Ụndụ Tebara Kị Mịẹtimi Bo Paa Ma O?

“Ụndụ [Ọkpọnanaowei] kị duo bo mị.” (Psalm 36:9) Ị́ kpọ bịsẹ bara pei wẹrị emi a? Kịmị tọbọụ ụndụ bị tẹmẹgha bara kị zụa-otu mọ gbaa mịnị. Kọkọ bịsẹ bara k’emi aba, omịnị vurudu kị paa mị. Anịa Ọkpọnanaowei Jehovah kị ụndụ tẹmẹ wẹrị emi aba, ụndụ tuu emi, bịsẹ bara a?a Bible ụndụ mịẹ timi bo paa bara mọ bá wo gbaa egberimọ kịrị emi tuubị wó mọ diitụa.

1. Ebebu akpọsẹ tebara kị mịẹ timi bo paa ma o?

Bible gbaa mị: “Ọkpọ koro paa mị Ọkpọnanaowei agọnọbo mọ kiri ogbo mọ tẹmẹ mị.” (Genesis 1:1) Biin dẹịn akiiroro-otuama kpọ ebebu akpọsẹ koro paa ifie emi bara biberin wẹrị emi. Ọkpọnanaowei tebara ka kị ebebu ọkpọsẹ tẹmẹ ma o? Omịnị wo “fịrị wẹnị kụrọ” mị—wo yalịyalị tẹmẹ—ka kị ebebu ọkpọ bọọ emi yemọsẹ tẹmẹ mị, gbaamaba ịkakaịmọ anịghakpọ agụrabo, ịkakaị anịghakpọ agụra ịkpudubosẹ, bá planetbosẹ.—Genesis 1:2.

2. Ọkpọnanaowei tetuu kị duonị kiriogbo tẹmẹ ma o?

Jehovah “[kiriogbo bi] paa tẹmẹgha, anịa yeama inyenrin mụ kị duonị tẹmẹ mị.” (Isaiah 45:18) Omịnị pọwẹi pọwẹị kiriogbo bọọ inyenrintimi bẹseri bẹseri laa kị Jehovah mọ dọụ wẹrị kiriogbo tẹmẹ mị. (Isaiah 40:28; 42:5 goo.) Akiiroro-otu gbaa amọ kiriogbo bị bẹbẹ paa akị zịnị planetmọ dẹịn emi. Kịmị awọụ kiriogbo bẹtịbị ka timi inyenrin a paa emi.

3. Teeki kịmị tọbọụ mịẹ nama mọ bẹbẹ paa emi a o?

Jehovah kiriogbo tẹmẹ siin bị, omịnị ụndụ kpọ tẹmẹ mị. Omịnị bọlọụ nama-ama mọ, tịịn-ama mọ má tuo-ama mọ kị tẹmẹ mị. Bịsẹ yọ bụọdẹ mị, “omịnị kịmị tọbọụ akị wo emi bara kị dii tẹmẹ mị.” (Genesis 1:27 goo.) Teeki kịmị tọbọụ mịẹ nama mọ bẹbẹ paa emi a o? Ọkpọnanaowei kịmị tọbọụ akị wó emi bara kị dii tẹmẹ wẹrị emi duonị, omịnị laa wo inyenrinbụọbo daa inyenrin a paa emi, gbaamaba tarị má kịrị ụgụla pẹlẹ. Omịnị zịnị bẹẹlị tolumọ, dii a ebi yeama duo pọwẹị nana, má pọwẹị bara akị numu pei kụrọ Jehovah mọ akị wó pịrị wẹrị emi. Má omịnị nama mọ kẹnị bara fa duonị, omịnị laa ebi bara wó tẹmẹowei karị a paa emi.

EBIBARA TUUDỌỤ

Ụndụ bẹtịbị bo paagha má tẹmẹyemọ gbelemọ yọ bọọ Bible gbaa egberi bị gesii emi bara mịẹ gaan wẹrị emi yeama dii. Kịmị awọụ nana wẹrị emi inyenrinbụọbo Ọkpọnanaowei emi bara kị mịẹ gaan dịa wẹrị emi bara ma tuudọụ.

4. Ọkpọnanaowei kị ụndụ Tẹmẹ mị

Tẹmẹ wẹrị emị yebo dii wẹrị ye mịẹ mịnị otubo tokoni a laa mịnị. Anịa tẹmẹyebo gbelemọ yọbị, te ụbọ kị tokoni laa agbẹị dẹịn emi a o? VIDIO farị dá, kirianga bọọ emi biibịbị kẹrị ẹrẹtei.

VIDIO: Peibolou Akị Ọkpọnanaowei A Tụa (2:43)

• Kịmịama tẹmẹ wẹrị emi yemọ dii wẹrị teyeama kị mịẹ mịnị a o?

