NEHEMIAS

1 Daytoy ti imbaga ni Nehemias*+ nga anak ni Hacalias: Iti bulan ti Kislev,* iti maika-20 a tawen ti panagturay ti ari, addaak idi iti kastilio* ti Susan.*+ 2 Sinarungkarannak ni Hanani+ a maysa kadagiti kakabsatko ken ti dadduma a lallaki idiay Juda. Dinamagko kadakuada ti kasasaad dagiti Judio a nabatbati kadagidi naipanaw ngem nakasublin iti daga ken ti situasion ti Jerusalem.+ 3 Insungbatda: “Ti kasasaad dagidiay adda idiay probinsia* a nabatbati kadagidi naipanaw a nakasublin iti daga ket nakarigrigat ken mababainda.+ Nadadaelen dagiti pader ti Jerusalem+ ken nauram dagiti ruanganna.”+

4 Idi nangngegko daytoy, nagtugawak ket nagsangsangitak. Adu nga aldaw a nagladladingitak, nagay-ayunarak,+ ken nagkarkararagak iti Dios ti langit. 5 Kinunak: “O Jehova a Dios ti langit, naindaklanka ken agbutengkami kenka, Dios a mangtungtungpal iti tulag ken mangipakpakita iti napudno nga ayat kadagidiay mangay-ayat kenka ken agtulnog iti bilbilinmo,+ 6 pangngaasim, imdengam ken ipangagmo koma ti ikarkararag daytoy adipenmo ita nga aldaw. Aldaw ken rabii nga ikarkararagko+ ti maipapan kadagiti adipenmo nga Israelita, ken ipudpudnok dagiti basolda kenka. Nagbasolkami, siak ken ti sangakabbalayan ni amak.+ 7 Pudno a dakes ti inar-aramidmi+ ta saanmi a tinungpal dagiti bilinmo, regulasionmo, ken pangngeddengmo nga intedmo ken Moises nga adipenmo.+

8 “Pangngaasim ta lagipem ti imbilinmo* ken Moises nga adipenmo: ‘No dikay agtalinaed a matalek kaniak, iwarawarakayto kadagiti nasion.+ 9 Ngem no agsublikayo kaniak ken tungpalenyo dagiti bilinko, uray pay naiwarawarakayo iti kaadaywan a paset ti daga, ummongenkayto+ ken ipankayto iti disso a pinilik a pakaidayawan ti naganko.’+ 10 Isuda dagiti adipenmo ken ti ilim, a sinubbotmo babaen ti dakkel a pannakabalinmo ken mannakabalin nga imam.+ 11 O Jehova, imdengam ti kararag daytoy adipenmo ken ti kararag dagiti adipenmo a naimpusuan nga agbuteng iti naganmo. Ken pagballigiem koma daytoy adipenmo ita nga aldaw, ket maasian koma kaniak+ ti ari.”

Siak idi ti mangyaw-awat iti arak iti ari.+

2 Iti bulan ti Nisan,* iti maika-20 a tawen+ ti panagturay ni Ari Artaxerxes,+ adda idi arak a naipasango iti ari. Kas iti gagangay nga ar-aramidek, inyawatko ti arak kenkuana.+ Ngem idi pay laeng a nakitanak a nakalidliday. 2 Isu a kinuna ti ari: “Apay a malidlidayka ket saanka met nga agsakit? Adda la ketdi nadagsen a problemam.” Madanaganak unay gapu iti dayta.

3 Kalpasanna, kinunak iti ari: “Agbiag koma ti ari! Kasano a diak malidayan ket nadadaelen ti siudad a nakaitabonan dagidi ammak ken napuoran dagiti ruanganna?”+ 4 Kinuna ti ari: “Ania ngarud ti kayatmo a mapasamak?” Nagkararagak a dagus iti Dios ti langit.+ 5 Ket kinunak iti ari: “No pagayatam, O Ari, ken patgam ti kiddaw daytoy adipenmo, palubosannak koma a mapan idiay Juda, iti siudad a nakaitabonan dagidi ammak, tapno bangonek manen dayta.”+ 6 Nakatugaw idi ti reyna iti abay ti ari. Ket kinuna ti ari: “Kasano kabayag ti kaawanmo ken kaanoka nga agsubli?” Isu a pinalubosannak ti ari+ ket imbagak ti kapaut ti kaawanko.+

7 Kinunak iti ari: “No pakaragsakam O ari, ikkannak koma kadagiti surat a para kadagiti gobernador iti rehion iti Labes ti Karayan,*+ tapno palubosandak a lumasat agingga a makadanonak idiay Juda, 8 ken surat a para ken ni Asaf nga agay-aywan iti Parke ti Ari,* tapno ikkannak kadagiti kayo a mausar iti pannakaaramid dagiti ruangan ti Torre+ iti Balay,* iti pannakaibangon dagiti pader ti siudad,+ ken iti balay a pagyanak.” Ket impaay amin dagita ti ari kaniak+ iti tulong ti Diosko.+

9 Nakadanonak kadagiti gobernador iti rehion iti Labes ti Karayan ket intedko kadakuada dagiti surat ti ari. Impakuyog met kaniak ti ari dagiti pangulo ti armada ken kumakabalio. 10 Ngem nakapungtot da Sanbalat+ a Horonita ken ni Tobias+ nga opisial* nga Ammonita+ idi naammuanda nga adda simmangpet a mangipaay iti pagsayaatan dagiti Israelita.

11 Idi agangay, nakadanonak idiay Jerusalem ket tallo nga aldawko sadiay. 12 Bimmangonak iti rabii ken ti sumagmamano kadagiti kakaduak a lallaki, ket awan ti nangibagbagaak iti ipapaaramid kaniak ti Diosko para iti Jerusalem. Awan ti sabali nga animal nga inkuyogko malaksid ti nagsakayak. 13 Rimmuarak iti rabii iti Ruangan ti Tanap+ ken limmabasak iti sango ti Ubbog ti Dakkel nga Uleg agingga iti Ruangan Dagiti Gabsuon+ a Dapo, ket sinukimatko dagiti nadadael a pader ti Jerusalem ken dagiti napuoran a ruanganna.+ 14 Nakadanonak iti Ruangan ti Ubbog+ ken iti Pagurnongan iti Danum ti Ari, ngem awan idi ti pagnaan ti animal a pagsaksakayak, 15 isu a nagturongak iti tanap*+ iti dayta a rabii ket kinitak dagiti pader. Idi agsubliak, nagnaak met laeng iti Ruangan ti Tanap.

16 Saan nga ammo dagiti opisial ti siudad+ no sadino ti napanak ken no ania ti ar-aramidek, ta awan pay ti imbagbagak kadagiti Judio, papadi, natatan-ok, opisial, ken kadagiti trabahador. 17 Kalpasanna, kinunak kadakuada: “Ammoyo a nakarigrigat ti kasasaadtayo, ta nadadaelen ti Jerusalem ken napuoran dagiti ruanganna. Bangonentayo manen dagiti pader ti Jerusalem tapno agpatingga ti pannakaumsitayo.” 18 Imbagak kadakuada no kasano a pabpabilgennak ti Diosko+ ken dagiti sasao ti ari.+ “Rugiantayo ngaruden,” kinunada. Isu a nagpipinnaregtada* tapno maibanagda ti nasayaat a trabaho.+

19 Idi naammuan dayta ni Sanbalat a Horonita ken ni Tobias+ nga opisial* nga Ammonita,+ ken ni Gesem nga Arabiano,+ inuy-uyaw+ ken kinatkatawaandakami nga ibagbagada: “Ania ti ar-aramidenyo? Agrebrebeldekayo kadi iti ari?”+ 20 Ngem kinunak: “Pagballigiennakaminto ti Dios ti langit.+ Dakami dagiti adipenna ket masapul a bangonenmi ti pader; ngem awanto ti bingayyo wenno kalinteganyo wenno pakalaglagipanyo* iti Jerusalem.”+

3 Ni Eliasib+ a nangato a padi ken ti kakabsatna a papadi binangonda ti Ruangan ti Karnero.+ Pinagbalinda dayta a nasantuan,+ ken inkabilda dagiti rikepna. Pinagbalinda dayta a nasantuan agingga iti Torre ti Mea+ ken Torre ni Hananel.+ 2 Intuloy dagiti lallaki ti Jerico+ a binangon ti paset ti pader. Intuloy met a binangon ni Zacur nga anak ni Imri ti sumaruno a paset.

