Wó Bịdẹ Mọ Wó Angọ Mọ Yelaa Emi Tuubi

Tụamụ bịdẹ bá angọ tọlọmọ mịnị bara gbelemọ yọmị, kịmị sẹlẹ wó pịrịgha fa. Anịa zụa Bible tolumọbịbị-ama, baratụa wó pịrị wẹrị laa wó dịsẹye tụa mịnị, bá Jehovah kpọ mịẹ pọwẹị mịnị. Wẹrị zụa Bible tolumọbịbị-ama dii.

1. Te Bible tolumọbịbị-ama kị baratụa wó pịrị wẹrị agbẹị bara akị angọ tọlọmọ a paaemi a o?

Omịnị “tụa agbẹị emi bịdẹ, angọ dii bá saịnsaịn ịkịọụ nana wẹrị emi bara inyenrin,” bá ifiemọsẹ yalịyalị bara akị angọ tọlọmọ dá “Ọkpọnanaowei karịmịnị” kịmịama bara mịẹdịa. (1 Timothy 2:9, 10) Wẹrị nia Bible tolumọbịbị-ama dii: (1) Omịnị “tụa agbẹị emi” bịdẹ kị tụa. Kaanghaba, ị́mịnị yetolumọyọ a mú wẹrị Jehovah kịmịbo akị angọ tọlọmọ mịnị bara mị bẹbẹ paaemi bara ẹrị dẹ. Amịnị Ọkpọnanaowei diidụbamọ wẹrị emi bara ka kị angọ tọlọmọ mịnị. (2) Omịnị “agbẹị bara” akị angọ tọlọmọ. Bịsẹ bara mịẹmụ yọmị, omịnị wó angọ tọlọmọ mịnị bara mị kịmịama mịẹ seiye irorogha fa bá pẹlẹgha bara kọn wó diigha fa. (3) Omịnị “saịnsaịn ịkịọụ nanawẹrị emi” bara akị angọ tọlọmọ. Bịsẹ bara mịẹmụ yọmị, omịnị aya paamịnị bịdẹ a tuuduogha fa. (4) Ifiemọsẹ wó akị angọ tọlọmọ mịnị bara mị “Ọkpọnanaowei karịmịnị” kịmịama bara mịẹdịa.—1 Corinthians 10:31.

2. Wó akị angọ tọlọmọ mịnị bara mị tebara ka kị wó mọ Jehovah karị-mịnị kịmịbo gbele a paaemi a o?

Omịnị kị bẹtịbị tụamụ bịdẹ sẹlẹ angọ pịrị mịnị kị gbaa kpọ, omịnị wó akị angọ tọlọmọ mịnị bara mị, zịnịotu gbele mịnị bara tụa iroro agbẹị emi. Omịnị zịnịotu mịẹ boloukọọn mụ ye mịẹgha fa, anịa “ebi wó ọvịbọ pịrị bá ụ kụrọmọ mụ ye” kị mịẹ mịnị.—Romans 15:1, 2 goo.

3. Wó akị angọ tọlọmọ mịnị bara mị, tebara ka kị baratụa zịnịotu pịrị wẹrị bo Jehovah emibara tolumọ nimi mịnị a o?

Omịnị ifiemọsẹ agbẹị bara ka kị angọ tọlọmọ mịnị. Anịa wó yetolumọyọ, bá egberigbaayọ a mú dọụmịnị aba, omịnị ebibara wó angọ tọlọmọ mịnị bara diitụa agbẹị emi. Kịmịotu wó gbaa mịnị ebi egberi a barasin wẹrị wó akị angọ tọlọmọ wẹrịemi bara kị dii omịnị mọ dọụgha. Anịa wó akị angọ tọlọmọ mịnị bara mị baratụa kịmịama pịrị wẹrị bo Ọkpọnanaowei karị bá “tokoni akị wó Zụọbụọmọ-owei tolumọ yebo pịrị” kị wó mọ dọụ emi.—Titus 2:10.

