NUMEROS

1 Nakisao ni Jehova ken ni Moises idiay let-ang ti Sinai,+ iti tolda a pagkonsultaan,+ iti umuna nga aldaw ti maikadua a bulan, iti maikadua a tawen manipud idi rimmuarda idiay Egipto.+ Kinunana: 2 “Saggaysa a bilangenyo*+ dagiti Israelita* sigun iti pamiliada ken sigun iti kapuonanda. Ilistayo ti amin a lallaki sigun iti naganda. 3 Duakayo ken Aaron a mangirehistro kadakuada sigun iti grupoda*—amin a 20 ti tawenna nga agpangato+ a kabaelanna ti agserbi kas soldado iti Israel.

4 “Mangpilikayo iti maysa a lalaki iti tunggal tribu kas pannakaulo iti tribuna.+ 5 Dagitoy ti nagan ti lallaki a tumulongto kadakayo: Iti tribu ni Ruben, ni Elizur+ nga anak ni Sedeur; 6 iti tribu ni Simeon, ni Selumiel+ nga anak ni Zurisadai; 7 iti tribu ni Juda, ni Naason+ nga anak ni Aminadab; 8 iti tribu ni Isacar, ni Netanel+ nga anak ni Zuar; 9 iti tribu ni Zabulon, ni Eliab+ nga anak ni Helon; 10 kadagiti annak ni Jose: iti tribu ni Efraim,+ ni Elisama nga anak ni Amihud; iti tribu ni Manases, ni Gamaliel nga anak ni Pedazur; 11 iti tribu ni Benjamin, ni Abidan+ nga anak ni Gideoni; 12 iti tribu ni Dan, ni Ahiezer+ nga anak ni Amisadai; 13 iti tribu ni Aser, ni Pagiel+ nga anak ni Okran; 14 iti tribu ni Gad, ni Eliasaf+ nga anak ni Deuel; 15 ken iti tribu ni Neftali, ni Ahira+ nga anak ni Enan. 16 Dagitoy ti lallaki a naayaban. Isuda ti panguluen+ ti tunggal tribu dagiti ammada ken pannakaulo dagiti rinibu a lallaki iti Israel.”+

17 Gapuna, inkuyog da Moises ken Aaron dagitoy a napili a lallaki. 18 Inummongda ti amin a tattao iti umuna nga aldaw ti maikadua a bulan, tapno saggaysa a mairehistroda sigun iti nagan, pamilia, ken kapuonanda—dagidiay 20 ti tawenna nga agpangato,+ 19 kas imbilin ni Jehova ken ni Moises. Iti kasta, inrehistrona ida idiay let-ang ti Sinai.+

20 Nailista dagiti annak ni Ruben, ti kaputotan ti inauna nga anak ni Israel,+ sigun iti nagan, pamilia, ken kapuonanda. Saggaysa a nabilang ti amin a lallaki a 20 ti tawenna nga agpangato a makabael nga agsoldado, 21 ket 46,500 ti nairehistro iti tribu ni Ruben.

22 Nailista ti kaputotan ni Simeon+ sigun iti nagan, pamilia, ken kapuonanda. Saggaysa a nabilang ti amin a lallaki a 20 ti tawenna nga agpangato a makabael nga agsoldado, 23 ket 59,300 ti nairehistro iti tribu ni Simeon.

24 Nailista ti kaputotan ni Gad+ sigun iti nagan, pamilia, ken kapuonanda. Nabilang ti amin a lallaki a 20 ti tawenna nga agpangato a makabael nga agsoldado, 25 ket 45,650 ti nairehistro iti tribu ni Gad.

26 Nailista ti kaputotan ni Juda+ sigun iti nagan, pamilia, ken kapuonanda. Nabilang ti amin a lallaki a 20 ti tawenna nga agpangato a makabael nga agsoldado, 27 ket 74,600 ti nairehistro iti tribu ni Juda.

28 Nailista ti kaputotan ni Isacar+ sigun iti nagan, pamilia, ken kapuonanda. Nabilang ti amin a lallaki a 20 ti tawenna nga agpangato a makabael nga agsoldado, 29 ket 54,400 ti nairehistro iti tribu ni Isacar.

30 Nailista ti kaputotan ni Zabulon+ sigun iti nagan, pamilia, ken kapuonanda. Nabilang ti amin a lallaki a 20 ti tawenna nga agpangato a makabael nga agsoldado, 31 ket 57,400 ti nairehistro iti tribu ni Zabulon.

32 Nailista ti kaputotan ni Jose babaen ken Efraim+ sigun iti nagan, pamilia, ken kapuonanda. Nabilang ti amin a lallaki a 20 ti tawenna nga agpangato a makabael nga agsoldado, 33 ket 40,500 ti nairehistro iti tribu ni Efraim.

34 Nailista ti kaputotan ni Manases+ sigun iti nagan, pamilia, ken kapuonanda. Nabilang ti amin a lallaki a 20 ti tawenna nga agpangato a makabael nga agsoldado, 35 ket 32,200 ti nairehistro iti tribu ni Manases.

36 Nailista ti kaputotan ni Benjamin+ sigun iti nagan, pamilia, ken kapuonanda. Nabilang ti amin a lallaki a 20 ti tawenna nga agpangato a makabael nga agsoldado, 37 ket 35,400 ti nairehistro iti tribu ni Benjamin.

38 Nailista ti kaputotan ni Dan+ sigun iti nagan, pamilia, ken kapuonanda. Nabilang ti amin a lallaki a 20 ti tawenna nga agpangato a makabael nga agsoldado, 39 ket 62,700 ti nairehistro iti tribu ni Dan.

40 Nailista ti kaputotan ni Aser+ sigun iti nagan, pamilia, ken kapuonanda. Nabilang ti amin a lallaki a 20 ti tawenna nga agpangato a makabael nga agsoldado, 41 ket 41,500 ti nairehistro iti tribu ni Aser.

42 Nailista ti kaputotan ni Neftali+ sigun iti nagan, pamilia, ken kapuonanda. Nabilang ti amin a lallaki a 20 ti tawenna nga agpangato a makabael nga agsoldado, 43 ket 53,400 ti nairehistro iti tribu ni Neftali.

44 Dagitoy ti inrehistro ni Moises a kaduana ni Aaron ken ti 12 a panguluen ti Israel, a mangirepresentar iti tunggal tribuda. 45 Nairehistro ti amin a lallaki a 20 ti tawenna nga agpangato a makabael nga agsoldado sigun iti kapuonanda, 46 ket agdagup iti 603,550 ti bilangda.+

47 Ngem saan a nairehistro dagiti Levita+ sigun iti tribu dagiti ammada.+ 48 Iti kasta, kinuna ni Jehova ken ni Moises: 49 “Ti laeng tribu ni Levi ti saanmo nga irehistro, ken saanmo nga iraman ti bilangda iti dadduma nga Israelita.+ 50 Dutokam dagiti Levita nga agserbi iti tabernakulo ti Testimonia+ ken agaywan iti amin nga alikamenna ken amin a banag iti dayta.+ Isuda ti agserbi+ ken mangawit iti tabernakulo ken iti amin nga alikamenna.+ Isuda ti agkampo iti aglawlaw ti tabernakulo.+ 51 No mayakar ti tabernakulo, dagiti Levita ti mangrakrak iti dayta;+ ket no masangal manen ti tabernakulo, dagiti Levita ti mangaramid iti dayta. Mapapatay ti asinoman a saan nga autorisado* nga umasideg iti dayta.+

52 “Masapul nga agtolda ti tunggal Israelita iti nairanta a pagkampuanna, sigun iti bennegna*+ ken sigun iti grupona.* 53 Masapul nga agkampo dagiti Levita iti aglawlaw ti tabernakulo ti Testimonia, tapno saanak a makapungtot kadagiti Israelita.+ Masapul nga aywanan* dagiti Levita ti tabernakulo ti Testimonia.”+

54 Inaramid dagiti Israelita ti amin nga imbilin ni Jehova ken ni Moises. Kasta ti eksakto nga inaramidda.

2 Kinuna ni Jehova kada Moises ken Aaron: 2 “Masapul nga agkampo dagiti Israelita iti nairanta a pagpuestuan ti bennegda,*+ iti abay ti bandera* ti kapuonanda. Agkampoda iti aglikmut ti tolda a pagkonsultaan ken nakasango iti dayta dagiti toldada.

3 “Ti agkampo iti daya, a pagsingisingan ti init, ket ti benneg ni Juda, sigun kadagiti grupoda.* Ni Naason+ nga anak ni Aminadab ti panguluen ti kaputotan ni Juda. 4 Ti nairehistro a soldadona ket 74,600.+ 5 Agkampo iti sikiganna ti tribu ni Isacar. Ni Netanel+ nga anak ni Zuar ti panguluen ti kaputotan ni Isacar. 6 Ti nairehistro a soldadona ket 54,400.+ 7 Sumaruno ti tribu ni Zabulon. Ni Eliab+ nga anak ni Helon ti panguluen ti kaputotan ni Zabulon. 8 Ti nairehistro a soldadona ket 57,400.+

9 “Agdagup iti 186,400 ti amin a nairehistro a soldado iti kampo ni Juda. Isuda ti umuna nga agluas.+

10 “Agkampo iti abagatan ti benneg ni Ruben,+ sigun iti grupoda.* Ni Elizur+ nga anak ni Sedeur ti panguluen ti kaputotan ni Ruben. 11 Ti nairehistro a soldadona ket 46,500.+ 12 Agkampo iti sikiganna ti tribu ni Simeon. Ni Selumiel+ nga anak ni Zurisadai ti panguluen ti kaputotan ni Simeon. 13 Ti nairehistro a soldadona ket 59,300.+ 14 Sumaruno ti tribu ni Gad. Ni Eliasaf+ nga anak ni Reuel ti panguluen ti kaputotan ni Gad. 15 Ti nairehistro a soldadona ket 45,650.+

16 “Agdagup iti 151,450 ti amin a nairehistro a soldado iti kampo ni Ruben. Isuda ti maikadua nga agluas.+

17 “No mayakar ti tolda a pagkonsultaan,+ agkampo dagiti Levita iti tengnga ti dadduma pay a kampo.

“Ti urnos ti panagdaliasatda ket kas iti urnos ti panagkampoda,+ sigun iti naituding a puestoda, ken sigun kadagiti bennegda.

18 “Agkampo iti laud ti benneg ni Efraim, sigun kadagiti grupoda.* Ni Elisama+ nga anak ni Amihud ti panguluen ti kaputotan ni Efraim. 19 Ti nairehistro a soldadona ket 40,500.+ 20 Agkampo iti sikiganna ti tribu ni Manases.+ Ni Gamaliel+ nga anak ni Pedazur ti panguluen ti kaputotan ni Manases. 21 Ti nairehistro a soldadona ket 32,200.+ 22 Sumaruno ti tribu ni Benjamin. Ni Abidan+ nga anak ni Gideoni ti panguluen ti kaputotan ni Benjamin. 23 Ti nairehistro a soldadona ket 35,400.+

24 “Agdagup iti 108,100 ti amin a nairehistro a soldado iti kampo ni Efraim. Isuda ti maikatlo nga agluas.+

25 “Agkampo iti amianan ti benneg ni Dan, sigun kadagiti grupoda.* Ni Ahiezer+ nga anak ni Amisadai ti panguluen ti kaputotan ni Dan. 26 Ti nairehistro a soldadona ket 62,700.+ 27 Agkampo iti sikiganna ti tribu ni Aser. Ni Pagiel+ nga anak ni Okran ti panguluen ti kaputotan ni Aser. 28 Ti nairehistro a soldadona ket 41,500.+ 29 Sumaruno ti tribu ni Neftali. Ni Ahira+ nga anak ni Enan ti panguluen ti kaputotan ni Neftali. 30 Ti nairehistro a soldadona ket 53,400.+

31 “Agdagup iti 157,600 ti amin a nairehistro iti kampo ni Dan. Isuda ti maudi nga agluas,+ sigun kadagiti bennegda.”

32 Dagitoy ti nairehistro nga Israelita sigun iti kapuonanda. Agdagup iti 603,550+ ti amin a nairehistro a soldado kadagiti kampo. 33 Ngem saan a nairaman dagiti Levita iti pannakairehistro+ ti dadduma nga Israelita,+ kas iti imbilin ni Jehova ken ni Moises. 34 Inaramid dagiti Israelita ti amin nga imbilin ni Jehova ken ni Moises. Kastoy ti panagkampoda sigun kadagiti bennegda,+ ken ti panagluasda+ sigun iti pamilia ken kapuonanda.

3 Dagitoy ti kaputotan* da Aaron ken Moises idi aldaw a nakisarita ni Jehova ken ni Moises idiay Bantay Sinai.+ 2 Dagitoy ti nagan dagiti annak ni Aaron: ni Nadab nga inauna, sa da Abihu,+ Eleazar,+ ken Itamar.+ 3 Dagitoy ti nagan dagiti annak ni Aaron, dagiti nadutokan* a papadi a naisaad* tapno agserbi kas papadi.+ 4 Ngem natay da Nadab ken Abihu iti sanguanan ni Jehova idi nagidatonda iti maiparit a daton* iti sanguanan ni Jehova+ idiay let-ang ti Sinai, ket saanda a naaddaan iti annak. Ngem nagtultuloy a nagserbi da Eleazar+ ken Itamar+ kas papadi a kadua ni Aaron nga amada.

5 Kinuna ni Jehova ken ni Moises: 6 “Alaem ti tribu ni Levi,+ sa patakderem ida iti sanguanan ni Aaron a padi, ket tumulongda+ kenkuana. 7 Masapul nga itungpalda ti responsabilidadda kenkuana ken iti intero nga Israel iti sanguanan ti tolda a pagkonsultaan babaen ti panagserbida iti tabernakulo. 8 Masapul nga aywananda ti amin nga alikamen+ iti tolda a pagkonsultaan, ken itungpalda dagiti responsabilidadda kadagiti Israelita babaen ti panagserbida iti tabernakulo.+ 9 Itedmo dagiti Levita ken ni Aaron ken kadagiti annakna. Maitedda kenkuana kas sagut manipud kadagiti Israelita.+ 10 Dutokam ni Aaron ken dagiti annakna, ket masapul nga itungpalda ti trabahoda kas papadi.+ Mapapatay ti asinoman a saan nga autorisado* nga umasideg iti tabernakulo.”+

11 Kinuna pay ni Jehova ken ni Moises: 12 “Alaek dagiti Levita manipud kadagiti Israelita kas kasukat ti amin nga inauna* nga annak dagiti Israelita,+ ket agbalinto a kukuak dagiti Levita. 13 Kukuak ti tunggal inauna.+ Idi aldaw a pinapatayko ti tunggal inauna idiay Egipto,+ inlasinko kas nasantuan para kaniak ti tunggal inauna iti Israel, tao man wenno animal.+ Agbalinda a kukuak. Siak ni Jehova.”

14 Kinuna pay ni Jehova ken ni Moises idiay let-ang ti Sinai:+ 15 “Irehistrom dagiti annak ni Levi sigun iti kapuonanda ken sigun iti pamiliada. Irehistrom ti tunggal lalaki a makabulan ti edadna nga agpangato.”+ 16 Gapuna, inrehistro ida ni Moises kas imbilin ni Jehova. 17 Dagitoy ti nagan dagiti annak ni Levi: Gerson, Cohat, ken Merari.+

18 Dagitoy ti nagan dagiti annak ni Gerson sigun iti pamiliada: Libni ken Simei.+

19 Ti annak ni Cohat sigun iti pamiliada ket da Amram, Izar, Hebron, ken Uziel.+

20 Ti annak ni Merari sigun iti pamiliada ket da Mali+ ken Musi.+

Dagitoy ti pamilia dagiti Levita a nagtaud kadakuada.

21 Nagtaud ken Gerson ti pamilia dagiti Libnita+ ken ti pamilia dagiti Simeita. Dagitoy ti pamilia dagiti Gersonita. 22 Ti bilang ti amin a lallaki a nairehistro a makabulan ti edadda nga agpangato ket 7,500.+ 23 Nagkampo iti laud ti pamilia dagiti Gersonita, iti likudan ti tabernakulo.+ 24 Ni Eliasaf nga anak ni Lael ti panguluen dagiti pamilia iti grupo dagiti Gersonita. 25 Ti responsabilidad dagiti annak ni Gerson+ iti tolda a pagkonsultaan ket aywananda ti tabernakulo ken ti tolda,+ ti abbongna,+ ti tabing*+ ti ruangan ti tolda a pagkonsultaan, 26 dagiti kortina+ ti paraangan, ti tabing*+ ti pagserkan ti paraangan iti aglikmut ti tabernakulo ken ti altar, ken dagiti tali ti tolda, ken amin a panagserbi a mainaig kadagita.

27 Nagtaud ken Cohat ti pamilia dagiti Amramita, ti pamilia dagiti Izarita, ti pamilia dagiti Hebronita, ken ti pamilia dagiti Uzielita. Dagitoy ti pamilia dagiti Cohatita.+ 28 Ti bilang ti amin a lallaki a nairehistro a makabulan ti edadda nga agpangato ket 8,600. Responsabilidadda nga aywanan ti nasantuan a disso.+ 29 Nagkampo iti abagatan ti tabernakulo ti pamilia dagiti annak ni Cohat.+ 30 Ni Elizafan nga anak ni Uziel+ ti panguluen dagiti pamilia iti grupo dagiti Cohatita. 31 Responsabilidadda nga aywanan ti Lakasa,+ ti lamisaan,+ ti kandelero,+ dagiti altar,+ dagiti alikamen+ a mausar iti panagserbi iti nasantuan a disso, ti tabing,*+ ken aramidenda ti amin a panagserbi mainaig kadagita.+

32 Ni Eleazar+ nga anak ni Aaron a padi ti pannakaulo dagiti panguluen dagiti Levita, ken mangiwanwan kadagiti addaan responsabilidad iti nasantuan a disso.

33 Nagtaud ken Merari ti pamilia dagiti Malita ken ti pamilia dagiti Musita. Dagitoy ti pamilia ni Merari.+ 34 Ti bilang ti amin a lallaki a nairehistro a makabulan ti edadda nga agpangato ket 6,200.+ 35 Ni Zuriel nga anak ni Abihail ti panguluen dagiti pamilia iti grupo dagiti Merarita. Nagkampoda iti amianan ti tabernakulo.+ 36 Responsabilidad dagiti annak ni Merari nga aywanan dagiti hamba+ ti tabernakulo, dagiti trangka,+ dagiti adigi+ ken dagiti batay a pakaisulbonganda, amin nga alikamen,+ ken aramidenda ti amin a panagserbi mainaig kadagita,+ 37 kasta met dagiti adigi iti aglikmut ti paraangan ken dagiti batay a pakaisulbonganda,+ ken dagiti pasok ken tali ti tolda.

38 Agkampo da Moises ken Aaron ken dagiti annakna iti daya, iti sanguanan ti tolda a pagkonsultaan, iti pagsingisingan ti init. Responsabilidadda nga aywanan ti santuario para kadagiti Israelita. Mapapatay ti asinoman a saan nga autorisado* nga umasideg iti santuario.+

39 Agdagup iti 22,000 ti amin a Levita a lallaki a makabulan ti edadda nga agpangato nga inrehistro da Moises ken Aaron sigun iti pamiliada, kas imbilin ni Jehova.

40 Kalpasanna, kinuna ni Jehova ken ni Moises: “Irehistrom ti amin nga inauna nga annak a lallaki dagiti Israelita a makabulan ti edadda nga agpangato,+ ket bilangem ida ken ilistam ti naganda. 41 Alaem dagiti Levita para kaniak—siak ni Jehova—a kasukat ti amin nga inauna nga annak dagiti Israelita,+ ken alaem dagiti taraken dagiti Levita a kasukat ti amin nga inauna nga annak dagiti taraken dagiti Israelita.”+ 42 Gapuna, inrehistro ni Moises ti amin nga inauna kadagiti Israelita, kas imbilin ni Jehova. 43 Ti bilang ti amin nga inauna a lallaki a nairehistro ti naganda a makabulan ti edadda nga agpangato ket 22,273.

44 Kinuna pay ni Jehova ken ni Moises: 45 “Alaem dagiti Levita kas sukat ti amin nga inauna nga annak dagiti Israelita, ken alaem dagiti taraken dagiti Levita kas sukat dagiti taraken dagiti Israelita. Masapul nga agbalin a kukuak dagiti Levita. Siak ni Jehova. 46 Ad-adu iti 273 dagiti inauna nga annak dagiti Israelita ngem kadagiti Levita.+ Tapno masubbot+ dagitoy a sobra a bilang, 47 mangalaka iti lima a siklo* para iti tunggal indibidual,+ sigun iti siklo a maus-usar iti nasantuan a disso.* Ti maysa a siklo ket 20 a gera.*+ 48 Itedmo ti kuarta ken Aaron ken kadagiti annakna kas gatad a pangsubbot iti sobra a bilang.” 49 Gapuna, innala ni Moises ti kuarta a pangsubbot kadagiti simmobra iti bilang dagiti Levita. 50 Ti gatad ti kuarta nga innalana kadagiti inauna nga annak dagiti Israelita ket 1,365 a siklo, sigun iti gatad a maus-usar iti nasantuan a disso. 51 Kalpasanna, inted ni Moises ken ni Aaron ken kadagiti annakna ti kuarta a pangsubbot, maitunos iti imbaga* ni Jehova, kas imbilin ni Jehova ken ni Moises.

4 Kinuna ni Jehova kada Moises ken Aaron: 2 “Masapul a mabilang dagiti annak a lallaki ni Cohat+ manipud iti annak ni Levi sigun iti pamiliada ken sigun iti kapuonanda, 3 amin nga agtawen iti 30+ agingga iti 50+ a karaman iti grupo nga agserbi iti tolda a pagkonsultaan.+

4 “Daytoy ti trabaho dagiti annak ni Cohat iti tolda a pagkonsultaan.+ Nasantuan unay daytoy: 5 No umakar ti kampo, sumrek ni Aaron ken dagiti annakna iti tolda ket akasenda ti kortina+ a nanglinged iti lakasa ti Testimonia sa iyabbongda iti lakasa.+ 6 Arpawanda dayta iti lalat ti foka ken parabawanda iti asul a lupot sa iyusokda dagiti assiw+ a pangawitda.

7 “Arpawanda met iti asul a lupot ti lamisaan a pakaikabilan ti pamarang a tinapay,+ ket iparabawda iti dayta dagiti pinggan, kopa, malukong, ken pitser a pagkargaan iti daton nga inumen.+ Saan a maikkat iti lamisaan ti regular a daton a tinapay.+ 8 Abbonganda dagita iti lupot a nalabaga ken parabawanda iti lalat ti foka sa iyusokda dagiti assiw+ a pangawitda. 9 Kalpasanna, mangalada iti asul a lupot nga iyabbongda iti kandelero,+ agraman dagiti lamparana,+ dagiti sipit, dagiti pagikkan iti beggang,+ ken amin a pagkargaan iti lana a mausar para iti dayta. 10 Balkutenda ti kandelero ken ti dadduma pay nga alikamen iti lalat ti foka sa iyusokda ti assiw a pangawitda. 11 Arpawanda iti asul a lupot ti balitok nga altar,+ abbonganda iti lalat ti foka, sa iyusokda dagiti assiw+ a pangawitda. 12 Kalpasanna, alaenda ti amin nga alikamen+ a regular nga us-usarenda nga agserbi iti nasantuan a disso sa ikabilda dagita iti asul a lupot ken abbonganda iti lalat ti foka sa iyusokda ti assiw a pangawitda.

13 “Masapul nga ikkatenda dagiti dapo* iti altar+ sa arpawanda ti altar iti lupot a purpura a delana. 14 Ikabilda iti dayta ti amin nga alikamen nga us-usarenda nga agserbi iti altar: dagiti pagikkan iti beggang, dagiti tinidor, pala, malukong, ken amin nga alikamen iti altar.+ Abbonganda dayta iti lalat ti foka sa iyusokda dagiti assiw+ a pangawitda.

15 “Ileppas ni Aaron ken dagiti annakna nga abbongan ti amin nga alikamen ti nasantuan a lugar+ sakbay nga umakar ti kampo. Kalpasanna, sumrek dagiti annak ni Cohat ket awitenda dagita,+ ngem saanda a sagiden ti nasantuan a disso tapno saanda a matay.+ Dagitoy ti responsabilidad* dagiti annak ni Cohat mainaig iti tolda a pagkonsultaan.

16 “Ni Eleazar+ nga anak ni Aaron a padi ti mangaywan iti lana dagiti lampara,+ nabanglo nga insienso,+ regular a daton a bukbukel, ken nasantuan a lana.+ Aywananna ti intero a tabernakulo ken ti amin nga adda iti dayta, a pakairamanan ti nasantuan a disso ken dagiti alikamen a linaonna.”

17 Kinuna pay ni Jehova kada Moises ken Aaron: 18 “Diyo ipalubos a maibus dagiti pamilia dagiti Cohatita+ manipud iti tribu ni Levi. 19 Kasta ti aramidenyo tapno saanda a matay gapu iti iyaasidegda kadagiti nasantuan unay a banag.+ Sumrek ni Aaron ken dagiti annakna sa ibagada no ania ti aramiden ken bagkaten dagiti Cohatita. 20 Saanda a sumrek a mangkita kadagiti nasantuan a banag uray apagbiit laeng, tapno saanda a matay.”+

21 Kinuna pay ni Jehova ken ni Moises: 22 “Masapul a mabilang dagiti annak a lallaki ni Gerson+ sigun iti kapuonanda ken sigun iti pamiliada. 23 Irehistrom ti amin nga agtawen iti 30 agingga iti 50 a karaman iti grupo nga agserbi iti tolda a pagkonsultaan. 24 Daytoy ti aywanan ken bagkaten ti pamilia dagiti Gersonita:+ 25 Bagkatenda dagiti abbong ti tabernakulo,+ wenno ti tolda a pagkonsultaan, ti abbongna ken ti abbong a lalat ti foka a naiparabaw iti dayta,+ ti tabing* ti ruangan ti tolda a pagkonsultaan,+ 26 dagiti kortina ti paraangan,+ ti tabing* ti pagserkan ti paraangan+ iti aglikmut ti tabernakulo ken altar, dagiti tali ti tolda ken amin nga alikamen ken banag a mausar iti panagserbi. Daytoy ti trabahoda. 27 Amin nga aramiden ken bagkaten dagiti Gersonita+ ket idauluan ni Aaron ken dagiti annakna; dagita amin ti itedyo a responsabilidadda a bagkaten. 28 Daytoy ti trabaho ti pamilia dagiti Gersonita iti tolda a pagkonsultaan,+ ket ni Itamar+ nga anak ni Aaron a padi ti mangidaulo kadagiti responsabilidadda.

