Opu Babylon Mị Teye A O?

Bible paraịbịbị mị

Revelation fun bị, “kẹnị ere” akị “opu amawẹnịere” tịịnwẹrịemi, amịnị “sọwẹịemi tuu nanawẹrịemi ẹrẹ emi, anị: ‘Opu Babylon.’” (Revelation 17:1, 3, 5) Mị eremị ọkpọ bọọ emi ikpé karịbụọbosẹ ka tịbị-tịẹmọwẹrịemi, anị “Ọkpọnanaowei gesii kọn ikpé ye deidẹ”a karịbụọbo. (Romans 1:25) Mị karịbụọbo biin ụwọụama ka kị bẹbẹ paaemi kị gbaa kpọ, ásẹẹ kịmịotu mịẹ gesii Ọkpọnanaowei, Jehovah karịmụ yọ dụọ seriimịnị.—Deuteronomy 4:35.

Opu Babylon nimimụ baramị

1. Opu Babylon mị, ye ka tịbị-tịẹmọemi. “Tọnmọyeama” kị kọn Revelation fun bọọ emi yebo gẹẹwẹrịemi. Anịduonị Opu Babylon kpọ kọn ye ka tịbị-tịẹmọwẹrịemi bara wo mọ gbaa a paaemi. (Revelation 1:1) Bible mọkpọ gbaamị, amịnị “biin beni-ama ka tịtẹ-emi,” mị beni-bo “kịmị-paamọsẹ, ibemọsẹ, bá bẹẹlịmọsẹ” kị bịịmọwẹrịemi. (Revelation 17:1, 15) Kẹnị ere bẹtịbị laa mị ye mịẹ a paagha.

2. Opu Babylon mị ọkpọyọrẹịsẹ a kụrọ nanawẹrịemi ogbo ka tịbị-tịẹmọwẹrịemi. Bei erema kọn “ọkpọ bọọ emi pẹrẹ-otubọsẹ daamịnị opu ama” kị tịịnwẹrịemi. (Revelation 17:18) Anịduonị, anị kụrọmị ọkpọyọrẹịsẹ kị laaemi bara gbaa a paaemi.

3. Opu Babylon mị, karịbụọ ogbo, politics anịghakpọ fọụtuubo ogbo-gha. Oruseri Babylon ama bị biin karịbụọ-ama nanawẹrịmi. Ámịnị “dirigụọ” bá “tẹmẹ-tolumọ” inyenrinbụọama kị nanawẹrịmị. (Isaiah 47:1, 12, 13; Jeremiah 50:1, 2, 38) Bei ama kịmịbo Ọkpọnanaowei dọụgha yeama kụmọ mịẹtimimị. (Genesis 10:8, 9; 11:2-4, 8) Babylon daatimi otubo angọserimọ bara Jehovah mọ ụ karịyọ mọ diiseimọmị. (Isaiah 14:4, 13, 14; Daniel 5:2-4, 23) Opu Babylon kpọ, “tẹmẹ-tolumọ inyenrinbụọ” nanawẹrịemi. Mị yẹmị, amịni karịbụọ ogbo bara mịẹdịa wẹrịemi.—Revelation 18:23.

   Opu Babylon mị politics ogbo-gha. Tuubị “ọkpọ pẹrẹbo,” a gbeingọgọlọdẹ bara ẹrịmị, ámịnị yọụmị. (Revelation 17:1, 2; 18:9) Opu Babylon mị fọụtuubo ogbo-gha. Tuubị, Bible mị amịnị mọ “kiriogbo bọọ emi fọụtuubo otubo” mọ bẹbẹ paaemi bara gbaamị.—Revelation 18:11, 15.



