TOLUMỌYE 49
Teeki Iné Warịbolou Mịẹ Pọwẹịmọ A Paa Emi A O?—Part 1
Aya zọzọ-nana mịnị otu pọwẹịtimi bẹseri bẹseri laa kị dọụ emi. Bịsẹ bara paa a paa emi. Bible tolumọye tụa inyenrin mịnị zọzọ-nana aladẹ christittuduo-otu, bei yebị laa paa a paa emi bara nimi wẹrị emi.
1. Bible te tolumọye ka kị yei-otu pịrị wẹrị emi a o?
Yei kị warịbolou bọọ tịbị bara kị Jehovah mọ gbaa wẹrị emi. (Ephesians 5:23 goo.) Yei bị baratụa warịbolou pịrị mịnị iroroama tọnpẹlẹ kị Jehovah mọ dọụ wẹrị emi. Bible gbaa yei-otu pịrị mị: “Ifiemọsẹ anị eremọ tarị.” (Ephesians 5:25) Te ụwọụ a o? Ere tarị emi yei ụbọ bị, warịbolou má kịmị-otu emi kpọ, ebibara ka kị ere mọ inyenrin mịnị. Omịnị a kekere bá akpotu bụọmọ a laagha. (1 Timothy 5:8) Yelaa dẹịn yebị, omịnị baratụa a pịrị Jehovah mọ naịn mịnị. (Matthew 4:4) Gbaamaba, omịnị wo erema mọ Bible goo má tẹẹ a paa emi. Yei ụbọ tarịnana bara akị ere kekere daba, ụ mọ Jehovah mọ ikie bị palịị dẹịn mịnị.—1 Peter 3:7 goo.
2. Bible te tolumọye ka kị ere-otu pịrị wẹrị emi a o?
Bible gbaa bara bị, ere-araụ “ebibara yei diidụbamọ.” (Ephesians 5:33) Ere-araụ tebara ka kị ebibara a yei diidụbamọ mịnị a o? Amịnị a yei nana wẹrị emi ebi inyenrinbụọbo mọ, má wo angọtụa warịbolou kekere mịnị bara kẹrị iroro. Amịnị mọkpọ a yei tọn-iroromọ dii inyenrin, ebibara ka kị ụ kẹrị ẹrẹ, bá ụ fa yọ kpọ wo ebiegberi kị gbaa. Omịnị a mọ mọ́ kẹnị peibolou nanagha kpọ.
3. Taa mọ yei mọ otu tebara ka kị anị zọzọ-nanayọ mịẹ kụrọmọ mịnị a o?
Taa mọ yei mọ otu gbelemọ yọmị Bible gbaa mị: “Maa kịmịmọ bo kẹnị ka paa mịnị.” (Matthew 19:5) Gbaa mịnị bara bị, amịnị benebene kẹnị ye kpọ bụọmọ anị tarị seimọ kụmọ. Bịsẹ bara mịẹmụ yọmị, amịnị ifie mịẹ paamọ ebibara tarị nana ụwọụ akị zọzọ kẹrị ẹrẹtei. Jehovah bụọmọ dẹbị—amịnị zịnị ye anịghakpọ zịnị kịmị—diidụbamọ anị zọzọ-nana wẹrị emi yọ dẹịn kụmọ. Amịnị benebene zịnị ụbọ mọ naịn dẹịngha fa.
EBIBARA TUUDỌỤ
Zọzọ-nanaye mịẹ kụrọmọ mịnị Bible tolumọbịbị-ama dii.
4. Yei-otu—ebibara anị eremọ tarị bá a kekere
Bible gbaa bara bị “yei-otu anị ọngọmọ tarị wẹrị emi bara ka kị anị erebo tarị.” (Ephesians 5:28, 29) Teeki gbaa mịnị a? VIDIO farị dá, bei biibịbị kẹrị ẹrẹtei.
Yei-ụbọ te ụwọụ-ama ka kị ere tarị emi bara mịẹdịa mịnị a o?
Colossians 3:12 goo dá, bei biibịbị kẹrị ẹrẹtei:
Yei-owei tebara ka kị bei inyenrinbụọbo mịẹdịa mịnị a o?