29 “Irehistrom met dagiti annak a lallaki ni Merari+ sigun iti pamiliada ken sigun iti kapuonanda. 30 Irehistrom ti amin nga agtawen iti 30 agingga iti 50 a karaman iti grupo nga agserbi iti tolda a pagkonsultaan. 31 Daytoy ti responsabilidadda a bagkaten+ iti tolda a pagkonsultaan: dagiti hamba+ ti tabernakulo, dagiti trangka,+ dagiti adigi+ ken dagiti batay a pakaisulbonganda;+ 32 dagiti adigi+ iti aglikmut ti paraangan ken dagiti batay a pakaisulbonganda,+ dagiti pasok ti tolda,+ dagiti tali ti tolda agraman ti amin nga alikamen ken amin a panagserbi mainaig kadagita. Inagananyo ti alikamen a bagkaten dagiti Merarita. 33 Daytoy ti trabaho dagiti pamilia ti annak ni Merari+ iti tolda a pagkonsultaan, nga idauluan ni Itamar nga anak ni Aaron a padi.”+

34 Gapuna, inrehistro da Moises ken Aaron ken dagiti panguluen+ ti Israel ti annak a lallaki dagiti Cohatita+ sigun iti pamiliada ken sigun iti kapuonanda, 35 amin nga agtawen iti 30 agingga iti 50 a karaman iti grupo nga agserbi iti tolda a pagkonsultaan.+ 36 Ti nairehistro sigun iti pamiliada ket agdagup iti 2,750.+ 37 Dagitoy ti nairehistro manipud iti pamilia dagiti Cohatita, amin nga agserserbi iti tolda a pagkonsultaan. Inrehistro ida da Moises ken Aaron kas imbilin ni Jehova babaen ken Moises.+

38 Nairehistro dagiti annak a lallaki ni Gerson+ sigun iti pamiliada ken sigun iti kapuonanda, 39 amin nga agtawen iti 30 agingga iti 50 a karaman iti grupo nga agserbi iti tolda a pagkonsultaan. 40 Dagiti nairehistro sigun iti pamiliada ken sigun iti kapuonanda ket agdagup iti 2,630.+ 41 Dagitoy ti nairehistro manipud iti pamilia dagiti annak ni Gerson, amin nga agserserbi iti tolda a pagkonsultaan. Inrehistro ida da Moises ken Aaron kas imbilin ni Jehova.+

42 Nairehistro dagiti annak a lallaki ni Merari sigun iti pamiliada ken sigun iti kapuonanda, 43 amin nga agtawen iti 30 agingga iti 50 a karaman iti grupo nga agserbi iti tolda a pagkonsultaan.+ 44 Ti nairehistro sigun iti pamiliada ket agdagup iti 3,200.+ 45 Dagitoy ti nairehistro manipud kadagiti pamilia dagiti annak ni Merari, nga inrehistro da Moises ken Aaron kas imbilin ni Jehova babaen ken Moises.+

46 Inrehistro da Moises ken Aaron ken dagiti panguluen ti Israel amin dagitoy a Levita sigun iti pamiliada ken sigun iti kapuonanda; 47 agtawenda iti 30 agingga iti 50, ken naitudingda amin nga agserbi ken mangbagkat kadagiti alikamen iti tolda a pagkonsultaan.+ 48 Agdagup iti 8,580 dagiti nairehistro.+ 49 Nairehistroda kas imbilin ni Jehova babaen ken Moises, sigun iti naited a trabaho ken bagkaten ti tunggal maysa; nairehistroda kas imbilin ni Jehova ken ni Moises.

5 Kinuna pay ni Jehova ken ni Moises: 2 “Ibilinmo kadagiti Israelita a paruarenda iti kampo ti asinoman nga agkukutel+ ken asinoman nga adda agruar iti bagina+ ken asinoman a narugit gapu ta nakasagid iti bangkay ti tao.*+ 3 Masapul a paruarenyo ida iti kampo, lalaki man wenno babai, tapno saanda a maakaran+ dagiti adda iti kampo ta agnanaedak iti tengngada.”+ 4 Gapuna, inaramid dayta dagiti Israelita ket impanda ida iti ruar ti kampo. Tinungpalda ti imbilin ni Jehova ken ni Moises.

5 Intuloy a kinuna ni Jehova ken ni Moises: 6 “Ibagam kadagiti Israelita, ‘No makaaramid ti maysa a lalaki wenno babai iti aniaman a basol ken saan nga agmatalek ken Jehova, nakabasol dayta a tao.*+ 7 Masapul nga ipudnona*+ ti basol nga inaramidna* ken itedna ti naikeddeng a gatad para iti basolna sa nayonanna iti 20 a porsiento dayta a gatad;+ itedna daytoy iti nakabasolanna. 8 Ngem no awan ti asideg a kabagian ti biktima nga umawat iti maited a gatad, maited dayta ken Jehova ket agbalin a kukua ti padi, agraman ti kalakian a karnero a maidaton kas pangabbong iti basol dayta a tao.+

9 “‘Dagiti nasantuan a kontribusion+ dagiti Israelita a maidatag iti padi ket agbalin a kukuana.+ 10 Agtalinaed a kukuana dagiti nasantuan a banag. Aniaman nga ited ti tunggal Israelita ket kukuanto ti padi.’”

11 Kinuna pay ni Jehova ken ni Moises: 12 “Ibagam kadagiti Israelita, ‘Daytoy ti rumbeng a maaramid no agbasol ti asawa a babai ken saan nga agmatalek iti asawana 13 ket dennaan ti sabali a lalaki,+ isu a rinugitanna ti bagina, ngem saan nga ammo ni lakayna, agtalinaed a saan a natakuatan, awan ti testigo iti inaramidna, ken saan a natiliwan: 14 No agimon ti lalaki ken atapenna a nakikamalala ti asawana, agpayso man dayta wenno saan, 15 ipanna ti asawana iti padi, ken mangitugot iti apagkapullo ti maysa nga efa* a sebada nga arina kas daton para iti asawana. Saanna nga ikkan iti lana wenno olibano, ta dayta ket daton a bukbukel gapu iti panagimon, maysa a daton a mangipalagip iti biddut.

16 “‘Alaen ti padi ti asawa a babai ket pagtakderenna iti sanguanan ni Jehova.+ 17 Mangala ti padi iti nasantuan a danum iti karamba sa mangala iti tapok iti suelo ti tabernakulo, ket ikabilna dayta iti danum. 18 Kalpasanna, pagtakderen ti padi ti babai iti sanguanan ni Jehova ken pawakrayna ti buok ti babai sa ikabilna kadagiti dakulapna ti daton a bukbukel a mangipalagip iti biddut, wenno ti daton a bukbukel gapu iti panagimon.+ Iggaman ti padi ti napait a danum a mangyeg iti lunod.+

19 “‘Pagsapataenna ti babai, ket ibagana: “No saanka a nakidenna iti sabali a lalaki bayat a naasawaanka,*+ ken saanka a nakikamalala ken dimo rinugitan ti bagim, awan koma ti dakes nga epekto kenka daytoy napait a danum a mangyeg iti lunod. 20 Ngem no nakikamalalaka bayat a naasawaanka babaen ti panangrugitmo iti bagim, ket nakidennaka iti sabali a lalaki+ malaksid iti asawam—” 21 Masapul a pagsapataenna ti babai a napakuyogan iti lunod, ket ibagana: “Ipalubos koma ni Jehova a mausar ti naganmo iti panagilunod ken panagsapata dagiti kailiam ket pakebbeten* ni Jehova ti luppom,* ken pabussogenna ti tianmo. 22 Sumrekto kadagiti bagismo daytoy a danum a mangyeg iti lunod ket bumsog ti tianmo ken kumbet* ti luppom.”* Isungbat ti babai: “Amen! Amen!”*

23 “‘Kalpasanna, masapul nga isurat ti padi dagitoy a lunod iti libro ken punasenna dagita babaen ti napait a danum. 24 Ipainumna iti babai ti napait a danum a mangyeg iti lunod, ket sumrek iti unegna ken mangpataud iti ut-ot. 25 Alaen ti padi ti daton a bukbukel gapu iti panagimon+ manipud iti ima ti babai ket ingatona nga ilili dayta iti sanguanan ni Jehova, sa iyasidegna iti altar. 26 Mangrakem ti padi manipud iti daton a bukbukel kas simbolo ti daton ket puoranna iti rabaw ti altar.+ Kalpasanna, ipainumna ti danum iti babai. 27 Inton ipainumna dayta, no rinugitan ti babai ti bagina ken nakikamalala, sumrek iti unegna ti danum a mangyeg iti lunod ken mangpataud iti ut-ot, bumsogto ti tianna, ken kumbet* ti luppona,* ket ilunodto dagiti kailianna. 28 Ngem no saan a rinugitan ti babai ti bagina ken nadalus, saanto a madusa, ket agsikogto ken maaddaan iti annak.

29 “‘Daytoy ti linteg maipapan iti panagimon,+ no nakikamalala ti babai ken rinugitanna ti bagina bayat a naasawaan, 30 wenno no agimon ti lalaki ken atapenna a nakikamalala ti asawana; masapul a pagtakderenna ti asawana iti sanguanan ni Jehova, ket ipatungpal ti padi kenkuana daytoy a linteg. 31 Awanto ti basol ti lalaki, ngem madusanto ti babai gapu iti basolna.’”

6 Kinuna pay ni Jehova ken ni Moises: 2 “Ibagam kadagiti Israelita, ‘No mangaramid ti maysa a lalaki wenno babai iti espesial a kari ken Jehova nga agbiag kas Nazareo,*+ 3 masapul a saan nga uminum iti arak ken dadduma pay a naingel nga inumen. Masapul met a saan nga uminum iti suka wenno aniaman a naalsem ken naingel nga inumen.+ Saan nga uminum iti aniaman a likido a naggapu iti ubas ken saan a mangan iti ubas wenno pasas. 4 Bayat ti panagbalinna a Nazareo, saan a mangan iti aniaman a produkto manipud iti ubas, naata man nga ubas wenno ti ukisna.

5 “‘Saan a mapukisan bayat ti inkarina a panagbalinna a Nazareo.+ Masapul nga agtalinaed a nasantuan babaen ti panangpaatiddogna iti buokna agingga a makompleto ti pannakailasinna para ken Jehova. 6 Saan nga umasideg iti bangkay ti tao* bayat ti pannakailasinna para ken Jehova. 7 Uray no ti matay ket ti ama wenno inana wenno ti kabsatna a lalaki wenno babai, saanna a mabalin a sagiden ti bangkayda,+ ta ti buok ti ulona ti simbolo ti panagbalinna a Nazareo iti Diosna.

8 “‘Isu ket nasantuan ken Jehova bayat ti panagbalinna a Nazareo. 9 Ngem no adda bigla a matay iti abayna+ ket marugitan ti buokna a mangisimbolo iti pannakailasinna para iti Dios,* masapul a kiskisanna ti ulona+ iti aldaw a pannakadalusna. Kiskisanna dayta iti maikapito nga aldaw. 10 Iti maikawalo nga aldaw, masapul a mangala iti dua a pagaw wenno dua a sibong ti atap a kalapati ket iyegna dagita iti padi iti ruangan ti tolda a pagkonsultaan. 11 Idatag ti padi ti maysa kas daton gapu iti basol ken ti maikadua kas daton a mapuoran tapno maabbongan ti basol dayta a tao+ gapu iti pannakasagidna iti bangkay.* Kalpasanna, masapul a pagbalinenna a nasantuan ti ulona iti dayta nga aldaw. 12 Masapul nga irugina manen ti agbalin a Nazareo para ken Jehova, ket mangyeg iti urbon a kalakian a karnero nga agarup maysa ti tawenna kas daton gapu iti biddut. Ngem saanto a maibilang dagiti immuna nga aldaw ti panagbalinna a Nazareo gapu ta narugitan.

13 “‘Daytoy ti linteg maipapan iti Nazareo: No makompletona ti panagbalinna a Nazareo,+ maipan iti ruangan ti tolda a pagkonsultaan. 14 Masapul nga ipanna sadiay ti datonna ken Jehova: maysa a nasalun-at a kalakian a karnero nga agarup maysa ti tawenna kas daton a mapuoran,+ maysa a nasalun-at a kabaian a karnero nga agarup maysa ti tawenna kas daton gapu iti basol,+ ken maysa a nasalun-at a kalakian a karnero kas daton a pakikappia,+ 15 sangabasket a sinansingsing a tinapay nga awan lebadurana a naaramid iti napino nga arina ken nalaokan iti lana, awan lebadurana a naingpis a tinapay a napulagidan iti lana, ken dagiti kakuyog dagita a daton a bukbukel+ ken daton nga inumen.+ 16 Masapul nga ipan dagita ti padi iti sanguanan ni Jehova ket idatagna ti daton gapu iti basol ken ti daton a mapuoran. 17 Idatagna ken Jehova ti kalakian a karnero kas daton a pakikappia agraman ti sangabasket a tinapay nga awan lebadurana, ket idatagna ti kakuyog dagita a daton a bukbukel+ ken daton nga inumen.

18 “‘Kalpasanna, masapul a kiskisan ti Nazareo ti ulona*+ iti ruangan ti tolda a pagkonsultaan, ket alaenna ti buokna bayat ti panagbalinna a Nazareo sa ipuorna iti apuy iti sirok ti daton a pakikappia. 19 Mangala ti padi iti maysa a naanger+ nga abaga ti kalakian a karnero, maysa a sinansingsing a tinapay nga awan lebadurana manipud iti basket, ken maysa a naingpis a tinapay nga awan lebadurana, ket ikabilna dagita kadagiti dakulap ti Nazareo kalpasan a nakiskisan ti simbolo ti panagbalinna a Nazareo. 20 Masapul nga ingato nga ilili dagita ti padi kas daton a mailili iti sanguanan ni Jehova.+ Maited dayta iti padi kas bingayna, agraman ti barukong ti daton a mailili ken ti luppo kas sagrado a bingay.+ Kalpasanna, mabalinen nga uminum iti arak ti Nazareo.

21 “‘Daytoy ti linteg maipapan iti Nazareo+ nga agkari: No ikarina a mangted iti daton ken Jehova kas kanayonan ti naikeddeng nga idatonna, masapul ngarud a tungpalenna ti karina maigapu iti linteg ti panagbalinna a Nazareo.’”

22 Kalpasanna, kinuna ni Jehova ken ni Moises: 23 “Ibagam ken Aaron ken kadagiti annakna, ‘Kastoy ti ibagayo no bendisionanyo+ dagiti umili ti Israel:

24 “Bendisionannakayo koma ni Jehova+ ken aywanannakayo.

25 Pagsilnagen koma ni Jehova ti rupana kadakayo,+ ken maragsakan koma kadakayo.

26 Kumita koma ni Jehova kadakayo tapno kaasiannakayo* ken ipaayannakayo iti talna.”’+

27 Ket usarenda ti naganko a mangbendision kadagiti annak ni Israel,+ tapno mabendisionak ida.”+

7 Idi aldaw a nalpas a naibangon ni Moises ti tabernakulo,+ winarsianna dayta iti nasantuan a lana+ ken pinagbalinna a nasantuan agraman ti amin nga alikamenna, kasta met ti altar ken ti amin nga alikamenna.+ Idi winarsianna dagitoy iti nasantuan a lana ken pinagbalinna a nasantuan,+ 2 nagdaton dagiti panguluen ti Israel,+ dagiti ulo dagiti pamiliada. Dagitoy a panguluen iti tribu a nangidaulo iti pannakairehistro 3 inyegda iti sanguanan ni Jehova ti datonda nga innem a naabbongan a kareson ken 12 a baka, maysa a kareson para iti dua a panguluen ken saggaysada a kalakian a baka;* ket impanda dagita iti sanguanan ti tabernakulo. 4 Kinuna ni Jehova ken ni Moises: 5 “Awatem dagitoy a mausar iti panagserbi iti tolda a pagkonsultaan, ket itedmo kadagiti Levita, sigun iti kasapulanda nga agserbi.”

6 Iti kasta, inawat ni Moises dagiti kareson ken baka ket intedna kadagiti Levita. 7 Nangted iti dua a kareson ken uppat a baka kadagiti annak ni Gerson, sigun iti kasapulanda nga agserbi;+ 8 ken nangted iti uppat a kareson ken walo a baka kadagiti annak ni Merari, sigun iti kasapulanda nga agserbi, babaen ti panangimaton ni Itamar nga anak ni Aaron a padi.+ 9 Ngem awan ti intedna kadagiti annak ni Cohat ta agserserbida iti nasantuan a disso,+ ken isuda ti mangibakbaklay kadagiti nasantuan a banag.+

10 Inted dagiti panguluen ti datonda bayat ti inagurasion*+ ti altar iti aldaw a nawarsian dayta iti nasantuan a lana. Idi impan dagiti panguluen ti datonda iti sanguanan ti altar, 11 kinuna ni Jehova ken ni Moises: “Iti tunggal aldaw, iti agsasaruno nga aldaw, maysa kadagiti panguluen ti mangted iti datonna para iti inagurasion ti altar.”

12 Ti nangted iti datonna iti umuna nga aldaw ket ni Naason+ nga anak ni Aminadab iti tribu ni Juda. 13 Nangidaton iti maysa a pirak a pinggan nga agdagsen iti 130 a siklo* ken maysa a pirak a malukong nga agdagsen iti 70 a siklo, sigun iti siklo a maus-usar iti nasantuan a disso,*+ agpada a napno dagita iti napino nga arina a nalaokan iti lana kas daton a bukbukel;+ 14 maysa a balitok a kopa* nga agdagsen iti 10 a siklo, a napno iti insienso; 15 maysa nga urbon a kalakian a baka, maysa a kalakian a karnero, ken maysa a kalakian a karnero nga agarup maysa ti tawenna kas daton a mapuoran;+ 16 maysa nga urbon a kalding kas daton gapu iti basol;+ 17 ken dua a baka, lima a kalakian a karnero, lima a kalakian a kalding, ken lima a kalakian a karnero nga agtawen iti maysa kas daton a pakikappia.+ Daytoy ti daton ni Naason nga anak ni Aminadab.+

18 Iti maikadua nga aldaw, nagdaton ni Netanel+ nga anak ni Zuar ken panguluen dagiti annak ni Isacar. 19 Nangidaton iti maysa a pirak a pinggan nga agdagsen iti 130 a siklo ken maysa a pirak a malukong nga agdagsen iti 70 a siklo, sigun iti siklo a maus-usar iti nasantuan a disso,+ agpada a napno dagita iti napino nga arina a nalaokan iti lana kas daton a bukbukel;+ 20 maysa a balitok a kopa nga agdagsen iti 10 a siklo, a napno iti insienso; 21 maysa nga urbon a kalakian a baka, maysa a kalakian a karnero, ken maysa a kalakian a karnero nga agarup maysa ti tawenna kas daton a mapuoran;+ 22 maysa nga urbon a kalding kas daton gapu iti basol;+ 23 ken dua a baka, lima a kalakian a karnero, lima a kalakian a kalding, ken lima a kalakian a karnero nga agtawen iti maysa kas daton a pakikappia.+ Daytoy ti daton ni Netanel nga anak ni Zuar.

24 Iti maikatlo nga aldaw, ni Eliab+ nga anak ni Helon ken panguluen dagiti annak ni Zabulon 25 ket nangidaton iti maysa a pirak a pinggan nga agdagsen iti 130 a siklo ken maysa a pirak a malukong nga agdagsen iti 70 a siklo, sigun iti siklo a maus-usar iti nasantuan a disso,+ agpada a napno dagita iti napino nga arina a nalaokan iti lana kas daton a bukbukel;+ 26 maysa a balitok a kopa nga agdagsen iti 10 a siklo, a napno iti insienso; 27 maysa nga urbon a kalakian a baka, maysa a kalakian a karnero, ken maysa a kalakian a karnero nga agarup maysa ti tawenna kas daton a mapuoran;+ 28 maysa nga urbon a kalding kas daton gapu iti basol;+ 29 ken dua a baka, lima a kalakian a karnero, lima a kalakian a kalding, ken lima a kalakian a karnero nga agtawen iti maysa kas daton a pakikappia.+ Daytoy ti daton ni Eliab+ nga anak ni Helon.

30 Iti maikapat nga aldaw, ni Elizur+ nga anak ni Sedeur ken panguluen dagiti annak ni Ruben 31 ket nangidaton iti maysa a pirak a pinggan nga agdagsen iti 130 a siklo ken maysa a pirak a malukong nga agdagsen iti 70 a siklo, sigun iti siklo a maus-usar iti nasantuan a disso,+ agpada a napno dagita iti napino nga arina a nalaokan iti lana kas daton a bukbukel;+ 32 maysa a balitok a kopa nga agdagsen iti 10 a siklo, a napno iti insienso; 33 maysa nga urbon a kalakian a baka, maysa a kalakian a karnero, ken maysa a kalakian a karnero nga agarup maysa ti tawenna kas daton a mapuoran;+ 34 maysa nga urbon a kalding kas daton gapu iti basol;+ 35 ken dua a baka, lima a kalakian a karnero, lima a kalakian a kalding, ken lima a kalakian a karnero nga agtawen iti maysa kas daton a pakikappia.+ Daytoy ti daton ni Elizur+ nga anak ni Sedeur.

36 Iti maikalima nga aldaw, ni Selumiel+ nga anak ni Zurisadai ken panguluen dagiti annak ni Simeon 37 ket nangidaton iti maysa a pirak a pinggan nga agdagsen iti 130 a siklo ken maysa a pirak a malukong nga agdagsen iti 70 a siklo, sigun iti siklo a maus-usar iti nasantuan a disso,+ agpada a napno dagita iti napino nga arina a nalaokan iti lana kas daton a bukbukel;+ 38 maysa a balitok a kopa nga agdagsen iti 10 a siklo, a napno iti insienso; 39 maysa nga urbon a kalakian a baka, maysa a kalakian a karnero, ken maysa a kalakian a karnero nga agarup maysa ti tawenna kas daton a mapuoran;+ 40 maysa nga urbon a kalding kas daton gapu iti basol;+ 41 ken dua a baka, lima a kalakian a karnero, lima a kalakian a kalding, ken lima a kalakian a karnero nga agtawen iti maysa kas daton a pakikappia.+ Daytoy ti daton ni Selumiel+ nga anak ni Zurisadai.

42 Iti maikanem nga aldaw, ni Eliasaf+ nga anak ni Deuel ken panguluen dagiti annak ni Gad 43 ket nangidaton iti maysa a pirak a pinggan nga agdagsen iti 130 a siklo ken maysa a pirak a malukong nga agdagsen iti 70 a siklo, sigun iti siklo a maus-usar iti nasantuan a disso,+ agpada a napno dagita iti napino nga arina a nalaokan iti lana kas daton a bukbukel;+ 44 maysa a balitok a kopa nga agdagsen iti 10 a siklo, a napno iti insienso; 45 maysa nga urbon a kalakian a baka, maysa a kalakian a karnero, ken maysa a kalakian a karnero nga agarup maysa ti tawenna kas daton a mapuoran;+ 46 maysa nga urbon a kalding kas daton gapu iti basol;+ 47 ken dua a baka, lima a kalakian a karnero, lima a kalakian a kalding, ken lima a kalakian a karnero nga agtawen iti maysa kas daton a pakikappia.+ Daytoy ti daton ni Eliasaf+ nga anak ni Deuel.

48 Iti maikapito nga aldaw, ni Elisama+ nga anak ni Amihud ken panguluen dagiti annak ni Efraim 49 ket nangidaton iti maysa a pirak a pinggan nga agdagsen iti 130 a siklo ken maysa a pirak a malukong nga agdagsen iti 70 a siklo, sigun iti siklo a maus-usar iti nasantuan a disso,+ agpada a napno dagita iti napino nga arina a nalaokan iti lana kas daton a bukbukel;+ 50 maysa a balitok a kopa nga agdagsen iti 10 a siklo, a napno iti insienso; 51 maysa nga urbon a kalakian a baka, maysa a kalakian a karnero, ken maysa a kalakian a karnero nga agarup maysa ti tawenna kas daton a mapuoran;+ 52 maysa nga urbon a kalding kas daton gapu iti basol;+ 53 ken dua a baka, lima a kalakian a karnero, lima a kalakian a kalding, ken lima a kalakian a karnero nga agtawen iti maysa kas daton a pakikappia.+ Daytoy ti daton ni Elisama+ nga anak ni Amihud.

54 Iti maikawalo nga aldaw, ni Gamaliel+ nga anak ni Pedazur ken panguluen dagiti annak ni Manases 55 ket nangidaton iti maysa a pirak a pinggan nga agdagsen iti 130 a siklo ken maysa a pirak a malukong nga agdagsen iti 70 a siklo, sigun iti siklo a maus-usar iti nasantuan a disso,+ agpada a napno dagita iti napino nga arina a nalaokan iti lana kas daton a bukbukel;+ 56 maysa a balitok a kopa nga agdagsen iti 10 a siklo, a napno iti insienso; 57 maysa nga urbon a kalakian a baka, maysa a kalakian a karnero, ken maysa a kalakian a karnero nga agarup maysa ti tawenna kas daton a mapuoran;+ 58 maysa nga urbon a kalding kas daton gapu iti basol;+ 59 ken dua a baka, lima a kalakian a karnero, lima a kalakian a kalding, ken lima a kalakian a karnero nga agtawen iti maysa kas daton a pakikappia.+ Daytoy ti daton ni Gamaliel+ nga anak ni Pedazur.

60 Iti maikasiam nga aldaw, ni Abidan+ nga anak ni Gideoni ken panguluen+ dagiti annak ni Benjamin 61 ket nangidaton iti maysa a pirak a pinggan nga agdagsen iti 130 a siklo ken maysa a pirak a malukong nga agdagsen iti 70 a siklo, sigun iti siklo a maus-usar iti nasantuan a disso,+ agpada a napno dagita iti napino nga arina a nalaokan iti lana kas daton a bukbukel;+ 62 maysa a balitok a kopa nga agdagsen iti 10 a siklo, a napno iti insienso; 63 maysa nga urbon a kalakian a baka, maysa a kalakian a karnero, ken maysa a kalakian a karnero nga agarup maysa ti tawenna kas daton a mapuoran;+ 64 maysa nga urbon a kalding kas daton gapu iti basol;+ 65 ken dua a baka, lima a kalakian a karnero, lima a kalakian a kalding, ken lima a kalakian a karnero nga agtawen iti maysa kas daton a pakikappia.+ Daytoy ti daton ni Abidan+ nga anak ni Gideoni.

66 Iti maika-10 nga aldaw, ni Ahiezer+ nga anak ni Amisadai ken panguluen dagiti annak ni Dan 67 ket nangidaton iti maysa a pirak a pinggan nga agdagsen iti 130 a siklo ken maysa a pirak a malukong nga agdagsen iti 70 a siklo, sigun iti siklo a maus-usar iti nasantuan a disso,+ agpada a napno dagita iti napino nga arina a nalaokan iti lana kas daton a bukbukel;+ 68 maysa a balitok a kopa nga agdagsen iti 10 a siklo, a napno iti insienso; 69 maysa nga urbon a kalakian a baka, maysa a kalakian a karnero, ken maysa a kalakian a karnero nga agarup maysa ti tawenna kas daton a mapuoran;+ 70 maysa nga urbon a kalding kas daton gapu iti basol;+ 71 ken dua a baka, lima a kalakian a karnero, lima a kalakian a kalding, ken lima a kalakian a karnero nga agtawen iti maysa kas daton a pakikappia.+ Daytoy ti daton ni Ahiezer+ nga anak ni Amisadai.

72 Iti maika-11 nga aldaw, ni Pagiel+ nga anak ni Okran ken panguluen dagiti annak ni Aser 73 ket nangidaton iti maysa a pirak a pinggan nga agdagsen iti 130 a siklo ken maysa a pirak a malukong nga agdagsen iti 70 a siklo, sigun iti siklo a maus-usar iti nasantuan a disso,+ agpada a napno dagita iti napino nga arina a nalaokan iti lana kas daton a bukbukel;+ 74 maysa a balitok a kopa nga agdagsen iti 10 a siklo, a napno iti insienso; 75 maysa nga urbon a kalakian a baka, maysa a kalakian a karnero, ken maysa a kalakian a karnero nga agarup maysa ti tawenna kas daton a mapuoran;+ 76 maysa nga urbon a kalding kas daton gapu iti basol;+ 77 ken dua a baka, lima a kalakian a karnero, lima a kalakian a kalding, ken lima a kalakian a karnero nga agtawen iti maysa kas daton a pakikappia.+ Daytoy ti daton ni Pagiel+ nga anak ni Okran.

78 Iti maika-12 nga aldaw, ni Ahira+ nga anak ni Enan ken panguluen dagiti annak ni Neftali 79 ket nangidaton iti maysa a pirak a pinggan nga agdagsen iti 130 a siklo ken maysa a pirak a malukong nga agdagsen iti 70 a siklo, sigun iti siklo a maus-usar iti nasantuan a disso,+ agpada a napno dagita iti napino nga arina a nalaokan iti lana kas daton a bukbukel;+ 80 maysa a balitok a kopa nga agdagsen iti 10 a siklo, a napno iti insienso; 81 maysa nga urbon a kalakian a baka, maysa a kalakian a karnero, ken maysa a kalakian a karnero nga agarup maysa ti tawenna kas daton a mapuoran;+ 82 maysa nga urbon a kalding kas daton gapu iti basol;+ 83 ken dua a baka, lima a kalakian a karnero, lima a kalakian a kalding, ken lima a kalakian a karnero nga agtawen iti maysa kas daton a pakikappia.+ Daytoy ti daton ni Ahira+ nga anak ni Enan.