3 Tinarimaan ti annak ni Hasenaa ti Ruangan ti Ikan.+ Inkabilda dagiti hamba+ sada inkapet dagiti ridaw ken trangkana. 4 Tinarimaan ni Meremot+ nga anak ni Uria ken apoko ni Hakoz ti sumaruno a paset; tinarimaan ni Mesulam+ nga anak ni Berekias ken apoko ni Mesezabel ti sumaruno a paset; ken tinarimaan ni Zadok nga anak ni Baana ti sumaruno a paset. 5 Tinarimaan met dagiti Tekoita+ ti sumaruno a paset, ngem dagiti natan-ok saanda a timmulong* iti impatrabaho dagiti manangaywan.

6 Tinarimaan da Joiada nga anak ni Pasea ken Mesulam nga anak ni Besodias ti Ruangan ti Daan a Siudad.+ Inkabilda dagiti hamba sada inkapet dagiti ridaw ken trangkana. 7 Binangon ni Melatias a Gibeonita+ ken ni Jadon a Meronotita ti sumaruno a paset ti pader. Kaduada dagiti lallaki ti Gibeon ken Mizpa+ a sakup ti* gobernador iti Labes ti Karayan.*+ 8 Ni Uziel nga anak ni Haraias ken maysa kadagiti agpampanday iti balitok ti nangbangon iti sumaruno a paset. Ni Hananias a maysa kadagiti agar-aramid iti bangbanglo ti nangbangon iti sumaruno a paset. Pinalanasda* ti pagnaan iti dayta a paset ti Jerusalem agingga iti Akaba a Pader.+ 9 Ni Refaias nga anak ni Hur ken prinsipe ti kagudua ti distrito ti Jerusalem ti nangtarimaan iti sumaruno a paset. 10 Tinarimaan ni Jedaias nga anak ni Harumaf ti sumaruno a paset nga adda iti sango ti balayna. Tinarimaan met ni Hatus nga anak ni Hasabnias ti sumaruno a paset.

11 Tinarimaan da Malkias nga anak ni Harim+ ken Hasub nga anak ni Pahat-moab+ ti sabali pay a paset* agraman ti Torre Dagiti Pugon.+ 12 Ni Salum nga anak ni Halohes, a prinsipe ti kagudua ti distrito ti Jerusalem, ti nangtarimaan iti sumaruno a paset a kaduana ti annakna a babbai.

13 Ni Hanun ken dagiti agnanaed iti Zanoa+ tinarimaanda ti Ruangan ti Tanap.+ Inkapetda dagiti rikep ken trangkana, ken tinarimaanda ti 1,000 a kasiko* a pader agingga iti Ruangan Dagiti Gabsuon a Dapo.+ 14 Ni Malkias nga anak ni Rekab ken prinsipe ti distrito ti Bet-hakerem+ ti nangtarimaan iti Ruangan Dagiti Gabsuon a Dapo ken nangikapet kadagiti ridaw ken trangkana.

15 Ni Salun nga anak ni Colhoze ken prinsipe ti distrito ti Mizpa+ ti nangtarimaan iti Ruangan ti Ubbog.+ Binangon ken inatepanna sana inkapet dagiti ridaw ken trangkana. Tinarimaanna pay ti pader ti Pagurnongan iti Danum+ ti Kanal nga abay ti Hardin ti Ari+ agingga iti Agdan+ nga agpababa manipud iti Siudad ni David.+

16 Ni Nehemias nga anak ni Azbuk ken prinsipe ti kagudua ti distrito ti Bet-zur+ ti nangtarimaan iti sango ti Sementerio ni David+ agingga iti naaramid a pagurnongan iti danum+ ken iti Balay Dagiti Mannakabalin.

17 Timmulong met dagiti Levita. Indauluan ni Rehum nga anak ni Bani ti panangtarimaan iti sumaruno a paset. Ni Hasabias a prinsipe ti kagudua ti distrito ti Keila+ ti nangidaulo iti distritona a nangtarimaan iti sumaruno a paset. 18 Nakipagtrabaho met dagiti kakabsatda. Ni Bavvai nga anak ni Henadad ken prinsipe ti kagudua ti distrito ti Keila ti nangidaulo iti sumaruno a paset.

19 Ni Ezer nga anak ni Jesua+ ken prinsipe ti Mizpa ti nangtarimaan iti sabali pay a paset iti sango ti sang-atan agingga iti Pagidulinan iti Armas iti Sarikedked.*+

20 Nakagaggaget ni Baruk nga anak ni Zabbai+ a nangtarimaan iti sabali pay a paset, manipud iti Sarikedked* agingga iti pagserkan ti balay ni Eliasib+ a nangato a padi.

21 Ni Meremot+ nga anak ni Uria ken apoko ni Hakoz ti nangtarimaan iti sabali pay a paset, manipud iti pagserkan ti balay ni Eliasib agingga iti ungtona.

22 Ti sumaruno a paset ket tinarimaan dagiti papadi manipud iti Distrito ti Jordan.*+ 23 Tinarimaan da Benjamin ken Hasub ti sumaruno a paset nga adda iti sango ti balayda. Tinarimaan met ni Azarias nga anak ni Maasias ken apoko ni Anania ti paset nga asideg iti balayna. 24 Tinarimaan ni Binnui nga anak ni Henadad ti sabali pay a paset, manipud iti balay ni Azarias agingga iti Sarikedked*+ ken iti suli ti pader.

25 Tinarimaan ni Palal nga anak ni Uzai ti sango ti Sarikedked* ken ti torre iti Balay* ti Ari,+ ti makinngato a paset nga adda iti Paraangan ti Guardia.+ Tinarimaan ni Pedaias nga anak ni Paros+ ti sumaruno a paset.

26 Dagiti agserserbi iti templo*+ nga agnanaed idiay Ofel+ tinarimaanda ti sumaruno a paset agingga iti sango ti Ruangan ti Danum+ iti daya ken agingga iti torre.

27 Tinarimaan dagiti Tekoita+ ti sabali pay a paset, manipud iti sango ti dakkel a torre agingga iti pader ti Ofel.

28 Tinarimaan dagiti papadi ti ngatuen ti Ruangan ti Kabalio.+ Tunggal maysa tinarimaanna ti paset ti pader iti batog ti balayna.

29 Tinarimaan ni Zadok+ nga anak ni Immer ti sumaruno a paset iti sango ti balayna.

Ti sumaruno a paset ket tinarimaan met ni Semaias nga anak ni Secanias nga agbambantay iti Makindaya a Ruangan.+

30 Tinarimaan ni Hananias nga anak ni Selemias ken ni Hanun a maikanem nga anak ni Zalaf ti sumaruno a paset.

Tinarimaan met ni Mesulam+ nga anak ni Berekias ti sumaruno a paset, iti sango ti balayna.*

31 Ni Malkias a miembro ti grupo dagiti agpampanday iti balitok ti nangtarimaan iti sumaruno a paset agingga iti balay dagiti agserserbi iti templo*+ ken dagiti negosiante, iti sango ti Ruangan ti Pannakasukimat agingga iti makinngato a kuarto iti suli ti pader.

32 Dagiti agpampanday iti balitok ken dagiti negosiante ti nangtarimaan iti sumaruno a paset manipud iti makinngato a kuarto iti suli ti pader agingga iti Ruangan ti Karnero.+

4 Idi nadamag ni Sanbalat+ a bangbangonenmi manen ti pader, nakaunget ken kasta unay ti rurodna,* ket linalaisna dagiti Judio. 2 Kinunana iti sango dagiti kakaduana ken ti armada ti Samaria: “Ania ti ar-aramiden dagiti nakapuy a Judio? Kabaelanda ngata ti agibangon nga is-isuda? Agidatonda ngata? Malpasda ngata iti agmalem? Mausarda pay ngata dagiti napuoran a batbato manipud iti bunton ti dapdapo?”+

3 Kinuna met ni Tobias+ nga Ammonita+ a nakatakder iti abayna: “Ania met ti bangbangonenda? Ulien la ti sora, marban.”

4 Nagkararagak: “O Diosmi, denggennakami, ta maum-umsikami.+ Agsubli koma kadakuada ti panangum-umsida+ ken bay-am a maadipenda iti sabali a daga. 5 Dimo koma pakawanen ti dakes nga aramidda wenno lipaten ti basolda,+ ta in-insultuenda dagiti agibangbangon.”

