Pẹlẹgha Bara Jehovah Mọ Kpẹkpẹrẹẹtimi

Gesii Christtuuduo-otubo Kẹnịye anịghakpọ kẹnị ụbọ kpọ bụọmọ wẹrị a mọ mọ Jehovah mọ ovuru seimọgha fa bara kị gbinipẹlẹ wẹrị emi. Tamanaịnyọ fa bara bị ị́mịnị kpọ bịsẹ bara gbinipẹlẹ dẹ. Jehovah iné gbinipẹlẹdẹ ye diidụbamọ wẹrị emi. (1 Chronicles 28:9 goo.) Te yeama kị ị́ mọ Jehovah mọ kpẹkpẹrẹẹ emi yọ daadi a paa emi a, anịa teeki baratụa ị́ pịrị a paa emi a o?

1. Zịnịotu tebara ka kị wó mọ Jehovah mọ ovuru seimọ a paa emi a o?

Zụa kịmịama omịnị Jehovah karị kụmọ bara gbaa wó pịrị a paa emi. Te kịmịama kị laa bei paa ye gbaa wó pịrị a paa emi a? Anị kịmịama nẹ ikpé egberiama kị Jehovah ogbo gbaịn mọ wẹrị wó peibolou seimọ dọụ mịnị otu. Gbaamaba zụa kịmịama nẹ Jehovah ogbo duo serii dẹ otu. Zụa ikpé karịbụọ tịbị-otu kpọ ikpé egberiama gbaa wẹrị zụa bịnaotu mịẹ Jehovah ogbo duo serii dẹ. Anịduonị a mọ mọ́ dọnọ, anị funbo goo, anị website duo sụọ, bá anị vidiobo diimụ yọ kpọ benebene ebigha. Jehovah karị mịnị kịmịama mịẹ suusụọ dọụ mịnị kịmịbo gbelemọ yọmị, Jesus gbaa mị: “A pei kụmọ. Asẹẹ tọrụ baan emi kịmị daa otuama. Anịa, tọrụ baan kịmị zịnị tọrụ baan kịmị daa wẹnị daba, anị maa kịmịbosẹ mú ogugu ka korosụọ mịnị.”—Matthew 15:14.

2. Wó tọn angọ pịrị mịnị yebo tebara ka kị wó mọ Jehovah mọ kpẹkpẹrẹẹ emi yọ gbele a paa emi a o?

Omịnị akị Jehovah ghọ nana wẹrị emi tarị mị baratụa wó pịrị wẹrị ikpé karịbụọmọ wẹnị gbeleigha fa. Wó wẹnị mịnị fịrị, wó sụọ emi ogbo bá wó mịẹ mịnị yesẹ, benebene ikpé karịbụọmọ kẹnịsụọmọgha. Jehovah berifaan ye kọn wó pịrị wẹrị emi: “Ine kịmịama [Opu Babylon], duo baịn serii.”—Revelation 18:2, 4.

EBIBARA TUUDỌỤ

3. Ikpé egberiama akị kịmịotu tolumọ mịnị otuama nimipẹlẹ

Omịnị Jehovah ogbo gbelemọ yọmị sei egberiama naa daba teeki mịẹ agbẹị emi a? Proverbs 14:15 goo dá, bei biibịbị kẹrị ẹrẹtei:

• Omịnị tetuu kị duonị wó naa mịnị yebosẹ pei agbẹịgha o?

Wẹrị 2 John 9-11 goo dá, mị biibịbịbo kẹrị ẹrẹtei:

• Omịnị tebara ka kị gesii duo korodẹ otu mọ inyenrin agbẹị emi a o?

• Omịnị gesii duo korodẹ otubo mọ ẹrẹgha kị gbaa kpọ, omịnị tebara ka kị mọkpọ a mọ mọ́ ẹrẹ a paa emi a?

• Omịnị kịmịotu akị Jehovah mọ bá wo ogbo mọ gbaịn mọ mịnị egberibo pei daba, tebara ka kị Jehovah gbele a paa emi bara kị ị́ mọ tọn ma o?