84 Dagitoy ti indaton dagiti panguluen ti Israel bayat ti inagurasion+ ti altar iti aldaw a nawarsian iti nasantuan a lana: 12 a pirak a pinggan, 12 a pirak a malukong, 12 a balitok a kopa;+ 85 agdagsen iti 130 a siklo ti tunggal pirak a pinggan ken 70 a siklo met ti tunggal malukong, isu nga amin a pirak a pagkargaan ket agdagsen iti 2,400 a siklo, sigun iti siklo a maus-usar iti nasantuan a disso;+ 86 ti tunggal maysa kadagiti 12 a balitok a kopa a napno iti insienso ket agdagsen iti 10 a siklo, sigun iti siklo a maus-usar iti nasantuan a disso, isu nga amin a balitok a kopa ket agdagsen iti 120 a siklo. 87 Amin nga animal kas daton a mapuoran ket agdagup iti 12 a kalakian a baka, 12 a kalakian a karnero, 12 a kalakian a karnero nga agtawen iti maysa ken dagiti kakuyogda a daton a bukbukel, ken 12 nga urbon a kalding kas daton gapu iti basol; 88 isu nga amin nga animal kas daton a pakikappia ket agdagup iti 24 a kalakian a baka, 60 a kalakian a karnero, 60 a kalakian a kalding, ken 60 a kalakian a karnero nga agtawen iti maysa. Daytoy ti daton iti inagurasion+ ti altar kalpasan a nawarsian iti nasantuan a lana.+

89 Tunggal sumrek ni Moises iti tolda a pagkonsultaan tapno makisarita iti Dios,*+ mangngegna ti timek ti kasarsaritana iti ngatuen ti kalub+ ti lakasa ti Testimonia, iti nagbaetan ti dua a kerubin;+ ket makisarita kenkuana ti Dios.

8 Kinuna ni Jehova ken ni Moises: 2 “Ibagam ken Aaron, ‘No sindiam dagiti lampara, masapul a malawagan ti pito a lampara ti sanguanan ti kandelero.’”+ 3 Iti kasta, sinindian ni Aaron dagiti lampara tapno malawagan ti sanguanan ti kandelero,+ kas imbilin ni Jehova ken ni Moises. 4 Kastoy ti pannakaaramid ti kandelero: Naaramid daytoy iti napanday a balitok; manipud iti ungkayna agingga kadagiti sabongna.+ Naaramid ti kandelero sigun iti sirmata+ nga impakita ni Jehova ken ni Moises.

5 Kinuna pay ni Jehova ken ni Moises: 6 “Ilasinmo dagiti Levita manipud kadagiti Israelita, ket dalusam ida.+ 7 Kastoy ti panangdalusmo kadakuada: Warsiam ida iti danum a pangdalus iti basol, ket kiskisanda ti intero a bagida babaen ti labaha, labaanda dagiti badoda, ken dalusanda ti bagida.+ 8 Kalpasanna, mangalada iti urbon a kalakian a baka+ ken ti kakuykuyogna a daton a bukbukel+ a napino nga arina a nalaokan iti lana, ket mangalaka iti sabali pay nga urbon a kalakian a baka kas daton gapu iti basol.+ 9 Idatagmo dagiti Levita iti sanguanan ti tolda a pagkonsultaan ken ummongem sadiay ti amin nga Israelita.+ 10 Inton idatagmo dagiti Levita iti sanguanan ni Jehova, iparabaw dagiti Israelita ti imada kadagiti Levita.+ 11 Masapul nga idatag* ni Aaron dagiti Levita iti sanguanan ni Jehova kas daton a mailili+ manipud kadagiti Israelita, ket agserbida ken Jehova.+

12 “Kalpasanna, iparabaw dagiti Levita ti imada kadagiti ulo dagiti kalakian a baka,+ sa idatagda ken Jehova ti maysa a baka kas daton gapu iti basol ken ti sabali kas daton a mapuoran tapno maabbongan ti basol+ dagiti Levita. 13 Pagtakderem dagiti Levita iti sanguanan ni Aaron ken dagiti annakna ket idatagmo* ida ken Jehova kas daton a mailili. 14 Masapul nga ilasinmo dagiti Levita manipud kadagiti Israelita, ket agbalinto a kukuak dagiti Levita.+ 15 Kalpasanna, sumrek dagiti Levita iti tolda a pagkonsultaan tapno agserbida sadiay. Kastoy ti panangdalus ken panangidatagmo* kadakuada kas daton a mailili. 16 Ta isuda dagiti maited kaniak kas sagut manipud kadagiti Israelita. Alaek ida para kaniak kas sukat ti amin nga inauna* dagiti Israelita.+ 17 Ta kukuak ti tunggal inauna kadagiti Israelita, tao man wenno animal.+ Pinagbalinko ida a nasantuan para kaniak iti daydi aldaw a panangpapatayko iti tunggal inauna idiay Egipto.+ 18 Alaek dagiti Levita kas sukat ti amin nga inauna dagiti Israelita. 19 Itedko ken Aaron ken kadagiti annakna dagiti Levita kas sagut manipud kadagiti Israelita, tapno agserbida iti tolda a pagkonsultaan+ ken mangaramidda iti seremonia iti panangabbong para kadagiti Israelita.+ Iti kasta, awan ti didigra a dumteng kadagiti Israelita iti iyaasidegda iti nasantuan a disso.”

20 Kastoy ti inaramid da Moises ken Aaron ken ti intero nga Israel kadagiti Levita. Inaramid dagiti Israelita ti amin nga imbilin ni Jehova ken ni Moises mainaig kadagiti Levita. 21 Gapuna, dinalusan dagiti Levita ti bagida ken linabaanda dagiti badoda,+ ket indatag* ida ni Aaron kas daton a mailili iti sanguanan ni Jehova.+ Kalpasanna, inaramid ni Aaron ti seremonia ti panangabbong tapno madalusanda.+ 22 Kalpasan dayta, simrek dagiti Levita tapno aramidenda ti trabahoda iti tolda a pagkonsultaan iti sanguanan ni Aaron ken dagiti annakna. Kasta ti inaramidda kadagiti Levita kas imbilin ni Jehova ken ni Moises.

23 Kinuna ni Jehova ken ni Moises: 24 “Kastoy ti urnos para kadagiti Levita: No agtawenen iti 25 nga agpangato, mangrugin nga agserbi iti tolda a pagkonsultaan a kaduana dagiti agserserbi sadiay. 25 Ngem inton agtawenen iti 50, agretiron iti trabahona ket saanen nga agserbi. 26 Mabalinna a tulongan dagiti kakabsatna nga agtrabtrabaho iti tolda a pagkonsultaan, ngem saan nga agserbi sadiay. Kasta ti aramidem kadagiti Levita ken kadagiti responsabilidadda.”+

9 Kinuna ni Jehova ken ni Moises idiay let-ang ti Sinai iti umuna a bulan+ ti maikadua a tawen kalpasan ti iruruarda idiay Egipto: 2 “Masapul nga isagana dagiti Israelita ti daton ti Paskua+ iti naikeddeng a tiempo.+ 3 Iti maika-14 nga aldaw daytoy a bulan, masapul nga isaganayo dayta iti naikeddeng a tiempo, sakbay a sumipnget kalpasan a lumnek ti init;* maitunos iti amin a paglintegan ken proseso ti pannakaisaganana.”+

4 Gapuna, imbaga ni Moises kadagiti Israelita nga isaganada ti daton ti Paskua. 5 Iti kasta, insaganada ti daton ti Paskua iti maika-14 nga aldaw ti umuna a bulan, sakbay a sumipnget kalpasan a lumnek ti init,* idiay let-ang ti Sinai. Inaramid dagiti Israelita ti amin nga imbilin ni Jehova ken ni Moises.

6 Adda idi lallaki a maibilang a narugit ta nakasagidda iti bangkay*+ isu a saanda a naisagana ti daton ti Paskua iti daydi nga aldaw. Gapuna, napanda kada Moises ken Aaron iti daydi nga aldaw+ 7 ket kinunada: “Narugitkami ta nakasagidkami iti bangkay.* Apay a maparitankami nga agdaton ken Jehova iti naikeddeng a tiempo a kadua dagiti Israelita?”+ 8 Gapuna, insungbat ni Moises: “Aguraykayo ta ammuek no ania ti ibaga ni Jehova maipapan kadakayo.”+

9 Iti kasta, kinuna ni Jehova ken ni Moises: 10 “Ibagam kadagiti Israelita, ‘No ti asinoman kadakayo wenno iti sumaruno a henerasionyo ket agbalin a narugit gapu ta nakasagid iti bangkay*+ wenno nagdaliasat iti adayo, masapul nga isaganana latta ti daton ti Paskua para ken Jehova. 11 Isaganada dayta iti maika-14 nga aldaw ti maikadua a bulan,+ sakbay a sumipnget kalpasan a lumnek ti init.* Masapul a kanenda dayta agraman dagiti tinapay nga awan lebadurana ken napait a natnateng.+ 12 Masapul nga awan ti iteddada para iti sumaruno a bigat,+ ken awan ti tukkolenda a tulangna.+ Nasken nga isaganada dayta maitunos iti tunggal paglintegan mainaig ti Paskua. 13 Ngem no nadalus ti maysa a tao* wenno saan a nagdaliasat ket liniwayanna nga isagana ti daton ti Paskua, masapul a mapapatay+ ta saan a nagdaton ken Jehova iti naikeddeng a tiempo. Madusanto dayta a tao gapu iti basolna.

14 “‘No adda ganggannaet a residente, isaganana met ti daton ti Paskua para ken Jehova,+ maitunos iti paglintegan ti Paskua ken iti proseso ti pannakaisaganana.+ Masapul a maymaysa a paglintegan ti surotenyo agraman dagiti ganggannaet a residente.’”+

15 Idi naibangon ti tabernakulo,+ adda ulep a mangab-abbong iti tabernakulo, wenno ti tolda ti Testimonia iti aldaw, ngem iti rabii, agbalin dayta a kasla apuy iti ngatuen ti tabernakulo agingga iti bigat.+ 16 Kasta ti agtultuloy a napasamak: Abbongan ti ulep ti tabernakulo iti aldaw, ken agbalin dayta a kasla apuy iti rabii.+ 17 No umakar ti ulep nga adda iti ngatuen ti tolda, pumanaw a dagus dagiti Israelita,+ ket agkampoda iti lugar a pagsardengan ti ulep.+ 18 Pumanaw dagiti Israelita no ibilin ni Jehova, ken agkampoda met no ibilin ni Jehova.+ Agtalinaedda iti nagkampuanda no saan nga umakar ti ulep iti ngatuen ti tabernakulo. 19 No agtalinaed ti ulep iti ngatuen ti tabernakulo iti adu nga aldaw, agtulnog dagiti Israelita ken Jehova ket saanda a pumanaw.+ 20 No dadduma, agtalinaed ti ulep iti sumagmamano nga aldaw iti ngatuen ti tabernakulo. Agtalinaedda iti nagkampuanda no ibilin ni Jehova, ket pumanawda met no ibilin ni Jehova. 21 No dadduma, agtalinaed laeng ti ulep iti rabii agingga iti bigat, ket pumanawdan no agpangaton ti ulep iti bigat. Aldaw man wenno rabii ti panagpangato ti ulep, masapul a pumanawda.+ 22 Dua nga aldaw man wenno makabulan wenno nabaybayag pay, agingga nga adda ti ulep iti ngatuen ti tabernakulo, agtalinaed dagiti Israelita iti nagkampuanda ket saanda a pumanaw. Ngem pumanawda no agpangaton ti ulep. 23 Agkampoda no ibilin ni Jehova, ket pumanawda met no ibilin ni Jehova. Nagtulnogda ken Jehova maitunos iti imbilin ni Jehova ken ni Moises.

10 Kinuna ni Jehova ken ni Moises: 2 “Agpaaramidka iti dua a trumpeta+ a napanday a pirak, ket usarem dagita no ummongem dagiti tattao ken no umakarda iti pagkampuan. 3 No aggiddan a mapuyotan dagita, masapul a dumatag kenka ti intero nga Israel iti ruangan ti tolda a pagkonsultaan.+ 4 No maysa laeng ti mapuyotan, dumatag laeng kenka dagiti panguluen, dagiti pannakaulo ti rinibu a lallaki iti Israel.+

5 “No puyotenyo dagiti trumpeta iti agbaliwbaliw nga uni, masapul a pumanaw ti grupo dagiti tribu a nagkampo iti daya.+ 6 No puyotenyo dagiti trumpeta iti maikadua a daras iti agbaliwbaliw nga uni, masapul a pumanaw ti grupo dagiti tribu a nagkampo iti abagatan.+ Kastoy ti pannakapuyot dagiti trumpeta tunggal pumanaw ti maysa a benneg.

7 “No ummongenyo dagiti tattao, masapul a puyotenyo dagiti trumpeta,+ ngem saan nga agbaliwbaliw ti uni dagita. 8 Dagiti papadi nga annak ni Aaron ti mangpuyot kadagiti trumpeta+ iti kasta a pamay-an. Daytoy ti agnanayon a paglintegan para iti amin a henerasionyo.

9 “No inkay makigubat kadagiti mangirurrurumen kadakayo iti dagayo, masapul a puyotenyo dagiti trumpeta+ kas panagsagana iti gubat, ket lagipennakayto ni Jehova a Diosyo ken isalakannakayto kadagiti kabusoryo.

10 “Kasta met, no selebraranyo dagiti naragsak nga okasion+—dagiti piestayo+ ken dagiti rugi ti bulanyo—puyotenyo dagiti trumpeta iti sango dagiti datonyo a mapuoran+ ken dagiti datonyo a pakikappia.+ Iti kasta, lagipennakayto ti Diosyo. Siak ni Jehova a Diosyo.”+

11 Iti maikadua a tawen, iti maika-20 nga aldaw ti maikadua a bulan,+ immakar ti ulep nga adda iti ngatuen ti tabernakulo+ ti Testimonia. 12 Iti kasta, pimmanaw dagiti Israelita idiay let-ang ti Sinai sigun iti naibilin nga urnos ti ipapanawda,+ ket nagsardeng ti ulep idiay let-ang ti Paran.+ 13 Daytoy ti damo nga iyaakarda kas panagtulnogda iti bilin ni Jehova babaen ken Moises.+

14 Isu nga immuna a pimmanaw ti benneg* ti kampo dagiti annak ni Juda sigun kadagiti grupoda,* ket ni Naason+ nga anak ni Aminadab ti nangidaulo iti grupona. 15 Ni Netanel+ nga anak ni Zuar ti nangidaulo iti tribu dagiti annak ni Isacar. 16 Ni Eliab+ nga anak ni Helon ti nangidaulo iti tribu ti annak ni Zabulon.

17 Idi naakas ti tabernakulo,+ pimmanaw dagiti annak ni Gerson+ ken dagiti annak ni Merari,+ a nangbagkat iti tabernakulo.

18 Simmaruno a pimmanaw ti benneg ti kampo ni Ruben sigun kadagiti grupoda,* ket ni Elizur+ nga anak ni Sedeur ti nangidaulo iti tribuna. 19 Ni Selumiel+ nga anak ni Zurisadai ti nangidaulo iti tribu dagiti annak ni Simeon. 20 Ni Eliasaf+ nga anak ni Deuel ti nangidaulo iti tribu dagiti annak ni Gad.

21 Pimmanaw met dagiti Cohatita a nangbagkat kadagiti alikamen iti santuario.+ Masapul a naibangonen ti tabernakulo no makadanonda iti pagkampuanda.

22 Sa pimmanaw met ti benneg ti kampo dagiti annak ni Efraim sigun kadagiti grupoda,* ket ni Elisama+ nga anak ni Amihud ti nangidaulo iti tribuna. 23 Ni Gamaliel+ nga anak ni Pedazur ti nangidaulo iti tribu dagiti annak ni Manases. 24 Ni Abidan+ nga anak ni Gideoni ti nangidaulo iti tribu dagiti annak ni Benjamin.

25 Kalpasanna, pimmanaw ti benneg ti kampo dagiti annak ni Dan sigun kadagiti grupoda,* nga isuda ti guardia iti likudan iti amin a kampo, ket ni Ahiezer+ nga anak ni Amisadai ti nangidaulo iti tribuna. 26 Ni Pagiel+ nga anak ni Okran ti nangidaulo iti tribu dagiti annak ni Aser. 27 Ni Ahira+ nga anak ni Enan ti nangidaulo iti tribu dagiti annak ni Neftali. 28 Kastoy ti urnos ti ipapanaw a suroten dagiti Israelita sigun kadagiti grupoda.*+

29 Kinuna ni Moises ken ni Hobab nga anak ni Reuel*+ a Midianita, a katugangan ni Moises: “Mapankami iti lugar nga inkari ni Jehova nga itedna kadakami.+ Kumuyogka kadakami+ ket saandakanto a baybay-an, ta inkari ni Jehova nga ipaayanna ti Israel iti naimbag a bambanag.”+ 30 Ngem insungbatna: “Saanak a kumuyog. Agsubliak iti pagiliak ken kadagiti kabagiak.” 31 Kinuna ni Moises: “Pangngaasim ta saannakami a panawan, ta ammom ti rumbeng a pagkampuanmi iti let-ang, ket sika ti mangidalan kadakami.* 32 No kumuyogka kadakami,+ magunggonaankanto met iti aniaman a bendision nga ipaay ni Jehova kadakami.”

33 Iti kasta, pimmanawda iti bantay ni Jehova+ ket nagdaliasatda iti tallo nga aldaw, nga adda iti sanguananda ti lakasa+ ti tulag ni Jehova tapno agbirokda iti lugar a paginanaanda.+ 34 No umakarda iti pagkampuan, adda iti ngatuenda ti ulep ni Jehova+ iti aldaw.

35 No mayakar ti Lakasa, kuna ni Moises: “Tumakderka, O Jehova,+ ket maiwarawara koma dagiti kabusormo ken agtalaw iti sanguanam dagiti gumurgura kenka.” 36 Ket no sumardeng dayta, ibagana: “Agsublika, O Jehova, iti di mabilang* a rinibu a tattao iti Israel.”+

11 Ita, napalalo ti panagreklamo dagiti tattao ken ni Jehova. Nakapungtot ni Jehova idi mangngegna dayta, ket nangyeg ni Jehova iti apuy a nanguram iti dadduma nga adda iti igid ti kampo. 2 Idi nagpatulong dagiti tattao ken Moises, nagpakaasi ken Jehova,+ ket naiddep ti apuy. 3 Iti kasta, napanaganan dayta a lugar iti Tabera,* ta nangyeg ni Jehova iti apuy a nanguram kadakuada.+

4 Inyebkas dagiti naglalaok a tattao*+ iti nagbabaetanda ti managimbubukodan a tarigagayda,+ ket nagsangit met dagiti Israelita ken kinunada: “Asino ti mangted iti karne a kanentayo?+ 5 Mailiwkamin kadagiti libre nga ikan a sidsidaenmi idiay Egipto, kasta met dagiti pipino, sandia, kutsay, lasona, ken bawang!+ 6 Ngem ita, agkakapsutkamin. Awanen ti sabali a makitkitami no di ti manna.”+

7 Ti manna+ ket kasla babassit a bukel ti kulantro,+ ken kasla tutot ti bedelio ti langana. 8 Agwaras dagiti tattao ket agpidutda iti manna sa tumekenda iti gilingan a pusiposen ti ima wenno baywenda iti alsong. Kalpasanna, lutuenda iti banga wenno pagbalinenda a nagbukel a tinapay,+ ket kasla nasam-it a tinapay a naikkan iti lana ti ramanna. 9 No bumaba ti linnaaw iti rabii, gumiddan met ti manna a bumaba iti aglawlaw ti kampo.+

10 Nangngeg ni Moises nga agsasangit ti tunggal pamilia ken tunggal tao iti ruangan ti toldana. Nakapungtot unay ni Jehova,+ ken nakasuron met ni Moises. 11 Gapuna, kinuna ni Moises ken ni Jehova: “Apay a parparigatem daytoy adipenmo? Ania ti naaramidak ta saanka a naragsakan kaniak, ket impabaklaymo ti problema dagitoy a tattao?+ 12 Siak kadi ti nangyinaw kadagitoy a tattao? Inyanakko kadi ida tapno ibagam, ‘Ubbaem ida, kas iti panangubba ti maysa nga agaw-awir* iti agsussuso a maladaga,’ agingga iti daga nga inkarim nga ited kadagidi ammada?+ 13 Pangalaak iti karne nga itedko kadagitoy a tattao? Ta dida agsardeng nga agsangsangit iti sanguanak, nga ibagbagada, ‘Ikkannakami iti karne a kanenmi!’ 14 Saanko a kabaelan nga aywanan dagitoy a tattao a sisiak; madagsenanak unay.+ 15 No kastoy met laeng ti ar-aramidem kaniak, nasaysayaat laengen a patayennak.+ No maasianka kaniak, dimo ipalubos a makitak ti sabali pay a didigra.”

16 Insungbat ni Jehova ken ni Moises: “Mangummongka iti 70 a lallaki kadagiti panglakayen ti Israel, dagiti bigbigem* kas panglakayen ken opisial kadagiti tattao,+ ket ipanmo ida iti tolda a pagkonsultaan, ken pagtakderem ida iti abaymo. 17 Bumabaakto+ sadiay ket makisaritaak kenka.+ Ikkatekto ti dadduma nga espiritu+ nga adda kenka ket itedko kadakuada. Tulongandakanto a mangaywan kadagitoy a tattao tapno saanka a madagsenan iti daytoy a responsabilidad.+ 18 Ibagam kadagiti tattao, ‘Dalusanyo ti bagbagiyo ta mangankayto iti karne inton bigat,+ ta nangngeg ni Jehova nga isangsangityo:+ “Asino ti mangted kadatayo iti karne a kanentayo? Nasaysayaat la koman nga addatayo idiay Egipto.”+ Sigurado nga ikkannakayo ni Jehova iti karne a kanenyo.+ 19 Mangankayto, saan laeng nga iti 1 wenno 2 wenno 5 wenno 10 wenno 20 nga aldaw, 20 no di ket iti intero a makabulan, agingga nga agruar daytan iti agongyo ken karugityon+ ta linaksidyo ni Jehova nga adda iti tengngayo, ket insangsangityo iti sanguananna: “Apay pay laeng a pimmanawtayo idiay Egipto?”’”+

21 Kalpasanna, kinuna ni Moises: “Adda kakaduak nga 600,000 a mannakigubat.+ Kasano koma nga ikkak ida iti karne nga umanay a kanenda iti makabulan? 22 Uray no maparti ti amin a taraken nga animal, umanayto kadi kadakuada? Wenno uray makalap ti amin nga ikan iti baybay, umanayto kadi a kanenda?”

23 Insungbat ni Jehova ken ni Moises: “Ababa kadi unay ti ima ni Jehova?+ Makitamto no tungpalek wenno saan ti imbagak.”

24 Rimmuar ngarud ni Moises ket imbagana kadagiti tattao ti sinao ni Jehova. Nangummong iti 70 a lallaki kadagiti panglakayen dagiti umili ket pinagtakderna ida iti aglawlaw ti tolda.+ 25 Kalpasanna, bimmaba ni Jehova iti ulep+ ket nakisarita+ ken Moises ken nangala iti dadduma nga espiritu+ nga adda kenkuana sa inkabilna iti tunggal maysa kadagiti 70 a panglakayen. Idi simreken kadakuada ti espiritu, nangrugida nga agtignay kas propeta,*+ ngem saanda a nauliten dayta.

26 Adda idi dua a lallaki nga adda pay laeng iti kampo. Ti naganda ket Eldad ken Medad. Simrek met kadakuada ti espiritu ta karaman ti naganda kadagiti nailista ngem saanda a napan iti tolda. Iti kasta, nangrugida met a nagtignay kas propeta iti uneg ti kampo. 27 Maysa nga agtutubo a lalaki ti nagtaray a nangipadamag ken Moises: “Agtigtignay da Eldad ken Medad kas propeta iti uneg ti kampo!” 28 Kinuna ni Josue+ nga anak ni Nun ken katulongan ni Moises manipud pay idi agtutubo: “Apo Moises, pasardengem ida!”+ 29 Ngem insungbat ni Moises: “Madanaganka kadi para kaniak? Saan, ta kayatko nga amin nga adipen ni Jehova ket agbalin a propeta ken ikabil ni Jehova kadakuada ti espirituna!” 30 Kalpasanna, napan ni Moises iti kampo a kaduana dagiti panglakayen ti Israel.

31 Di nagbayag, dimteng ti angin ni Jehova a nangiduron kadagiti pugo manipud baybay ket naiturongda iti aglawlaw ti kampo.+ Agarup maysa nga aldaw a pagnaen ti kalawa ti nakaiwarasanda iti maysa a sikigan ti kampo, ken kasta met iti dadduma pay a sikiganna, iti agarup dua a kasiko* iti ngatuen ti daga. 32 Iti kasta, nagmalmalem ken nagpatpatnag a nagtiltiliw dagiti tattao iti pugo. Kasta met ti nagmalmalem nga inaramidda iti simmaruno nga aldaw. Awan ti nakaala iti nakurkurang ngem 10 a homer,* ket imbilagda dagita iti aglawlaw ti kampo. 33 Ngem adda pay laeng karne kadagiti nagbaetan dagiti ngipenda, sakbay pay a matilmonda, idi nakapungtot ni Jehova, isu a nangyeg ni Jehova iti makapapatay a sakit ket adu kadakuada ti natay.+

34 Iti kasta, pinanagananda dayta a lugar iti Kibrot-hataava,*+ ta naitabon sadiay dagiti tattao a managimbubukodan ti tarigagayda.+ 35 Manipud Kibrot-hataava, nagturong dagiti tattao idiay Hazerot,+ ket nagtalinaedda sadiay.

12 Nagtanabutob da Miriam ken Aaron maibusor ken Moises gapu iti panangasawana iti maysa a Cusita.+ 2 Ibagbagada: “Ni laeng kadi Moises ti pakisarsaritaan ni Jehova? Saan kadi a makisarsarita met kadata?”+ Mangmangngeg ni Jehova ti ibagbagada.+ 3 Ni Moises idi ti kaemmaan iti amin a tao*+ iti rabaw ti daga.

4 Dagus a kinuna ni Jehova kada Moises, Aaron, ken Miriam: “Rummuarkayo a tallo ket mapankayo iti tolda a pagkonsultaan.” Gapuna, rimmuarda a tallo. 5 Bimmaba ni Jehova iti adigi nga ulep+ ket nagtakder iti ruangan ti tolda sa inayabanna da Aaron ken Miriam. Immasidegda a dua. 6 Kinunana kadakuada: “Pangngaasiyo ta denggendak. No adda propeta ni Jehova kadakayo, ipakaammok kenkuana iti sirmata no asinoak,+ ket makisaritaak kenkuana iti tagtagainep.+ 7 Ngem saan a kasta ken Moises nga adipenko! Naitalek kenkuana ti intero nga ilik.*+ 8 Makisarsaritaak kenkuana iti rupanrupa,*+ saan a babaen ti burburtia; ket makitkitana ti langa ni Jehova. Isu nga apay a dikay nagbuteng nga agtanabutob maibusor ken Moises nga adipenko?”

9 Nakapungtot ni Jehova, ket pimmanaw kadakuada. 10 Immadayo ti ulep nga adda iti ngatuen ti tolda, ket naaddaan ni Miriam iti kukutel a kas kapuraw ti niebe.+ Timmaliaw ni Aaron ket nakitana nga agkukutelen+ ni Miriam. 11 Dagus a kinuna ni Aaron ken ni Moises: “Pangngaasim, apo! Dinakami koma dusaen gapu iti daytoy a basolmi. Minamaag ti inaramidmi! 12 Pangngaasim ta dimo baybay-an ti kabsatko a kasla natay a nayanak, a narunoten ti kagudua ti bagina!” 13 Impakaasi ni Moises ken ni Jehova: “Pangngaasim, O Dios, ta paimbagem! Pangngaasim!”+

14 Insungbat ni Jehova ken ni Moises: “No ti rupa ni Miriam ket tupraan ni amana, saan kadi a maibabain iti pito nga aldaw? Ikuarentinasmo iti pito nga aldaw iti ruar ti kampo,+ ket kalpasanna, mabalinton a sumrek.” 15 Nakuarentinas ngarud ni Miriam iti ruar ti kampo iti pito nga aldaw,+ ket saan nga immakar dagiti tattao agingga a simrek ni Miriam iti kampo. 16 Kalpasanna, pimmanaw dagiti tattao idiay Hazerot+ ket nagkampoda idiay let-ang ti Paran.+

13 Kinuna ni Jehova ken ni Moises: 2 “Mangpilika iti panguluen+ iti tunggal tribu+ ti amana ket ibaonmo ida a mangespia* iti Canaan nga itedko kadagiti Israelita.”

