Ikpé Karịbụọ Ọkpọnanaowei Ẹrẹ Seimọ Mịnị Bara Bị

Ọkpọnanaowei wó tarị emi aba, tetuu kị duonị karịbụọ-ama wo ẹrẹ bị akị sei yeama mịẹ mịnị a o? Gbẹsị gbaamaba, bei karịbụọ mọsẹ ikpé karịbụọ-ama; amịnị Ọkpọnanaowei ẹrẹ kị seimọ mịnị. Amịnị tebara ka kị Ọkpọnanaowei ẹrẹ seimọ mịnị a? Bei yebị tebara ka kị Ọkpọnanaowei gbele mịnị a o? Mị bọlọụ mị Ọkpọnanaowei teeki mịẹ mịnị a o?

1. Ikpé Karịbụọ tolumọ mịnị yemọ tebara ka kị Ọkpọnanaowei ẹrẹ seimọ mịnị a o?

Ikpé karịbụọ “Ọkpọnanaowei ẹrẹ sọwẹị wẹrị ikpé egberiama kị tolumọ mịnị.” (Romans 1:25) Gbaa maba, biin karịbụọ-ama Ọkpọnanaowei ẹrẹ bị akị anị tuuduo-otumọ tolumọgha. Anịa, Bible omịnị Ọkpọnanaowei ẹrẹ tịịn kị gbaa wẹrị emi. (Romans 10:13, 14) Zụa sei yeama paa daba bei karịbụọ tịbị-otumọ gbaa mịnị, Ọkpọnanaowei dọụ bara kị paa mịnị. Anị kịrịịgha egberi. Ọkpọnanaowei sei mịẹgha. (James 1:13 goo.) Sei dẹịn yọmị, ikpé karịbụọ tolumọ mịnị yebo duonị biin kịmịama bá Ọkpọnanaowei karị dọụgha.

2. Ikpé karịbụọ mịẹ mịnị yemọ tebara ka kị Ọkpọnanaowei ẹrẹ seimọ mịnị a o?

Ikpé karịbụọ Ọkpọnanaowei dọụ emi bara bị akị kịmịotu mọ inyenringha. Bible gbaa bara mị ikpé karịbụọ “mịẹ mịnị seibo bá Ọkpọnanaowei tọrụyọ a sọwẹịgha.” (Revelation 18:5) Ikpé karịbụọ biin kụraị-ama akị daabụọ otumọ kẹnị wẹnịmọ wẹrị suu-ama dọụ, má biin kịmịama kị sụọ fị dẹ. Zụa karịbụọ tịbị-otuama pẹrẹ dọụ mịnị duonị anị tuuduo-otu baramọ duo sịlị-ama akị mịnị. Bei yemọ mịẹ gaan amọ amịnị Ọkpọnanaowei nimigha, bá Ọkpọnanaowei kịmịama akị angọ tịịn agbẹịgha.—1 John 4:8 goo.

3. Ọkpọnanaowei tebara ka kị Ikpé karịbụọ diimọ wẹrị emi a o?

Ikpé karịbụọ mịẹ mịnị yebo ị́ dọọn mịnị aba, tebara ka kị Jehovah dọọn mịnị bara kị ị́ mọ tọn ma o? Jehovah kịmị ọwọụ tarị kụrọmọ emi, anị duonị karịbụọ tịbị-otu wo ẹrẹ seimọ bá anị tuuduo-otubo ụyamọ daba, wo bolou ịmbẹlẹgha. Jehovah ikpé karịbụọ gbein gọgọlọ bá amịnị “benebene ba timigha fa” bara kị kii koromọ wẹrị emi. (Revelation 18:21) Alaghatimi, Ọkpọnanaowei ikpé karịbụọ bosẹ gbein gọgọlọ siin mịnị.—Revelation 18:8.

EBIBARA TUUDỌỤ

4. Ọkpọnanaowei karịbụọ mọsẹ ghọ barapougha

Biin kịmịama karịbụọbo akị Ọkpọnanaowei karị mịnị bẹbẹ ụwọụama bara kị biberin wẹrị emi. Amịnị kịrịị ma? Matthew 7:13, 14 goo dá, bei biibịbị kẹrị ẹrẹtei:

• Bible tebara ka kị ụndụ akị wó pịrị mịnị ụwọụ tọnmọ wẹrị emi a o?

VIDIO farị dá, kirianga bọọ emi biibịbị kẹrị ẹrẹtei.

