Christtuuduo-kịmị Tebara Ka Kị Kụrọ-wuru Diimọ Agbẹị Emi A O?

Akpọyọrọịsẹ, kịmịama bẹbẹ bara ka kị kụrọ-wuru bou diimọ wẹrị emi. Zụa kịmịama, ikieotu mọ kala tei mịẹ mịnị ifie ka kụrọ-wuru bou mịnị. Zụa kịmịama bá benebene kụrọ-wuru bougha. Anịa zụa kịmịama kụrọ-wuru boutimi, bou kẹrị mịnị. Bible kụrọ-wuru gbelemọ yọmị teeki gbaa ma o?

1. Kụrọ-wuru bou sei emi a o?

Bible kụrọ-wuru bou sei emi bara gbaagha. Gbaamaba, Ọkpọnanaowei tẹmẹ wó pịrịyebo Bible mọ kịẹntimi ifie mị, wuru kpọ sụọ emi, Bible gbaa mị “wuru kịmịtọbọụ adụdụ mịẹ pọwẹị mịnị.” (Psalm 104:14, 15) Bible bolou dii daba, peibolou nana wẹrị emi kịmịama kpọ kụrọ-wuru bou mị.—1 Timothy 5:23.

2. Bible te tolumọye ka kị wuru bou dọụ mịnị kịmịama pịrị wẹrị emi a o?

Bible gbaa wẹrị emi: “Wuru bou kụrọmọ mịnị kịmịama ovuru ghọ timi kụmọ.” (Proverbs 23:20) Jehovah wuru bou kụrọmọ bá bou kẹrị inyenrinbụọ dịsẹgha. (Galatians 5:21) Anị duonị wuru bou dọụ mịnị ifiesẹ—bẹtịbị kị timi bou mịnị kpọ—bou angọ dẹịnmọ kụmọ. Wuru kpá ị́ kẹrị mịnị aba, bá bou kụmọ.

3. Kụrọ-wuru bou gbelemọ yọmị omịnị tebara ka kị zịnịotu sẹlẹ angọ pịrịdẹ ye diidụbamọ mịnị a o?

Wuru bou gbelemọ yọmị, kịmịsẹ bẹtịbị kị sẹlẹ angọ pịrị mịnị. Anị duonị, kịmị agbẹị bara akị wuru bou mịnị aba, ụbọ kẹrị ụgụlasụọ kụmọ, má benebene bougha ụbọ kpọ penimọ kụmọ. (Romans 14:10) Wó bou mịnị wuru mị, zịnị kịmị a bụụdọọn mịnị aba, omịnị bá bougha fa. (Romans 14:21 goo.) Omịnị “ebi [wó] pịrị emi ye bẹtịbị dọụ kụmọ, anịa zịnị ụbọ ebi kị dọụ.”—1 Corinthians 10:23, 24 goo.

EBIBARA TUUDỌỤ

4. Wuru bou gbelemọ yọmị bẹtịbị sẹlẹ angọ pịrị

Jesus tebara ka kị kụrọ-wuru bou diimọ ma o? Bei biibịbị paraị yọbị ị́ mọ nimi dọụ emi aba, Jesus bọlọụ mịẹ tamamaa ye dii. John 2:1-11 goo dá, bei biibịbịmọ kẹrị ẹrẹtei:

• Mị mịẹ tamamaa ye dii daba, Jesus tebara ka kị kụrọ-wuru má kụrọ-wuru bou mịnị kịmịbo diimọ ma o?

• Jesus kụrọ-wuru bou kọn seiye bara diimọgha duonị, omịnị tebara ka kị kụrọ-wuru bou mịnị kịmịbo diimọ agbẹị emi a o?

Christtuuduo kịmị kụrọ-wuru bou kpọ seigha duonị, ị́mịnị ifiemọsẹ wuru bou e bara gbaagha. Proverbs 22:3 goo dá, bei yebo iné kụrọ-wuru bouyọ gbele emi bara dii:

• Ị́mịnị arụ yọụ, anịghakpọ engine akị fịrị wẹnị dọụ mịnị ifie.

• Ị́mịnị ofuro emi ifie.

• Dọọnzụọ-owei bá kụrọ-wuru bou kụmọ bara gbaa ị́ pịrị daba.

• Ị́mịnị kụrọ-wuru bou dẹ ifiesẹ, angọ kẹrị a paagha aba.

• Government oloko mị ị́ bụọmọ wẹrị kụrọ-wuru bougha sẹ.

• Ị́mịnị kụrọ-wuru boutimi barasin dẹ kịmị mọ k’emi aba.

Ere-nana uge, anịghakpọ zịnị ugeama kụrọ-wuru dịẹ agbẹị emi a o? Ebi iroro tọnpẹlẹmụ bara dii, VIDIO farị.