3 Gapuna, imbaon ida ni Moises manipud iti let-ang ti Paran+ kas imbilin ni Jehova. Amin dagitoy a lallaki ket panguluen dagiti Israelita. 4 Dagitoy ti naganda: iti tribu ni Ruben, ni Sammua nga anak ni Zacur; 5 iti tribu ni Simeon, ni Safat nga anak ni Hori; 6 iti tribu ni Juda, ni Caleb+ nga anak ni Jefune; 7 iti tribu ni Isacar, ni Igal nga anak ni Jose; 8 iti tribu ni Efraim, ni Hosea+ nga anak ni Nun; 9 iti tribu ni Benjamin, ni Palti nga anak ni Rafu; 10 iti tribu ni Zabulon, ni Gadiel nga anak ni Sodi; 11 iti tribu ni Jose,+ para iti tribu ni Manases,+ ni Gaddi nga anak ni Susi; 12 iti tribu ni Dan, ni Amiel nga anak ni Gemali; 13 iti tribu ni Aser, ni Setur nga anak ni Miguel; 14 iti tribu ni Neftali, ni Nabi nga anak ni Vofsi; 15 iti tribu ni Gad, ni Geuel nga anak ni Maki. 16 Dagitoy ti nagan dagiti lallaki nga imbaon ni Moises a mangespia iti daga. Josue*+ ti impanaganna ken ni Hosea nga anak ni Nun.

17 Idi imbaon ida ni Moises a mangespia iti Canaan, kinunana kadakuada: “Mapankayo idiay Negeb, sa sumang-atkayo iti kabambantayan.+ 18 Kitaenyo no ania a kita ti daga dayta+ ken no napigsa wenno nakapuy dagiti tattao sadiay, no bassit wenno aduda, 19 no nasayaat ti daga wenno saan, ken no dagiti siudad a pagnanaedanda ket napaderan wenno saan. 20 Ammuenyo met no nadam-eg* wenno natikag*+ ti daga ken no adda kaykayona wenno awan. Papigsaenyo ti pakinakemyo+ ket mangalakayo iti sumagmamano a bunga ti daga.” Panawen idi ti panagluom ti damo a bunga dagiti ubas.+

21 Gapuna, nagrubbuatda iti let-ang ti Zin+ ket napanda idiay Rehob,+ iti asideg ti Lebo-hamat.*+ 22 Idi napanda idiay Negeb, dimtengda idiay Hebron,+ a pagnanaedan dagiti Anakim+ a da Ahiman, Sesai, ken Talmai.+ Ti Hebron ket naibangon pito a tawen sakbay ti Zoan idiay Egipto. 23 Idi nakadanonda idiay Tanap* ti Escol,+ nangsip-akda iti sanga nga addaan iti sangaraay nga ubas, a bagkaten ti dua a lallaki babaen ti assiw. Nangalada pay iti sumagmamano a bunga ti granada ken higos.+ 24 Naawagan dayta a lugar iti Tanap* ti Escol,*+ gapu iti sangaraay nga ubas a sinip-ak dagiti Israelita.

25 Kalpasan ti 40 nga aldaw,+ nagawid dagiti napan nangespia iti daga. 26 Dimmatagda kada Moises ken Aaron ken iti amin nga Israelita iti let-ang ti Paran, idiay Kades.+ Impadamagda iti amin nga Israelita ti nakitada ken dagiti bunga ti daga. 27 Kinunada ken Moises: “Simrekkami iti daga a nangibaonam kadakami. Pudno a pagay-ayusan ti gatas ken diro,+ ket dagitoy ti bungana.+ 28 Ngem napipigsa dagiti agnanaed sadiay, ken nagdadakkel dagiti napaderan a siudadda. Nakitami met sadiay dagiti Anakim.+ 29 Agnanaed dagiti Amalekita+ idiay Negeb,+ ket dagiti Heteo, Jebuseo,+ ken Amoreo+ iti kabambantayan, ken dagiti met Canaanita+ iti igid ti baybay+ ken iti igid ti Jordan.”

30 Inkagumaan ni Caleb a pagkalmaen dagiti Israelita tapno dumngegda ken Moises, ket kinunana: “Intayo a dagus ket matagikuatayto ti daga, ta sigurado a maparmektayo dayta.”+ 31 Ngem kinuna dagiti lallaki a kaduana: “Ditay kabaelan dagidiay a tattao, ta napigpigsada ngem datayo.”+ 32 Intultuloyda ti nangipadamag iti dakes+ kadagiti Israelita maipapan iti daga nga inespiada, ket kinunada: “Napeggad ti daga nga inespiami ket sigurado a mataykayo sadiay, ken sobra ti katayag+ ti amin a lallaki a nakitami. 33 Nakitami sadiay dagiti higante, nga annak ni Anak,+ a nagtaud* kadagiti Nefilim, ket kaskam la dudon no maidilig kadakuada, ken kasta met ti panagkitada kadakami.”

14 Kalpasanna, nagpukpukkaw ti amin nga Israelita ken nagpatpatnagda a nagsangit.+ 2 Intantanabutob ti amin nga Israelita kada Moises ken Aaron:+ “Nataykami la koman idiay Egipto, wenno ditoy let-ang! 3 Apay nga ipannakami ni Jehova iti dayta a daga tapno mataykami iti espada?+ Matiliwto kas adipen dagiti assawa ken annakmi.+ Nasaysayaat laengen nga agsublikami idiay Egipto!”+ 4 Ibagbagada pay iti maysa ken maysa: “Mangdutoktayo iti lidertayo ket agsublitayo idiay Egipto!”+

5 Gapuna, nagruknoy da Moises ken Aaron iti Dios iti sanguanan ti intero nga Israel. 6 Ni Josue+ nga anak ni Nun ken ni Caleb+ nga anak ni Jefune, a karaman kadagidiay nangespia iti daga, pinigisda dagiti badoda, 7 ket kinunada iti amin nga Israelita: “Nakasaysayaat ti daga nga inespiami.+ 8 No maragsakan ni Jehova kadatayo, sigurado nga ipan ken itedna dayta kadatayo, maysa a daga a pagay-ayusan ti gatas ken diro.+ 9 Ngem saankayo nga agrebelde ken Jehova ken dikay agbuteng kadagiti agnanaed iti daga,+ ta abakentayto ida.* Awanen ti mangsalsalaknib kadakuada, ken adda kadatayo ni Jehova.+ Dikay agbuteng kadakuada.”

10 Nagsasaritaan ti intero nga Israel nga uboren ida.+ Ngem nagparang ti dayag ni Jehova iti ngatuen ti tolda a pagkonsultaan iti sanguanan ti amin nga Israelita.+

11 Kinuna ni Jehova ken ni Moises: “Agingga kaano a saandak a raemen dagitoy a tattao,+ ken kasano kabayag a saandak a patien uray no nakitada dagiti milagro nga inaramidko iti tengngada?+ 12 Mangyegak iti makapapatay a sakit ket dadaelek ida, ngem pagbalinenka a maysa a nasion a dakdakkel ken napigpigsa ngem kadakuada.”+

13 Insungbat ni Moises ken ni Jehova: “Inruarmo dagitoy a tattao idiay Egipto babaen ti pannakabalinmo. Inton madamag dagiti Egipcio ti inaramidmo,+ 14 ipadamagdanto dayta kadagiti agnanaed iti daytoy a daga. Nadamagda met, O Jehova, nga addaka iti tengnga dagitoy a tattao+ ken nagparangka kadakuada iti rupanrupa.+ Sika ni Jehova, ket nangpataudka iti ulep iti ngatuen ti kampoda ken addaka iti sanguananda babaen ti sinan-adigi nga ulep iti aldaw ken sinan-adigi nga apuy iti rabii.+ 15 No mammaminsan* a papatayem dagitoy a tattao, ibaganto dagiti nasion a nakadamag iti kinalatakmo: 16 ‘Saan a kabaelan ni Jehova nga ipan dagitoy a tattao iti daga nga inkarina nga ited kadakuada, isu a pinapatayna ida iti let-ang.’+ 17 Pangngaasim, O Jehova, ta ipakitam ti dakkel a pannakabalinmo, kas inkarim idi kinunam: 18 ‘Ni Jehova ket nabannayat nga agpungtot ken dakkel ti napudno nga ayatna,*+ manangpakawan iti kamali ken biddut, ngem sigurado a dusaenna dagiti nakabasol. Dusaenna dagiti annak, appoko, ken appoko iti tumeng gapu iti kamali dagiti amma.’+ 19 Pangngaasim ta pakawanem ti kamali dagitoy a tattao maitunos iti dakkel a napudno nga ayatmo, kas iti panangpakawanmo kadakuada manipud iruruarda idiay Egipto agingga ita.”+

20 Iti kasta, kinuna ni Jehova: “Pakawanek ida kas imbagam.+ 21 Ngem iti sabali a bangir, isapatak kas sibibiagak, mapnonto ti intero a daga iti dayag ni Jehova.+ 22 Amin a tattao a nakakita iti dayagko ken kadagiti milagro+ nga inaramidko idiay Egipto ken iti let-ang ngem agtultuloy a mangsubsubok kaniak+ iti 10 a daras itan ken saan a dimngeg iti timekko+ 23 didanto pulos makita ti daga nga inkarik kadagidi ammada. Awan uray maysa kadagidiay saan a mangraraem kaniak ti makakitanto iti dayta.+ 24 Ngem gapu ta naiduma ti espiritu ti adipenko a ni Caleb+ ken naimpusuan nga agtultulnog kaniak, sigurado nga ipankonto iti daga a napananna, ket tagikuaento dayta ti kaputotanna.+ 25 Gapu ta agnanaed dagiti Amalekita ken Canaanita+ iti tanap,* agsublikayo inton bigat ket agturongkayo iti let-ang, a dumalankayo iti Nalabaga a Baybay.”+

26 Kinuna pay ni Jehova kada Moises ken Aaron: 27 “Agingga kaano nga agtantanabutob kaniak dagitoy a dakes nga Israelita?+ Nangngegko ti itantanabutobda maibusor kaniak.+ 28 Ibagam kadakuada, ‘“Isapatak kas sibibiagak,” kuna ni Jehova, “aramidekto kadakayo ti nangngegko nga insaoyo!+ 29 Mataykayto iti daytoy a let-ang,+ dakayo amin a nairehistro nga agtawen iti 20 nga agpangato a nagtanabutob maibusor kaniak.+ 30 Awanto kadakayo ti makastrek iti daga nga inkarik* a pagnaedanyo,+ malaksid kada Caleb nga anak ni Jefune ken ni Josue nga anak ni Nun.+

31 “‘“Dagiti annakyo, a kunayo a matiliwto kas adipen,+ ipankonto ida iti daga a linaksidyo ket makitadanto dayta.+ 32 Ngem mataykayto iti daytoy a let-ang. 33 Agbalinto nga agpaspastor iti let-ang dagiti annakyo iti 40 a tawen,+ ket sagabaendanto ti diyo panagmatalek* agingga a mataykayo amin iti let-ang.+ 34 Sigun iti bilang dagiti aldaw a panangespiayo iti daga, 40 nga aldaw,+ maysa nga aldaw para iti maysa a tawen, wen, maysa nga aldaw para iti maysa a tawen, lak-amenyonto iti 40 a tawen+ ti resulta dagiti biddutyo tapno maammuanyo ti pagbanagan ti panangbusoryo kaniak.

35 “‘“Siak, ni Jehova, ti nangibaga iti dayta. Kastoy ti aramidekto kadagitoy dakes a tattao a naguummong maibusor kaniak: Agpatinggadanto iti daytoy a let-ang, ket mataydanto ditoy.+ 36 Dagiti lallaki nga imbaon ni Moises a nangespia iti daga ken nakaigapuan ti panagtanabutob kaniak ti intero nga Israel idi dakes ti impadamagda maipapan iti daga,+ 37 wen, madusa ken matayto iti sanguanan ni Jehova dagiti lallaki a nangyeg iti dakes a damag maipapan iti daga.+ 38 Ngem sigurado nga agtultuloyto nga agbiag ni Josue nga anak ni Nun ken ni Caleb nga anak ni Jefune, a karaman kadagiti nangespia iti daga.”’”+

39 Nagleddaang unay ti amin nga Israelita idi imbaga dagitoy ni Moises. 40 Bimmangonda met a nasapa iti bigat ket pinadasda ti sumang-at iti tuktok ti bantay, a kinunada: “Nakasaganakamin a mapan iti lugar nga imbaga ni Jehova, ta nagbasolkami.”+ 41 Ngem kinuna ni Moises: “Apay a sukirenyo ti imbilin ni Jehova? Dikayto agballigi. 42 Dikay sumang-at, ta awan kadakayo ni Jehova. Abakendakayto dagiti kabusoryo.+ 43 Ta makilabanto kadakayo dagiti Amalekita ken Canaanita,+ ket mataykayto iti espada. Gapu ta pinanawanyo ni Jehova, awanto kadakayo ni Jehova.”+

44 Nupay kasta, sidadarasudos a simmang-atda iti bantay,+ ngem nagbati ni Moises ken ti lakasa ti tulag ni Jehova iti tengnga ti kampo.+ 45 Iti kasta, simmalog dagiti Amalekita ken Canaanita nga agnanaed iti dayta a bantay ket pinapatayda ida, ken naiwarawarada agingga idiay Horma.+

15 Kinuna pay ni Jehova ken ni Moises: 2 “Ibagam kadagiti Israelita, ‘Inton makadanonkayo iti daga nga itedko a pagnaedanyo+ 3 ken mangidatonkayo ken Jehova iti baka, karnero, wenno kalding—daton man a mapuoran,+ daton a pangtungpal iti espesial a kari, boluntario a daton,+ wenno daton bayat dagiti piesta,+ a mangpataud iti makaay-ayo* a banglo ken Jehova+— 4 daydiay mangipaay iti daton ket masapul met a mangipaay ken Jehova iti daton a bukbukel a napino nga arina,+ nga apagkapullo ti maysa nga efa,* a nalaokan iti lana a kakapat ti maysa a hin.* 5 Mangipaaykayo met iti arak kas daton nga inumen, a kakapat ti maysa a hin, a karaman iti daton a mapuoran+ wenno para iti tunggal daton nga urbon a kalakian a karnero. 6 No met kalakian a karnero ti maidaton, pakuyogam iti daton a bukbukel a napino nga arina a dua nga apagkapullo ti maysa nga efa a nalaokan iti lana a kakatlo ti maysa a hin. 7 Mangipaaykayo met iti arak kas daton nga inumen, a kakatlo ti maysa a hin, a mangpataud iti makaay-ayo* a banglo ken Jehova.

8 “‘Ngem no mangipaaykayo iti kalakian a baka kas daton a mapuoran,+ daton a pangtungpal iti espesial a kari,+ wenno daton a pakikappia ken Jehova,+ 9 pakuyoganyo ti kalakian a baka iti daton a bukbukel+ a napino nga arina a tallo nga apagkapullo ti maysa nga efa a nalaokan iti lana a kagudua a hin. 10 Mangipaaykayo met iti arak kas daton nga inumen,+ a kagudua a hin, kas daton a mapuoran a makaay-ayo* ti banglona ken Jehova. 11 Kastoy ti rumbeng a maaramid iti tunggal kalakian a baka wenno kalakian a karnero wenno urbon a kalakian a karnero wenno kalding. 12 Mano man ti idatonyo, kastoy ti aramidenyo para iti tunggal maysa, sigun iti bilangda. 13 Kastoy ti aramiden ti tunggal Israelita no mangipaay iti daton a mapuoran, a makaay-ayo* ti banglona ken Jehova.

14 “‘No ti maysa a ganggannaet a makipagnanaed kadakayo iti adun a henerasion ket mangipaay met ken Jehova iti daton a mapuoran a makaay-ayo* ti banglona, aramidenna met ti kas iti aramidenyo.+ 15 Agpada ti paglintegan a surotenyo agraman dagiti ganggannaet a residente. Daytoy ti agnanayon a paglintegan iti amin a henerasionyo. Saan a naiduma kadakayo ti ganggannaet iti sanguanan ni Jehova.+ 16 Agpada ti linteg ken pangngeddeng a surotenyo agraman ti ganggannaet a residente.’”

17 Kinuna pay ni Jehova ken ni Moises: 18 “Ibagam kadagiti Israelita, ‘Inton makadanonkayo iti daga a pangipanak kadakayo 19 ken mangankayo iti aniaman a produkto* ti daga,+ masapul nga idatonyo ken Jehova ti dadduma kadagita. 20 Masapul nga idatonyo ti umuna+ a nakersang nga arina kas sinansingsing a tinapay. Idatonyo dayta kas iti panangidatonyo iti produkto a naggapu iti pagirikan. 21 Iti amin a henerasionyo, idatonyo ken Jehova ti dadduma nga umuna a nakersang nga arinayo.

22 “‘No agkamalikayo ken saanyo a masurot amin dagitoy a bilin nga imbaga ni Jehova ken ni Moises, 23 wen, amin nga imbilin ni Jehova babaen ken Moises manipud iti aldaw a panangibilin ni Jehova ken agtultuloy agingga kadagiti sumaruno a henerasionyo, 24 ken no saan nga ammo ti intero nga Israel daytoy a kamali, masapul a mangtedda iti maysa nga urbon a kalakian a baka kas daton a mapuoran a makaay-ayo* ti banglona ken Jehova a mapakuyogan iti daton a bukbukel ken daton nga inumen maitunos iti naibilin,+ ken maysa nga urbon a kalding kas daton gapu iti basol.+ 25 Idatag daytoy ti padi tapno maabbongan ti basol ti amin nga Israelita sa mapakawanda,+ ta nagkamalida, ket nangyegda ken Jehova iti daton a mapuoran ken nangipaayda ken Jehova iti daton gapu iti basolda. 26 Mapakawanto ti amin nga Israelita ken ti ganggannaet a residente ta di inggagara a nagkamalida.

27 “‘No adda asinoman a di inggagara a nakabasol, masapul a mangipaay iti kabaian a kalding nga agarup maysa ti tawenna kas daton gapu iti basol.+ 28 Idatag daytoy ti padi tapno maabbongan ti di inggagara a basol dayta a tao iti sanguanan ni Jehova, ket mapakawan.+ 29 No maipapan kadagiti Israelita ken ganggannaet a residente, masapul nga agpada ti paglinteganyo no adda maaramidanyo a di inggagara a basol.+

30 “‘Ngem masapul a mapapatay ti mangigagara nga agbasol,+ Israelita man wenno ganggannaet a residente, a mangumsi ken Jehova. 31 Gapu ta linaisna ti sao ni Jehova ken sinukirna ti bilinna, masapul a mapapatay dayta a tao.+ Madusanto gapu iti basolna.’”+

32 Bayat ti kaadda dagiti Israelita iti let-ang, nakakitada iti lalaki nga agum-ummong kadagiti kayo iti aldaw ti Sabbath.+ 33 Dagidiay nakakita kenkuana nga agum-ummong iti kayo impanda isuna kada Moises ken Aaron ken iti amin nga Israelita. 34 Impupokda+ ta saanda pay nga ammo ti masapul a maaramid kenkuana.

35 Kinuna ni Jehova ken ni Moises: “Masapul a mapapatay ti lalaki,+ ken uboren dagiti Israelita iti ruar ti kampo.”+ 36 Gapuna, impan dagiti Israelita iti ruar ti kampo ket inuborda agingga a natay, kas imbilin ni Jehova ken ni Moises.

37 Intuloy a kinuna ni Jehova ken ni Moises: 38 “Ibagam kadagiti Israelita a mangaramidda iti baruyboy iti gayadan dagiti badoda iti amin a henerasionda, ken mangikabilda iti asul a lubid iti ngatuen ti baruyboy ti badoda.+ 39 ‘Masapul nga adda daytoy a baruyboy iti gayadan ti badoyo tapno makitayo ken malagipyo ti amin nga imbilin ni Jehova ket tungpalenyo dagita.+ Saanyo a suroten ti puso ken matayo, a mangimpluensia kadakayo nga agdayaw iti sabali a dios.*+ 40 Daytoy ti tumulong kadakayo a manglagip ken mangtungpal iti amin a bilinko ket agbalinkayo a nasantuan iti Diosyo.+ 41 Siak ni Jehova a Diosyo, a nangiruar kadakayo idiay Egipto tapno agbalinak a Diosyo.+ Siak ni Jehova a Diosyo.’”+

16 Kalpasanna, ni Kore+ nga anak ni Izar,+ nga anak ni Cohat,+ nga anak ni Levi,+ ket dimmasig kada Datan ken Abiram nga annak ni Eliab,+ ken ni On nga anak ni Peleth, a kaputotan ni Ruben.+ 2 Bimmusorda ken Moises a kaduada ti 250 a lallaki nga Israelita, dagiti panguluen, napili, ken nalatak a lallaki. 3 Gapuna, naguummongda maibusor+ kada Moises ken Aaron, ket kinunada: “Naumakamin kadakayo! Nasantuan ti intero nga Israel,+ ket adda kadakuada ni Jehova.+ Apay nga insaadyo ti bagiyo a nangatngato ngem iti ili ni Jehova?”

4 Idi nangngeg dayta ni Moises, dagus a nagruknoy. 5 Kalpasanna, kinunana ken Kore ken kadagiti kakaduana: “Ipakaammonto ni Jehova inton bigat no asino ti kukuana+ ken no asino ti nasantuan ken no asino ti rumbeng nga umasideg kenkuana,+ ket umasidegto ti asinoman a pilienna.+ 6 Daytoy ti aramidenyo: Mangalakayo iti pagikkan iti insienso,+ sika Kore ken ti amin a kakaduam,+ 7 ket inton bigat, kargaanyo dagita iti beggang ken insienso iti sanguanan ni Jehova. Ti lalaki a pilien ni Jehova+ isunto ti nasantuan. Aglablabeskayon, dakayo nga annak ni Levi!”+

8 Kinuna pay ni Moises ken ni Kore: “Pangngaasiyo ta dumngegkayo, dakayo nga annak ni Levi. 9 Tagtagibassitenyo kadi ti panangpili kadakayo ti Dios ti Israel manipud iti amin nga Israelita+ tapno agserbikayo iti tabernakulo ni Jehova ken agtakderkayo iti sanguanan ti intero nga Israel tapno agserbikayo kadakuada,+ 10 ken inyasidegnakayo kenkuana agraman ti amin a kakabsatyo nga annak ni Levi? Kayatyo met kadi nga agawen ti kinapadi?+ 11 Gapu iti daytoy, busbusorenyo ni Jehova, sika ken ti amin a kakaduam. Ket asino ni Aaron tapno pagtanabutobanyo?”+

12 Kalpasanna, pinaayaban ni Moises da Datan ken Abiram+ nga annak ni Eliab, ngem kinunada: “Saanmi a kayat ti umay! 13 Saan pay la kadi nga umanay ti panangiruarmo kadakami iti daga a pagay-ayusan ti gatas ken diro tapno mataykami iti let-ang?+ Sa ita, kayatnakami pay kadi nga iturayan? 14 Saannakami nga impan iti aniaman a daga a pagay-ayusan ti gatas ken diro+ wenno naikkan iti tawid a talon ken kaubasan. Kayatmo kadi a kasla bulsek* a sumursurot kenka dagidiay a lallaki? Saanmi a kayat ti umay!”

15 Gapuna, nakapungtot ni Moises ket kinunana ken Jehova: “Saanmo nga awaten ti datonda a bukbukel. Awan uray maysa nga asno ti innalak kadakuada, ken awan uray maysa ti dinangrak kadakuada.”+

16 Kinuna ngarud ni Moises ken ni Kore: “Dumatagka ken ti amin a kakaduam iti sanguanan ni Jehova inton bigat—sika, isuda, ken ni Aaron. 17 Itugot ti tunggal maysa kadakayo ti pagikkanna iti insienso ket kargaanyo iti insienso, sa idatagyo iti sanguanan ni Jehova, 250 a pagikkan iti insienso, kasta met ti pagikkanyo ken ni Aaron iti insienso.” 18 Gapuna, intugot ti tunggal maysa kadakuada ti pagikkanna iti insienso, kinargaanda iti insienso, sa nagtakderda iti ruangan ti tolda a pagkonsultaan iti abay da Moises ken Aaron. 19 Idi naummong ni Kore dagiti kakaduana+ iti ruangan ti tolda a pagkonsultaan, nagparang ti dayag ni Jehova iti intero nga Israel.+

20 Kinuna ni Jehova kada Moises ken Aaron: 21 “Suminakayo iti daytoy a grupo, ta papatayek ida a mamimpinsan.”+ 22 Iti kasta, nagruknoyda ket kinunada: “O Dios, a mangipapaay iti biag iti amin a tattao,*+ agpungtotka kadi iti intero nga Israel gapu laeng iti basol ti maysa a tao?”+

23 Insungbat ni Jehova ken ni Moises: 24 “Ibagam iti intero nga Israel: ‘Adaywanyo ti aglawlaw dagiti tolda da Kore, Datan, ken Abiram!’”+

25 Gapuna, immasideg ni Moises kada Datan ken Abiram, ket simmurot kenkuana dagiti panglakayen+ ti Israel. 26 Kinunana iti intero nga Israel: “Pangngaasiyo ta adaywanyo dagiti tolda dagitoy a dakes a lallaki ket dikay sagiden ti aniaman a kukuada, tapno saankayo a mairaman a matay gapu iti amin a basolda.” 27 Dagus nga inadaywanda dagiti tolda da Kore, Datan, ken Abiram. Rimmuar da Datan ken Abiram ket nagtakderda iti ruangan dagiti toldada, agraman dagiti assawa ken annakda.

28 Kalpasanna, kinuna ni Moises: “Babaen iti daytoy, maammuanyonto nga imbaonnak ni Jehova a mangaramid amin kadagitoy, a saan a nagtaud iti bukodko a nakem:* 29 No matay dagitoy a tattao a kas iti natural nga ipapatay ti tao ken no pareho ti dusada iti amin a tattao, saannak nga imbaon ni Jehova.+ 30 Ngem no mangaramid ni Jehova iti nakaskasdaaw a banag ket agungap* ti daga ken alun-onenna ida a sibibiag iti Tanem* agraman ti amin a kukuada, maammuanyonto ngarud nga awan ti panagraem dagitoy a lallaki ken ni Jehova.”

31 Idi naibaganan amin dagitoy, nagbirri ti daga a pagtaktakderanda.+ 32 Nagungap* ti daga ket inalun-onna ida, agraman ti sangakabbalayanda ken amin a dimmasig ken Kore+ ken ti amin a sanikuada. 33 Iti kasta, natnagda amin a sibibiag iti Tanem,* ket nagkaem ti daga, isu a natayda iti tengnga ti Israel.+ 34 Nagtataray ti amin nga Israelita nga adda iti aglawlawda, ket impukpukkawda: “Mabutengkami amangan no alun-onennakami ti daga!” 35 Kalpasanna, adda apuy manipud ken Jehova+ ket inuramna ti 250 a lallaki nga agidatdaton iti insienso.+

36 Kinuna ni Jehova ken ni Moises: 37 “Ibagam ken Eleazar nga anak ni Aaron a padi nga alaenna dagiti pagikkan iti insienso+ manipud iti apuy, ta nasantuan dagita. Ibagam pay nga iwarsina dagiti beggang iti adayo. 38 Dagiti pagikkan iti insienso dagiti lallaki a napapatay gapu iti basolda* ket mapagbalin a naingpis a plata a metal tapno maikalupkop iti altar,+ ta naidatag dagita iti sanguanan ni Jehova, isu a nagbalinda a nasantuan. Agserbi dagita kas pakdaar kadagiti Israelita.”+ 39 Gapuna, innala ni Eleazar a padi dagiti gambang a pagikkan iti insienso nga indatag dagidiay nauram, ket pinitpitda dagita tapno maikalupkop iti altar, 40 kas imbilin kenkuana ni Jehova babaen ken Moises. Nagserbi dayta kas pakdaar kadagiti Israelita nga asinoman a saan nga autorisado* ken saan a kaputotan ni Aaron ket di rumbeng nga umasideg tapno mangpuor iti insienso iti sanguanan ni Jehova,+ ken awan koma ti mangtulad ken Kore ken kadagiti kakaduana.+

41 Iti simmaganad nga aldaw, intanabutob ti amin nga Israelita kada Moises ken Aaron:+ “Pinapatayyo dagiti adipen ni Jehova.” 42 Idi naguummong ti intero nga Israel maibusor kada Moises ken Aaron, simmangoda iti tolda a pagkonsultaan ket inabbongan dayta ti ulep, sa nagparang ti dayag ni Jehova.+

43 Immasideg da Moises ken Aaron iti ruangan ti tolda a pagkonsultaan,+ 44 ket kinuna ni Jehova ken ni Moises: 45 “Adaywanyo dagitoy a tattao, ta papatayek ida a mamimpinsan.”+ Iti kasta, nagruknoyda.+ 46 Kinuna ni Moises ken ni Aaron: “Alaem ti pagikkan iti insienso ket kargaam iti apuy manipud iti altar+ sa parabawam iti insienso. Darasem ti mapan iti tengnga dagiti Israelita ket mangaramidka iti seremonia a pangabbong iti basolda,+ ta napalalo ti pungtot ni Jehova. Nangrugin ti didigra!” 47 Dagus nga inaramid ni Aaron ti imbaga ni Moises. Nagtaray a napan iti tengnga dagiti Israelita ket nakitana a nangrugin a madidigra dagiti tattao. Gapuna, inkabilna ti insienso iti pagikkan iti insienso ket nangaramid iti seremonia a pangabbong iti basol dagiti tattao. 48 Nagtultuloy a nagtakder iti nagbabaetan dagiti natay ken dagiti sibibiag ket simmardeng met laeng ti didigra. 49 Agdagup iti 14,700 ti natay iti didigra, malaksid pay kadagidiay natay maigapu ken Kore. 50 Nagsardengen ti didigra idi nagsubli ni Aaron iti ayan ni Moises iti ruangan ti tolda a pagkonsultaan.