4. Itu bolou bọọ kịmị kụrọ sei kị mịẹ kpọ, Jehovah mọ kpẹkpẹrẹẹtimi

Omịnị itu bolou bọọ kịmị kụrọ sei mịẹ bara naa daba, teeki mịẹ agbẹị emi a? Jehovah tụa Israel ibe pịrị oloko dii. Leviticus 5:1 goo.

Mị Bible goo yọ gbaa bara dii daba, itu bolou bọọ kịmị kụrọ sei mịẹ bara omịnị mọ naa daba, omịnị bịsẹ ye gbaa akị itu-kosuotubo pịrị. Anịa bịsẹ bara kị mịẹ agbẹị emi kpọ, bọlọụ, gbaa angọ nana ụbọ pịrị dá ụbọ mị bẹtịbị egberigbaa itu-kosuotubo pịrị. Ụbọ mị gbaaghaba, wó Jehovah mọ kpẹkpẹrẹẹ emi yọmị baratụa wó pịrị wẹrị egberi gbaa akị itu-kosuotu pịrị mịnị. Bịsẹ bara mịẹ emi yọmị tebara ka kị ị́mịnị . . .

• Jehovah mọ kpẹkpẹrẹẹ emi bara mịẹdịa mịnị a o?

• kụrọ sei mịẹ ụbọ tarị wẹrị emi bara mịẹdịa mịnị a o?

• itu bọọ zịnị otu tarị wẹrị emi bara mịẹdịa mịnị a o?

5. Opu Babylon duo serii

VIDIO: Opu Babylon Duo Serii! (5:06)

Luke 4:8 mọ Revelation 18:4, 5 mọ goo dá, mị biibịbịbo parụ:

• Ine ẹrẹ mị mọkpọ iné mútimi ikpé karịbụọ fun ma emi a?

• Ine sụọ emi ogbo mị, zịnị karịbụọ mọ kẹnịsụọmọ emi a?

• Ine wẹnị mịnị fịrị mị baratụa akị ikpé karịbụọ pịrị mịnị a?

• Ine ụndụsẹ diisiin daba, ị́mịnị ikpé karịbụọ duo serii agbẹịye mọkpọ emi a?

• Ịmịnị mị biibịbịbo kẹnị ka iin parụ kpọ, teeki ị mọ mịẹ agbẹị emi a o?

Paabara paabara, angọtụa dá iné ye-iroro agba mịẹ peree, bá ị mọ Jehovah mọ mịẹ kpẹkpẹrẹẹtimi mịnị ye kị sẹlẹ angọ pịrị.

KỊLỌỌBARA

Omịnị Jehovah mọ kpẹkpẹrẹẹtimi dọụ emi ifiesẹ, wo lẹlẹmọwẹrị seiye mịẹmụ kịmịama mọ wẹnị gbelei kụmọ.

Waị diitụa

• Tetuu kị duonị omịnị gesii duo korodẹ otubo mịẹpaamọ dẹ yebo peimọ agbẹịgha o?

• Bịnaụbọ kụrọ sei mịẹdẹ bara wo mọ mini daba, omịnị teeki mịẹ agbẹị emi a o?

• Omịnị tebara ka kị ikpé karịbụọ duo serii berifaan yebị kẹrị akị wẹrị emi bara mịẹdịa a paa emi a o?

DIITỤA

Kịmịama kịrịịgha egberiama akị Jehovah ogbo gbaịnmọ daba, iné mịẹ agbẹị emi bara dọụ ẹrị.

“Do You Have the Facts?” (The Watchtower, August 2018)

Ị́mịnị tebara ka kị, baratụa Opu Babylon pịrị mịnị ogboama anịghakpọ baratụa akị a pịrị mịnị fịrịama lelei a paa emi a o?

“Keep Busy During the Last of ‘the Last Days’” (The Watchtower, October 2019, paragraphs 16-18)

Jehovah karịgha kịmịama tebara ka kị wó peibolou mịẹ suusụọ dọụ mịnị a o?

A Bụọmọ Ị́ Lẹlẹmọ Kụmọ (9:32)

“I Had Been Looking for God Since Childhood,” egberi bị Shinto karịbụọ a ịkịan kụụntimi owei ikpé karịbụọ a bara siin bara dii.

“The Bible Changes Lives” (The Watchtower, July 1, 2011)