6 Isu nga intultuloymi a binangon ti pader agingga a nagsisilpo ken nalpasmi ti kagudua ti kangatona. Intultuloy nga inggaed dagiti umili ti nagtrabaho.

7 Napalalo ti pungtot da Sanbalat ken Tobias,+ uray dagiti Arabiano,+ Ammonita, ken Asdodita+ idi nadamagda nga agtultuloy ti pannakaibangon dagiti pader ti Jerusalem ken natarimaanen dagiti giwangna. 8 Nagkukumplotda tapno umayda rauten ken riribuken ti Jerusalem. 9 Ngem nagkararagkami iti Diosmi ken nangikabilkami iti guardia nga agbantay kadakuada iti aldaw ken rabii.

10 Nupay kasta, kinuna dagiti umili ti Juda: “Agkakapsuten dagiti trabahador,* sa nakaad-adu dagiti basura. Ditay kabaelan nga ileppas ti pader.”

11 Ibagbaga met dagiti kabusormi: “Ditay agpadpadlaw. Intay patayen ida ken pasardengentayo ti trabahoda.”

12 Kada umay agtrabaho dagiti Judio nga agnanaed iti asideg dagiti kabusor, maulit-ulit* nga ibagada kadakami: “Umaydatayo rauten manipud iti nagduduma a lugar.”

13 Isu a nangpiliak kadagiti agbantay manipud iti tunggal pamilia. Inikkak ida kadagiti espada, gayang, ken pana sa impuestok ida iti nababa a paset iti ruar ti pader a di pay nalpas. 14 Idi nadlawko a mabutengda, imbagak a dagus kadagiti natatan-ok,+ opisial, ken iti amin nga umili: “Diyo kabuteng ida.+ Laglagipenyo a ni Jehova ket naindaklan ken nakaskasdaaw.+ Makilabankayo para kadagiti kakabsat, annak, assawa, ken pagtaenganyo.”

15 Idi nadamag dagiti kabusormi a naammuanmin dagiti planoda ken saan nga impalubos ti Dios nga agballigida, intuloymi ti trabahomi iti pader. 16 Manipud idin, kagudua kadagiti tattaok ti agtrabaho+ ken kagudua met ti nakakabal ken nakaiggem kadagiti gayang, kalasag, ken pana. Sinuportaran dagiti prinsipe+ dagiti umili ti Juda 17 nga agibangbangon iti pader. Usaren dagiti agbumbunag ti maysa nga imada a pagtrabaho bayat a nakaiggem iti armas* ti maysa nga imada. 18 Nakabarikes iti espada ti tunggal maysa kadagiti agibangbangon bayat nga agtrabtrabahoda, ket adda iti abayko ti parapuyot iti tangguyob.+

19 Kalpasanna, kinunak kadagiti natatan-ok ken kadagiti opisial ken iti amin nga umili: “Nagdakkel ken nakaad-adu ti trabahuentayo iti pader, sa agaaddayotayo. 20 Isu a no mangngegyo ti uni ti tangguyob, umaykayo iti ayanmi. Ti Diostayo ti makilaban para kadatayo.”+

21 Isu nga intultuloymi ti nagtrabaho bayat a ti kagudua ti bilangmi ket nakaiggem iti gayang, manipud parbangon agingga iti rabii a panagparangen dagiti bituen. 22 Iti dayta a tiempo, imbagak kadagiti umili: “Agyan koma dagiti lallaki ken dagiti katulonganda iti uneg ti Jerusalem tapno guardiaandakami iti rabii ken agtrabahoda iti aldaw.” 23 Siak ken dagiti kakabsatko, dagiti katulongak,+ ken dagiti guardia, saanmi a sinuktan dagiti badomi ken iggemmi latta dagiti armasmi iti makannawan nga imami.

5 Nagreklamo dagiti lallaki ken dagiti assawada gapu kadagiti aramid dagiti padada a Judio.+ 2 Adda dagiti nangibaga: “Adu ti annakmi a lallaki ken babbai ket kasapulanmi ti taraon tapno agbiagkami.” 3 Kinuna met ti dadduma: “Insaldami dagiti talon, kaubasan, ken balbalaymi tapno adda kanenmi kabayatan ti bisin.” 4 Adda met dagiti nangibaga: “Immutangkami iti kuarta a pagbayad iti buis para iti talon ken kaubasanmi.+ 5 Agkakabagiankami amin.* Awan nakaidumaan dagiti annakda kadagiti annakmi; ngem mapilitankami a mangipaadipen kadagiti annakmi, ket naadipenen ti dadduma nga annakmi a babbai.+ Awan ti maaramidanmi a mangpasardeng iti daytoy ta sabalin ti makinkukua kadagiti talon ken kaubasanmi.”

6 Kasta unay ti pungtotko idi nangngegko dagitoy a reklamoda. 7 Isu a pinampanunotko ti problemada. Napanak kadagiti natan-ok ken kadagiti opisial ket binabalawko ida: “Mangipatpatawkayo iti interes* kadagiti mismo a kakabsatyo.”+

Kalpasanna, inummongko dagiti umili tapno masolbar dayta. 8 Kinunak kadakuada: “Inkagumaantayo a subboten* dagiti Judio a kakabsattayo a nailako kadagiti nasion. Sa ita, ilakoyo kadi ida kadagiti mismo a kakabsatyo+ satayto subboten met laeng ida?” Gapu iti dayta, awan ti naibaga ken naisungbatda. 9 Isu a kinunak: “Saan a nasayaat ti kasta nga ar-aramidenyo. Saan kadi a rumbeng koma nga agbutengkayo iti Diostayo+ tapno saantayo a maibabain kadagiti nasion a bumusbusor kadatayo? 10 Kasta met, dakami nga agkakabsat ken dagiti katulongak ket agpapautang iti kuarta ken bukbukel, ngem awanan iti interes. Isardengtayo koman ti agpautang nga addaan iti interes.+ 11 Pangngaasiyo ta isubliyon ita met la nga aldaw dagiti talon,+ kaubasan, kaolibuan, ken balbalayda, agraman ti apagkasangagasut* ti kuarta, ti bukbukel, ti baro nga arak, ken ti lana a singsingirenyo kas interes ti utangda.”

12 Gapuna kinunada: “Isublimin dagita ken saankamin nga agdawat iti kasukatna. Aramidenmi ti amin nga imbagam.” Isu nga inayabak dagiti papadi ket pinagsapatak dagitoy a tattao a tungpalenda dayta nga inkarida. 13 Winagwagko met ti badok* ket kinunak: “Kastoy koma ti panangwagwag ti pudno a Dios iti asinoman manipud iti balay ken sanikuana no saanna a matungpal ti karina. Kasta koma ti mapasamak agingga a mapukaw ti amin nga adda kenkuana.” Sangsangkamaysa a kinuna dagiti naguummong: “Amen!”* Ket indaydayawda ni Jehova ken tinungpalda ti karida.