17 Kinuna ni Jehova ken ni Moises: 2 “Kasaritam dagiti Israelita ket mangalaka iti maysa a sarukod para iti tunggal tribu, manipud kadagiti panguluen ti tunggal tribu,+ 12 a sarukod amin. Isuratmo iti tunggal sarukod ti nagan ti makinkukua iti dayta. 3 Isuratmo ti nagan ni Aaron iti sarukod ni Levi, gapu ta maysa laeng ti sarukod ti panguluen ti tunggal tribu. 4 Ikabilmo dagiti sarukod iti tolda a pagkonsultaan iti sanguanan ti Testimonia,+ a kanayon a pagparparangak kadakayo.+ 5 Agsaringitto ti sarukod ti lalaki a piliek,+ ken pagsardengekto ti panagtanabutob kaniak dagiti Israelita,+ a makagapu met iti panagtanabutobda kadakayo.”+

6 Gapuna, kinasarita ni Moises dagiti Israelita, ket inted kenkuana ti amin a panguluen dagiti sarukodda—maysa a sarukod para iti panguluen ti tunggal tribu, 12 amin—agraman ti sarukod ni Aaron. 7 Kalpasanna, inkabil ni Moises dagita a sarukod iti sanguanan ni Jehova iti tolda ti Testimonia.

8 Idi simrek ni Moises iti tolda ti Testimonia iti sumaruno nga aldaw, nakitana a nagsaringit ti sarukod ni Aaron para iti tribu ni Levi, ken agtultuloy nga agsaringit, agsabong, ken agbunga iti naluom nga almendro. 9 Inruar ni Moises ti amin a sarukod iti sanguanan ni Jehova ket impakitana iti amin nga Israelita. Kinitada dagita, ket innala ti tunggal lalaki ti sarukodna.

10 Kalpasanna, kinuna ni Jehova ken ni Moises: “Isublim ti sarukod ni Aaron+ iti sanguanan ti Testimonia ket idulinmo kas pakdaar+ kadagidiay agrebelde.+ Iti kasta, agsardengdan nga agtanabutob kaniak tapno saanda a matay.” 11 Dagus nga inaramid ni Moises ti imbilin ni Jehova. Kasta ti inaramidna.

12 Kinuna dagiti Israelita ken ni Moises: “Ita, mataykamin, sigurado a mataykamin, maibuskami amin! 13 Matay ti asinoman nga umasideg iti tabernakulo ni Jehova!+ Mataytayo kadi amin?”+

18 Kalpasanna, kinuna ni Jehova ken ni Aaron: “Sika ken dagiti annak ken kaputotam ti manungsungbatto iti aniaman a basol mainaig iti santuario,+ ken sika ken dagiti annakmo ti manungsungbatto iti aniaman a basol mainaig iti kinapadiyo.+ 2 Iyasidegmo met dagiti kakabsatmo iti tribu ni Levi, ti tribu ni amam, tapno makikaduada kenka ken kadagiti annakmo nga agserbi+ iti sanguanan ti tolda ti Testimonia.+ 3 Masapul nga itungpalda ti responsabilidadda kenka ken ti amin a panagserbi iti tolda.+ Ngem saanda nga umasideg kadagiti alikamen iti nasantuan a disso ken iti altar, tapno saanda a matay ken saanka met a matay.+ 4 Tulongandaka ken itungpalda ti responsabilidadda iti tolda a pagkonsultaan ken iti amin a panagserbi iti tolda, ket awan ti umasideg kadakayo a saan nga autorisado.*+ 5 Masapul nga itungpalyo ti responsabilidadyo iti nasantuan a disso+ ken iti altar,+ tapno saanakon a makapungtot+ iti Israel. 6 Innalak dagiti kakabsatyo, dagiti Levita, manipud kadagiti Israelita kas sagut kadakayo.+ Naitedda ken Jehova nga agserbi iti tolda a pagkonsultaan.+ 7 Sika ken dagiti annakmo ti mangaramid kadagiti trabahoyo kas papadi mainaig iti altar ken iti adda iti uneg ti kortina,+ ket dakayo ti makinresponsabilidad iti daytoy.+ Intedko kadakayo kas sagut ti panagserbi kas papadi, ket rumbeng a mapapatay ti asinoman nga umasideg a saan nga autorisado.”*+

8 Kinuna pay ni Jehova ken ni Aaron: “Sika ti pangitalkak kadagiti kontribusion a naited kaniak.+ Intedko kenka ken kadagiti annakmo ti dadduma a paset ti amin a nasantuan a banag nga inted dagiti Israelita kas bingayyo iti agnanayon.+ 9 Kukuayo dagitoy manipud kadagiti nasantuan a daton a mapuoran: dagiti itedda kaniak a daton, a pakairamanan ti daton a bukbukel+ ken daton gapu iti basol+ ken daton gapu iti biddut.+ Nasantuan unay dagita kenka ken kadagiti annakmo. 10 Kanem dayta iti nasantuan unay a disso.+ Mabalin a mangan ti tunggal lalaki. Agbalin dayta a nasantuan a banag.+ 11 Kukuam pay dagitoy: dagiti sagut nga ited+ dagiti Israelita agraman ti amin a daton a mailili.+ Intedko dagita kenka ken kadagiti annakmo a lallaki ken babbai, kas bingayyo iti agnanayon.+ Mabalin a mangan ti asinoman a nadalus nga adda iti balaymo.+

12 “Itedkonto kenka ti amin a kasayaatan a lana ken amin a kasayaatan a baro nga arak ken bukbukel, ti umuna a bungbunga+ a maapit dagiti Israelita nga itedda ken Jehova.+ 13 Kukuamto dagiti umuna a naluom a bunga ti dagada, nga itedda ken Jehova.+ Mabalin a mangan ti asinoman a nadalus nga adda iti balaymo.

14 “Kukuamto ti amin a banag a nairanta para iti sagrado* a panggep iti Israel.+

15 “Kukuamto ti tunggal inauna nga anak ti amin a sibibiag a parsua*+ a maidaton ken Jehova, tao man wenno animal. Ngem masapul a subbotem ti inauna nga anak dagiti tattao,+ ken ti inauna nga anak dagiti narugit nga animal.+ 16 Masapul nga itedmo ti gatad a pangsubbot inton maysa a bulanna nga agpangato, maitunos iti naikeddeng a gatad ti lima a siklo*+ a pirak, sigun iti siklo a maus-usar iti nasantuan a disso.* Ti maysa a siklo ket 20 a gera.* 17 Ti laeng inauna a baka wenno inauna a kalakian nga urbon a karnero wenno inauna a kalding ti saanmo a subboten.+ Nasantuan dagita. Masapul nga iwarsim ti darada iti altar,+ ken ipuormo ti tabada kas daton a mapuoran a makaay-ayo* ti banglona ken Jehova.+ 18 Kukuamto ti karneda, kas iti barukong ti daton a mailili ken iti kannawan a luppo.+ 19 Amin dagiti nasantuan a kontribusion nga inted dagiti Israelita ken Jehova,+ intedko kenka ken kadagiti annakmo a lallaki ken babbai kas bingayyo iti agnanayon.+ Maysa dayta a tulag ti asin* iti sanguanan ni Jehova para kenka ken iti kaputotam.”

20 Kinuna pay ni Jehova ken ni Aaron: “Awanto ti tawidmo iti dagada, ken awanto ti bingaymo a daga iti tengngada.+ Siak ti bingay ken tawidmo iti tengnga dagiti Israelita.+

21 “Intedko a tawid dagiti annak ni Levi ti tunggal apagkapullo+ iti Israel kas subad ti panagserbida iti tolda a pagkonsultaan. 22 Awan ti Israelita nga umasideg iti tolda a pagkonsultaan tapno saanda nga agbasol ken matay. 23 Dagiti Levita ti agserbi iti tolda a pagkonsultaan, ket manungsungbatda iti biddut dagiti Israelita.+ Daytoy ti agnanayon a paglintegan para iti amin a henerasionyo, a saanda a maaddaan iti tawid kadagiti Israelita.+ 24 Ta intedko kas tawid dagiti Levita ti apagkapullo dagiti inkontribusion dagiti Israelita, nga intedda ken Jehova. Dayta ti makagapu a kinunak kadakuada, ‘Saanda a maaddaan iti tawid kadagiti Israelita.’”+

25 Kalpasanna, kinuna ni Jehova ken ni Moises: 26 “Ibagam kadagiti Levita, ‘Awatenyonto kadagiti Israelita ti apagkapullo nga intedko kadakayo kas tawidyo,+ ket masapul nga itedyo ti apagkapullo dayta kas kontribusionyo ken Jehova.+ 27 Maibilangto dayta kas kontribusionyo, a kasla bukbukel a nagtaud iti pagirikanyo+ wenno produkto a nagtaud iti pagpespesanyo iti ubas wenno lana. 28 Iti kasta, makaitedkayo met iti kontribusion ken Jehova manipud iti amin nga apagkapullo nga inawatyo kadagiti Israelita, ket itedyo ken Aaron a padi dagiti kontribusionyo a kukua ni Jehova. 29 Mangtedkayo iti kontribusion ken Jehova manipud iti amin a kasayaatan a sagut a naited kadakayo+ kas nasantuan a banag.’

30 “Masapul nga ibagam kadakuada, ‘No ikontribusionyo ti kasayaatan kadagita a sagut, maibilangto dayta kas produkto a nagtaud iti pagirikan dagiti Levita ken iti pagpespesanda iti ubas wenno lana. 31 Mabalinyo a kanen dayta agraman ti intero a pamiliayo iti sadinoman a lugar ta tangdanyo dayta kas subad ti panagserbiyo iti tolda a pagkonsultaan.+ 32 Saankayo a makabasol iti daytoy no la ket ta ikontribusionyo ti kasayaatan kadagita a sagut, ken saanyo a rugitan dagiti nasantuan a banag tapno saankayo a matay.’”+

19 Kinuna manen ni Jehova kada Moises ken Aaron: 2 “Daytoy ti linteg nga imbilin ni Jehova, ‘Ibagam kadagiti Israelita nga iyalaandaka iti nasalun-at a nalabaga a baka nga awan depektona+ ken saan pay a naisangol. 3 Itedyo dayta ken Eleazar a padi, ket ipanna iti ruar ti kampo sa maparti iti sanguananna. 4 Kalpasanna, isawsaw ni Eleazar a padi ti ramayna iti dara sa mamimpito a warsianna ti ruangan ti tolda a pagkonsultaan.+ 5 Mapuoranto ti baka iti sanguananna, agraman ti kudil, lasag, dara, ken takkina.+ 6 Mangala ti padi iti kayo a sedro, mula a hisopo,+ ken nalabaga a lupot ket ipuruakna dagita iti apuy a pakaur-uraman ti baka. 7 Kalpasanna, labaan ti padi dagiti badona ken agdigus* sakbay a sumrek iti kampo. Ngem maibilang a narugit ti padi agingga a lumnek ti init.

8 “‘Labaan met daydiay nangpuor iti baka dagiti badona sa agdigus,* ken maibilang a narugit agingga a lumnek ti init.

9 “‘Ti nadalus a tao ti mangurnong kadagiti dapo ti baka+ sa ikabilna iti nadalus a disso iti ruar ti kampo. Masapul a maidulin dagita ken usaren dagiti Israelita a mangisagana iti danum a pagdalus.+ Maysa dayta a daton gapu iti basol. 10 Labaan daydiay mangurnong kadagiti dapo ti baka dagiti badona ken maibilang a narugit agingga a lumnek ti init.

“‘Agserbi daytoy kas agnanayon a paglintegan a suroten dagiti Israelita ken dagiti ganggannaet a residente.+ 11 Maibilang a narugit iti pito nga aldaw ti asinoman a mangsagid iti bangkay ti tao.*+ 12 Masapul a dalusan dayta a tao ti bagina iti danum iti maikatlo nga aldaw, ket maibilangto a nadalus iti maikapito nga aldaw. Ngem no saanna a dalusan ti bagina iti maikatlo nga aldaw, saanto a maibilang a nadalus iti maikapito nga aldaw. 13 Asinoman a mangsagid iti bangkay ti tao* a saanna a dalusan ti bagina, rinugitanna ti tabernakulo ni Jehova,+ ket masapul a mapapatay dayta a tao.*+ Gapu ta saan a nawarsian iti danum a pagdalus,+ maibilang a narugit ket agtultuloy a kasta.

14 “‘Daytoy ti linteg no adda matay iti uneg ti tolda: Maibilang a narugit iti pito nga aldaw ti asinoman a sumrek iti tolda ken ti asinoman nga adda iti uneg ti tolda. 15 Narugit met ti amin a pagkargaan a naluktan ken saan a naigalut ti kalubna.+ 16 Maibilang a narugit iti pito nga aldaw ti asinoman nga adda iti ruar a makasagid iti tao a napapatay iti espada, wenno iti bangkay, tulang ti bangkay, wenno tanem.+ 17 Tapno madalusan ti tao a naibilang a narugit, nasken a maala ti sumagmamano a dapo ti napuoran a daton gapu iti basol ken maikabil iti pagkargaan sa malaokan iti danum ti ubbog. 18 Kalpasanna, ti nadalus a tao+ ti mangala iti mula a hisopo+ ket isawsawna dayta iti danum sa iwarsina iti tolda ken iti amin a pagkargaan ken kadagiti tattao* nga adda sadiay ken iti asinoman a nakasagid iti tulang, wenno iti napapatay a tao, bangkay, wenno tanem. 19 Iti maikatlo ken iti maikapito nga aldaw, iwarsi dayta ti nadalus a tao iti asinoman a maibilang a narugit, ket madalusan ti basol daydiay a tao iti maikapito nga aldaw.+ Kalpasanna, ti tao a madaldalusan masapul a labaanna dagiti badona sa agdigus, ket maibilangen a nadalus no limneken ti init.

20 “‘Ngem mapapatay iti tengnga dagiti Israelita+ ti asinoman a narugit a saan a mangdalus iti bagina, ta rinugitanna ti santuario ni Jehova. Maibilang a narugit ta saan a nawarsian iti danum a pagdalus.

21 “‘Daytoy ti agnanayon a paglintegan a surotenda: Asinoman a mangiwarsi iti danum a pagdalus+ masapul a labaanna dagiti badona, ket asinoman a mangsagid iti danum a pagdalus maibilangto a narugit agingga a lumnek ti init. 22 Agbalinto a narugit ti aniaman a sagiden ti asinoman a narugit, ket ti tao* a mangsagid iti dayta maibilangto a narugit agingga a lumnek ti init.’”+

20 Iti umuna a bulan, nakadanon ti intero nga Israel iti let-ang ti Zin, ket nagnaedda idiay Kades.+ Sadiay a natay ken naitabon ni Miriam.+

2 Awan idi ti danum para iti intero nga Israel+ isu a naguummongda maibusor kada Moises ken Aaron. 3 Inreklamo dagiti tattao ken ni Moises:+ “Nataykami la koman idi natay dagiti kakabsatmi iti sanguanan ni Jehova! 4 Apay nga impanmo dagiti adipen ni Jehova iti daytoy a let-ang? Tapno mataykami ditoy agraman dagiti tarakenmi?+ 5 Apay nga inruarnakami idiay Egipto tapno ipannakami iti daytoy nagrigat a lugar?+ Awan ti pagmulaan iti bin-i, higos, ubas, ken granada ken awan ti danum a mainum.”+ 6 Pinanawan ngarud da Moises ken Aaron dagiti tattao ket napanda iti ruangan ti tolda a pagkonsultaan. Nagruknoyda ket nagparang kadakuada ti dayag ni Jehova.+

7 Kinuna ni Jehova ken ni Moises: 8 “Alaem ti sarukod ket ummongenyo ken Aaron a kabsatmo ti intero nga Israel. Kasaritayo ti dakkel a bato iti imatangda tapno mangted iti danum. Rummuarto ti danum iti dakkel a bato ket itedyo nga inumenda ken dagiti tarakenda.”+

9 Gapuna, innala ni Moises ti sarukod iti sanguanan ni Jehova,+ kas imbilin ti Dios. 10 Kalpasanna, inummong da Moises ken Aaron ti intero nga Israel iti sanguanan ti dakkel a bato, ket kinuna ni Moises: “Dumngegkayo, dakayo a rebelde! Kayatyo kadi nga ikkandakayo iti danum manipud iti daytoy a bato?”+ 11 Iti kasta, inngato ni Moises ti imana ket namindua nga impang-orna ti sarukodna iti bato. Pimsuak ti danum ket imminum dagiti tattao ken dagiti tarakenda.+

12 Idi agangay, kinuna ni Jehova kada Moises ken Aaron: “Gapu ta nakapuy ti pammatiyo kaniak ken saandak a pinadayawan iti sanguanan dagiti Israelita, saanto a dakayo ti mangipan kadakuada iti daga nga itedko.”+ 13 Dagitoy ti danum ti Meriba,*+ a nagreklamuan dagiti Israelita ken Jehova, isu nga impakitana kadakuada ti dayagna.

14 Kalpasanna, nangibaon ni Moises kadagiti mensahero manipud Kades a mapan mangibaga iti ari ti Edom:+ “Daytoy ti kinuna ti kabsatmo nga Israel,+ ‘Ammom amin a rigat a napasaranmi. 15 Napan idiay Egipto+ dagiti ammami, ket nagnaedda sadiay iti adu a tawen,*+ ngem minaltratodakami dagiti Egipcio agraman dagiti ammami.+ 16 Kamaudiananna, nagpakaasikami ken Jehova+ ket impangagnakami isu a nangibaon iti anghel+ a nangiruar kadakami idiay Egipto. Ita, addakami ditoy Kades, maysa a siudad iti pagpatinggaan ti teritoriam. 17 Pangngaasim ta palubosannakami a lumasat iti dagam. Saankamto a lumasat iti aniaman a talon wenno kaubasan, ket saankamto nga uminum iti danum iti aniaman a bubon. Magnakamto iti Kalsada ti Ari ken saankami nga agpakannawan wenno agpakannigid agingga a makalasatkami iti teritoriam.’”+

18 Ngem insungbat ti ari ti Edom: “Saanyo a mabalin ti lumasat iti teritoriami. No lumasatkayo, nakaespadakamto a sumabet kadakayo.” 19 Insungbat dagiti Israelita: “Magnakamto iti kangrunaan a kalsada, ket no uminumkami ken dagiti tarakenmi iti danumyo, bayadanminto.+ Lumasatkami laeng.”+ 20 Ngem kinunana latta: “Saanyo a mabalin ti lumasat.”+ Iti kasta, simmabet ti ari ti Edom a kaduana ti adu a tattao ken nabileg nga armada.* 21 Saan nga impalubos ti ari ti Edom a lumasat ti Israel iti teritoriana isu a pimmanaw ti Israel.+

22 Pimmanaw ti intero nga Israel idiay Kades ket nakadanonda idiay Bantay Hor.+ 23 Kinuna ni Jehova kada Moises ken Aaron idiay Bantay Hor iti pagpatinggaan ti Edom: 24 “Maitiponto ni Aaron kadagiti kailianna.*+ Saanto a makastrek iti daga nga itedko kadagiti Israelita, ta sinukiryo a dua ti imbilinko mainaig kadagiti danum ti Meriba.+ 25 Ipanmo ni Aaron ken ni Eleazar nga anakna idiay Bantay Hor. 26 Ikkatem dagiti bado ni Aaron+ ket isuotmo ken ni Eleazar+ nga anakna. Matayto* sadiay ni Aaron.”

27 Inaramid ni Moises ti imbilin ni Jehova, ket simmang-atda idiay Bantay Hor iti sanguanan ti intero nga Israel. 28 Iti kasta, inikkat ni Moises dagiti bado ni Aaron ket insuotna ken ni Eleazar nga anakna. Kalpasanna, natay ni Aaron iti tuktok ti bantay,+ ket simmalog da Moises ken Eleazar. 29 Idi naammuan ti intero nga Israel a natayen ni Aaron, 30 nga aldaw a sinangsangitanda.+

21 Idi lumasat ti Israel idiay Atarim, nadamag dayta ti Canaanita nga ari ti Arad+ nga agnanaed idi idiay Negeb, ket rinautna ida ken tiniliwna kas balud ti dadduma kadakuada. 2 Iti kasta, inkari ti Israel ken ni Jehova: “No tulongannakami a mangparmek kadagitoy a tattao, sigurado a dadaelenminto dagiti siudadda.” 3 Impangag ni Jehova dagiti Israelita ket naparmekda dagiti Canaanita ken dinadaelda dagiti siudadda. Gapuna, pinanagananda dayta a lugar iti Horma.*+

4 Nabannog dagiti Israelita bayat nga intultuloyda ti nagna manipud Bantay Hor+ nga agturong iti Nalabaga a Baybay tapno likawenda ti Edom.+ 5 Nagreklamo manen dagiti tattao maibusor iti Dios ken ni Moises.+ Sangkaibagada: “Apay nga inruarnakami idiay Egipto? Tapno mataykami iti daytoy a let-ang? Awan ti taraon ken danum,+ ken masuronkamin iti daytoy a makauma a tinapay.”+ 6 Gapuna, nangibaon ni Jehova kadagiti nagita* nga uleg ket kinagatda dagiti tattao isu nga adu ti natay nga Israelita.+

7 Immasideg dagiti tattao ken ni Moises ket kinunada: “Nagbasolkami, ta nagsaokami maibusor ken Jehova ken maibusor kenka.+ Agpakaasika ken Jehova para kadakami tapno papanawenna dagiti uleg.” Nagpakaasi ngarud ni Moises iti Dios maipaay kadagiti tattao.+ 8 Kinuna ni Jehova ken ni Moises: “Mangaramidka iti sinan nagita* nga uleg sa ikabilmo iti poste. Kumita iti dayta ti asinoman a nakagat iti uleg tapno saan a matay.” 9 Dagus a nangaramid ni Moises iti gambang nga uleg+ sa inkabilna iti poste,+ ket immimbag ti asinoman a nakagat iti uleg a kimmita iti gambang nga uleg.+

10 Kalpasanna, nagluas dagiti Israelita ket nagkampoda idiay Obot.+ 11 Idi pimmanawda idiay Obot, nagkampoda idiay Iye-abarim,+ iti let-ang a sumango iti Moab, iti daya. 12 Pimmanawda sadiay ket nagkampoda idiay Tanap* ti Zered.+ 13 Idi pimmanawda sadiay, nagkampoda iti rehion ti Arnon,+ nga adda iti let-ang a dumanon iti pagpatinggaan ti teritoria dagiti Amoreo, ta adda ti Arnon iti pagpatinggaan ti Moab, iti nagbaetan ti Moab ken dagiti Amoreo. 14 Dayta ti makagapu a nadakamat iti libro Dagiti Gubat ni Jehova ti maipapan iti “Vaheb idiay Sufa ken dagiti tanap* ti Arnon, 15 ken ti pagsalogan* dagiti tanap,* a dumanon iti siudad ti Ar ken kaabay ti pagpatinggaan ti Moab.”

16 Kalpasanna, napanda idiay Beer. Daytoy ti bubon a tuktukoyen ni Jehova idi imbagana ken Moises: “Ummongem dagiti tattao, ket ikkak ida iti danum.”

17 Iti dayta a tiempo, inkanta ti Israel:

“Agubbogka, O bubon!—Sumungbatka!*

Kalpasanna, napanda iti let-ang ti Mattana. 19 Manipud Mattana, nagturongda idiay Nahaliel, ket manipud Nahaliel, nagturongda idiay Bamot.+ 20 Manipud Bamot, napanda iti tanap nga adda iti teritoria* ti Moab,+ iti ngatuen ti Pisga,+ a tumannawag iti Jesimon.*+

21 Nangibaon ti Israel kadagiti mensahero a mapan mangibaga ken Sihon nga ari dagiti Amoreo:+ 22 “Palubosannakami a lumasat iti dagam. Saankamto a magna iti talon wenno iti kaubasan. Saankamto nga uminum iti danum iti aniaman a bubon. Magnakamto iti Kalsada ti Ari agingga a makalasatkami iti teritoriam.”+ 23 Ngem saan a pinalubosan ni Sihon a lumasat ti Israel iti teritoriana. Imbes ketdi, inummongna ti amin a tattaona tapno makigubatda iti Israel idiay let-ang ket idi nakadanonda idiay Jahaz, rinugianda ti nakilaban iti Israel.+ 24 Ngem inabak ida ti Israel babaen ti espada+ ket tinagikuada ti dagana+ manipud Arnon+ agingga idiay Jabok,+ iti asideg dagiti Ammonita, ta ti Jazer+ ti pagpatinggaan ti teritoria dagiti Ammonita.+

25 Sinakup ti Israel amin dagitoy a siudad, ket nagnaedda iti amin a siudad dagiti Amoreo,+ idiay Hesbon ken kadagiti ili iti aglawlawna. 26 Ta ti Hesbon ti siudad ni Sihon, ti ari dagiti Amoreo, a nakigubat idi iti ari ti Moab ken nangsakup iti amin a dagana agingga idiay Arnon. 27 Dayta ti makagapu a naaramid daytoy a manglais a daniw:

“Umayka iti Hesbon.

Maibangon koma ti siudad ni Sihon ken maipasdek a sititibker.

28 Rimmuar ti apuy manipud Hesbon, gimmil-ayab ti ili ni Sihon.

Nauram ti Ar ti Moab, dagiti makinkukua kadagiti nangato a disso ti Arnon.

29 Kaasika pay, Moab! Madadaelkayto, O tattao ni Kemos!+

Impalubosna nga agbalin ti annakna a lallaki ken babbai kas balud ni Sihon, ti ari dagiti Amoreo.

31 Gapuna, nagnaed ti Israel iti daga dagiti Amoreo. 32 Nangibaon ni Moises kadagiti lallaki a mangespia iti Jazer.+ Sinakupda dagiti ili iti aglawlawna ken pinapanawda dagiti Amoreo nga agnanaed sadiay. 33 Kalpasanna, nagnada iti Dalan ti Basan. Sinabet ida ni Og+ nga ari ti Basan, agraman ti amin a tattaona tapno gubatenda ti Israel idiay Edrei.+ 34 Kinuna ni Jehova ken ni Moises: “Dika agbuteng+ ta tulonganka a mangparmek kenkuana ken kadagiti tattaona ket itedkonto kenka ti dagana.+ Aramidemto kenkuana ti inaramidmo ken Sihon nga ari dagiti Amoreo, nga agnanaed idi idiay Hesbon.”+ 35 Gapuna, pinatayda ni Og, agraman dagiti annakna ken dagiti tattaona—awan ti nakalasat.+ Kalpasanna, sinakupda ti dagana.+

22 Kalpasanna, pimmanaw dagiti Israelita ket nagkampoda iti tanap ti Moab iti ballasiw ti Jordan, a batog ti Jerico.+ 2 Nadamag ni Balak+ nga anak ni Zipor ti amin nga inaramid ti Israel kadagiti Amoreo, 3 ket nagdanag unay ti Moab gapu ta nakaad-adu dagiti tattao; wen, napalalo ti buteng ti Moab gapu kadagiti Israelita.+ 4 Iti kasta, kinuna ti Moab kadagiti panglakayen ti Midian:+ “Ibusento dagitoy a tattao ti amin nga adda iti aglawlawtayo, kas iti panangibus ti kalakian a baka iti amin a ruot iti tanap.”