Photograph taken by courtesy of the British Museum

4. Opu Babylon ẹrẹbị ikpé karịbụọ agbẹịemi. Baratụa kịmịotu pịrị bo Ọkpọnanaowei mọ naịnmụ bara dii a, ikpé karịbụọ kịmịotu mịẹ zịnị yeama kị karịmịnị. Bible bei inyenrinbụọ kọn “tẹmẹ-anga amawẹnị” kị tịịnmịnị. (Leviticus 20:6; Exodus 34:15, 16) Biin ikpé karịbụọama mị tịẹkiri kpọ oruseri Babylon tolumọtimi yeama kị kọn kịmịotu tolumọmịnị. Gbaamaba, tara kịmị kị Ọkpọnanaowei mịẹwẹrịemị, kịmịawọụ fịịdaba tẹmẹ-bị fịịgha, bá fotoama anịghakpọ karawẹrịemi yeama kọn Ọkponanaowei karịmịnị. Mị karịbụọbo ọkpọ tarịwẹrịemi yeama kpọ mịẹmịnị. Bible bei inyenrinbụọ bị kọn tẹmẹ-anga amawẹnị kị tịịnmịnị.—James 4:4.

   Bible gbaa amọ Opu Babylon mị “purple mọ scarlet mọ colour bịdẹ kị tụawẹrịemi” bá “goldama mọ yelaa ikputuama mọ pearlama mọ kị tụawẹrịemi.” Ikpé karịbụọ nanawẹrịemi yobo mọ bá mị yebo kọn angọdụbamọmịnị baramị, Bible akị Opu Babylon tọnmọ wẹrịemi bara mịẹdịamịnị. (Revelation 17:4) “Ọkpọ bọọ emi lịkaị lịkaị yebosẹ” anịghakpọ Ọkpọnanaowei diiseimọmịnị tolumọ yebosẹ, Opu Babylon kị duo boemi. (Revelation 17:5) Opu Babylon bọọ barapou wẹrịemi otubo, anị ikpé karibụọ bọọ emi “kịmịpaabosẹ.”—Revelation 17:15.

“Ọkpọ bọọ baadẹ kịmịmọsẹ” Opu Babylon tịbị k’emi. (Revelation 18:24) Oruseri ifie duobosẹ, ikpé karibụọ, tarịnana Ọkpọnanaowei Jehovah gbelemọ gesii bị kọn kịmịotu tolumọgha, anịa kịmịotu dịnịmọwẹrị sụụama mọ bá akpotuama kị mịẹpaamọmịnị. (1 John 4:8) Mị yemị opu bara ka kị kịmịotu mịẹ zọzọ baadẹ.

Ọkpọnanaowei tebara ka kị Opu Babylon diimọwẹrịemi a o?

Ọkpọnanaowei tọrụyọ bị, Opu Babylon “mịẹmịnị seimọ serii mú heaven kpọ laadọ.” (Revelation 18:4, 5) Ikpé karịbụọ Ọkpọnanaowei karịmịnị kịmịbo ụyamọ bá ụ gbaaseimọmịnị duonị, Ọkpọnanaowei boloukọnmịnị.

Teeki Opu Babylon paamọmịnị a o?

Opu Babylon gbelemọ yọmị “Ọkpọnanaowei wó ụgụla-pẹlẹ ye gbaa paamọdẹ” bara Bible mọ gbaamị. (Revelation 18:20) Bible mị tọnmọye akị, Ọkpọnanaowei ikpé karịbụọbosẹ gbeingọgọlọ mụ bara gbaamị. (Revelation 18:8) Ómịnị kẹnị kwekwe bou kụrọ nama—anị, kụrọnana wẹrịemi politics ogbo ka tịbịtịẹmọ wẹrịemi yebị—dịnịmọwẹrị ikpé karịbụọ golu bá a gbeingọgọlọmịnị. (Revelation 17:16, 17) “Bei akị saramọ saramọ Babylon opu ama gbeinkoromọmụ baramị, bá kịmị benebene anị ẹrịgha fa.” (Revelation 18:21) Anịduonị, Ọkpọnanaowei mịẹ pọwẹị dụọmịnị kịmịsẹ “a duo serii” agbẹịemi.—2 Corinthians 6:14-17.