14 Insaadnak ni Ari Artaxerxes+ kas gobernador+ iti Juda iti 12 a tawen, manipud maika-20+ agingga iti maika-32 a tawen+ ti panagturayna. Kabayatan dayta, siak wenno uray dagiti kakabsatko ket saan a nangan iti taraon nga abastok kas gobernador.+ 15 Ngem dagiti gobernador nga immun-una ngem siak pinarigatda dagiti tattao. Inaldaw a siningirda ida iti 40 a siklo* a pirak para iti taraon ken arak. Uray dagiti katulonganda pinarigatda dagiti umili. Ngem saanko nga inaramid dayta+ ta agbutengak iti Dios.+

16 Maysa pay, timmulongak iti pannakaibangon daytoy a pader. Nakipagtrabaho met ti amin a katulongak ngem awan ti talon a ginamgammi.+ 17 Pinakpakanko ti 150 a Judio ken opisial, kasta met dagidiay naggapu iti dadduma a nasion. 18 Inaldaw a maysa a kalakian a baka, innem a kasayaatan a karnero, ken adu a tumatayab ti naisagana para kaniak.* Kada 10 nga aldaw met a nagpainumak iti adu nga arak a nagduduma ti klasena. Ngem diak inal-ala ti taraon nga abastok kas gobernador ta madagdagsenanen dagiti umili. 19 Laglagipennak ken bendisionannak,* O Diosko, iti amin nga inaramidko maigapu kadagitoy a tattao.+

6 Idi nadamag da Sanbalat, Tobias,+ ken Gesem nga Arabiano+ ken ti dadduma pay a bumusbusor a nabangonko manen ti pader+ ket awanen ti nabati a giwangna (nupay diak pay idi naikabil ti rikep dagiti ruangan),+ 2 dagus nga impaibaga kaniak da Sanbalat ken Gesem: “Agkikitatayo iti purok ti Tanap ti Ono.”+ Ngem planodak a dangran. 3 Isu a nangibaonak kadagiti mensahero a mangibaga kadakuada: “Adu ti ar-aramidek isu a diak makaumay. Apay koma a maisardeng ti trabaho tapno laeng makipagkitaak kadakayo?” 4 Namimpat nga impaibagada a mapanak ngem isu latta ti sungbatko.

5 Iti maikalima a gundaway, impaitulod ni Sanbalat iti katulonganna ti silulukat a suratna kaniak a naglaon iti isu met la a mensahe. 6 Kuna ti suratna: “Agdindinamag kadagiti nasion ken ipadpadamag pay ni Gesem+ a panggepyo a Judio ti agrebelde+ isu a bangbangonenyo ti pader, ket sikanto kano ti agbalin nga arida. 7 Adda pay dagiti dinutokam a propeta a mangipakaammo iti maipapan kenka iti intero a Jerusalem, ‘Adda ari iti Juda!’ Maidanonto dagita iti ari isu nga umayka ket pagsasaritaantayo dayta.”

8 Ngem impaibagak kenkuana: “Saan nga agpayso dagiti ibagbagam, inim-imbento laeng dagita ti imahinasionmo.”* 9 Ta butbutngendakami amin, nga ibagbagada: “Maupaydanto ket saandanto a maileppas ti panagbangonda.”+ Ngem ita, O Diosko, pangngaasim ta pabilgennak.+

10 Napanak iti balay ni Semaias nga anak ni Delaias ken apoko ni Mehetabel bayat nga agpuppupok sadiay. Kinunana: “Agtulagta no kaano nga agkitata idiay balay ti pudno a Dios, iti uneg ti templo. Iserratanto dagiti ridawna ta umaydaka patayen. Rabii ti iyaayda a mangpatay kenka.” 11 Ngem kinunak: “Rumbeng aya nga agtalaw ti maysa a lalaki a kas kaniak? Makastrek aya iti templo ti maysa a lalaki a kas kaniak ket saan a mapapatay?+ Saanakto a sumrek!” 12 Naamirisko a saan a ti Dios ti nangibaon kenkuana no di ket tinangdanan da Tobias ken Sanbalat+ a mangipadto iti dayta maibusor kaniak. 13 Tinangdananda a mangbutbuteng kaniak tapno agbasolak ket adda panggapuanda a mangdadael iti reputasionko ken maibabainak.

14 O Diosko, laglagipem da Tobias+ ken Sanbalat ken dagiti ar-aramidenda, ken uray ni Noadias a propeta a babai ken ti dadduma pay a propeta a kanayon a mangbutbuteng idi kaniak.

15 Ket nalpas ti pader iti maika-25 nga aldaw ti Elul,* iti las-ud ti 52 nga aldaw.

16 Idi nadamag dayta dagiti bumusbusor kadakami ken nakita dayta ti amin a nasion iti aglawlawmi, nabainanda unay*+ ket naamirisda a naileppas dayta a trabaho gapu iti tulong ti Diosmi. 17 Kadagidi nga aldaw, makisinsinnurat ken Tobias dagiti natan-ok+ iti Juda. 18 Adu a taga-Juda ti simmuporta kenkuana, ta isu ket manugang ni Secanias nga anak ni Arah.+ Inasawa ti anakna a ni Jehohanan ti balasang ni Mesulam+ nga anak ni Berekias. 19 Kanayon met nga es-estoriaenda kaniak dagiti nasayaat a bambanag maipapan kenkuana sadanto idanon kenkuana dagiti ibagbagak, isu a sursuratannak ni Tobias tapno butbutngennak.+

7 Idi nalpasen ti pader,+ inkabilko dagiti ruanganna,+ ken nangdutokak kadagiti Levita,+ kumakanta,+ ken parabantay iti ruangan.+ 2 Ni Hanani+ a kabsatko ken ni Hananias a panguluen iti Torre+ ti inkabilko nga agaywan iti Jerusalem. Ni Hananias ket managbuteng iti pudno a Dios+ ken awan kapadana no iti kinamapagtalkan. 3 Kinunak kadakuada: “Sa la maluktan dagiti ruangan ti Jerusalem no nangaton ti init. Bayat nga agbambantay dagiti guardia iti rabii, masapul nga iserra ken itrangkada dagiti ruangan. Mangalakayo met kadagiti agnanaed iti Jerusalem nga agguardia iti lugar a pilienyo ken iti dadduma nga agguardia iti sango ti balayda.” 4 Dakkel ken nalawa ti siudad ngem manmano dagiti agnanaed,+ ken saan pay a natarimaan dagiti balbalay.

5 Ngem tinignaynak ti Diosko a mangummong kadagiti natan-ok, opisial, ken umili tapno mairehistroda sigun iti pamilia a nagtaudanda.+ Kalpasanna, nasarakak ti listaan dagiti immun-una a nagsubli, ket kastoy ti linaonna:

6 Dagitoy ti agnanaed iti probinsia* a kaputotan dagiti innala+ idi ni Nabucodonosor+ nga ari ti Babilonia a nagsubli iti bukodda a siudad idiay Jerusalem ken Juda,+ 7 a kimmuyog kada Zerubabel,+ Jesua,+ Nehemias, Azarias, Raamias, Nahamani, Mardokeo, Bilsan, Misperet, Bigvai, Nehum, ken Baanah.

Daytoy ti bilang dagiti lallaki nga Israelita:+ 8 annak ni Paros, 2,172; 9 annak ni Sefatias, 372; 10 annak ni Arah,+ 652; 11 annak ni Pahat-moab,+ a kaputotan da Jesua ken Joab,+ 2,818; 12 annak ni Elam,+ 1,254; 13 annak ni Zattu, 845; 14 annak ni Zaccai, 760; 15 annak ni Binnui, 648; 16 annak ni Bebai, 628; 17 annak ni Azgad, 2,322; 18 annak ni Adonikam, 667; 19 annak ni Bigvai, 2,067; 20 annak ni Adin, 655; 21 annak ni Ater, a kaputotan ni Ezekias, 98; 22 annak ni Hasum, 328; 23 annak ni Bezai, 324; 24 annak ni Harif, 112; 25 annak ni Gibeon,+ 95; 26 lallaki iti Betlehem ken Netofa, 188; 27 lallaki iti Anatot,+ 128; 28 lallaki iti Bet-azmavet, 42; 29 lallaki iti Kiriat-jearim,+ Kefira, ken Beerot,+ 743; 30 lallaki iti Rama ken Geba,+ 621; 31 lallaki iti Mikmas,+ 122; 32 lallaki iti Bethel+ ken Ai,+ 123; 33 lallaki iti sabali pay a Nebo, 52; 34 annak ti sabali pay nga Elam, 1,254; 35 annak ni Harim, 320; 36 lallaki iti Jerico, 345; 37 annak da Lod, Hadid ken Ono,+ 721; 38 lallaki iti Senaa, 3,930.