Ni Balak nga anak ni Zipor ti ari ti Moab iti daydi a tiempo. 5 Nangibaon kadagiti mensahero a mapan ken Balaam nga anak ni Beor iti ilina a Petor,+ nga adda iti igid ti Karayan.* Pinaayabanna, ket kinunana: “Adtoy dagiti tattao a rimmuar idiay Egipto! Nagsaknapdan iti rabaw* ti daga,+ ket agnanaedda iti sango ti teritoriak. 6 Pangngaasim ta umayka ket ilunodmo dagitoy a tattao para kaniak,+ ta nabilbilegda ngem siak. Bareng maparmek ken mapapanawko ida iti daga, ta ammok a mabendisionan daydiay bendisionam ken mailunod daydiay ilunodmo.”

7 Nagdaliasat ngarud dagiti panglakayen ti Moab ken dagiti panglakayen ti Midian nga awitda ti pangtangdanda iti panangilunod* ni Balaam+ ket imbagada kenkuana ti impaibaga ni Balak. 8 Insungbatna kadakuada: “Umyankayo ditoy ita a rabii, ket ipakaammokto ti aniaman nga ibaga kaniak ni Jehova.” Gapuna, nagtalinaed pay laeng dagiti prinsipe ti Moab iti ayan ni Balaam.

9 Nagparang ti Dios ken ni Balaam ket kinunana:+ “Siasino dagitoy lallaki a kakaduam?” 10 Insungbat ni Balaam iti pudno a Dios: “Pinaayabannak ti ari ti Moab a ni Balak nga anak ni Zipor, ket kinunana, 11 ‘Adtoy dagiti tattao a naggapu idiay Egipto ket nagsaknapda iti rabaw* ti daga. Umayka ket ilunodmo ida para kaniak.+ Bareng maparmek ken mapapanawko ida.’” 12 Ngem kinuna ti Dios ken ni Balaam: “Dika kumuyog kadakuada. Saanmo nga ilunod dagitoy a tattao, ta binendisionak ida.”+

13 Bimmangon ni Balaam iti bigat ket kinunana kadagiti prinsipe ni Balak: “Agawidkayon, ta dinak pinalubosan ni Jehova a kumuyog kadakayo.” 14 Gapuna, pimmanaw dagiti prinsipe ti Moab ket nagsublida ken Balak sa kinunada: “Saan a kayat ni Balaam ti kumuyog kadakami.”

15 Ngem nangibaon manen ni Balak iti ad-adu a prinsipe a natantan-ok ngem iti immuna a grupo. 16 Napanda ken Balaam ket kinunada: “Daytoy ti imbaga ni Balak nga anak ni Zipor, ‘Pangngaasim ta umayka koma nga umay, 17 ta dakkelto ti itedko a gunggonam ket aramidekto ti amin nga ibagam. Isu a pangngaasim ta umayka, ket ilunodmo dagitoy a tattao para kaniak.’” 18 Ngem insungbat ni Balaam kadagiti adipen ni Balak: “Uray ited kaniak ni Balak ti balayna a napno iti pirak ken balitok, saanko a mabalin a sukiren ti bilin ni Jehova a Diosko, bassit man wenno dakkel dayta.+ 19 Ngem pangngaasiyo ta umyankayo met ditoy ita a rabii, tapno maammuak no ania pay ti ibaga kaniak ni Jehova.”+

20 Nagparang ti Dios ken ni Balaam iti rabii ket kinunana: “No umaydaka ayaban dagitoy a lallaki, kumuyogka. Ngem ti laeng ibagak kenka ti ibagam.”+ 21 Bimmangon ngarud ni Balaam iti bigat ket insaganana ti asnona* ket kimmuyog kadagiti prinsipe ti Moab.+

22 Ngem nakapungtot ti Dios ta mapan ni Balaam, ket nagtakder ti anghel ni Jehova iti dalan tapno lapdanna ni Balaam. Nakasakay idi ni Balaam iti asnona, ket kaduana ti dua a katulonganna. 23 Idi nakita ti asno ti anghel ni Jehova a nakatakder iti dalan a nakaiggem iti espada, pinadas ti asno ti aglisi a mapan iti tanap. Ngem rinugian ni Balaam a pang-oren ti asno tapno pagsublienna iti dalan. 24 Kalpasanna, nagtakder ti anghel ni Jehova iti akikid a dalan iti nagbaetan ti dua a kaubasan, nga addaan iti nakabite a pader iti agsumbangir a sikigan. 25 Idi nakita ti asno ti anghel ni Jehova, impidegna ti bagina iti pader ket nalipit ti saka ni Balaam, isu a pinang-or manen ni Balaam.

26 Immabante ti anghel ni Jehova ket nagtakder iti nailet a disso nga awan ti dalan a pangliklikan, iti man kannawan wenno kannigid. 27 Nagtugaw ti asno idi nakitana ti anghel ni Jehova, isu a nakapungtot ni Balaam ket pinangpang-orna ti asno. 28 Kamaudiananna, pinagsao ni Jehova ti asno*+ ket kinunana ken ni Balaam: “Ania ti inaramidko ta namitlon a pinangpang-ornak?”+ 29 Insungbat ni Balaam iti asno: “Gapu ta pagbalbalinennak a maag. No adda la koma espadak, pinataykan!” 30 Kinuna ti asno ken ni Balaam: “Saan aya a siak ti asno a nabayagen a pagsaksakayam agingga ita? Inaramidko kadin ti kastoy kenka?” Insungbat ni Balaam: “Saan pay!” 31 Idi linuktan ni Jehova dagiti mata ni Balaam,+ nakitana ti anghel ni Jehova a nakatakder iti dalan a nakaiggem iti espada ket dagus a nagruknoy.

32 Kinuna kenkuana ti anghel ni Jehova: “Apay a namitlo a pinangpang-ormo ti asnom? Immayak tapno lapdanka, ta saan a maitunos iti pagayatak ti aramidem.+ 33 Nakitanak ti asnom ket namitlo a linisiannak.+ No saannak a linisian, pinapatayka koman ngem saanko nga an-anuen ti asnom.” 34 Kinuna ni Balaam iti anghel ni Jehova: “Nagbasolak, ta saanko nga ammo a sika ti nakatakder iti dalan a sumabat kaniak. No saanmo a kayat a mapanak, agawidakon.” 35 Kinuna ti anghel ni Jehova: “Kumuyogka kadagiti lallaki, ngem ti laeng ibagak kenka ti ibagam.” Iti kasta, intuloy ni Balaam ti simmurot kadagiti prinsipe ni Balak.

36 Idi naammuan ni Balak a kimmuyog ni Balaam, dagus a sinabatna iti siudad ti Moab, nga adda iti igid ti Arnon iti pagpatinggaan ti teritoria. 37 Kinuna ni Balak ken ni Balaam: “Apay a saanka nga immay idi pinaayabanka? Saanmo kadi nga ammo a kabaelanka nga ikkan iti dakkel a gunggona?”+ 38 Insungbat ni Balaam: “Uray ta addaakon. Ngem saanak a mapalubosan a mangibaga iti aniaman. Ti laeng imbaga ti Dios ti mabalinko nga ibaga.”+

39 Gapuna, kimmuyog ni Balaam ken ni Balak ket napanda idiay Kiriat-huzot. 40 Nagidaton ni Balak kadagiti baka ken karnero ket intedna ti dadduma ken ni Balaam ken kadagiti prinsipe a kakaduana. 41 Kabigatanna, inkuyog ni Balak ni Balaam ket simmang-atda idiay Bamot-baal; sadiay a matannawaganna ti amin a tattao.+

23 Kalpasanna, kinuna ni Balaam ken ni Balak: “Mangibangonka iti daytoy a disso iti pito nga altar,+ ken iyalaannak iti pito a kalakian a baka ken pito a kalakian a karnero.” 2 Dagus nga inaramid ni Balak ti imbaga ni Balaam. Nangidaton da Balak ken Balaam iti baka ken karnero iti tunggal altar.+ 3 Kinuna ni Balaam ken ni Balak: “Agbatika ditoy iti abay ti datonmo a mapuoran, ta mapanak sadiay. Bareng makisarita kaniak ni Jehova. Ibagakto kenka ti aniaman nga ibagana.” Napan ni Balak iti maysa a kalbo a turod.

4 Nakisarita ti Dios ken ni Balaam,+ ket kinuna ni Balaam: “Nangibangonak iti pito a naintar nga altar, ken nangidatonak iti baka ken karnero iti tunggal altar.” 5 Inkabil ni Jehova daytoy a sao iti ngiwat ni Balaam:+ “Agsublika ken Balak, ket kastoy ti ibagam.” 6 Gapuna, nagsubli ket nakitana ni Balak ken ti amin a prinsipe ti Moab a nakatakder iti abay ti datonna a mapuoran. 7 Imbagana daytoy a mensahe:+

‘Umaymo ilunod ni Jacob para kaniak.

Wen, umaymo kondenaren ti Israel.’+

 8 Kasanok koma nga ilunod dagidiay saan nga inlunod ti Dios?

Ken kasanok koma a kondenaren dagidiay saan a kinondenar ni Jehova?+

11 Kinuna ni Balak ken ni Balaam: “Ania daytoy nga inaramidmo? Pinaayabanka tapno ilunodmo dagiti kabusorko, ngem binendisionam met ida.”+ 12 Insungbat ni Balaam: “Saan aya a ti laeng inkabil ni Jehova iti ngiwatko ti ibagak?”+

13 Kinuna ni Balak: “Pangngaasim ta kumuyogka kaniak iti sabali a disso a pakakitaam kadakuada. Manmano laeng ti makitam kadakuada sadiay; saanmonto a makita amin ida. Ilunodmo ida sadiay para kaniak.”+ 14 Gapuna, impanna ni Balaam iti maysa a tanap idiay Zofim, iti tuktok ti Pisga.+ Nangibangon sadiay iti pito nga altar ken nangidaton iti baka ken karnero iti tunggal altar.+ 15 Kinuna ni Balaam ken ni Balak: “Agbatika ditoy iti abay ti datonmo a mapuoran ta mapanak makisarita iti Dios.” 16 Nakisarita ni Jehova kenkuana ket inkabilna daytoy a sao iti ngiwat ni Balaam:+ “Agsublika ken Balak, ket kastoy ti ibagam.” 17 Gapuna, nagsubli ket nakitana ni Balak nga agur-uray iti abay ti datonna a mapuoran, ket kaduana dagiti prinsipe ti Moab. Insaludsod ni Balak: “Ania ti imbaga ni Jehova?” 18 Imbagana daytoy a mensahe:+

“Tumakderka, Balak, ket dumngegka.

Denggennak, O anak ni Zipor.

Aramidenna ti aniaman nga ibagana,

Tungpalenna ti saona.+

22 Inruar ida ti Dios manipud Egipto.+

Para kadakuada, kayariganna dagiti sara ti atap a kalakian a baka.+

Ita, maikuna dagiti tattao maipapan ken Jacob ken iti Israel:

‘Kitaenyo ti inaramid ti Dios!’

25 Kinuna ni Balak ken ni Balaam: “No saanmo a kabaelan nga ilunod ti Israel, saanmo koma met a bendisionan.” 26 Insungbat ni Balaam: “Saan kadi nga imbagak kenka nga aramidek ti amin nga imbaga ni Jehova?”+

27 Kinuna ni Balak: “Kumuyogka koma kaniak iti sabali pay a lugar. Bareng ipalubosen ti pudno a Dios nga ilunodmo ida sadiay para kaniak.”+ 28 Gapuna, inkuyog ni Balak ni Balaam idiay tuktok ti Peor, a sumango iti Jesimon.*+ 29 Iti kasta, kinuna ni Balaam ken ni Balak: “Mangibangonka iti daytoy a disso iti pito nga altar, ken iyalaannak iti pito a kalakian a baka ken pito a kalakian a karnero.”+ 30 Inaramid ni Balak ti imbaga ni Balaam, ket nangidaton iti baka ken karnero iti tunggal altar.

24 Idi nakita ni Balaam a kayat* ni Jehova a bendisionan ti Israel, saanen nga immadayo tapno agbirok iti lunod,+ no di ket simmango iti let-ang. 2 Idi nakita ni Balaam a nagkampo ti Israel iti tunggal tribu,+ nagtignay kenkuana ti espiritu ti Dios.+ 3 Kastoy ti mensahe nga imbagana:+

10 Nakapungtot ni Balak ket nagpalakpak sa kinunana ken Balaam: “Inayabanka tapno ilunodmo dagiti kabusorko,+ ngem namitlo met a binendisionam ida. 11 Agawidkan! Dakkel koma ti itedko a gunggonam,+ ngem impaidam dayta kenka ni Jehova.”

12 Insungbat ni Balaam: “Saan kadi nga imbagak kadagiti mensahero nga imbaonmo, 13 ‘Uray ited kaniak ni Balak ti balayna a napno iti pirak ken balitok, saanko a mabalin a sukiren ti bilin ni Jehova ket aramidek ti bukodko a pagayatan,* naimbag man wenno dakes. Ti laeng ibaga kaniak ni Jehova ti ibagak’?+ 14 Mapanakon kadagiti kailiak. Ngem umayka ta ibagak no ania ti aramiden dagitoy a tattao kadagiti tattaom iti masanguanan.”* 15 Iti kasta, imbagana daytoy a mensahe:+

20 Idi nakitana ti Amalek, intuloyna ti daniwna:

21 Idi nakitana dagiti Keneo,+ intuloyna ti mensahena:

“Natalged ti pagnanaedanyo, ket aggigiankayo iti nangato a bato.

22 Ngem addanto mangpuor iti Kain.

Kasano kabayag agingga nga ipanawnakayo ti Asiria kas balud?”

23 Intuloyna pay ti mensahena:

“Kaasi pay! Asinonto ti makalasat inton aramiden daytoy ti Dios?

Ngem naan-anay a mapukawdanto met.”

25 Kalpasanna, timmakder ni Balaam+ sa pimmanaw, ket nagturong met ni Balak iti papananna.

25 Bayat nga agnanaed dagiti Israelita idiay Sitim,+ nakidennada kadagiti babbai iti Moab.+ 2 Inawis ida dagiti Moabita nga agidaton kadagiti diosda,+ isu a nakipanganda ken nagruknoyda kadagita a dios.+ 3 Gapuna, nakiraman ti Israel iti panagdaydayaw ken Baal ti Peor,+ ket nakapungtot unay ni Jehova iti Israel. 4 Kinuna ni Jehova ken ni Moises: “Alaem ti amin a lider* dagitoy a tattao ket papatayem ida sa ibitinmo ti bangkayda iti imatang ni Jehova iti sanguanan ti amin a tattao.* Iti kasta, bumaaw ti nakaro a pungtot ni Jehova iti Israel.” 5 Kalpasanna, kinuna ni Moises kadagiti ukom ti Israel:+ “Papatayenyo dagiti panguluen a nakiraman iti panagdaydayaw ken Baal ti Peor.”+

6 Bayat nga agsangsangit dagiti Israelita iti ruangan ti tolda a pagkonsultaan, pagammuan ta adda Israelita a nangiserrek iti Midianita a babai+ iti kampo ket nakita dayta ni Moises ken ti amin nga Israelita. 7 Idi nakita dayta ni Finehas+ nga anak ni Eleazar nga anak ni Aaron a padi, dagus a timmakder iti nagbabaetan dagiti Israelita ket nangala iti pika.* 8 Sinurotna ti lalaki nga Israelita ken ti Midianita iti uneg ti tolda ket dinuyokna ida iti mabagbagida. Iti kasta, simmardeng ti didigra iti Israel.+ 9 Ti natay iti daytoy a didigra ket 24,000.+

10 Kalpasanna, kinuna ni Jehova ken ni Moises: 11 “Bimmaaw ti pungtotko iti Israel gapu ken Finehas+ nga anak ni Eleazar nga anak ni Aaron a padi ta saanna nga impalubos nga adda sabali a dayawen ti Israel.+ Iti kasta, saanko a pinapatay ti amin nga Israelita nupay kidkiddawek ti naipamaysa a debosion.+ 12 Gapuna, ibagam, ‘Makitulagak kenkuana iti kappia. 13 Gapu iti daytoy a tulag, isu ken ti kaputotanna agserbidanto kas papadi iti agnanayon,+ ta saanna nga impalubos nga adda sabali a Dios a dayawen+ dagiti Israelita ken dinalusanna ti basolda.’”

14 Ti lalaki nga Israelita a napapatay a kadua ti babai a Midianita ket ni Zimri nga anak ni Salu ken panguluen ti maysa a benneg ti pamilia dagiti Simeonita. 15 Ti babai a Midianita a napapatay ket ni Cozbi nga anak ni Zur,+ a lider ti maysa a sangakabbalayan iti Midian.+

16 Idi agangay, kinuna ni Jehova ken ni Moises: 17 “Rauten ken papatayenyo dagiti Midianita,+ 18 ta nadidigrakayo gapu iti panangsulisogda kadakayo nga agbasol idiay Peor+ ken gapu ken Cozbi nga anak ti panguluen ti Midian, ti kabsatda a babai a napapatay+ idi aldaw a dimteng ti didigra gapu iti napasamak idiay Peor.”+

26 Kalpasan ti didigra,+ kinuna ni Jehova kada Moises ken Eleazar nga anak ni Aaron a padi: 2 “Bilangenyo ti amin nga Israelita nga agtawen iti 20 nga agpangato, sigun iti kapuonanda, ket bilangenyo amin a mabalin nga agserbi iti armada ti Israel.”+ 3 Iti kasta, nakisarita da Moises ken Eleazar+ a padi kadagiti Israelita iti tanap ti Moab+ iti asideg ti Jordan, iti sango ti Jerico,+ ket kinunada: 4 “Bilangenyo dagiti agtawen iti 20 nga agpangato, kas imbilin ni Jehova ken ni Moises.”+

Dagitoy ti Israelita a rimmuar idiay Egipto: 5 ni Ruben+ nga inauna ni Israel; ti annak ni Ruben+ ket: ni Hanok a nagtaudan dagiti Hanokita, ni Palu a nagtaudan dagiti Paluita, 6 ni Hezron a nagtaudan dagiti Hezronita, ken ni Carmi a nagtaudan dagiti Carmita. 7 Dagitoy ti pamilia dagiti Rubenita; 43,730 ti nairehistro kadakuada.+

8 Ti anak ni Palu ket ni Eliab. 9 Ti annak ni Eliab ket da Nemuel, Datan, ken Abiram. Dagitoy a Datan ken Abiram, a napili manipud kadagiti Israelita, ti bimmusor kada Moises+ ken Aaron ken kimmadua iti grupo ni Kore+ idi bimmusorda ken Jehova.+

10 Kalpasanna, nagungap* ti daga ket inalun-onna ida. Natay ni Kore ken dagiti simmuporta kenkuana idi nauram ti 250 a lallaki.+ Nagserbi dayta a pasamak kas pakdaar.+ 11 Ngem saan a natay dagiti annak ni Kore.+

12 Dagitoy ti annak ni Simeon+ sigun iti pamiliada: ni Nemuel a nagtaudan dagiti Nemuelita, ni Jamin a nagtaudan dagiti Jaminita, ni Jakin a nagtaudan dagiti Jakinita, 13 ni Zera a nagtaudan dagiti Zeraita, ken ni Shaul a nagtaudan dagiti Shaulita. 14 Dagitoy ti pamilia dagiti Simeonita; ket 22,200 ti nairehistro kadakuada.+

15 Dagitoy ti annak ni Gad+ sigun iti pamiliada: ni Zefon a nagtaudan dagiti Zefonita, ni Haggi a nagtaudan dagiti Haggita, ni Suni a nagtaudan dagiti Sunita, 16 ni Ozni a nagtaudan dagiti Oznita, ni Eri a nagtaudan dagiti Erita, 17 ni Arod a nagtaudan dagiti Arodita, ken ni Areli a nagtaudan dagiti Arelita. 18 Dagitoy ti pamilia dagiti annak ni Gad; 40,500 ti nairehistro kadakuada.+

19 Ti annak ni Juda+ ket da Er ken Onan.+ Ngem natay da Er ken Onan idiay Canaan.+ 20 Dagitoy ti annak ni Juda sigun iti pamiliada: ni Sela+ a nagtaudan dagiti Selanita, ni Perez+ a nagtaudan dagiti Perezita, ken ni Zera+ a nagtaudan dagiti Zeraita. 21 Ti annak ni Perez ket ni Hezron+ a nagtaudan dagiti Hezronita, ken ni Hamul+ a nagtaudan dagiti Hamulita. 22 Dagitoy ti pamilia ni Juda; 76,500 ti nairehistro kadakuada.+

23 Dagitoy ti annak ni Isacar+ sigun iti pamiliada: ni Tola+ a nagtaudan dagiti Tolaita, ni Puva a nagtaudan dagiti Punita, 24 ni Jasub a nagtaudan dagiti Jasubita, ken ni Shimron a nagtaudan dagiti Shimronita. 25 Dagitoy ti pamilia ni Isacar; 64,300 ti nairehistro kadakuada.+

26 Dagitoy ti annak ni Zabulon+ sigun iti pamiliada: ni Sered a nagtaudan dagiti Seredita, ni Elon a nagtaudan dagiti Elonita, ken ni Jaleel a nagtaudan dagiti Jaleelita. 27 Dagitoy ti pamilia dagiti Zabulonita; 60,500 ti nairehistro kadakuada.+

28 Ti annak ni Jose+ sigun iti pamiliada ket da Manases ken Efraim.+ 29 Dagitoy ti annak ni Manases:+ ni Makir+ a nagtaudan dagiti Makirita ken ama ni Gilead,+ ken ni Gilead a nagtaudan dagiti Gileadita. 30 Dagitoy ti annak ni Gilead: ni Yezer a nagtaudan dagiti Yezerita, ni Helek a nagtaudan dagiti Helekita, 31 ni Asriel a nagtaudan dagiti Asrielita, ni Sikem a nagtaudan dagiti Sikemita, 32 ni Semida a nagtaudan dagiti Semidaita, ken ni Hefer a nagtaudan dagiti Heferita. 33 Ni Zelofehad+ nga anak ni Hefer ket awanan idi iti annak a lallaki, no di ket annak a babbai,+ a da Mala, Noe, Hogla, Milca, ken Tirza. 34 Dagitoy ti pamilia ni Manases; 52,700 ti nairehistro kadakuada.+

35 Dagitoy ti annak ni Efraim+ sigun iti pamiliada: ni Sutela+ a nagtaudan dagiti Sutelaita, ni Beker a nagtaudan dagiti Bekerita, ken ni Tahan a nagtaudan dagiti Tahanita. 36 Dagitoy ti annak ni Sutela: ni Eran a nagtaudan dagiti Eranita. 37 Dagitoy ti pamilia dagiti annak ni Efraim; 32,500 ti nairehistro kadakuada.+ Dagitoy ti annak ni Jose sigun iti pamiliada.

38 Dagitoy ti annak ni Benjamin+ sigun iti pamiliada: ni Bela+ a nagtaudan dagiti Belaita, ni Asbel a nagtaudan dagiti Asbelita, ni Ahiram a nagtaudan dagiti Ahiramita, 39 ni Sefufam a nagtaudan dagiti Sufamita, ken ni Hufam a nagtaudan dagiti Hufamita. 40 Ti annak ni Bela ket da Ard ken Naaman.+ Nagtaud ken Ard dagiti Ardita; nagtaud met ken Naaman dagiti Naamita. 41 Dagitoy ti annak ni Benjamin sigun iti pamiliada; 45,600 ti nairehistro kadakuada.+

42 Dagitoy ti annak ni Dan+ sigun iti pamiliada: ni Suham a nagtaudan dagiti Suhamita. Dagitoy ti annak ni Dan sigun iti pamiliada. 43 Amin a nairehistro iti pamilia dagiti Suhamita ket 64,400.+

44 Dagitoy ti annak ni Aser+ sigun iti pamiliada: ni Imna a nagtaudan dagiti Imnita, ni Isvi a nagtaudan dagiti Isvita, ni Berias a nagtaudan dagiti Beriasita, 45 ti annak ni Berias: ni Heber a nagtaudan dagiti Heberita, ken ni Malkiel a nagtaudan dagiti Malkielita. 46 Sera ti nagan ti anak a babai ni Aser. 47 Dagitoy ti pamilia ti annak ni Aser; 53,400 ti nairehistro kadakuada.+

48 Dagitoy ti annak ni Neftali+ sigun iti pamiliada: ni Jazeel a nagtaudan dagiti Jazeelita, ni Guni a nagtaudan dagiti Gunita, 49 ni Jezer a nagtaudan dagiti Jezerita, ken ni Silem a nagtaudan dagiti Silemita. 50 Dagitoy ti pamilia ni Neftali sigun iti pamiliada; 45,400 ti nairehistro kadakuada.+

51 Ti dagup dagiti nairehistro nga Israelita ket 601,730.+

52 Kalpasanna, kinuna ni Jehova ken ni Moises: 53 “Bingaybingayem ti daga kas tawidda sigun iti nailista a nagan.*+ 54 No ad-adu ti grupo, iyad-adum ti tawidda; ngem no basbassit ti grupo, ibasbassitmo ti tawidda.+ Ti tawid ti tunggal grupo ket masapul a maitunos iti bilangda. 55 Ngem masapul a mabingaybingay ti daga babaen ti binnunot.+ Awatenda ti tawidda sigun iti nagan dagiti tribu dagidi ammada. 56 Mapagbibinnunotan ti tawid ken mabingaybingay kadagiti dadakkel ken babassit a grupo.”

57 Dagitoy ti nairehistro kadagiti Levita+ sigun iti pamiliada: ni Gerson a nagtaudan dagiti Gersonita, ni Cohat+ a nagtaudan dagiti Cohatita, ken ni Merari a nagtaudan dagiti Merarita. 58 Dagitoy ti pamilia dagiti Levita: dagiti Libnita,+ dagiti Hebronita,+ dagiti Malita,+ dagiti Musita,+ ken dagiti Korita.+

Ni Cohat ti ama ni Amram.+ 59 Ti asawa ni Amram ket ni Jocabed+ a nayanak idiay Egipto ken anak ni Levi. Inyanakna ken Amram da Aaron, Moises, ken ni Miriam a kabsatda a babai.+ 60 Kalpasanna, naaddaan ni Aaron iti annak: da Nadab, Abihu, Eleazar, ken Itamar.+ 61 Ngem natay da Nadab ken Abihu gapu ta nangidatagda ken Jehova iti maiparit a daton.*+

62 Ti dagup dagiti nairehistro kadakuada ket 23,000, nga amin ket lallaki a makabulan ti edadna nga agpangato.+ Saanda ngamin a nairehistro a karaman kadagiti Israelita,+ ta awan ti maited a tawidda iti tengnga dagiti Israelita.+

63 Dagitoy ti inrehistro da Moises ken Eleazar a padi idi inrehistroda dagiti Israelita idiay tanap ti Moab iti asideg ti Jordan iti sango ti Jerico. 64 Ngem awan uray maysa kadakuada ti inrehistro da Moises ken Aaron a padi idi nabilang dagiti Israelita idiay let-ang ti Sinai.+ 65 Ta kinuna ni Jehova maipapan kadakuada: “Sigurado a mataydanto amin idiay let-ang.”+ Iti kasta, awan ti nabati kadakuada malaksid ken Caleb nga anak ni Jefune ken ni Josue nga anak ni Nun.+

27 Immasideg ti annak a babbai ni Zelofehad,+ nga anak ni Hefer, nga anak ni Gilead, nga anak ni Makir, nga anak ni Manases, manipud kadagiti pamilia iti tribu ni Manases, nga anak ni Jose. Ti annakna a babbai ket da Mala, Noe, Hogla, Milca, ken Tirza. 2 Nagtakderda iti sanguanan da Moises, Eleazar a padi, dagiti panguluen,+ ken ti intero nga Israel iti ruangan ti tolda a pagkonsultaan. Kinunada: 3 “Natay ni amami idiay let-ang, ngem saan a karaman iti grupo dagiti bimmusor ken Jehova, dagiti simmuporta ken Kore.+ Natay gapu iti basolna ken saan a naaddaan iti annak a lallaki. 4 Apay koma a maikkat ti nagan ni amami manipud iti tribu a nagtaudanna gapu laeng ta awan anakna a lalaki? Ikkannakami iti sanikua a kas kadagiti kakabsat a lallaki ni amami.” 5 Iti kasta, indatag ni Moises ti kasoda ken Jehova.+

6 Kinuna ni Jehova ken ni Moises: 7 “Husto ti annak a babbai ni Zelofehad. Masapul nga ikkam ida iti sanikua a kas kadagiti kakabsat a lallaki ni amada ket itedmo kadakuada ti tawid ni amada.+ 8 Ibagam kadagiti Israelita, ‘No matay ti maysa a lalaki ket awan anakna a lalaki, itedyo ti tawidna iti anakna a babai. 9 No awan anakna a babai, itedyo ti tawidna kadagiti kakabsatna a lallaki. 10 No awan kakabsatna a lallaki, itedyo ti tawidna kadagiti lallaki a kakabsat ni amana. 11 No awan lallaki a kakabsat ni amana, itedyo ti tawidna iti kaasitgan a kabagianna, ket isunto ti mangtagikua iti dayta. Daytoy a pangngeddeng ti agserbi a paglintegan para kadagiti Israelita, kas imbilin ni Jehova ken ni Moises.’”

