TOLUMỌYE 39
Ọkpọnanaowei Asịịn Diimọ Wẹrị Emi Bara Mị
Asịịn yelaa kụrọmọ emi. Asịịn fa sẹ, kẹnịbọ ụndụ nanagha fa. Jehovah asịịn tẹmẹowei kị omịnị asịịn akị mịẹmụ bara gbaa wó pịrịmọ agbẹị emi. Ọkpọnanaowei asịịn gbelemọ yọ bọọ teeki gbaa ma a o? Omịnị asịịn fị anịghakpọ akị angọ ghọ tụa a paa emi a? Bá asịịn gbelemọ ye paa daba, ị́mịnị tebara ka kị ebi iroro tọn mịnị a o?
1. Jehovah tebaba ka kị asịịn diimọ wẹrị emi a o?
Jehovah gbaa Israelotu pịrị mị: “Inyenrin mịnị yebosẹ anị ụndụ mị asịịn bolou ka emi.” (Leviticus 17:14) Jehovah, asịịn akị ụndụ kọọ tịbịtịẹmọ wẹrị emi. Ọkpọnanaowei ụndụ diidụbamọ emi, anị duonị asịịn kpọ opu bara ka kị yelaa emi.
2. Asịịn gbelemọ yọmị Ọkpọnanaowei teeki dọụgha o?
Ọkpọnanaowei asịịn fị kụmọ bara gbaa oruseri ifie bọọ ụ karịtimi kịmịbọ pịrị mị. (Genesis 9:4 má Leviticus 17:10 goo.) Jehovah waị governing body duotolu ghọ bei egberi gbaa Christtuuduo-otubo pịrị mị “ifiemọsẹ asịịn duo . . . anị angọ kọn siin.”—Acts 15:28, 29 goo.
Asịịn duo angọ kọn siin bị teeki wo tuu a o? Dọọnzụọ-owei, kụrọ wuru duo iné angọ kọn siin gbaa daba, ị́mịnị bá kụrọ wuru bougha fa. Anịa ị́mịnị wuru bị akị fịyaị a tụa fị anịghakpọ akị ịsịan duo tụa daba, ebi emi a? Benebene kịrịgha. Bịsẹ kpekẹnị bara bị, Ọkpọnanaowei asịịn duo angọ kọn siin gbaa mịnị mị, omịnị akị angọ ghọ tụa kụmọ, kọọnpẹlẹgha nama fị kụmọ, bá akị fịyaị kpọ ghọ tụa fị kụmọ kị gbaa mịnị.
Asịịn akị angọzụọ mịnị yọmị sei emi a o? Asịịn bọọ bei yebo ka kị angọzụọ daba Ọkpọnanaowei olokobo mọ kịrịịgha. Gbaamaba, red cells, white cells, platelets, bá plasma. Zụa dọọnzụọ paa-ama Ọkpọnanaowei olokobo seimọgha kpọ paa emi. Gbaamaba, zụa-otu asịịn bolou bọọ emi yebo duo mịẹpaamọ wẹrị emi kala yeama ka kị kịmị zụọ mịnị. Zụa kịmịama bá iné bẹtịbị asịịn ka kị ị́ zụọ dọụ emi. Anịa bịsẹ bara paa daba, ị́mịnị kị bẹtịbị tọnpẹlẹ angọ pịrị mịnị.a—Galatians 6:5.
EBIBARA TUUDỌỤ
Asịịn akị angọzụọ gbelemọ yọmị iné mịẹ agbẹị emi bara diitụa.
3. Angọzụọ gbelemọ yọmị ifiemọsẹ Jehovah mịẹ pọwẹịmọ mịnị ye kị tọnpẹlẹ
Asịịn gbelemọ yọmị ị́mịnị tebara ka kị Ọkpọnanaowei dịsẹmụ iroro tọn a paa emi a o? VIDIO farị dá, bei yebo mịẹ mịnị yọmị yelaa emi bara kẹrị ẹrẹtei.
Ọkpọnanaowei bara ghọ kịlịkịlị-nimiye bii.—James 1:5.
Bible tolumọbịbịama ghọ tuudọụ bá kẹrị iroro.—Proverbs 13:16.
Iné emi yọ bọọ pịrị mịnị yebo dọụ paamọ.
Iné kọn dọụgha yemọ mịẹ gaan paamọ.
Pebi dá iné tọnpẹlẹmụ yebi ị́ mịẹ dọọ ịkịọụ nana.—Acts 24:16.b
Kẹnị ụbọ kpọ laa asịịn gbelemọ egberi ghọ ye tọnpẹlẹ ị́ pịrịgha fa—ị́ taa anịghakpọ ị́ yei, itu-kosukịmị—bá Bible akị ị́ tolumọ mịnị ụbọ kpọ.—Romans 14:12.