5. Ere-otu—anị yei tarị má a diidụbamọ
Yei-ụbọ mị a mọ mọ́ kẹnị peibolou nanagha kpọ, erema yei diidụbamọ kị Bible mọ gbaa wẹrị emi. Wó 1 Peter 3:1, 2 goo dá, bei biibịbịbo kẹrị ẹrẹtei:
Ị́ yei ị́ mọ mọ́ kẹnị peibolou nanaghaba, omịnị bo ị́ mọ mọ́ Jehovah karị ị́mịnị mọ dọụ emi. Teeki baratụa ụ pịrị a paa emi a—ifiemọsẹ egberi gbaa ụ pịrị anịghakpọ ebibara ụ mọ mọ́ inyenrin má ụ diidụbamọ mịnị yọmị a? Tetuu a o?
Taa mọ yei mọ otu gbelei ebi iroro tọn a paa emi. Anịa, zụa ifieama yei iroro yọmị erema dịsẹgha. Jehovah ebi iroro tọnmụ fomuun bị akị yei kị pịrị wẹrị emi duonị, erema dọọ má diidụbamọ ụwọụ ka kị anị iroro wẹrị emi yọ gbaa. Má wo tọn-iroro bị kẹrị akị. Amịnị bịsẹ bara mịẹ daba, warịbolou bị pọwẹị mịnị. Wẹrị 1 Peter 3:3-5 goo dá, bei biibịbị kẹrị eretei:
Jehovah tebara ka kị yei-owei diidụbamọ inyenrinbụọ diimọ wẹrị emi a o?
6. Ị́mịnị zọzọ-nana bolou bọọ emi bụụdọọnyebo dẹịnmọ a paa emi
Ebisiin emi taa mọ yei mọ fa. Anị duonị, bụụdọọnye dẹịnmọmụ yọbị taa mọ yei mọ otubo gbelei mịẹ agbẹị ye mịẹ. VIDIO farị dá, bei biibịbịmọ kẹrị ẹrẹtei.
Vidio bolou mị, teeki taa mọ yei mọ otumọ bá bọlọụ naịntimi bara fa bara mịẹdịa ma?
Teeki baratụa a pịrị ma o?
Wó 1 Corinthians 10:24 má Colossians 3:13 goo. Kẹnị goo siin daba, biibịbị paraị dẹkị má barịịyọ kpọ goo dá biibịbị paraị:
Mị tolumọye bị, tebara ka kị baratụa warịbolou pịrị mịnị a o?
Bible gbaa mị, zọzọ diidụbamọ. Zọzọ diidụbamọ bị, ebi mịẹ zọzọ pịrị má diidụbamọ ụwọụ akị zọzọ kẹrị inyenrin kị gbele emi. Romans 12:10 goo dá, bei biibịbịmọ kẹrị ẹrẹtei:
Yei anịghakpọ ere ụbọ diidụbamọ ye dọụ agbẹị emi a? Tetuu a o?
ZỤA KỊMỊAMA GBAA MỊNỊ: “Ị mọ ị yei mọ bá bọlọụ naịntimi bara fa.”
Ị́ tebara ka kị Bible bị akị baratụa a pịrị a paa emi a o?
KỊLỌỌBARA
Taa mọ yei mọ otu zọzọ tarị, zọzọ diidụbamọ bá Bible tolumọbịbị akị tụa inyenrin daba pọwẹị nana mịnị.
Waị diitụa
Yei ụbọ tebara ka kị warịbolou mịẹ pọwẹị a paa emi a o?
Ere-araụ tebara ka kị warịbolou mịẹ pọwẹịmọ mịnị a o?
Ere anịghakpọ yei ị́ mọ nana wẹrị emi abá, te Bible tolumọbịbị kị baratụa iné warịbolou pịrị a paa emi a o?
DIITỤA
Baratụa ị́ pịrị iné warịbolou mịẹ pọwẹịmọ mịnị yeama dọụ ẹrị.
Ọkpọnanaowei tolumọye akị tụa inyenrin daba, tarị-ama emi bara mịẹdịa wẹrị emi vidio farịye dii.
Yei-owei diidụbamọ agbẹị emi bara bị dọụ ẹrị.
“Women, Why Submit to Headship?” (The Watchtower, May 15, 2010)
Kẹnị taa mọ yei mọ tebaraka kị anị bụụdọọnyebo mọ bá anị zọzọ a paa yọ kpọ kẹrịtịẹmọ má o?
Ọkpọnanaowei Baratụa Wo Pịrịwerị Wo Zọzo̱nanaye Waị Mịẹtịẹmọmị (5:14)