12 Kalpasanna, kinuna ni Jehova ken ni Moises: “Sumang-atka iti daytoy a bantay ti Abarim,+ ket kitaem ti daga nga itedkonto kadagiti Israelita.+ 13 Inton makitamon, maitiponkanto met kadagiti kailiam,*+ kas iti napasamak ken Aaron a kabsatmo,+ 14 gapu ta nagreklamo kaniak ti intero nga Israel idiay let-ang ti Zin, sinukiryo ti bilinko ket saandak a pinadayawan iti sanguananda babaen kadagiti danum.+ Dagitoy ti danum ti Meriba+ idiay Kades+ idiay let-ang ti Zin.”+

15 Kinuna ni Moises ken ni Jehova: 16 “Mangdutok koma ni Jehova, ti Dios a nangted iti biag ti amin a tattao,* iti lalaki manipud kadagiti Israelita 17 a mangidaulo kadakuada iti amin a banag ken mangigiya iti amin nga aramidenda, tapno ti ili ni Jehova ket saan a kas kadagiti karnero nga awanan iti pastor.” 18 Iti kasta, kinuna ni Jehova ken ni Moises: “Alaem ni Josue nga anak ni Nun, maysa a lalaki nga addaan iti espiritu, ket iparabawmo kenkuana ta imam.+ 19 Kalpasanna, pagtakderem iti sanguanan ni Eleazar a padi ken iti amin nga Israelita ket dutokam iti sanguananda.+ 20 Itedmo kenkuana ti dadduma nga autoridadmo,*+ tapno dumngeg kenkuana ti amin nga Israelita.+ 21 Agtakderto iti sanguanan ni Eleazar a padi, ket ammuen ni Eleazar ti pangngeddeng ni Jehova babaen ti Urim.+ Rummuarda no ibilinna ken sumrekda no ibilinna, isu ken ti amin nga Israelita a kaduana ken ti amin a naguummong.”

22 Iti kasta, inaramid ni Moises ti imbilin ni Jehova. Pinagtakderna ni Josue iti sanguanan ni Eleazar a padi ken iti intero nga Israel, 23 ket imparabawna ti imana ken Josue ket dinutokanna,+ kas imbilin ni Jehova babaen ken Moises.+

28 Kalpasanna, kinuna ni Jehova ken ni Moises: 2 “Ibilinmo kadagiti Israelita, ‘Masapul nga idatagyo kaniak ti datonko, ti tinapayko. Masapul a maidatag iti naikeddeng a tiempo dagiti datonko a mapuoran a makaay-ayo* kaniak ti banglona.’+

3 “Ibagam kadakuada, ‘Daytoy ti daton a mapuoran nga idatagyo ken Jehova: inaldaw a mangidatagkayo iti dua a nasalun-at nga urbon a kalakian a karnero kas daton a mapuoran.+ 4 Idatonyo ti maysa nga urbon a karnero iti bigat, ken idatonyo ti maikadua sakbay a sumipnget kalpasan a lumnek ti init,*+ 5 agraman ti apagkapullo ti maysa nga efa* a napino nga arina a nalaokan iti apagkapat ti maysa a hin* a lana ti nataltal nga olibo kas daton a bukbukel.+ 6 Regular a mangidatagkayo ken Jehova iti daton a mapuoran+ a makaay-ayo* ti banglona, kas naibilin idiay Bantay Sinai, 7 agraman ti daton nga inumen a kakapat ti maysa a hin a maipakuyog iti tunggal kalakian nga urbon a karnero.+ Maibukbok ti arak iti nasantuan a disso kas daton nga inumen para ken Jehova. 8 Idatagyo ti maikadua a kalakian nga urbon a karnero sakbay a sumipnget kalpasan a lumnek ti init.* Pakuyoganyo dayta iti daton a bukbukel ken daton nga inumen a kas iti maidatag iti bigat, ket idatagyo kas daton a mapuoran a makaay-ayo* ti banglona ken Jehova.+

9 “‘Ngem ti maidatag iti aldaw ti Sabbath+ ket dua a nasalun-at a kalakian a karnero nga agtawen iti maysa, ken dua nga apagkapullo ti maysa nga efa a napino nga arina a nalaokan iti lana kas daton a bukbukel, a mapakuyogan iti daton nga inumen. 10 Daytoy ti daton a mapuoran iti Sabbath, agraman ti regular a daton a mapuoran ken daton nga inumen.+

11 “‘Iti rugi ti tunggal bulan,* mangidatagkayo ken Jehova iti daton a mapuoran a dua nga urbon a kalakian a baka, maysa a kalakian a karnero, ken pito a nasalun-at a kalakian a karnero nga agtawen iti maysa,+ 12 ken tallo nga apagkapullo a sukat ti napino nga arina a nalaokan iti lana kas daton a bukbukel+ para iti tunggal baka, ken dua nga apagkapullo a sukat ti napino nga arina a nalaokan iti lana kas daton a bukbukel para iti karnero,+ 13 ken apagkapullo a sukat ti napino nga arina a nalaokan iti lana kas daton a bukbukel para iti tunggal urbon a karnero, kas daton a mapuoran a makaay-ayo* ti banglona+ ken Jehova. 14 Ti daton nga inumen ket kagudua ti maysa a hin nga arak para iti maysa a baka,+ ken kakatlo ti maysa a hin nga arak para iti karnero,+ ken kakapat ti maysa a hin para iti kalakian nga urbon a karnero.+ Daytoy ti binulan a daton a mapuoran iti intero a makatawen. 15 Masapul a maidatag met ken Jehova ti maysa nga urbon a kalding kas daton gapu iti basol, malaksid iti regular a daton a mapuoran a napakuyogan iti daton nga inumen.

16 “‘Ti maika-14 nga aldaw ti umuna a bulan ket Paskua para ken Jehova.+ 17 Addanto piesta iti maika-15 nga aldaw dayta a bulan. Pito nga aldaw a mangankayo iti tinapay nga awan lebadurana.+ 18 Ti umuna nga aldaw ket nasantuan a panagtataripnong. Dikay agtrabaho iti nadagsen. 19 Mangidatagkayo ken Jehova iti daton a mapuoran: dua nga urbon a kalakian a baka, maysa a kalakian a karnero, ken pito a kalakian a karnero nga agtawen iti maysa. Masapul a nasalun-at nga animal ti idatonyo.+ 20 Pakuyoganyo dagita iti daton a bukbukel a napino nga arina a nalaokan iti lana+—tallo nga apagkapullo a sukat para iti baka ken dua nga apagkapullo a sukat para iti karnero. 21 Pakuyoganyo met iti apagkapullo a sukat ti tunggal maysa kadagiti pito a kalakian nga urbon a karnero, 22 kasta met ti kalding kas daton gapu iti basol tapno maabbongan ti basolyo. 23 Idatonyo dagitoy, malaksid iti daton a mapuoran iti bigat, a para iti regular a daton a mapuoran. 24 Agpapada ti pamay-an a panangidatagyo kadagitoy iti pito nga aldaw kas taraon,* kas daton a mapuoran a makaay-ayo* ti banglona ken Jehova. Maidatag dagitoy a kakuyog ti regular a daton a mapuoran ken daton nga inumen. 25 Mangaramidkayo iti nasantuan a panagtataripnong iti maikapito nga aldaw.+ Dikay agtrabaho iti nadagsen.+

26 “‘No mangidatagkayo ken Jehova iti baro a daton a bukbukel,+ iti aldaw dagiti umuna a naluom a bunga,+ mangaramidkayo iti nasantuan a panagtataripnong iti piesta dagiti lawas.+ Dikay agtrabaho iti nadagsen.+ 27 Mangidatagkayo ken Jehova iti dua nga urbon a kalakian a baka, maysa a kalakian a karnero, ken pito a kalakian a karnero nga agtawen iti maysa, kas daton a mapuoran a makaay-ayo* ti banglona.+ 28 Pakuyoganyo dagita iti daton a bukbukel a napino nga arina a nalaokan iti lana—tallo nga apagkapullo a sukat para iti tunggal baka ken dua nga apagkapullo a sukat para iti karnero. 29 Pakuyoganyo met iti apagkapullo a sukat ti tunggal maysa kadagiti pito a kalakian nga urbon a karnero, 30 kasta met ti urbon a kalding tapno maabbongan ti basolyo.+ 31 Idatonyo dagita, malaksid iti regular a daton a mapuoran ken ti daton a bukbukel. Masapul a nasalun-at dagita nga animal+ ken mapakuyogan iti daton nga inumen.

29 “‘Mangaramidkayo iti nasantuan a panagtataripnong iti umuna nga aldaw ti maikapito a bulan. Dikay agtrabaho iti nadagsen.+ Puyotenyo dagiti trumpeta iti dayta nga aldaw.+ 2 Ipaayyo ken Jehova kas daton a mapuoran a makaay-ayo* ti banglona ti maysa nga urbon a kalakian a baka, maysa a kalakian a karnero, ken pito a kalakian a karnero nga agtawen iti maysa ken nasalun-at amin. 3 Pakuyoganyo dagita iti daton a bukbukel a napino nga arina a nalaokan iti lana—tallo nga apagkapullo a sukat ti maysa nga efa para iti baka, dua nga apagkapullo a sukat para iti karnero, 4 ken apagkapullo a sukat para iti tunggal maysa kadagiti pito nga urbon a karnero, 5 kasta met ti maysa a kalding kas daton gapu iti basol tapno maabbongan ti basolyo. 6 Maidatag dagitoy a karaman iti binulan a daton a mapuoran ken ti kakuyogna a daton a bukbukel+ kasta met ti regular a daton a mapuoran ken ti kakuyogna a daton a bukbukel.+ Maidatag dagitoy ken Jehova agraman dagiti kakuyogda a daton nga inumen+ kas daton a mapuoran a makaay-ayo* ti banglona, maitunos iti naibilin.

7 “‘Masapul a mangaramidkayo iti nasantuan a panagtataripnong iti maika-10 nga aldaw daytoy maikapito a bulan,+ ket masapul a parigatenyo ti bagiyo.* Dikay agtrabaho iti aniaman.+ 8 Idatagyo ken Jehova kas daton a mapuoran a makaay-ayo* ti banglona ti maysa nga urbon a kalakian a baka, maysa a kalakian a karnero, ken pito a kalakian a karnero nga agtawen iti maysa ken nasalun-at amin.+ 9 Pakuyoganyo dagita iti daton a bukbukel a napino nga arina a nalaokan iti lana—tallo nga apagkapullo a sukat para iti baka, dua nga apagkapullo a sukat para iti karnero, 10 apagkapullo a sukat para iti tunggal maysa kadagiti pito nga urbon a karnero, 11 kasta met ti maysa nga urbon a kalding kas daton gapu iti basol, malaksid iti daton gapu iti basol iti aldaw ti panangabbong+ ken ti regular a daton a mapuoran ken ti kakuyogna a daton a bukbukel, ken dagiti daton nga inumen.

12 “‘Mangaramidkayo iti nasantuan a panagtataripnong iti maika-15 nga aldaw ti maikapito a bulan. Dikay agtrabaho iti nadagsen, ken selebraranyo ti piesta para ken Jehova iti pito nga aldaw.+ 13 Idatagyo ken Jehova kas daton a mapuoran+ a makaay-ayo* ti banglona ti 13 nga urbon a kalakian a baka, 2 a kalakian a karnero, ken 14 a kalakian a karnero nga agtawen iti maysa ken nasalun-at amin.+ 14 Pakuyoganyo dagita iti daton a bukbukel a napino nga arina a nalaokan iti lana—tallo nga apagkapullo a sukat para iti tunggal maysa kadagiti 13 a baka, dua nga apagkapullo a sukat para iti tunggal maysa kadagiti 2 a karnero, 15 ken apagkapullo a sukat para iti tunggal maysa kadagiti 14 nga urbon a karnero, 16 kasta met ti maysa nga urbon a kalding kas daton gapu iti basol, malaksid iti regular a daton a mapuoran, ti kakuyogna a daton a bukbukel ken daton nga inumen.+

17 “‘Iti maikadua nga aldaw, mangidatagkayo iti 12 a kalakian a baka, 2 a kalakian a karnero, ken 14 a kalakian a karnero nga agtawen iti maysa ken nasalun-at amin,+ 18 ken ti daton a bukbukel ken dagiti daton nga inumen para kadagiti kalakian a baka, karnero, ken urbon a karnero sigun iti bilangda ken maitunos iti naibilin. 19 Mangidatagkayo met iti maysa nga urbon a kalding kas daton gapu iti basol, malaksid iti regular a daton a mapuoran ken ti kakuyogna a daton a bukbukel, ken dagiti daton nga inumen.+

20 “‘Iti maikatlo nga aldaw, mangidatagkayo iti 11 a kalakian a baka, 2 a kalakian a karnero, ken 14 a kalakian a karnero nga agtawen iti maysa ken nasalun-at amin,+ 21 ken ti daton a bukbukel ken dagiti daton nga inumen para kadagiti kalakian a baka, karnero, ken urbon a karnero sigun iti bilangda ken maitunos iti naibilin. 22 Mangidatagkayo met iti maysa a kalding kas daton gapu iti basol, malaksid iti regular a daton a mapuoran ken ti kakuyogna a daton a bukbukel ken daton nga inumen.+

23 “‘Iti maikapat nga aldaw, mangidatagkayo iti 10 a kalakian a baka, 2 a kalakian a karnero, ken 14 a kalakian a karnero nga agtawen iti maysa ken nasalun-at amin,+ 24 ken ti daton a bukbukel ken dagiti daton nga inumen para kadagiti kalakian a baka, karnero, ken urbon a karnero sigun iti bilangda ken maitunos iti naibilin. 25 Mangidatagkayo met iti maysa nga urbon a kalding kas daton gapu iti basol, malaksid iti regular a daton a mapuoran ken ti kakuyogna a daton a bukbukel ken daton nga inumen.+

26 “‘Iti maikalima nga aldaw, mangidatagkayo iti 9 a kalakian a baka, 2 a kalakian a karnero, ken 14 a kalakian a karnero nga agtawen iti maysa ken nasalun-at amin,+ 27 ken ti daton a bukbukel ken dagiti daton nga inumen para kadagiti kalakian a baka, karnero, ken urbon a karnero sigun iti bilangda ken maitunos iti naibilin. 28 Mangidatagkayo met iti maysa a kalding kas daton gapu iti basol, malaksid iti regular a daton a mapuoran ken ti kakuyogna a daton a bukbukel ken daton nga inumen.+

29 “‘Iti maikanem nga aldaw, mangidatagkayo iti 8 a kalakian a baka, 2 a kalakian a karnero, ken 14 a kalakian a karnero nga agtawen iti maysa ken nasalun-at amin,+ 30 ken ti daton a bukbukel ken dagiti daton nga inumen para kadagiti kalakian a baka, karnero, ken urbon a karnero sigun iti bilangda ken maitunos iti naibilin. 31 Mangidatagkayo met iti maysa a kalding kas daton gapu iti basol, malaksid iti regular a daton a mapuoran, ti kakuyogna a daton a bukbukel, ken dagiti daton nga inumen.+

32 “‘Iti maikapito nga aldaw, mangidatagkayo iti 7 a kalakian a baka, 2 a kalakian a karnero, ken 14 a kalakian a karnero nga agtawen iti maysa ken nasalun-at amin,+ 33 ken ti daton a bukbukel ken dagiti daton nga inumen para kadagiti kalakian a baka, karnero, ken urbon a karnero sigun iti bilangda ken maitunos iti naibilin. 34 Mangidatagkayo met iti maysa a kalding kas daton gapu iti basol, malaksid iti regular a daton a mapuoran, ti kakuyogna a daton a bukbukel ken daton nga inumen.+

35 “‘Iti maikawalo nga aldaw, mangaramidkayo iti nasantuan nga asamblea. Dikay agtrabaho iti nadagsen.+ 36 Idatagyo ken Jehova kas daton a mapuoran a makaay-ayo* ti banglona ti maysa a kalakian a baka, maysa a kalakian a karnero, ken pito a kalakian a karnero nga agtawen iti maysa ken nasalun-at amin,+ 37 ken ti daton a bukbukel ken dagiti daton nga inumen para iti kalakian a baka, karnero, ken kadagiti urbon a karnero sigun iti bilangda ken maitunos iti naibilin. 38 Mangidatagkayo met iti maysa a kalding kas daton gapu iti basol, malaksid iti regular a daton a mapuoran ken ti kakuyogna a daton a bukbukel ken daton nga inumen.+

39 “‘Dagitoy ti ipaayyonto ken Jehova kadagiti piestayo,+ kas kanayonan dagiti datonyo a pangtungpal iti kari,+ dagiti boluntario a datonyo+ kas daton a mapuoran,+ dagiti datonyo a bukbukel,+ dagiti datonyo nga inumen,+ ken dagiti datonyo a pakikappia.’”+ 40 Imbaga ni Moises kadagiti Israelita ti amin nga imbilin kenkuana ni Jehova.

30 Kalpasanna, kinuna ni Moises kadagiti panguluen+ dagiti tribu ti Israel: “Daytoy ti imbilin ni Jehova: 2 No adda ikari+ ti maysa a lalaki ken ni Jehova wenno adda isapatana+ a saanna nga aramiden, masapul a tungpalenna dayta.+ Masapul nga aramidenna ti amin nga inkarina.+

3 “No adda ikari ti maysa a balasang ken ni Jehova wenno adda isapatana a saanna nga aramiden bayat nga adda iti poder ni amana, 4 ket saan a kumontra ni amana no maammuanna ti inkari ti anakna wenno ti insapatana a saanna nga aramiden, tungpalenna ti amin nga inkarina ken ti aniaman nga insapatana a saanna nga aramiden. 5 Ngem no paritan ni amana apaman a maammuanna ti inkari wenno insapatana, saan a mapilit a mangtungpal iti dayta. Pakawanen ni Jehova ta pinaritan ni amana.+

6 “Ngem no makiasawa iti maysa a lalaki bayat a saanna pay a naitungpal ti karina wenno ti nadarasudos a sapatana 7 ket saan a paritan ni lakayna apaman a maammuanna dayta, masapul a tungpalenna ti inkarina wenno ti insapatana a saanna nga aramiden. 8 Ngem no paritan ni lakayna apaman a maammuanna dayta, mabalin a waswasen ni lakayna ti kari wenno ti nadarasudos a sapatana,+ ket pakawanen ni Jehova.

9 “No adda ikari ti maysa a balo wenno diborsiado a babai, masapul a tungpalenna ti amin nga insapatana a saanna nga aramiden.

10 “Ngem no adda ikari ti naasawaan a babai wenno isapatana a saanna nga aramiden, 11 ket saan a paritan wenno kontraen ni lakayna apaman a maammuanna dayta, masapul a tungpalenna ti amin nga inkarina wenno ti insapatana a saanna nga aramiden. 12 Ngem no paritan ni lakayna apaman a maammuanna dayta, naan-anay a mawaswas ti aniaman nga inkari wenno insapatana.+ Pakawanen ni Jehova ta winaswas dagita ni lakayna. 13 Aniaman a kari wenno sapata a panangpaidam iti bagi,* ni lakayna ti mangikeddeng no matungpal wenno mawaswas dayta. 14 Ngem no saan a pulos a kumontra ni lakayna bayat ti panaglabas dagiti aldaw, ken pinalubosanna a mangtungpal iti amin nga inkarina wenno insapatana a saanna nga aramiden, masapul a tungpalenna dagita. Pinalubosanna a mangaramid kadagita ta saan a kimmontra idi naammuanna dagita. 15 Ngem no waswasen dagita ni lakayna, sumagmamano a tiempo kalpasan a naammuanna, isu ti manungsungbat iti basol ni baketna.+

16 “Dagitoy ti regulasion nga imbilin ni Jehova ken ni Moises mainaig iti lalaki ken iti asawana, ken mainaig iti ama ken iti anakna a babai nga adda pay laeng iti poderna.”

31 Kinuna ni Jehova ken ni Moises: 2 “Ibalesam+ dagiti Israelita kadagiti Midianita.+ Kalpasanna, maitiponkanto kadagiti kailiam.”*+

3 Gapuna, imbaga ni Moises kadagiti tattao: “Isaganayo dagiti lallaki a makigubat* iti Midian ket ipalak-amyo ti pammales ni Jehova iti Midian. 4 Iti tunggal tribu ti Israel, mangibaonkayo iti 1,000 a makigubat.” 5 Gapuna, napili ti 1,000 a lallaki iti tunggal tribu ti Israel+ ket 12,000 ti nakasagana a makigubat.*

6 Imbaon ida ni Moises, 1,000 iti tunggal tribu a mapan makigubat, agraman ni Finehas+ nga anak ni Eleazar a padi, a nangitugot kadagiti nasantuan nga alikamen ken kadagiti trumpeta a mangipakaammo iti gubat.+ 7 Nakigubatda iti Midian, kas imbilin ni Jehova ken ni Moises, ket pinapatayda ti tunggal lalaki. 8 Pinatayda met ti lima nga ari ti Midian a da Evi, Rekem, Zur, Hur, ken Reba. Pinatayda met ni Balaam+ nga anak ni Beor babaen ti espada. 9 Ngem tiniliw dagiti Israelita dagiti babbai ken ubbing a Midianita. Innalada pay ti amin a taraken ken sanikuada. 10 Inuramda ti amin a siudad a pagnanaedan ken pagkamkampuan* dagiti Midianita. 11 Innalada ti amin a natiliwda, tattao ken animal. 12 Impanda dagiti naalada a tao, taraken, ken sanikua kada Moises ken Eleazar a padi ken iti amin nga Israelita, idiay tanap ti Moab+ a nagkampuanda iti asideg ti Jordan idiay Jerico.

13 Rimmuar iti kampo da Moises, Eleazar a padi, ken ti amin a panguluen ti Israel tapno sabtenda dagiti napan nakigubat. 14 Ngem nakapungtot ni Moises kadagiti nadutokan a lallaki, dagiti panguluen ti rinibu ken panguluen ti ginasut a naggapu iti gubat. 15 Kinuna ni Moises: “Apay a saanyo a pinatay dagiti babbai? 16 Isuda ti makagapu, kas imbaga ni Balaam, a saan a nagmatalek ti Israel+ ken ni Jehova idi addada idiay Peor,+ isu a nadidigra ti ili ni Jehova.+ 17 Ita, patayenyo amin nga ubbing a lallaki ken amin a babbai a nakidenna iti lalaki. 18 Ngem saanyo a patayen dagiti ubbing a babbai a saan pay a nakidenna iti lalaki.+ 19 Masapul nga agyankayo iti ruar ti kampo iti pito nga aldaw. Iti maikatlo ken maikapito nga aldaw, amin nga adda napatayna ken nasagidna a bangkay+ masapul a dalusanna ti bagina+ ken dagiti tiniliwna. 20 Dalusanyo met ti tunggal bado, ken alikamen a naaramid iti lalat, dutdot ti kalding, ken kayo.”

21 Kinuna ni Eleazar a padi kadagiti lallaki a naggapu iti gubat: “Daytoy ti paglintegan nga imbilin ni Jehova ken ni Moises, 22 ‘Dagiti laeng balitok, pirak, gambang, landok, lata, buli, 23 ken amin a saan a mauram ti maipalasat iti apuy tapno madalusan. Ngem masapul a madalusan met dagita iti danum.+ Amin a saan a maipalasat iti apuy ket madalusan iti danum. 24 Labaanyo met dagiti badoyo iti maikapito nga aldaw tapno madalusan. Kalpasanna, mabalinyon ti sumrek iti kampo.’”+

25 Kinuna ni Jehova ken ni Moises: 26 “Bilangem dagiti naala iti gubat, tao man wenno animal. Kaduam ni Eleazar a padi ken dagiti ulo dagiti pamilia ti Israel. 27 Guduaem dagiti naala iti gubat. Itedmo ti kagudua kadagiti napan nakigubat ken ti sabali pay a kagudua iti amin a nabati nga Israelita.+ 28 Manipud iti bingay dagiti soldado a napan nakigubat, mangalaka iti maysa a kararua* iti tunggal 500, kadagiti tattao, baka, asno, karnero, ken kalding kas buis para ken Jehova. 29 Alaem dayta manipud iti bingayda sa itedmo ken Eleazar a padi kas kontribusion para ken Jehova.+ 30 Manipud iti bingay dagiti Israelita, mangalaka iti maysa iti tunggal 50 a tao, baka, asno, karnero, kalding, ken amin a kita ti taraken sa itedmo dagita kadagiti Levita,+ nga agtrabtrabaho iti tabernakulo ni Jehova.”+

31 Gapuna, inaramid da Moises ken Eleazar a padi ti imbilin ni Jehova ken ni Moises. 32 Ti naala dagiti napan nakigubat ket agdagup iti 675,000 a karnero ken kalding, 33 72,000 a baka, 34 ken 61,000 nga asno. 35 Dagiti babbai a saan a nakidenna iti lalaki+ ket agdagup iti 32,000. 36 Agdagup iti 337,500 a karnero ken kalding ti bingay dagidiay napan nakigubat, 37 ket 675 kadagita ti buis para ken Jehova. 38 Agdagup iti 36,000 ti baka, ket 72 kadagita ti buis para ken Jehova. 39 Ken agdagup iti 30,500 ti asno, ket 61 kadagita ti buis para ken Jehova. 40 Agdagup iti 16,000 dagiti tao,* ket 32 kadakuada ti buis para ken Jehova. 41 Inted ni Moises ken ni Eleazar a padi ti buis para ken Jehova,+ kas imbilin ni Jehova ken ni Moises.

42 Ti bingay nga inted ni Moises kadagiti Israelita manipud iti naala dagiti lallaki a nakigubat ket, 43 337,500 a karnero ken kalding, 44 36,000 a baka, 45 ken 30,500 nga asno, 46 ken 16,000 a tao.* 47 Iti bingay dagiti Israelita, nangala ni Moises iti maysa iti tunggal 50 a tao ken animal, ket intedna dagita kadagiti Levita,+ nga agtrabtrabaho iti tabernakulo ni Jehova,+ kas imbilin ni Jehova ken ni Moises.

48 Kalpasanna, immasideg ken Moises dagiti lallaki a nangidaulo iti rinibu* a soldado,+ kayatna a sawen, dagiti panguluen ti rinibu ken panguluen ti ginasut, 49 ket kinunada ken Moises: “Binilang dagiti adipenmo dagiti lallaki nga indauluanmi a napan nakigubat, ket awan ti naksay uray maysa.+ 50 Gapuna, bay-am a mangidatonkami ken Jehova kadagiti alahas a balitok, pulseras ti saka, pulseras ti ima, pagmarka a singsing, aritos, ken dadduma pay nga alahas, tapno maabbongan ti basolmi ken Jehova.”

51 Gapuna, inawat da Moises ken Eleazar a padi dagiti balitok, amin nga alahas. 52 Ti inted dagiti panguluen ti rinibu ken dagiti panguluen ti ginasut ken ni Jehova ket agdagup iti 16,750 a siklo* a balitok. 53 Adda bingay a naala ti amin a soldado. 54 Inawat da Moises ken Eleazar a padi dagiti balitok nga inted dagiti panguluen ti rinibu ken ginasut ket impanda iti tolda a pagkonsultaan kas pammalagip* kadagiti Israelita iti sanguanan ni Jehova.

