Ugebosẹ Kị Ọkpọnanaowei Dịsẹ Emi A O?

Omịnị pọwẹịtimi kị Jehovah mọ dọụ emi, anịa wó tei mịnị ugebosẹ kị ụ mịẹ pọwẹị mịnị a o? Bei egberi gbelemọ yọbị, omịnị tebara ka kị Jehovah mịẹ pọwẹị a paa emi a o?

1. Tetuu kị duonị Jehovah biin uge-ama dịsẹgha o?

Biin tei mịnị uge-ama Bible bolou a fa, má ikpé karịbụọ kị duobo emi. Zụa tei mịnị uge-ama, teme tolumọ anịghakpọ fịịdẹ-otu naa fịịgha tolumọye kị duo boemi. Bẹẹ bá kịrịịgha tolumọyeama kị duo paa emi. (Isaiah 65:11) Jehovah berifanye akị ụ karị mịnị otumọ pịrị wẹrị emi: “Anị angọbo akị yalịghaye duo seri . . . má gbele kpọ gbele kụmọ.”—2 Corinthians 6:17.a

2. Jehovah tebara ka kị kịmịawọụ tokoni mịnị ugebo diimọ wẹrị emi a o?

Jehovah berifanye kọn wó pịrị wẹrị emi, omịnị “eti akị paa kịmịtọbọụ ghọ tụa kụmọ.” (Jeremiah 17:5 goo.) Zụa uge-ama, ibe daa mịnị otuama anịghakpọ sụụ-otu kị tokoni mịnị. Zụa uge-ama bá, ibe bọọ tịbịtịẹmọ wẹrị emi yeama anịghakpọ ibe paa erein kị tokoni mịnị. (1 John 5:21) Má zụa uge-ama daa mịnị ogboama anịghakpọ sịlị nana wẹrị emi ogboama kị tokoni mịnị. Omịnị agbẹịgha bara akị kịmị anịghakpọ Jehovah dọụgha yeama mịẹ mịnị ogboama kị tokoni mịnị aba, Jehovah mịẹ pọwẹị mịnị a o?

3. Te inyenrinbụọama kị uge mịẹ seimọ a paa emi a o?

Bible “wuru bou angọ dẹịn, opu teiama, [má] wuru bou teiama” duo wó angọ kọn siin kị gbaa wẹrị emi. (1 Peter 4:3) Zụa uge-ama, kịmịotu angọ kẹrịgha paagha má amafị inyenrinbụọ kị kẹrị mịẹ mịnị. Omịnị Jehovah ikie ụbọ ghọ paa dọụ mịnị ifiesẹ, mị ebigha ugebo omịnị mọ teigha fa.

EBIBARA TUUDỌỤ

4. Jehovah tokonigha uge-ama tei kụmọ

Ephesians 5:10 goo dá, mị biibịbịbo kẹrị ẹrẹtei:

• Uge gbelemọ iroro tọn mịnị ifiesẹ, omịnị teeki ukie agbẹị emi a o?

• Iné emi yọmị te uge-ama kị kịmịama mọ tei mịnị a o?

• Bịsẹ ugebo Jehovah mịẹ pọwẹịmọ mịnị a?

Gbaamaba zii-erein uge kịmịama mọ tei mịnị yọmị Ọkpọnanaowei mịẹ pọwẹịmọ mịnị a o? Bible dii daba Jehovah karị mịnị kịmị zii-erein uge teigha. Bible bọọ emi maa zii-erein ugebo kpọ Jehovah karịgha kịmịama kị tei mị. Genesis 40:20-22 má Matthew 14:6-10 goo dá, mị biibịbịbo kẹrị ẹrẹtei:

• Bei maa zii-erein ugebosẹ, teeki paa ma?

• Bei gooyọbo dii daba zii-erein uge tei Jehovah dịsẹ emi?

Ị́mịnị bii a paa emi, ‘Zii-erein uge anịghakpọ Bible bolou a fa uge tei mịnị yọmị Jehovah gbele emi a o?’ Exodus 32:1-8 goo má, VIDIO farị dá, bei biibịbịbo kẹrị ẹrẹtei.

VIDIO: Ọkpọnanaowei Dịsẹgha Uge-ama (5:07)

• Tetuu kị duonị omịnị Ọkpọnanaowei dịsẹ emi yeama kẹrị iroro agbẹị emi a o?

• Omịnị tebara ka kị bịsẹ bara mịẹ mịnị a o?

