Kanta ni Solomon
3 “Iti pagiddaak bayat dagiti rabii sinapulko daydiay inay-ayat ti kararuak.+ Isu sinapulko, ngem saanko a nasarakan. 2 Bay-andak a tumakder, pangngaasiyo, ket mapanko sursoren ti siudad;+ kadagiti kalsada ken kadagiti publiko a plasa+ bay-andak a mangsapul iti daydiay inay-ayat ti kararuak. Isu sinapulko, ngem saanko a nasarakan. 3 Dagiti managwanawan+ a nangliklikmut iti siudad nasarakandak, ‘Daydiay inay-ayat ti kararuak nakitayo kadi?’ 4 Nganngani saanak pay a nakalabas kadakuada idi nasarakak daydiay inay-ayat ti kararuak. Isu ginammatak, ket saanko a pinalusposan, agingga a naiyegko iti balay ni inak ken iti makin-uneg a siled daydiay nangisikog kaniak. 5 Pinagsapatakayo,+ O annak a babbai ti Jerusalem, babaen kadagiti kabaian a gasela wenno babaen kadagiti kabaian nga ugsa iti tay-ak,+ a saanyo a padasen a riingen wenno gutugoten ti ayat kaniak agingga nga agduyos.”+
6 “Ania daytoy banag a sumangsang-at manipud iti let-ang a kas kadagiti munmon ti asuk, a nabangbangluan iti mirra ken olibano,+ iti mismo a tunggal kita ti naayamuom a pulbos ti maysa nga agtagtagilako?”+
7 “Adtoy! Dayta ti sopana, daydiay kukua ni Solomon. Adda innem a pulo a nabileg a lallaki iti intero nga aglikmut dayta, manipud kadagiti nabileg a lallaki ti Israel,+ 8 isuda amin agik-ikutda iti kampilan, yantangay nasursuruanda iti pannakigubat, tunggal maysa adda kampilanna iti luppona gapu iti panagalinggaget bayat dagiti rabii.”+
9 “Dayta ti kamilia nga inaramid ni Ari Solomon maipaay iti bagina manipud kadagiti kayo ti Libano.+ 10 Dagiti adigina inaramidna manipud iti pirak, dagiti sadirina manipud iti balitok. Ti tugawna naaramid iti delana a natinaan iti lumabaga a purpura, ti unegna inaruatan a siaayat ti annak a babbai ti Jerusalem.”
11 “Rummuarkayo ket kumitakayo, O dakayo nga annak a babbai ti Sion, ken Ari Solomon nga addaan iti balangat+ nga inabel ni inana+ maipaay kenkuana iti aldaw ti panangasawana ken iti aldaw ti panagrag-o ti pusona.”+