EBIBARA TUUDỌỤ

4. Omịnị ebibara akị angọ tọlọmọ wẹrị emisẹ, omịnị Jehovah kị diidụbamọ mịnị

Te yelaa tuu kị duonị omịnị agbẹị bara akị angọ tọlọmọ mịnị a o? Psalm 47:2 goo dá, bei biibịbịmọ kẹrị ẹrẹtei:

• Omịnị Jehovah ka tịbịtịẹmọ wẹrị emi yọmị, tebara ka kị wó angọ tọlọmọ mịnị bara gbele agbẹị emi a o?

• Omịnị yetolumọyọ bá egberigbaa yọ a mú mịnị ifiesẹ, omịnị wó akị angọ tọlọmọ mịnị bara kẹrị iroro agbẹị emi a? Tetuu a o?

5. Teeki baratụa wó pịrị wẹrị agbẹị bara akị angọ tọlọmọ a paaemi a o?

VIDIO farị.

VIDIO: “Ọkpọnanaowei Tokoni Bara Akị Yemọsẹ Mịẹ” (10:18)

Wó tụa mịnị bịdẹbo tubokụrọgha kị gbaa kpọ, bịdẹbo yalịị bá wó mú dọụ mịnị yọmọ agbẹị emi bara kị timi. 1 Corinthians 10:24 má 1 Timothy 2:9, 10 goo dá, bei bịdẹ paabo tụa agbẹịgha tuu mị wó mọ kẹrị ẹrẹtei . . .

• ịlọlị bịdẹ.

• angọ-fini bịdẹ, anịghakpọ angọ-palị emi bịdẹ.

Christtuuduo-otu bá Moses oloko okukuru a fa kpọ, amịnị Moses olokobo duo Jehovah akị ye iroro mịnị bara tolumọ nimi a paaemi. Deuteronomy 22:5 goo dá, bei biibịbị kẹrị ẹrẹtei:

• Tetuu kị duonị, omịnị owei mịẹ eremọ lei mịnị bịdẹ anịghakpọ ere mịẹ oweimọ lei mịnị bịdẹ tụa agbẹị a o?

Wó 1 Corinthians 10:32, 33 má 1 John 2:15, 16 goo dá, bei biibịbịmọ kẹrị ẹrẹtei:

• Tetuu ki duonị wó tụa mịnị bịdẹbo, itu bolou mọ, bá wó inyenrin mịnị yọ bọọ emi kịmịbo dịsẹgha sẹ, wó gbele agbẹị emi a o?

• Iné inyenrin mịnị yọbị, kịmịotu tebara ka kị birii mịnị a o?

• Kịmịotu tụa mịnị bịdẹbo zụa yaị Christtuuduo-otu tụa agbẹịgha bara ị́ mọ tọn ma? Tetuu a o?

KỊLỌỌBARA

Omịnị, agbẹị emi bara akị angọ tọlọmọ mịnị ifiesẹ, omịnị Jehovah mọ, má zịnịotu mọ diidụbamọ wẹrị emi bara kị mịẹdịa mịnị.

Waị diitụa

• Tetuu kị duonị wó angọ tọlọmọ mịnị bara mị Jehovah tọrụyọ bọọ yelaa emi a o?

• Te Bible tolumọbịbị-ama kị baratụa wó pịrị wẹrị agbẹị bara akị angọ tọlọmọ a paaemi a o?

• Zịnịotu wó akị angọ tọlọmọ mịnị bara mị ẹrị daba amịnị tebara ka kị gesii karịbụọ diimọ a paaemi a o?

DIITỤA

Wẹrị kịmịotu iné birii wẹrị emi bara duonị, akị ị́ dii a paaemi bara dii.

“How Do I Look?” (Web article)

Bọlọụ paamụ bara iroro dẹkị tattoo kọn iné angọ bọọ draw tụa agbẹị emi tuu dii.

“What Does the Bible Say About Tattoos?” (Web article)

Baratụa wó pịrị wẹrị ebi iroro tọnpẹlẹ a paaemi Bible tolumọbịbị-ama dii.

“Does Your Style of Dress Glorify God?” (The Watchtower, September 2016)

Kẹnị ere tebara ka kị zịnịotu tụa mịnị bịdẹbo diiseimọtimi inyenrinbụọ daatịẹmọ ma o?

“Dress and Grooming Was My Stumbling Block” (Awake!, December 22, 2003)