VIDIO: Ọkpọnanaowei Karịbụọbosẹ Kị Kẹrị Akị Wẹrị Emi A O?—Dọlọyọ (3:22)

• Bible karịbụọbosẹ kị Ọkpọnanaowei mịẹ bolouịmbẹlẹmọ mịnị bara kị gbaa ma?

5. Ikpé karịbụọ Ọkpọnanaowei nana wẹrị emi tarị mịẹdịagha

Karịbụọ-ama biin ụwọụama ka kị Ọkpọnanaowei ẹrẹ seimọ dẹ. Amịnị suu a mụ́ mịnị yọ kpọ kẹnị sei dẹịn ụwọụ. Kẹnị mịẹdịaye dii mụ yọmị, VIDIO farị. Má bei biibịbịmọ kẹrị ẹrẹtei.

VIDIO: Karịbụọ-otu World War II Bọọ Mịẹ Bara Mị (2:22)

• World War II mị Karịbụọ-otu tebara kị mịẹ ma o?

• Ị́mịnị tebara ka kị anị mịẹ ye diimọ ma o?

John 13:34, 35 má 17:16 goo. Má bei biibịbịmọ kẹrị ẹrẹtei:

• Karịbụọ-otu kpọ sụọ suu dọụ yọmị, tebara ka kị Jehovah gbele bara kị ị́ mọ tọn ma?

• Ikpé karịbụọ biin sei yeama kị mịẹ dẹ. Ikpé karịbụọ te ụwọụama ka kị Ọkpọnanaowei tarị mị inyenrin paamọgha o?

6. Ọkpọnanaowei baratụa kịmịotu pịrị ikpé karịbụọ duo seri kị dọụ emi

Revelation 18:4a goo dá, bei biibịbị kẹrị ẹrẹtei:

• Ikpé karịbụọ ghọ emi otu Ọkpọnanaowei mọ zụọbụọmọ dọụ emi bara ị́ mọ nimi yọbị, tebara ka kị ị́ gbele ma o?

7. Gesii Ọkpọnanaowei emi bara tolumọ bọlọụ ghọ mụ́

Ikpé karịbụọ mịẹ mịnị yebo ị́mịnị Ọkpọnanaowei diimọ wẹrị emi bara gbele agbẹị emi a o? Kẹnị asịyaị pesi, daụ gbaa yọ naagha timi warị ghọ barasin wẹrị sei inyenrinbụọ kẹrị inyenrin bara wó mọ kẹrị iroro dii. Anịa, daụ bị tọbọụ mịẹ ye bọọ barapougha. Tetuu kị duonị tọbọụ mịẹ yebị akị daụ seimọ agbẹịgha o?

• Ikpé karịbụọ mịẹ mịnị yemọ duonị boloukọọn Ọkpọnanaowei pịrịmọ agbẹị emi ao?

KỊLỌỌBARA

Ikpé karịbụọ mịẹ mịnị yebo mọ má tolumọ mịnị yebo mọ Ọkpọnanaowei ẹrẹ seimọ mịnị. Ọkpọnanaowei ikpé karịbụọ gbein gọgọlọ mịnị.

Waị diitụa

• Ị́mịnị tebara ka kị ikpé karịbụọ mịẹ mịnị yebo, má anị tolumọ mịnị yebo diimọ ma o?

• Jehovah tebara ka kị ikpé karịbụọ diimọ wẹrị emi a o?

• Bei bọlọụ bị Ọkpọnanaowei te ka kị ikpé karịbụọ mịẹ mịnị a o?

DIITỤA

Ikpé karịbụọ Ọkpọnanaowei dọụgha bara mịẹ mịnị maa ụwọụama diitụa.

“Are All Religions the Same? Do They All Lead to God?” (Web article)

Tetuu kị duonị Jehovah omịnị zịnị kịmịama sụọmọ ụ karị dọụ wẹrị emi a o?

“Is It Necessary to Belong to an Organized Religion?” (Web article)

Kẹnị karịbụọ tịbịowei wo karịbụọ mịẹtimi yemọ dịsẹgha. Anịa, bei yebị wo Ọkpọnanaowei tolumọ nimi mịnị yọ tịẹmọgha.

“Why a Priest Left His Church” (Awake!, February 2015)

Ikpé karịbụọ, biin kụraị-ama akị kịmị-otu mịẹ Ọkpọnanaowei sẹrịị k’emi má bolousei kịmị bara iroro mịnị. Wó wẹrị anị gbaa dẹ tara ikpé egberiama diitụa.

“Lies That Make God Seem Unlovable” (The Watchtower, November 1, 2013)