39 Dagiti papadi:+ annak ni Jedaias, a kaputotan ni Jesua, 973; 40 annak ni Immer, 1,052; 41 annak ni Pasur,+ 1,247; 42 annak ni Harim,+ 1,017.

43 Dagiti Levita:+ annak ni Jesua, iti pamilia ni Kadmiel,+ a kaputotan ni Hodeva, 74. 44 Dagiti kumakanta:+ annak ni Asaf,+ 148. 45 Dagiti parabantay iti ruangan:+ annak ni Salum, annak ni Ater, annak ni Talmon, annak ni Akub,+ annak ni Hatita, annak ni Sobai, 138.

46 Dagiti agserserbi iti templo:*+ annak ni Ziha, annak ni Hasufa, annak ni Tabaot, 47 annak ni Keros, annak ni Sia, annak ni Padon, 48 annak ni Lebana, annak ni Hagaba, annak ni Salmai, 49 annak ni Hanan, annak ni Giddel, annak ni Gahar, 50 annak ni Reaias, annak ni Rezin, annak ni Nekoda, 51 annak ni Gazzam, annak ni Uza, annak ni Pasea, 52 annak ni Besai, annak ni Meunim, annak ni Nefusesim, 53 annak ni Bakbuk, annak ni Hakufa, annak ni Harhur, 54 annak ni Bazlit, annak ni Mehida, annak ni Harsa, 55 annak ni Barkos, annak ni Sisera, annak ni Tema, 56 annak ni Nezias, ken annak ni Hatifa.

57 Annak dagiti adipen ni Solomon:+ annak ni Sotai, annak ni Soferet, annak ni Perida, 58 annak ni Jaala, annak ni Darkon, annak ni Giddel, 59 annak ni Sefatias, annak ni Hattil, annak ni Pokeret-hazebaim, annak ni Amon. 60 Amin nga agserserbi iti templo*+ ken annak dagiti adipen ni Solomon ket 392.

61 Dagitoy ti naggapu idiay Tel-mela, Tel-harsa, Kerub, Addon, ken Immer, ngem saanda a napaneknekan ti kapuonanda, no Israelitada wenno saan:+ 62 annak ni Delaias, annak ni Tobias, annak ni Nekoda, 642. 63 Ken dagiti papadi: annak ni Habaias, annak ni Hakoz,+ annak ni Barzillai, a nangasawa iti maysa kadagiti babbalasang ni Barzillai+ a Gileadita ket naipasurot kenkuana ti nagan ni katuganganna. 64 Dagitoy ti nangbirok iti kapuonanda iti listaan ngem awan ti nasarakanda, isu a saandan a kualipikado nga agserbi kas papadi.*+ 65 Kuna ti gobernador*+ a masapul a saanda a mangan kadagiti nasantuan a taraon+ agingga nga adda padi nga agkonsulta iti Urim ken Tummim.+

66 Ti bilang ti amin a nagsubli ket 42,360,+ 67 saan pay a karaman ti 7,337 nga adipenda a lallaki ken babbai+ ken ti 245 a kumakanta a lallaki ken babbai.+ 68 Addaanda iti 736 a kabalio, 245 a mulo, 69 435 a kamelio, ken 6,720 nga asno.

70 Nangted ti dadduma nga ulo dagiti pamilia iti kontribusion para iti trabaho.+ Nangted ti gobernador* iti pondo a 1,000 a balitok a drakma,* 50 a malukong, ken 530 a nagayad a bado dagiti papadi.+ 71 Dadduma met nga ulo dagiti pamilia ti nangted iti pondo a 20,000 a balitok a drakma ken 2,200 a pirak a mina.* 72 Nangted met dagiti umili iti 20,000 a sinsilio a balitok, 2,000 a sinsilio a pirak, ken 67 a nagayad a bado dagiti papadi.

73 Dagiti papadi, Levita, parabantay iti ruangan, kumakanta,+ dadduma nga umili, agserserbi iti templo,* ken ti amin a dadduma pay iti Israel* ket nagnaed kadagiti siudadda.+ Iti maikapito a bulan,+ agnanaeden dagiti Israelita kadagiti siudadda.+

8 Nagtataripnong ti amin nga umili iti plasa iti sango ti Ruangan ti Danum+ ket imbagada ken Esdras+ a parakopia* nga alaenna ti libro ti Linteg ni Moises,+ nga imbilin ni Jehova iti Israel.+ 2 Isu nga iti umuna nga aldaw ti maikapito a bulan,+ inyeg ti padi a ni Esdras ti Linteg iti sanguanan dagiti nagtataripnong+ a lallaki, babbai, ken amin nga ubbing a makaawaten iti sao. 3 Manipud iti agsapa agingga iti tengnga ti aldaw, imbasana dayta iti napigsa+ kadagiti naguummong a lallaki, babbai, ken amin nga ubbing a makaawaten iti sao nga adda iti plasa iti sango ti Ruangan ti Danum. Dimngegda amin a naimbag+ iti pannakaibasa ti libro ti Linteg. 4 Nagtakder ti parakopia* a ni Esdras iti kayo a plataporma a nairanta iti dayta a taripnong. Nakatakder iti makannawanna da Matitias, Sema, Anaias, Urias, Hilkias, ken Maasias. Iti makannigidna ket da Pedaias, Misael, Malkias,+ Hasum, Has-badana, Zacarias, ken Mesulam.

5 Linuktan ni Esdras ti libro iti sanguanan ti amin nga umili iti nangato nga ayanna. Timmakderda amin bayat a lukluktanna dayta. 6 Indaydayaw ni Esdras ti pudno ken naindaklan a Dios a ni Jehova, ket insungbat ti amin a tattao, “Amen!* Amen!”+ sada inngato dagiti imada. Kalpasanna, nagparintumeng ken nagdumogda iti imatang ni Jehova. 7 Dagiti Levita a da Jesua, Bani, Serebias,+ Jamin, Akub, Sabetai, Hodias, Maasias, Kelita, Azarias, Jozabad,+ Hanan, ken Pelaias, inlawlawagda ti Linteg bayat a sitatakder dagiti umili.+ 8 Intultuloyda nga imbasa iti napigsa ti libro, ti Linteg ti pudno a Dios, ken inlawlawagda a naimbag ti kaipapananna; isu a tinulonganda dagiti umili a mangtarus iti naibasa.+

9 Ket ni Nehemias a gobernador,* ken ni Esdras+ a padi ken parakopia,* ken dagiti Levita a mangisursuro iti Linteg kinunada iti amin a tattao: “Daytoy nga aldaw ket nasantuan ken Jehova a Diosyo.+ Dikay agsangit wenno agladingit.” Ta agsangsangit ti amin nga umili idi nangngegda ti Linteg. 10 Kinunana kadakuada: “Agawidkayon ket mangankayo kadagiti agkakaimas a taraon*+ ken uminumkayo iti nasam-it, ket ibingayanyo dagidiay awan ti naisaganana; ta daytoy nga aldaw ket nasantuan iti Apotayo. Dikay agladingit, ta ti rag-o nga ipaay ni Jehova ti natalged a pagkamanganyo.”* 11 Pinagkalma dagiti Levita ti rikna ti amin nga umili, nga ibagbagada: “Dikay agsangit. Nasantuan daytoy nga aldaw. Dikay agladingit.” 12 Gapuna, nagawid ti amin nga umili tapno mangan, uminum, mangibingay iti taraon, ken itultuloyda ti agrag-o,+ ta naawatanda ti naipakaammo kadakuada.+

13 Iti simmaruno nga aldaw, dagiti ulo dagiti pamilia ti amin nga umili, dagiti papadi, ken dagiti Levita, napanda ken Esdras a parakopia* tapno ad-adda a maawatanda ti linaon ti Linteg. 14 Naammuanda iti Linteg nga imbilin ni Jehova babaen ken Moises a rumbeng nga agnaed dagiti Israelita kadagiti abong-abong* bayat ti piesta iti maikapito a bulan,+ 15 ken masapul nga ipakaammoda+ iti amin a siudadda ken iti intero a Jerusalem: “Inkayo iti bambantay ket agalakayo kadagiti adda bulbulongna a sanga ti olibo, saleng, mirto, palma, ken sangsanga ti dadduma pay a kayo a pagaramidyo kadagiti abong-abong, kas iti naisurat.”