Ọkpọnanaowei dịsẹgha uge nimi mịnị bara bị

• Uge bị ikpé tolumọ yeama kị duobo emi a o? Tuudọụ.

• Agbẹịgha bara tokoni akị kịmịawọụ, ogboama, bá ibe a tịbịtịẹmọ wẹrị emi yeama kị pịrị mịnị a o? Omịnị Jehovah kị tokoni dẹịn mịnị, omịnị kị wó bụụdọọnyebosẹ kọn siin mịnị.

• Uge bọọ mịẹ mịnị yebo Bible mọ kẹnịsụọmọ emi? Pebi dá wó inyenrinbụọmọ ifiebosẹ yalịyalịtimi.

5. Baratụa zịnịotu pịrị iné peibolou diidụbamọ

VIDIO: Kịlịkịlị Bara Akị Iné Peibolou Gbaa Paamọ (2:01)

Matthew 7:12 goo dá, bei biibịbịbo kẹrị ẹrẹtei:

• Bei gooyọ dii daba, ị́mịnị, mị uge tei kụmọ bara gbaa ị́ mọ mọ́ Jehovah karịgha bịnaotu pịrị agbẹị emi a?

• Omịnị tebara ka kị wó warịotubo tarị wẹrị emi bara mịẹ akị a dịa mịnị a o?

6. Omịnị pọwẹịtimi kị Jehovah mọ dọụ emi

Omịnị wó warị bịnaotubo, bá ikieotubo mọ pọwẹị fịyaị fị gbelei kị Jehovah mọ dọụ emi. Ecclesiastes 8:15 goo dá, bei biibịbị kẹrị ẹrẹtei:

• Gooyọ dii daba, omịnị pọwẹịtimi Jehovah mọ dọụ emi bara paa emi?

Ụ karị mịnị kịmịbosẹ pọwẹịtimi kị Jehovah mọ dọụ wẹrị emi. VIDIO farị dá, wó opubẹnịị bọọ paa mịnị yebo dii.

VIDIO: Opubẹnịị A Egeni Kẹrị Akị Inyenrinbụọ Mịẹdịa Mịnị (5:40)

Galatians 6:10 goo dá, mị biibịbịbo kẹrị ẹrẹtei:

• Omịnị kịmịsẹ tei mịnị ugebo tei dẹkị laa “ebi mịẹ” zịnịotu pịrị a paa emi a o?

• Uge teimịnị ifie ka ye kọn zịnịotu pịrị, bá adụdụ duo ye akị a pịrịmịnị yọmọ, te ye kị pọwẹị akị ị́ pịrị dẹịn mịnị a o?

• Biin Jehovah Iseriotuama zụa ifieama kala tei mịẹ bá ebi yeama akị anị awọụbo pịrị mịnị. Ị́ kpọ awọụ nana wẹrị emi aba, te ebi yeama kị ị́ mọ mịẹ a pịrị a paa emi a o?

KỊLỌỌBARA

Omịnị wó warị-otubo mọ má ikieotubo mọ pọwẹị fịyaị fị gbelei Jehovah mọ dọụ emi. Anịa Jehovah zụa uge-ama dịsẹgha.

Waị diitụa

• Jehovah dịsẹgha uge-ama nimi mụ yọmị, omịnị te biibịbịama kị kọn angọ bii agbẹ emi a o?

• Omịnị tebara ka kị uge teigha tuu gbaa akị wó warị-otu pịrị a paa emi a o?

• Ị́mịnị tebara kị mịẹtimi omịnị pọwẹịtimi kị Jehovah mọ dọụ wẹrị emi bara nimi ma o?

DIITỤA

Wó wẹrị Jesus tuuduo-otu teigha fa uge-ama zụa dii.

“Why Don’t Jehovah’s Witnesses Celebrate Certain Holidays?” (Web article)

Zii-erein uge teimọ agbẹịgha nia tuu-ama wó mọ dọụ ẹrị.

“Why Don’t Jehovah’s Witnesses Celebrate Birthdays?” (Web article)

Sukulu uge-tie ifie laa daba, kala awọụama Jehovah mịẹ pọwẹịmọ mịnị bara bị dii.

Ị́mịnị Jehovah Tọrụyọ Bọọ Yelaa Emi (11:35)

Million dẹịn emi Christtuuduo-otu Christmas uge teigha fa bara sẹlẹ angọ pịrịdẹ. Amịnị tebara ka kị mị sẹlẹ angọ pịrịdẹ yọmị diimọ ma?

“They Found Something Better” (The Watchtower, December 1, 2012)