Iné tọnpẹlẹdẹ yebi gẹẹ koromọ.
4. Jehovah Iseriotu ebidẹịn ụwọụ ka kị angọzụọ mịnị
Ị́mịnị Ọkpọnanaowei oloko seimọgha bá asịịn kpọ tụagha bara akị angọ zụọ a paa emi. VIDIO farị.
Titus 3:2 goo dá, bei biibịbị kẹrị ẹrẹtei:
Dọọnzụọ-otumọ mịẹmụ bara ẹrẹ mịnị ifie mị, omịnị tetuu kị duonị a diidụbamọ bá angọ iyerimọ agbẹị emi a o?
Akịgha fa |
Sẹlẹ angọ pịrị |
|---|---|
A. Blood plasma |
Plasma duo mịẹpaamọ yeama |
B. White cells |
White cells duo mịẹpaamọ yeama |
C. Platelets |
Platelets duo mịẹpaamọ yeama |
D. Red cells |
Red cells duo mịẹpaamọ yeama |
5. Asịịn Bolou Bọọ Emi Yemọ Duo Mịẹpaamọ Yemọ Gbele Daba
Asịịn bolou bị nia yelaa yeama k’emi—red cells, white cells, platelets, bá plasma. Zụa kala yeama bei nia yemọ bolou bọọ emi, bei yebo akị asịịn duo mịẹpaamọ yeama kị tịịn mịnị.c Mị yebo wó angọ bolou bọọ dọọn-ama daatịẹmọ bá angọ asịịn paa kụrọmọ daba laa anị akị bịsẹ yọ kpọ daatịẹmọ mịnị.
Asịịn bolou bọọ emi yemọ duo mịẹpaamọ yebo gbelemọ yọbị, kịmịsẹ Bible bọọ ẹrị dẹ yebo kị duo ebibara tọnpẹlẹ angọ pịrị. Zụa kịmịama asịịn bolou bọọ emi yemọ duo mịẹpaamọ yebo akị angọ zụọgha, zụa-otu bá anị ịkịọụ bị a bụọmọ wẹrị bei yebo akị angọ zụọ mịnị.
Iroro ị́ mọ tọn dọụ mịnị ifiesẹ, bei biibịbị kẹrị iroro:
Asịịn duo mịẹpaamọ yebo gbelemọ yọmị, ịmịnị tetuu kị duonị akị anịghakpọ akịgha bara gbaa dọọnzụọ-owei pịrị mịnị a o?
KỊMỊ BII A PAA EMI: “Asịịn akị angọ a tụa mịnị yọmị sei emi a?”
Ị́ tebara kị tọn ma?
KỊLỌỌBARA
Wósẹ agbẹị bara akị asịịn diimọ bara kị Jehovah mọ dọụ wẹrị emi.
Waị diitụa
Tetuu kị duonị Jehovah asịịn diidụbamọ emi a o?
Wó tebara kị mịẹtimi asịịn duo angọ kọn siin oloko mị, asịịn akị angọ a tụamụ yọ kpọ gbele emi bara nimi ma o?
Asịịn akị angọ zụọ gbelemọ yọmị, teeki baratụa ị́ pịrị wẹrị ebi iroro tọn angọ pịrị mịnị a o?
DIITỤA
Iné asịịn ka kị waị ị́ zụọ dọụ mịnị aba, teeki ị́ mọ mịẹ agbẹị emi a o?
Asịịn duo mịẹpaamọ yemọ ị́ mọ akị dọụ mịnị aba, teeki kẹrị iroro agbẹị emi a o?
Teeki physics goo wẹrị emi kịmị mịẹ Jehovah asịịn gbelemọ yọ bọọ gbaa wẹrị emi egberi kịrịị emi bara biberin ma o?
Hospital Liaison Committees ghọ fịrịwẹnị mịnị itu-kosuotu baratụa bịnaotu pịrị mịnị bara dii.
a Tolumọyọ 35 dii, “Ebi Iroro Tọn Angọ Pịrị Mụ Bara Mị.”
b Kala egberitịbị 5, “Asịịn Bolou Bọọ Emi Yemọ Duo Mịẹpaamọ Yemọ Gbele Daba” dii, bá Endnote 3, “Asịịn Akị Angọ Zụọ Mịnị Ụwọụama” kpọ dii.
c Zụa dọọnzụọ kịmịama nia yebo kpọ akị asịịn bolou bọọ emi yebo duo mịẹpaamọ wẹrị emi yeama kị diimọ wẹrị emi. Anị duonị, ị́mịnị a mọ mọ́ ẹrẹ mịnị ifiesẹ gaan iné akị mịnị ye mọ, bá akịgha fa yebo gbaa a pịrị.