Warịbosẹ kịmị kị kẹrị mị. Anịa te ụbọ kị yebosẹ tẹmẹ ma o? Hebrews 3:4 goo dá, mị biibịbịmọ kẹrị ẹrẹtei:

• Ọkpọnanaowei tẹmẹ yebo teeki ị́ dịsẹ dẹịn ma o?

• Ọkpọ bọọ emi yemọsẹ kịmị kị tẹmẹ wẹrị emi bara wó mọ biberin a paa emi a? Tetuu a o?

Ị́ kpọ nimi ma?

Bei egberitịbị gbelemọ egberiama má vidioama ị́ mọ akị jw.org bọọ “Was It Designed?” má “Viewpoints on the Origin of Life.” anga bọọ arị mịnị.

“Gbẹsị mị, warịbosẹ kịmị kị kẹrị wẹrị emi, anịa yemọsẹ tẹmẹ ụbọ bị Ọkpọnanaowei”

5. Tẹmẹ yebo gbelemọ yọbị Bible gbaa yebị kịrị emi

VIDIO: Kịmị kị Ebebu Ọkpọsẹ Tẹmẹ ma?—Dọlọyọ (3:51)

• Kiri mọ má akpọ bọọ ụndụ emi yemọsẹ sondia erein ka kị tẹmẹ mị bara Bible mọ gbaa ma?

• Tẹmẹ yemọ gbelemọ yọbị Bible gbaa egberi bị kịrịị ma? Tetuu ki duonị kịrịị ma o, anịghakpọ tetuu kị duonị kịrịgha o?

Genesis 1:1 goo dá, mị biibịbị kẹrị ẹrẹtei:

• Akiiroro-otu gbaa amọ ebebu akpọsẹ koro paa ifie emi. Anị gbaa egberi mị tebara ka kị iné goo Bible yọ mọ kẹnịsụọmọ emi a o?

Zụa kịmịama Ọkpọnanaowei kẹnị ye kị tẹmẹ wẹrị má kọọ yemọsẹ bịsẹ ye kị duo paa bara kị iroro mịnị. Genesis 1:21, 25, 27 goo dá, mị biibịbịmọ kẹrị ẹrẹtei:

• Ọkpọnanaowei kẹnị ye bẹtịbị kị tẹmẹ wẹrị, kọọ yemọsẹ bịsẹ ye kị duo paa bara kị Bible mọ gbaa ma? Anịghakpọ omịnị “bẹbẹ paa bẹbẹ paa” inyenrin mịnị yeama kị tẹmẹ ma?b

6. Ọkpọnanaowei bẹbẹẹ bara ka kị kịmị awọụ tẹmẹ wẹrị emi

Jehovah nama-ama emi bara akị kịmị tọbọụ tẹmẹgha. Genesis 1:26 goo dá, mị biibịbị kẹrị ẹrẹtei:

• Omịnị dieneni bá tarị inyenrinbọụ nana wẹrị emi yọmị, Ọkpọnanaowei tebara kị emi bara kị gbaa wó pịrị mịnị a o?

KỊLỌỌBARA

Jehovah kị ebebu ọkpọsẹ má ụndụ kpọ tẹmẹ mị.

Waị diitụa

• Bible ebebu ọkpọsẹ tebara kị mịẹ timi bo paa bara kị gbaa ma o?

• Ọkpọnanaowei kẹnị ye bẹtịbị kị tẹmẹ wẹrị, kọọ yemọsẹ bịsẹ ye kị duo paa, anịghakpọ omịnị bẹtịbị kị a tẹmẹ ma?

• Tetuu kị duonị kịmị tọbọụ bẹbẹ paa emi a o?

DIITỤA

Ọkpọ bọọ tẹmẹ wẹrị emi yemọ kịmị kị a tẹmẹ wẹrị emi bara mịẹdịa wẹrị emi. Mịẹdịaye dii

“What Does Nature Teach?” (Awake!, September 2006)

Kẹnị daụ owei Bible bolou duo ọkpọ tẹmẹ bara gbaa wo tọbọụ dịa mịnị bara dịị.

“Jehovah . . . Kị Yemọsẹ Tẹmẹ mị” (2:37)

Ọkpọ mị bẹtịbị kị paa mị tolumọ yemị Bible mọ kẹnịsụọmọgha bara dii.

“Did God Use Evolution to Create the Different Types of Life?” (Web article)

Ụndụ bẹtịbị kị bo paa ma anịghakpọ kịmị kị tẹmẹ wẹrị emị a, akiioro-otu má ye tuudọụ otu gbaa yebị goo ẹrị.

The Origin of Life—Five Questions Worth Asking (brochure)