VIDIO: Kụrọ-Wuru Dịẹ Kịmịotu Pịrị Agbẹị Emi? (2:41)

Romans 13:13 má 1 Corinthians 10:31, 32 goo. Kẹnị Bible yọ goo daba biibịbị paraị dẹkị barịịye kpọ goo dá biibịbị paraị:

• Bei tolumọbịbị mị, tebara ka kị baratụa ị́ pịrị wẹrị Jehovah mịẹ pọwẹịmụ iroro tọn mịnị a o?

5. Iné bou agbẹị yọ tọnpẹlẹ

Kụrọ-wuru ị́ mọ bou mịnị aba, ukie: Kụrọ-wuru bou Jehovah tọrụ ghọ seigha kị gbaa kpọ, wuru bou angọ dẹịn mị ụ dịsẹgha. Tetuu a? Hosea 4:11, 18 goo dá, bei biibịbị kẹrị ẹrẹtei:

• Kịmị wuru bou kụrọmọ daba, teeki paa mịnị a o?

Teeki baratụa wó pịrị wẹrị wuru bou angọ dẹịngha fa o? Omịnị angọ nimi agbẹị emi, anịghakpọ wó mịẹ a paa emi ye nimi agbẹị emi. Proverbs 11:2 goo dá, bei biibịbị kẹrị ẹrẹtei:

• Tetuu kị duonị ị́mịnị, kụrọ-wuru bou dụụmụ yọ sẹlẹ angọ pịrị agbẹị emi a o?

6. Baratụa kịmị pịrị kụrọ-wuru bou angọ dẹịngha fa ye mị

VIDIO: ‘Ine Inyenrin Mịnị Akpọ Bị Ị Dẹịn Mị’ (6:32)

• Vidio dii daba, Dmitry kụrọ-wuru bou daba tebara kị mịẹtimi ma o?

• Dmitry saramọ saramọ kụrọ-wuru bou tịẹmọ ma?

• Omịnị tebara kị mịẹ wẹrị laa kụrọ-wuru bouyọ tịẹmọ ma o?

Wẹrị 1 Corinthians 6:10, 11 goo dá, bei biibịbịmọ kẹrị ẹrẹtei:

• Wuru bou kẹrị tebara kị sei kụrọmọ emi a o?

• Teeki wuru bou kẹrịtimi kịmị kpọ laa barasin a paa emi bara mịẹdịa ma o?

Matthew 5:30 goo dá, mị biibịbị kẹrị ẹrẹtei:

• Jesus bara pẹlẹsiin gbaa yọmị, akị wó Jehovah karị mịnị yọ bọọ zụa yeama kọn siinmụ bara kị tọnmọ wẹrị emi. Wuru bou kẹrị inyenrinbụọ ị́ mọ nana wẹrị emi aba, teeki baratụa ị́ pịrị a paa emi a o?a

Wó 1 Corinthians 15:33 goo dá, bei biibịbị kẹrị ẹrẹtei:

• Iné ikieotubo tebara ka kị iné wuru boumịnị yọ gbele a paa emi a o?

KỊLỌỌBARA

Jehovah, omịnị wuru bou dá pọwẹịtimi kị dọụ wẹrị emi, anịa wuru bou angọ dẹịn anịghakpọ bou kẹrị yọmị ụ dịsẹgha.

Waị diitụa

• Bible mị tebara ka kị kụrọ-wuru diimọ wẹrị emi a o?

• Te akpotuama kị kụrọ-wuru bou angọdẹịn yọ ma emi a o?

• Kụrọ-wuru bou gbelemọ yọmị, wó tebara ka kị zịnịotu sẹlẹ angọ pịrịdẹye diidụbamọ mịnị a o?

DIITỤA

Asịyaị-pesi ụbọ tebara ka kị kụrọ-wuru gbelemọ yọ bọọ ebi iroro tọn angọ pịrị a paa emi a o?

Ọngọ Dii Uru Anịghakpọ Wuru Bou (2:31)

Baratụa ị́ pịrị kụrọ-wuru bou angọdẹịn yọ tịẹmọ mịnị yebo dii.

“Keeping Alcohol in Its Place” (The Watchtower, January 1, 2010)

Christtuuduo kịmị toasting mịẹ agbẹị emi a o?

“Questions From Readers” (The Watchtower, February 15, 2007)

“I Was a Bottomless Barrel” egberitịbị goo dá, kẹnị kịmị kụrọ-wuru bou angọdẹịn inyenrin tịẹmọ bara dọụ ẹrị.

“The Bible Changes Lives” (The Watchtower, May 1, 2012)