16 Isu a rimmuar dagiti umili ket nangyawidda iti sangsanga ken nangaramidda iti abong-abong iti atep ti balbalayda, kadagiti paraanganda, kadagiti paraangan ti balay ti pudno a Dios,+ iti plasa ti Ruangan ti Danum,+ ken iti plasa ti Ruangan ti Efraim.+ 17 Amin a nagsubli kadagiti naipanaw idi ket nangaramid kadagiti abong-abong a pagyananda. Nanipud idi kaaldawan ni Josue+ nga anak ni Nun, ita laeng manen nga inaramid dayta dagiti Israelita, isu a nakaragragsakda.+ 18 Manipud iti umuna agingga iti maudi nga aldaw ti piesta, inaldaw nga adda maibasa manipud iti Linteg ti pudno a Dios.+ Pito nga aldaw a nagpiestada ket iti maikawalo nga aldaw, naangay ti nasantuan a taripnong kas naibilin.+

9 Iti maika-24 nga aldaw iti isu met la a bulan, nagtataripnong dagiti Israelita. Nagayunarda ken nagkawesda iti nakersang a lupot ken nangikabilda iti tapok kadagiti uloda.+ 2 Simmina dagiti Israelita iti amin a ganggannaet,+ ket timmakderda ken impudnoda dagiti basolda ken basol dagidi ammada.+ 3 Kalpasanna, agarup tallo nga oras iti aldaw* a naibasa kadakuada ti libro ti Linteg+ ni Jehova a Diosda; ket impudnoda dagiti basolda ken Jehova a Diosda iti sabali pay a tallo nga oras.

4 Da Jesua, Bani, Kadmiel, Sebanias, Bunni, Serebias,+ Bani, ken Kenani timmakderda iti plataporma+ dagiti Levita ket nagkararagda iti napigsa ken Jehova a Diosda. 5 Kinuna dagiti Levita a da Jesua, Kadmiel, Bani, Hasabnias, Serebias, Hodias, Sebanias ken Petaias: “Tumakderkayo ken idaydayawyo ni Jehova a Diosyo iti agnanayon.*+ Idaydayawda koma ti nadayag a naganmo a maikari unay a maitan-ok ken maidaydayaw.

6 “Siksika laeng ni Jehova;+ inaramidmo ti langit, wen, ti langlangit ken ti amin nga adda kadagita, ti daga ken ti amin nga adda iti dayta, ken dagiti baybay ken ti amin nga adda kadagita. Sika ti mangbibiag kadakuada amin, ket agrukruknoy kenka dagiti armada ti langit. 7 Sika ni Jehova a pudno a Dios, a nangpili ken Abram+ ken nangiruar kenkuana manipud iti siudad ti Ur+ dagiti Caldeo ken nangpanagan kenkuana iti Abraham.+ 8 Napaneknekam a naimpusuan ti panagtalekna kenka,+ isu a nakitulagka kenkuana nga itedmo ti daga dagiti Canaanita, Heteo, Amoreo, Perizeo, Jebuseo, ken Girgaseo, tapno pagnaedan dagiti kaputotanna.*+ Tinungpalmo dagiti karim gapu ta nalintegka.

9 “Nakitam ti pannakaparigat dagidi ammami idiay Egipto,+ ken nangngegmo ti ikkis ti panagpatulongda idiay Nalabaga a Baybay. 10 Kalpasanna, nangaramidka kadagiti pagilasinan ken milagro maibusor ken Faraon ken iti amin nga adipenna ken tattao iti dagana,+ ta ammom a pinarparigatda+ dagidi ammami. Nangaramidka iti pakaidayawan ti naganmo, kas iti ar-aramidem agingga ita nga aldaw.+ 11 Binisngaymo ti baybay iti sanguananda tapno makaballasiwda iti namaga a daga,+ ket inlemmesmo dagiti mangkamkamat kadakuada a kas iti bato a naipalladaw iti nadawel a baybay.+ 12 Inturongmo ida babaen ti sinan-adigi nga ulep iti aldaw ken sinan-adigi nga apuy iti rabii, tapno lawagam ti dalan a pagnaanda.+ 13 Bimmabaka iti Bantay Sinai+ ken nakisaritaka kadakuada manipud langit+ ken inikkam ida kadagiti nalinteg a pangngeddeng, linteg a naibatay iti kinapudno,* nasayaat a pagalagadan, ken bilbilin.+ 14 Insurom a ngilinenda ti Sabbath+ tapno agtalinaed dayta a sagrado, ket inikkam ida kadagiti bilin, pagalagadan, ken maysa a linteg babaen ken Moises nga adipenmo. 15 Inikkam ida iti taraon manipud langit idi mabisinda,+ pinaruarmo ti danum manipud iti dakkel a bato idi mawawda,+ ken imbagam a sumrekda ken tagikuaenda ti daga nga inkarim* nga itedmo kadakuada.

16 “Ngem nagtignay a sidadarasudos+ ken nagsukir*+ dagidi ammami ken saanda a nagtulnog kadagiti bilinmo. 17 Saandaka nga impangag+ ken linipatda dagiti nakaskasdaaw nga inaramidmo kadakuada. Gapu ta nagsukirda,* nangpilida iti mangidaulo kadakuada nga agsubli idiay Egipto+ tapno agpaadipenda manen. Ngem maysaka a Dios a sisasagana a mangpakawan,* mannakipagrikna* ken naasi, nabannayat nga agpungtot, ken dakkel ti napudno nga ayatmo,*+ ket saanmo a binaybay-an ida.+ 18 Uray no nagaramidda iti metal nga estatua* nga urbon a baka a didiosenda ken ibagbagada, ‘Daytoy ti Diosmo a nangipanaw kenka idiay Egipto,’+ ken namin-adu nga impakitada a saandaka a raraemen, 19 saanmo ida a binaybay-an idiay let-ang+ gapu iti dakkel nga asim. Saanmo nga inikkat ti ulep a mangidalan kadakuada iti aldaw ken ti apuy a manglawag iti pagnaanda iti rabii.+ 20 Impaaymo ti nasayaat nga espiritum a tumulong kadakuada a maaddaan iti pannakaawat,+ pinakanmo ida iti manna,+ ken pinainummo ida idi mawawda.+ 21 Inikkam ida iti taraon idiay let-ang iti 40 a tawen.+ Dida nagkurang iti aniaman. Saan a narunot dagiti badoda,+ ken saan a limteg dagiti sakada.

22 “Inikkam ida iti pagpagarian ken il-ili, sa biningbingaymo dagita para kadakuada,+ isu a natagikuada ti daga ti Sihon,+ a daga ti ari ti Hesbon,+ ken ti daga ni Og+ nga ari ti Basan. 23 Pinaadum dagiti annakda a kas kadagiti bituen idiay langit.+ Kalpasanna, impanmo ida iti daga nga inkarim kadagidi ammada a serken ken tagikuaenda.+ 24 Gapuna, simrek dagiti annakda ket tinagikuada ti daga,+ ken pinarmekmo iti imatangda dagiti Canaanita+ nga agnanaed iti dayta. Intedmo kadakuada ti ar-ari ken tattao ti daga, tapno aramiden dagiti adipenmo ti kaykayatda kadakuada. 25 Sinakupda dagiti napaderan a siudad+ ken nadam-eg* a daga,+ ket tinagikuada dagiti balbalay a napno iti amin a nasayaat a bambanag, dagiti nakalin a bubon, kaubasan, kaolibuan,+ ken adu nga agbungbunga a kaykayo. Nangan ken napnekda ken limmukmegda gapu ta nakasaysayaatka.

