.” (Psalm 37:10) Jesus kiriogbo bọọ dọọ mịẹpaamọ má kịrị ị ụgụla kị pẹlẹ mịnị.—Isaiah 11:4 goo.

2. Kịmịawọụ Ọkpọnanaowei dọụbara mịẹ daba tebara kị paa mịnị a o?

Ọkpọnanaowei Daabụọ kiriogbo daa daba, “kịrịịye mịẹ mịnị otubo kiriogbo bọọ timi mịnị, má amịnị inyenrintimi bẹseri bẹseri laa mịnị.” (Psalm 37:29) Wẹrị iroro dii! Kịmịsẹ ebiye mịẹ, zọzọ tarị, Jehovah kpọ tarị, kẹnị kịmị kpọ bá dọọngha má kịmịsẹ inyenrintimi bẹseri bẹseri laa mịnị.

3. Seimịẹ kịmịbo fịị siin daba Ọkpọnanaowei Daabụọ bị teeki mịẹ mịnị a o?

Seimịẹ mịnị otumọsẹ fịị siin daba, Jesus mọ 144,000 kịmịbo mọ 1,000 kụraị akị daa daba, amịnị baratụa kịmịotu pịrị wẹrị seigbelegha angọ nana mịnị. Bei 1,000 kụraịbo fadaba, kịmịsẹ bo Jehovah gbaa ye kị mịẹ dẹ duonị, akpọsẹ bo paradise paa mịnị. Bịsẹ yọ bụọ daba Jesus daabụọ bụọmọ akị wo Daụ, Jehovah pịrị mịnị. Bei yemị, Jehovah, “ẹrẹ mịẹ yalịyalị [mịnị].” (Matthew 6:9, 10) Má Jehovah kị kịmịtọbọụ daamọ agbẹị emi bara mịẹ gaan mịnị. Bịsẹ ifie laa daba, Satan, seitẹmẹbosẹ, bá tịbịkụrọ Ọkpọnanaowei Daabụọ pịrị mịnị kịmịbosẹ Jehovah mụ baa siin mịnị. (Revelation 20:7-10) Ọkpọnanaowei Daabụọ mị mịẹpaamọ mịnị ebi yemọsẹ timi bẹseri bẹseri laa mịnị.

EBIBARA TUUDỌỤ

4. Ọkpọnanaowei Daabụọ mị kịmịawọụ daabụọmọsẹ seri siin mịnị

“Kịmịtọbọụ kị kịmịtọbọụ daa mú akpotu a sụọ mịnị.” (Ecclesiastes 8:9) Jehovah wo Daabụọ mị akị kịmịawọụ daabụọ mịẹdẹ sei yebosẹ mịẹ ebimọ mịnị.

Daniel 2:44 mọ 2 Thessalonians 1:6-8 mọ goo dá, bei biibịbịmọ kẹrị ẹrẹtei:

• Jehovah mọ Jesus mọ te ye ka kị kịmịawọụ daabụọ bọọ daamịnị otubo mọ má, barapou a pịrị wẹrị emi otubo mọ mịẹ mịnị a o?

• Jehovah mọ Jesus mọ ị́ mọ tolumọ timi laadẹ yọmị, amịnị bei bọlọụ mị, kịrịịye mịẹ mịnị bara ị́ mọ tọn wẹrị emi?

5. Jesus kị Pẹrẹ sụọ agbẹị dẹịn emi

Jesus Ọkpọnanaowei Daabụọ Pẹrẹ mị, biin ụwọụama ka kị baratụa kịmịotu pịrị mịnị. VIDIO farị dá, Jesus baratụa kịmịawọụ pịrị dịsẹ nana wẹrị emi bá Ọkpọnanaowei kpọ kụrọ bị akị ụ pịrịdẹ bara dọụ erị.

VIDIO: Jesus Ọkpọnanaowei Daabụọ Mịẹ Mụ Yebo Mịẹ Gaan Mị (1:13)

Jesus kiriogbo bọọ timi mịẹ yebosẹ Ọkpọnanaowei Daabụọ mịẹ mịnị yeama kị mịẹgaan wẹrị emi. Vidio bọọ tịịn wẹrị emi yebosẹ te yaị kị iné angọ duosụọ dẹịn ma? Bịsẹ Bible yọmọ goo.

6. Bei bọlọụ mị, Ọkpọnanaowei Daabụọ bị tamamaa yeama mịẹ wó pịrị mịnị

VIDIO: Kịlọọbara Ka Kị Bei Bọlọụ Bọọ Emi Tamamayebo Dii Tụa (4:38)

Psalm 145:16 goo dá, bei biibịbị kẹrị ẹrẹtei:

• Jehovah “kịmịawọụ dọụ emi yebo mịẹ mịnị” bara ị́ mọ nimi yọmị, tebara ka kị ị́ gbele ma o?

KỊLỌỌBARA

Ọkpọnanaowei Daabụọ akpọsẹ dei bo paradise a paa mịnị, má ebi ịkịọụ nana wẹrị emi kịmịama Jehovah karịtimi bẹseri bẹseri laa mịnị.

Waị diitụa

• Daabụọ mị tebara ka kị Jehovah ẹrẹ mịẹ yalịyalị mịnị a o?

• Omịnị tebara ka kị Ọkpọnanaowei Daabụọ bị Bible kii koromọ wẹrị emi yemọ, mịẹbeinmọ mịnị bara nimi ma o?

• Ọkpọnanaowei Daabụọ mịẹ kịmịawọụ pịrịmụ yebosẹ, teeki iné angọ duo sụọ dẹịn ma?

DIITỤA

Armageddon tuu mị dọụ erị.

“What Is the Battle of Armageddon?” (Web article)

Jesus gbaa wẹrịemi “opu akpotu” ifie bọọ paamụ yebo wo mọ dii.—Matthew 24:21

“Teeki Opu Akpotu Mị A O?” (Web article)

Warịbolou-otu paradise bo daba Daabụọ mịẹ mụ ebi yemọ kẹrị iroro mịnị bara dii.

Ị́ Kpọ Paradise Ka Emibara Iroro (1:50)

“Ịmịnị Biin Biibịbịama Kị Nana Wẹrị Mị,” egberitịbị duo government kẹrị sụụtimi owei wo dọụ timi yemị ẹrẹ bara dii.

“The Bible Changes Lives” (The Watchtower, January 1, 2012)