32 Nakaad-adu ti taraken dagiti annak ni Ruben+ ken annak ni Gad,+ ket nakitada a nasayaat a pagtaraknan ti daga ti Jazer+ ken Gilead. 2 Gapuna, napan dagiti annak ni Ruben ken annak ni Gad kada Moises, Eleazar a padi, ken kadagiti panguluen ti Israel, ket kinunada: 3 “Ti Atarot, Dibon, Jazer, Nimra, Hesbon,+ Eleale, Sebam, Nebo,+ ken Beon,+ 4 ti teritoria nga inabak ni Jehova iti sanguanan dagiti Israelita,+ ket daga a nasayaat a pagtaraknan. Nakaad-adu ti taraken dagiti adipenmo.”+ 5 Intuloyda a kinuna: “No ipalubosmo, maited koma daytoy a daga kas sanikua dagiti adipenmo. Saannakami koma a pagballasiwen iti Jordan.”

6 Insungbat ni Moises kadagiti annak ni Gad ken annak ni Ruben: “Kayatyo kadi ti agbati ditoy idinto ta mapan makigubat dagiti kakabsatyo? 7 Apay nga upayenyo dagiti Israelita a bumallasiw iti daga a sigurado nga ited kadakuada ni Jehova? 8 Kasta ti inaramid dagiti ammayo idi imbaonko ida manipud Kades-barnea tapno kitaenda ti daga.+ 9 Idi napanda idiay Tanap* ti Escol+ ket nakitada ti daga, inupayda dagiti annak ni Israel tapno saanda a sumrek iti daga a sigurado nga ited kadakuada ni Jehova.+ 10 Nakapungtot ni Jehova iti daydi nga aldaw isu nga insapatana:+ 11 ‘Dagiti lallaki a naggapu idiay Egipto nga agtawen iti 20 nga agpangato saandanto a makita ti daga+ nga inkarik kada Abraham, Isaac, ken Jacob,+ ta saanda a naimpusuan a nagtulnog kaniak— 12 malaksid ken Caleb+ nga anak ni Jefune a Kenizeo ken ni Josue+ nga anak ni Nun, ta naimpusuan a nagtulnogda ken Jehova.’+ 13 Gapuna, nakapungtot ni Jehova iti Israel ket pinagakar-akarna ida iti let-ang iti 40 a tawen,+ agingga a natay ti intero a henerasion a nagaramid iti dakes iti sanguanan ni Jehova.+ 14 Managbasolkayo a kas kadagiti ammayo a nangpakaro iti pungtot ni Jehova iti Israel. 15 No isardengyo ti kumuyog kenkuana, sigurado a baybay-anna manen dagitoy a tattao iti let-ang, ket dakayonto ti makagapu iti pannakadadaelda amin.”

16 Kalpasanna, immasidegda kenkuana ket kinunada: “Palubosannakami a mangibangon ditoy kadagiti bato a pagaponan dagiti tarakenmi ken kadagiti siudad a pagyanan dagiti annakmi. 17 Ngem itultuloyminto ti agsagana a makigubat+ ken makikadua kadagiti Israelita agingga a maitulodmi ida iti pagnaedanda, bayat a sitatalged nga agyan dagiti annakmi kadagiti napaderan a siudad ket saan ida a dangran dagiti agnanaed iti daytoy a daga. 18 Saankamto nga agsubli kadagiti balaymi agingga a saan a maited iti tunggal Israelita ti daga a tawidna.+ 19 Ta awanto ti tawidmi iti ballasiw ti Jordan ken iti labesna, ta naawatmin ti tawidmi iti daya ti Jordan.”+

20 Insungbat kadakuada ni Moises: “No aramidenyonto daytoy: Agsaganakayo a makigubat iti sanguanan ni Jehova;+ 21 ket no agsagana a makigubat ti tunggal maysa kadakayo ken bumallasiwkayo iti Jordan iti sanguanan ni Jehova bayat a pagtalawenna dagiti kabusorna+ 22 agingga a maparmek ti daga iti sanguanan ni Jehova,+ mabalinyonto ti agsubli+ ket saankayto a makabasol ken Jehova ken iti Israel. Iti kasta, agbalinto a sanikuayo daytoy a daga iti sanguanan ni Jehova.+ 23 Ngem no saanyo nga aramiden daytoy, makabasolkayto ken Jehova, ket madusakayto gapu iti basolyo. 24 Gapuna, mabalinyonto ti mangbangon kadagiti siudad a pagyanan dagiti annakyo ken mangaramid kadagiti pagaponan dagiti tarakenyo,+ ngem masapul a tungpalenyo ti inkariyo.”

25 Kastoy ti insungbat dagiti annak ni Gad ken annak ni Ruben: “Apo, aramidento dagiti adipenmo ti imbilinmo. 26 Dagiti annakmi, assawami, ken amin a tarakenmi agyandanto kadagiti siudad ti Gilead,+ 27 ngem bumallasiwto dagiti adipenmo, tunggal lalaki a nakasagana a makigubat iti sanguanan ni Jehova,+ kas kinunayo.”

28 Iti kasta, imbilin ni Moises kada Eleazar a padi, ni Josue nga anak ni Nun, ken kadagiti ulo dagiti pamilia dagiti tribu ti Israel: 29 “No sumurot kadakayo a bumallasiw iti Jordan dagiti annak ni Gad ken annak ni Ruben, tunggal lalaki a nakasagana a makigubat iti sanguanan ni Jehova, ket maparmek ti daga iti sanguananyo, itedyonto kas sanikuada ti daga ti Gilead.+ 30 Ngem no saanda a makigubat ken bumallasiw a kaduayo, makipagyandanto ngarud kadakayo idiay Canaan.”

31 Insungbat dagiti annak ni Gad ken annak ni Ruben: “Aramidento dagiti adipenmo ti imbaga kadakami ni Jehova. 32 Agsaganakamto a makigubat ken bumallasiw iti Canaan+ iti sanguanan ni Jehova, ngem agbalin a tawidmi a sanikua daytoy a paset ti Jordan.” 33 Iti kasta, inted ni Moises kadakuada—dagiti annak ni Gad, annak ni Ruben,+ ken ti kagudua ti tribu ni Manases+ nga anak ni Jose—ti pagarian ni Sihon+ nga ari dagiti Amoreo ken ti pagarian ni Og+ nga ari ti Basan, ti daga a sakup dagiti siudad iti teritoriada, ken dagiti siudad iti aglawlaw dagita.

34 Binangon* dagiti annak ni Gad ti Dibon,+ Atarot,+ Aroer,+ 35 Atrot-sofan, Jazer,+ Jogbea,+ 36 Bet-nimra,+ ken Bet-haran+—amin ket napaderan a siudad—sa nangaramidda kadagiti pagaponan dagiti tarakenda. 37 Binangon dagiti annak ni Ruben ti Hesbon,+ Eleale,+ Kiriataim,+ 38 Nebo,+ ken Baal-meon+—nabaliwan ti naganda—ken Sibma; ket binaliwanda ti nagan dagiti siudad a tinarimaanda.

39 Ginubat dagiti annak ni Makir+ nga anak ni Manases ti Gilead ket naparmekda dayta ken pinagtalawda dagiti Amoreo nga adda sadiay. 40 Gapuna, inted ni Moises ti Gilead ken Makir nga anak ni Manases, ket nagnaed sadiay.+ 41 Ginubat ida ni Jair nga anak ni Manases ket naparmekna dagiti pagkamkampuanda, isu a pinanagananna dagita iti Havot-jair.*+ 42 Nakigubat ni Noba ket naparmekna ti Kenat ken dagiti ili a sakupna, isu nga inawaganna dayta iti Noba nga impasurotna iti naganna.

33 Dagitoy ti agsasaruno a dinaliasat dagiti Israelita idi pimmanawda idiay Egipto+ sigun kadagiti grupoda*+ iti panangidaulo da Moises ken Aaron.+ 2 Inlista ni Moises dagiti lugar a dinaliasatda kas imbilin ni Jehova, ket dagitoy ti agsasaruno a dinaliasatda:+ 3 Nagluasda idiay Rameses+ iti maika-15 nga aldaw ti umuna a bulan.+ Iti mismo nga aldaw kalpasan ti Paskua,+ situtured* a pimmanaw dagiti Israelita iti imatang ti amin nga Egipcio. 4 Itabtabon idi dagiti Egipcio ti amin nga inauna a pinapatay ni Jehova,+ ta inukom ni Jehova dagiti didiosenda ket dinusana ida.+

5 Gapuna, pimmanaw dagiti Israelita idiay Rameses ket nagkampoda idiay Succot.+ 6 Pimmanawda idiay Succot ket nagkampoda idiay Etham,+ iti igid ti let-ang. 7 Idi pimmanawda idiay Etham, nagturongda idiay Pihahirot, iti sango ti Baal-zefon,+ sa nagkampoda iti asideg ti Migdol.+ 8 Kalpasanna, pimmanawda idiay Pihahirot ket bimmallasiwda iti tengnga ti baybay+ nga agturong iti let-ang.+ Intultuloyda ti nagdaliasat iti tallo nga aldaw iti let-ang ti Etham+ sa nagkampoda idiay Mara.+

9 Pimmanawda idiay Mara ket nakadanonda idiay Elim. Adda idi 12 nga ubbog idiay Elim ken 70 a kayo a palma, isu a nagkampoda sadiay.+ 10 Simmaganad, pimmanawda idiay Elim ket nagkampoda iti abay ti Nalabaga a Baybay. 11 Kalpasanna, pimmanawda idiay Nalabaga a Baybay ket nagkampoda iti let-ang ti Sin.+ 12 Pimmanawda iti let-ang ti Sin ket nagkampoda idiay Dofka. 13 Di nagbayag, pimmanawda idiay Dofka ket nagkampoda idiay Alus. 14 Pimmanawda idiay Alus ket nagkampoda idiay Refidim.+ Awan idi sadiay ti danum nga inumen dagiti tattao. 15 Kalpasanna, pimmanawda idiay Refidim ket nagkampoda iti let-ang ti Sinai.+

16 Pimmanawda iti let-ang ti Sinai ket nagkampoda idiay Kibrot-hataava.+ 17 Kalpasanna, pimmanawda idiay Kibrot-hataava ket nagkampoda idiay Hazerot.+ 18 Pimmanawda idiay Hazerot ket nagkampoda idiay Ritma. 19 Simmaganad, pimmanawda idiay Ritma ket nagkampoda idiay Rimmon-perez. 20 Kalpasanna, pimmanawda idiay Rimmon-perez ket nagkampoda idiay Libna. 21 Pimmanawda idiay Libna ket nagkampoda idiay Rissa. 22 Idi pimmanawda idiay Rissa, nagkampoda idiay Kehelata. 23 Pimmanawda idiay Kehelata ket nagkampoda idiay Bantay Sefer.

24 Kalpasanna, pimmanawda idiay Bantay Sefer ket nagkampoda idiay Harada. 25 Pimmanawda idiay Harada ket nagkampoda idiay Makelot. 26 Simmaganad, pimmanawda+ idiay Makelot ket nagkampoda idiay Tahat. 27 Kalpasanna, pimmanawda idiay Tahat ket nagkampoda idiay Tera. 28 Pimmanawda idiay Tera ket nagkampoda idiay Mitka. 29 Di nagbayag, pimmanawda idiay Mitka ket nagkampoda idiay Hasmona. 30 Pimmanawda idiay Hasmona ket nagkampoda idiay Moserot. 31 Kalpasanna, pimmanawda idiay Moserot ket nagkampoda idiay Bene-jaakan.+ 32 Pimmanawda idiay Bene-jaakan ket nagkampoda idiay Hor-hagidgad. 33 Idi pimmanawda idiay Hor-hagidgad, nagkampoda idiay Jotbata.+ 34 Di nagbayag, pimmanawda idiay Jotbata ket nagkampoda idiay Abrona. 35 Kalpasanna, pimmanawda idiay Abrona ket nagkampoda idiay Ezion-geber.+ 36 Pimmanawda idiay Ezion-geber ket nagkampoda iti let-ang ti Zin,+ wenno Kades.

37 Di nagbayag, pimmanawda idiay Kades ket nagkampoda iti asideg ti Bantay Hor,+ iti pagpatinggaan ti Edom. 38 Simmang-at ni Aaron a padi idiay Bantay Hor kas imbilin ni Jehova ket sadiay a natay iti maika-40 a tawen kalpasan a pimmanaw dagiti Israelita idiay Egipto, iti umuna nga aldaw ti maikalima a bulan.+ 39 Agtawen ni Aaron iti 123 idi natay idiay Bantay Hor.

40 Kabayatanna, ti ari ti Arad,+ ti Canaanita nga agnanaed idi idiay Negeb iti Canaan, nadamagna ti iyaay dagiti Israelita.

41 Idi agangay, pimmanawda idiay Bantay Hor+ ket nagkampoda idiay Zalmona. 42 Kalpasanna, pimmanawda idiay Zalmona ket nagkampoda idiay Punon. 43 Pimmanawda idiay Punon ket nagkampoda idiay Obot.+ 44 Pimmanawda idiay Obot ket nagkampoda idiay Iye-abarim iti pagpatinggaan ti Moab.+ 45 Di nagbayag, pimmanawda idiay Iyim ket nagkampoda idiay Dibon-gad.+ 46 Kalpasanna, pimmanawda idiay Dibon-gad ket nagkampoda idiay Almon-diblataim. 47 Pimmanawda idiay Almon-diblataim ket nagkampoda iti kabambantayan ti Abarim+ iti sango ti Nebo.+ 48 Kamaudiananna, pimmanawda iti kabambantayan ti Abarim ket nagkampoda iti tanap ti Moab iti asideg ti Jordan iti sango ti Jerico.+ 49 Nagtultuloyda a nagkampo iti asideg ti Jordan manipud Bet-jesimot agingga iti Abel-sitim,+ iti tanap ti Moab.

50 Nakisarita ni Jehova ken ni Moises iti tanap ti Moab iti asideg ti Jordan iti sango ti Jerico, ket kinunana: 51 “Ibagam kadagiti Israelita, ‘Bumallasiwkayo iti Jordan nga agturong idiay Canaan.+ 52 Masapul a pagtalawenyo ti amin nga agnanaed iti daga ket dadaelenyo ti amin a bato a rebultoda,+ amin a metal nga estatuada,*+ ken amin a nangato a disso a pagdaydayawanda.+ 53 Tagikuaenyo ti daga ken agnaedkayo iti dayta, ta sigurado nga itedkonto ti daga kas sanikuayo.+ 54 Bingbingayenyo ti daga babaen ti binnunot+ ket itedyo kas sanikua dagiti pamiliayo. Ad-adu ti tawid ti dakdakkel a grupo, ken basbassit ti tawid ti basbassit a grupo.+ Ti mabunot ti maysa isunto ti tawidna. Awatenyo ti tawidyo a daga sigun iti tribu dagiti ammayo.+

55 “‘Ngem no saanyo a pagtalawen dagiti agnanaed iti daga,+ dagidiay mabati agbalindanto a kas puling kadagiti matayo ken kas siit kadagiti bakrangyo, ket riribukendakayto iti daga a pagnaedanyo.+ 56 Ket aramidekto kadakayo ti inkeddengko nga aramiden kadakuada.’”+

34 Kinuna pay ni Jehova ken ni Moises: 2 “Kastoy ti ibilinmo kadagiti Israelita: ‘Inton sumrekkayo idiay Canaan,+ daytoy ti daga nga agbalinto a tawidyo, ti Canaan sigun kadagiti pagpatinggaanna.+

3 “‘Ti pagpatinggaanyo iti abagatan ket manipud iti let-ang ti Zin iti abay ti Edom agingga iti ungto ti Asin a Baybay*+ iti daya. 4 Agbaliwto ti turong ti pagpatinggaanyo nga agpaabagatan a lumabas iti sang-atan ti Akrabim+ nga agturong iti Zin ken agpatingga iti Kades-barnea+ iti abagatan. Aglayon daytoy idiay Hazar-addar+ agingga idiay Azmon. 5 Agbaliwto ti pagpatinggaanyo idiay Azmon nga agturong idiay Karayan* ti Egipto ken agpatingga iti Baybay.*+

6 “‘Ti pagpatinggaanyo iti laud ket ti igid ti Dakkel a Baybay.* Daytoyto ti pagpatinggaanyo iti laud.+

7 “‘Daytoyto ti pagpatinggaanyo iti amianan: Mangrugi iti Dakkel a Baybay agingga idiay Bantay Hor. 8 Manipud Bantay Hor nga agturong idiay Lebo-hamat,*+ ken agpatingga idiay Zedad.+ 9 Dumanon ti pagpatinggaanyo idiay Zifron, ken agpatingga idiay Hazar-enan.+ Daytoyto ti pagpatinggaanyo iti amianan.

10 “‘Mangrugi ti pagpatinggaanyo iti daya idiay Hazar-enan agingga idiay Sefam. 11 Dumanon ti pagpatinggaanyo manipud Sefam nga agturong idiay Ribla iti daya ti Ain, ken sumalog sa bumallasiw iti makindaya nga igid ti Baybay ti Kineret.*+ 12 Aglayon ti pagpatinggaanyo idiay Jordan, ken agpatingga idiay Asin a Baybay.+ Daytoyto ti dagayo+ ken dagiti pagpatinggaanna.’”

13 Gapuna, imbilin ni Moises kadagiti Israelita: “Daytoy ti daga a pagbibingayanyonto kas sanikua babaen ti binnunot,+ sigun iti imbilin ni Jehova a maited iti siam ket kagudua a tribu. 14 Ta naiteden ti tawid ti tribu dagiti Rubenita, ti tribu dagiti Gadita, ken ti kagudua ti tribu ni Manases.+ 15 Naalan ti dua ket kagudua a tribu ti tawidda iti daya ti Jordan iti sango ti Jerico, iti pagsingisingan ti init.”+

16 Kinuna pay ni Jehova ken ni Moises: 17 “Dagitoy ti nagan dagiti lallaki a mangbingayto iti daga a tagikuaenyo: ni Eleazar+ a padi ken ni Josue+ nga anak ni Nun. 18 Mangalakayto iti maysa a panguluen iti tunggal tribu a mangbingay iti daga kas tawidyo.+ 19 Dagitoy ti nagan dagiti lallaki: iti tribu ni Juda,+ ni Caleb+ nga anak ni Jefune; 20 iti tribu dagiti annak ni Simeon,+ ni Semuel nga anak ni Amihud; 21 iti tribu ni Benjamin,+ ni Elidad nga anak ni Kislon; 22 iti tribu dagiti annak ni Dan,+ maysa a panguluen, ni Buki nga anak ni Jogli; 23 kadagiti annak ni Jose+ manipud iti tribu dagiti annak ni Manases,+ maysa a panguluen, ni Haniel nga anak ni Efod; 24 manipud iti tribu dagiti annak ni Efraim,+ maysa a panguluen, ni Kemuel nga anak ni Siftan; 25 iti tribu dagiti annak ni Zabulon,+ maysa a panguluen, ni Elizafan nga anak ni Parnak; 26 iti tribu dagiti annak ni Isacar,+ maysa a panguluen, ni Paltiel nga anak ni Azan; 27 iti tribu dagiti annak ni Aser,+ maysa a panguluen, ni Ahihud nga anak ni Selomi; 28 iti tribu dagiti annak ni Neftali,+ maysa a panguluen, ni Pedahel nga anak ni Amihud.” 29 Dagitoy ti binilin ni Jehova a mangbingay iti daga kadagiti Israelita idiay Canaan.+

35 Kinuna pay ni Jehova ken ni Moises iti tanap ti Moab iti asideg ti Jordan+ iti sango ti Jerico: 2 “Bilinem dagiti Israelita nga ikkanda dagiti Levita kadagiti siudad a pagnaedan manipud iti maited a tawidda,+ ken itedda kadagiti Levita ti aglawlaw dagita a siudad a pagipastoranda.+ 3 Agnaeddanto kadagita a siudad, ket dagiti pagipastoran ti agpaayto kadagiti tarakenda ken iti amin a kasapulan dagita. 4 Dagiti pagipastoran kadagiti siudad nga itedyonto kadagiti Levita ket agingga iti 1,000 a kasiko* manipud iti pader ti siudad. 5 Mangrukodkayo iti ruar ti siudad iti 2,000 a kasiko iti makindaya a sikigan, 2,000 a kasiko iti makin-abagatan a sikigan, 2,000 a kasiko iti makinlaud a sikigan, ken 2,000 a kasiko iti makin-amianan a sikigan, ket ti siudad ti adda iti tengnga. Dagitoy ti agserbinto a pagipastoran kadagiti siudadda.

6 “Ikkanyonto dagiti Levita iti 6 a siudad a pagkamangan,+ a papanan ti tao a nakapatay,+ ken ikkanyo pay ida iti 42 a siudad. 7 Agdagup iti 48 a siudad ti itedyo kadagiti Levita, agraman dagiti pagipastoran dagita a siudad.+ 8 Dagiti siudad nga itedyo kadakuada ket aggapu iti tawid dagiti Israelita.+ Adu ti alaenyo kadagiti dakdakkel a grupo, ket bassit ti alaenyo kadagiti basbassit a grupo.+ Ited ti tunggal grupo ti dadduma a siudadda kadagiti Levita maitunos iti tawid a maited kadakuada.”

9 Intuloy a kinuna ni Jehova ken ni Moises: 10 “Ibagam kadagiti Israelita: ‘Ballasiwenyo ti Jordan nga agturong idiay Canaan.+ 11 Mangpilikayo kadagiti siudad a kombiniente kadakayo nga agbalin a siudad a pagkamangan, a papanan ti di inggagara a nakapatay.+ 12 Dagitoy a siudad ti agserbinto a pagkamanganyo manipud iti mangibales iti dara ti napapatay a tao,+ tapno saan a matay ti nakapatay agingga a mausig ti kasona iti sanguanan dagiti umili.+ 13 Kastanto ti pakausaran ti innem a siudad a pagkamangan nga itedyo. 14 Tallo a siudad iti daytoy a bangir ti Jordan+ ken tallo a siudad iti Canaan+ ti agserbinto kas siudad a pagkamangan. 15 Dagitoy nga innem a siudad ti agserbinto a pagkamangan ti asinoman a di inggagara a nakapatay,+ Israelita man, ganggannaet a residente,+ wenno makipagnanaed.

16 “‘Ngem no pang-oren ti maysa a tao ti padana a tao iti landok ket matay, maibilang a kriminal isu a masapul a mapapatay.+ 17 No barsakenna iti bato ti padana a tao a mabalin a pakatayanna ket matay, maibilang a kriminal isu a masapul a mapapatay. 18 No pang-orenna iti kayo ti padana a tao a mabalin a pakatayanna ket matay, maibilang a kriminal isu a masapul a mapapatay.

19 “‘Ti mangibales iti dara ti napapatay a tao ti mangpatay iti kriminal. No masarakanna, patayenna. 20 No induron ti maysa a tao ti padana a tao gapu iti gurana wenno binarsakna gapu iti dakes a panggepna* ket natay,+ 21 wenno kinabilna gapu iti gurana ket natay, masapul a mapapatay ti pimmatay. Maibilang a kriminal ket patayento ti mangibales iti dara ti napapatay a tao no masarakanna.

22 “‘No di inggagara a naiduron ti maysa a tao ti padana a tao ngem awan ti gurana wenno napuruakanna iti aniaman a banag ngem awan ti dakes a panggepna,*+ 23 wenno saanna a nakita a natinnaganna iti bato ngem saanna a kabusor wenno saanna nga inranta a dangran, ket natay, 24 masapul ngarud nga usigen dagiti ukom ti kaso ti nakapatay ken ti mangibales iti dara ti napapatay a tao, maitunos kadagitoy a paglintegan.+ 25 Iti kasta, ispalen dagiti ukom ti nakapatay manipud iti mangibales iti dara ti napapatay a tao sa isublida iti siudad a nagkamanganna. Masapul nga agyan sadiay agingga a matay ti nangato a padi a nabukbokan iti nasantuan a lana.+

26 “‘Ngem no rummuar ti nakapatay iti pagpatinggaan ti siudad a nagkamanganna 27 sa masarakan ti mangibales iti dara ti napapatay a tao iti ruar ti pagpatinggaan ti siudad ket patayenna, awanto ti basolna. 28 Ta masapul nga agyan dayta a tao iti siudad a pagkamangan agingga a matay ti nangato a padi. Ngem no natayen ti nangato a padi, mabalinen nga agsubli ti nakapatay iti dagana.+ 29 Daytoyto ti agnanayon a pagalagadan para iti amin a henerasionyo iti sadinoman a pagnaedanyo.

30 “‘Ti asinoman a mangpatay iti tao* ket masapul a mapapatay kas kriminal+ maibatay iti testimonia* dagiti testigo;+ ngem awan ti mapapatay maibatay iti testimonia ti maysa laeng a testigo. 31 Diyo awaten ti subbot para iti biag* ti kriminal a maikari a matay, ta masapul a mapapatay.+ 32 Diyo awaten ti subbot nga ited ti maysa a napan iti siudad a pagkamangan tapno agsubli nga agnaed iti dagana uray saan pay a natay ti nangato a padi.

33 “‘Diyo rugitan ti daga a pagnanaedanyo, ta marugitan ti daga gapu iti dara dagiti napapatay,+ ket awan ti mabalin a pangabbong iti dara a naibuyat iti daga malaksid ti dara ti tao a pimmatay.+ 34 Diyo rugitan ti daga a pagnanaedanyo, ken pagnanaedak; ta siak, ni Jehova, agnanaedak iti tengnga dagiti Israelita.’”+

36 Dagiti ulo ti pamilia ti kaputotan ni Gilead nga anak ni Makir+ nga anak ni Manases manipud kadagiti pamilia dagiti annak ni Jose immasidegda kada Moises ken kadagiti panguluen, dagiti ulo ti pamilia dagiti Israelita, 2 ket kinunada: “Imbilin ni Jehova iti apok a bingayenyo ti daga kas tawid dagiti Israelita babaen ti binnunot;+ imbilin pay ni Jehova nga itedyo ti tawid ni Zelofehad a kabsatmi kadagiti annakna a babbai.+ 3 No makiasawada iti lallaki iti sabali a tribu ti Israel, maikissay ti tawidda iti natawid dagiti ammami babaen ti binnunot ket mainayon iti tawid ti tribu ti pakiasawaanda. 4 Inton dumteng ti Jubileo+ iti Israel, mainayon met ti tawid dagiti babbai iti tribu ti pakiasawaanda isu a maikissay dayta iti tawid ti tribu dagiti ammami.”

5 Iti kasta, kinuna ni Moises kadagiti Israelita kas imbilin ni Jehova: “Umiso ti imbaga ti tribu dagiti annak ni Jose. 6 Daytoy ti imbilin ni Jehova kadagiti annak a babbai ni Zelofehad: ‘Mabalinda ti makiasawa iti asinoman a kayatda, ngem makiasawada laeng iti lalaki iti tribu ni amada. 7 Awan koma ti tawid dagiti Israelita a maipasa iti sabali a tribu, ta agtalinaed a kukua ti tunggal tribu ti tawid dagidi ammada. 8 Asinoman a babai a naikkan iti tawid manipud kadagiti tribu ti Israel ket masapul a makiasawa iti lalaki iti tribu ni amana,+ tapno agtalinaed kadagiti Israelita ti tawid dagidi ammada. 9 Awan koma ti tawid a maipasa iti sabali a tribu, ta masapul nga agtalinaed a kukua dagiti tribu ti Israel ti tawidda.’”

10 Inaramid dagiti annak a babbai ni Zelofehad ti imbilin ni Jehova ken ni Moises.+ 11 Iti kasta, da Mala, Tirza, Hogla, Milca, ken Noe, nga annak a babbai ni Zelofehad,+ nakiasawada kadagiti kasinsinda iti ama. 12 Nagbalinda nga assawa dagiti lallaki iti tribu ni Manases nga anak ni Jose ket nagtalinaed iti tribuda ti tawid ti pamilia ni amada.

13 Dagitoy ti bilin ken pangngeddeng nga inted ni Jehova kadagiti Israelita babaen ken Moises iti tanap ti Moab iti asideg ti Jordan iti sango ti Jerico.+