26 “Nupay kasta, simmukir ken nagrebeldeda kenka+ ket tinallikudanda ti Lintegmo.* Pinatayda dagiti imbaonmo a propeta a nangpakdaar kadakuada tapno agsublida kenka, ken namin-adu nga impakitada a saandaka a raraemen.+ 27 Gapu iti daytoy, impalubosmo a parmeken ken parigaten ida+ dagiti kabusorda.+ Ngem tunggal agrigatda, agpatulongda kenka ket denggem ida manipud iti langit. Gapu iti dakkel nga asim, mangibaonka kadagiti mangisalakan kadakuada iti ima dagiti kabusorda.+

28 “Ngem inton sumayaat ti kasasaadda, agaramidda manen iti dakes iti sanguanam,+ ket ipalubosmo a matnagda iti ima dagiti kabusorda a mangituray kadakuada.*+ Kalpasanna, agsublida ken agpatulongda manen kenka,+ ket denggem ida manipud iti langit ken isalakanmo manen ida gapu iti dakkel nga asim.+ 29 Uray no bagbagaam ida tapno tungpalenda manen ti Lintegmo, saanda latta a nagtulnog gapu iti kinatangsitda ken saanda nga impangag dagiti bilinmo;+ ken sinukirda dagiti pagalagadam, a mangyeg koma iti biag no annurotenda dagita.+ Ngem tinallikudandaka ken saandaka nga impangag gapu iti kinatangken ti uloda. 30 Nupay kasta, inan-anusam ida+ iti adu a tawen ken kanayon a pinakpakdaaram ida babaen ti panangipaaymo iti espiritum kadagiti propetam, ngem saanda a dimngeg. Isu nga impalubosmo a sakupen ida dagiti nasion iti aglawlawda.+ 31 Gapu iti dakkel nga asim, saanmo ida a dinadael+ wenno binaybay-an, ta mannakipagrikna* ken naasika a Dios.+

32 “Ita, O Diosmi, Dios a naindaklan, mannakabalin, nakaskasdaaw, napudno iti tulagan, ken mangipakpakita iti napudno nga ayat,+ dimo koma tagtagilag-anen ti amin a panagrigrigatmi, agraman dagiti arimi, piprinsipemi,+ papadimi,+ propetami,+ ammami, ken amin a tattaom nanipud idi kaaldawan dagiti ari ti Asiria+ agingga ita nga aldaw. 33 Impakitam a nalintegka iti amin a napasaranmi gapu ta kanayon a matalekka, ngem dakami ti agar-aramid iti dakes.+ 34 Saan a tinungpal dagiti arimi, piprinsipemi, papadimi, ken dagidi ammami, ti Lintegmo. Saanda met a sinurot dagiti bilinmo wenno dagiti palagipmo* a mangpakdaar kadakuada. 35 Uray addada iti pagarianda ken mapmapnekda iti naruay a kinaimbagmo ken addada iti nalawa ken nadam-eg* a daga nga intedmo kadakuada, saanda a nagserbi kenka+ ket intultuloyda ti nagaramid iti dakes. 36 Ita, ad-adipenkami;+ ad-adipenkami iti daga nga intedmo kadagidi ammami a pangalaanda iti taraonda ken nasayaat a bambanag. 37 Gapu ta nagbasolkami, dagiti ari a nangipaadipenam kadakami ti nagunggonaan iti nakaad-adu nga apit.+ Inaramidda ti kaykayatda kadakami ken kadagiti tarakenmi, isu a napalalo ti rigatmi.

38 “Gapu amin kadagitoy, agaramidkami iti kasuratan+ a patalgedan dagiti piprinsipe, Levita, ken papadimi.”+

10 Dagitoy ti nangpatalged iti kasuratan:+

9 Ken dagiti Levita: ni Jesua nga anak ni Azanias, ni Binnui a kaputotan ni Henadad, Kadmiel,+ 10 Sebanias, Hodias, Kelita, Pelaias, Hanan, 11 Mica, Rehob, Hasabias, 12 Zakur, Serebias,+ Sebanias, 13 Hodias, Bani, ken Beninu.

14 Dagiti pannakaulo dagiti umili: da Paros, Pahat-moab,+ Elam, Zattu, Bani, 15 Bunni, Azgad, Bebai, 16 Adonias, Bigvai, Adin, 17 Ater, Ezekias, Azur, 18 Hodias, Hasum, Bezai, 19 Harif, Anatot, Nebai, 20 Magpias, Mesulam, Hezir, 21 Mesezabel, Zadok, Jaddua, 22 Pelatias, Hanan, Anaias, 23 Oseas, Hananias, Hasub, 24 Halohes, Pilha, Sobek, 25 Rehum, Hasabna, Maasias, 26 Ahias, Hanan, Anan, 27 Maluk, Harim, ken Baanah.

28 Ti dadduma pay nga umili a pakairamanan dagiti papadi, Levita, parabantay iti ruangan, kumakanta, agserserbi iti templo,* ken asinoman a simmina manipud iti tattao kadagiti nasion tapno agtulnog iti Linteg ti pudno a Dios,+ agraman assawada a babbai, annakda a lallaki ken babbai, ken amin nga addaan pannakaammo ken pannakaawat,* 29 nakikaduada kadagiti kakabsatda ken kadagiti natatan-ok a tattao. Nakipagsapatada a tungpalenda ti Linteg ti pudno a Dios a ni Jehova nga Apotayo, nga intedna babaen ken Moises nga adipenna, ken agtulnogda iti amin a bilin, pangngeddeng, ken pagalagadanna, tapno saanda a mailunod. 30 Ditay ited dagiti annaktayo a babbai kas assawa dagiti tattao kadagiti nasion, ken ditay ipalubos nga alaen dagiti annaktayo a lallaki kas assawa dagiti annakda a babbai.+

31 No umay aglako dagiti tattao kadagiti nasion iti uray ania a banag ken amin a kita ti bukbukel iti aldaw ti Sabbath, saantayo a gumatang kadakuada iti aniaman iti aldaw ti Sabbath+ wenno iti nasantuan nga aldaw.+ Iti maikapito a tawen,+ saantayo met nga alaen dagiti apit iti daga ken baybay-antayon ti amin a pautangtayo.+

32 Tinawen met a mangted ti tunggal maysa kadatayo iti apagkatlo ti siklo* a pangsuporta kadagiti trabaho iti balay* ti Dios.+ 33 Agpaay dagita iti napagtutuon a tinapay,*+ iti regular a daton a bukbukel,+ iti regular a daton a mapuoran iti Sabbath+ ken baro a bulan+ ken pipiesta,+ iti nasantuan a bambanag, kadagiti daton gapu iti basol+ ti Israel, ken iti amin a trabaho iti balay ti Diostayo.

34 Pagbibinnunotantayo no kaano a mangyeg dagiti papadi, Levita, ken tattao iti tunggal pamiliatayo kadagiti kayo a mausar iti balay ti Diostayo, a pagpuor iti daton iti altar ni Jehova a Diostayo kadagiti tiempo ti panagdaton iti kada tawen, kas naisurat iti Linteg.+ 35 Tinawen met nga ipantayo iti balay ni Jehova dagiti umuna a naluom a bunga ti dagatayo ken dagiti umuna a naluom a bunga ti tunggal kita ti kayo nga agbunga+ 36 agraman dagiti inauna nga annaktayo a lallaki ken dagiti tarakentayo,+ ken dagiti inauna kadagiti baka, karnero, ken kaldingtayo sigun iti naisurat iti Linteg. Ipantayo dagita iti balay ti Diostayo, kadagiti papadi nga agserserbi iti balay ti Diostayo.+ 37 Iyegtayo met kadagiti papadi iti siled a pagidulinan* iti balay ti Diostayo+ ti nakersang nga arina manipud iti umuna nga apittayo,+ dagiti kontribusiontayo, dagiti bunga ti tunggal kita ti kayo,+ baro nga arak, ken lana.+ Itedtayo pay kadagiti Levita+ ti apagkapullo ti apit ti dagatayo, ta dagiti Levita ti mangkolekta kadagiti apagkapullo ti amin nga apit kadagiti siudadtayo.

38 Ti padi a nagtaud iti pamilia ni Aaron masapul a kaduana dagiti Levita no alaenda ti apagkapullo; ti apagkapullo ti naalada nga apagkapullo ket rumbeng nga ipan dagiti Levita kadagiti siled a pagidulinan* nga adda iti balay ti Diostayo.+ 39 Ti kontribusion+ a bukbukel, baro nga arak, ken lana+ ket rumbeng nga ipan dagiti Israelita ken Levita kadagiti siled a pagidulinan,* a nakaikabilan dagiti alikamen ti templo, ken ayan dagiti agserserbi a papadi, parabantay iti ruangan, ken dagiti kumakanta. Saantayo a baybay-an ti balay ti Diostayo.+

11 Agnanaed idi iti Jerusalem+ dagiti prinsipe, ngem nagbibinnunot+ dagiti umili tapno pilienda ti maysa a pamilia iti kada 10 a pamilia nga agyan iti Jerusalem a nasantuan a siudad. Agyan met ti sabali pay a siam iti dadduma a siudad. 2 Adda met dagiti nagboluntario nga agnaed iti Jerusalem ket inap-apresiar ida dagiti umili.

3 Ket dagitoy ti ulo ti pamilia iti probinsia* a nagnaed iti Jerusalem. (Ti dadduma nga Israelita, papadi, Levita, agserserbi iti templo,*+ ken ti annak dagiti adipen ni Solomon,+ nagnaedda kadagiti bukodda a daga iti dadduma a siudad iti Juda.+

4 Nagnaed met iti Jerusalem ti dadduma kadagiti tattao ti Juda ken Benjamin.) Dagiti tattao ti Juda ket ni Ataias nga anak ni Uzias nga anak ni Zacarias nga anak ni Amarias nga anak ni Sefatias nga anak ni Mahalalel a kaputotan ni Perez,+ 5 ken ni Maasias nga anak ni Baruk nga anak ni Colhoze nga anak ni Hazaias nga anak ni Adaias nga anak ni Joiarib nga anak ni Zacarias iti pamilia ni Sela. 6 Amin nga annak ni Perez nga agnanaed iti Jerusalem ket 468 a natured a lallaki.

7 Dagitoy dagiti tattao ti Benjamin: ni Sallu+ nga anak ni Mesulam nga anak ni Joed nga anak ni Pedaias nga anak ni Kolaias nga anak ni Maasias nga anak ni Itiel nga anak ni Jesaias, 8 kasta met da Gabbai ken Salai. Aminda ket 928. 9 Ket ni Joel nga anak ni Zikri ti mangidadaulo kadakuada, ket ni Juda nga anak ni Hasenua ti katulonganna a mangidaulo iti siudad.

10 Dagitoy ti papadi: ni Jedaias nga anak ni Joiarib, ni Jakin,+ 11 ni Seraias nga anak ni Hilkias nga anak ni Mesulam nga anak ni Zadok nga anak ni Meraiot nga anak ni Ahitub,+ maysa a lider iti balay* ti pudno a Dios, 12 ken ti kakabsatda nga agserserbi sadiay, 822; ken ni Adaias nga anak ni Jeroham nga anak ni Pelalias nga anak ni Amzi nga anak ni Zacarias nga anak ni Pasur+ nga anak ni Malkias, 13 ken ti kakabsatna, dagiti ulo dagiti pamilia, 242; ken ni Amashai nga anak ni Azarel nga anak ni Azai nga anak ni Mesilemot nga anak ni Immer, 14 ken ti kakabsatda a nabileg ken natured a lallaki, 128; ket idadauluan ida ni Zabdiel a miembro ti mabigbigbig a pamilia.

15 Dagitoy dagiti Levita: ni Semaias+ nga anak ni Hasub nga anak ni Azrikam nga anak ni Hasabias nga anak ni Bunni, 16 ken da Sabetai+ ken Jozabad,+ a karaman kadagiti panguluen dagiti Levita, a mangidadaulo kadagiti trabaho iti ruar ti balay ti pudno a Dios. 17 Karaman met ni Matanias,+ nga anak ni Mikias nga anak ni Zabdi nga anak ni Asaf,+ a mangidadaulo iti panagkanta ken panangidaydayaw bayat dagiti kararag,+ ken ni Bakbukias a katulonganna, ken ni Abda nga anak ni Samua nga anak ni Galal nga anak ni Jedutun.+ 18 Amin a Levita iti nasantuan a siudad ket 284.

19 Dagiti parabantay iti ruangan ket da Akub, Talmon,+ ken dagiti kakabsatda, 172.

20 Nagnaed ti dadduma nga Israelita, papadi, ken Levita iti bukodda a daga* iti nadumaduma a siudad iti Juda. 21 Idiay Ofel+ ti pagnanaedan dagiti agserserbi iti templo,*+ ket da Ziha ken Gispa ti mangidadaulo kadagiti agserserbi iti templo.*

22 Ti mangidadaulo kadagiti Levita idiay Jerusalem ken mangidadaulo iti panagserbi iti balay ti pudno a Dios ket ni Uzi nga anak ni Bani nga anak ni Hasabias nga anak ni Matanias+ nga anak ni Mikias, manipud iti pamilia ni Asaf, dagiti kumakanta. 23 Ta adda idi bilin ti ari+ para kadakuada, ken adda idi naikeddeng nga urnos a maited ti inaldaw a kasapulan dagiti kumakanta. 24 Ti mamalbalakad ti ari* iti aniaman a pakaseknan dagiti umili ket ni Petaias nga anak ni Mesezabel a kaputotan ni Zera nga anak ni Juda.

25 Dadduma kadagiti tattao ti Juda ti nagnaed idiay Kiriat-arba+ ken kadagiti ili iti aglawlawna, Dibon ken kadagiti ili iti aglawlawna, Jekabzeel+ ken kadagiti purok iti aglawlawna, 26 Jesua, Molada,+ Bet-pelet,+ 27 Hazar-sual,+ Beer-sheba ken kadagiti ili iti aglawlawna, 28 Ziklag,+ Mecona ken kadagiti ili iti aglawlawna, 29 En-rimmon,+ Zora,+ Jarmut, 30 Zanoa,+ Adulam ken kadagiti purokna, Lakis+ ken kadagiti talonna, ken idiay Azeka+ ken kadagiti ili iti aglawlawna. Nagnaedda* iti Beer-sheba agingga iti Tanap ti Hinnom.+

31 Nagnaed dagiti tattao ti Benjamin idiay Geba,+ Mikmas, Aia, Bethel+ ken kadagiti ili iti aglawlawna, 32 Anatot,+ Nob,+ Anania, 33 Hazor, Rama,+ Gitaim, 34 Hadid, Zeboim, Nebalat, 35 Lod, Ono,+ ken iti tanap dagiti nalaing a trabahador. 36 Napili a makipagnaed iti tribu ni Benjamin ti dadduma a pamilia dagiti Levita nga agnanaed idiay Juda.

12 Dagitoy ti papadi ken Levita a nagsubli iti Jerusalem a kadua da Zerubabel+ nga anak ni Sealtiel+ ken Jesua:+ da Seraias, Jeremias, Esdras, 2 Amarias, Maluk, Hatus, 3 Secanias, Rehum, Meremot, 4 Iddo, Ginetoi, Abias, 5 Mijamin, Maadias, Bilga, 6 Semaias, Joiarib, Jedaias, 7 Sallu, Amok, Hilkias, ken Jedaias. Isuda ti pangulo dagiti papadi ken ti kakabsatda idi kaaldawan ni Jesua.

8 Dagiti Levita ket da Jesua, Binnui, Kadmiel,+ Serebias, Juda, ken ni Matanias+ a mangidadaulo iti panagkanta iti panagyaman a kadua ti kakabsatna. 9 Ket nakatakder iti bangirda da Bakbukias ken Uni a kakabsatda tapno agguardia.* 10 Ni Jesua ti ama ni Joiakim. Ni Joiakim ti ama ni Eliasib. Ni Eliasib+ ti ama ni Joiada.+ 11 Ni Joiada ti ama ni Jonatan. Ket ni Jonatan ti ama ni Jaddua.

12 Idi kaaldawan ni Joiakim, dagitoy ti papadi a mangirepresentar kadagiti ulo dagiti pamilia: ni Meraias iti pamilia ni Seraias;+ ni Hananias iti pamilia ni Jeremias; 13 ni Mesulam iti pamilia ni Esdras;+ ni Jehohanan iti pamilia ni Amarias; 14 ni Jonatan iti pamilia ni Maluki; ni Jose iti pamilia ni Sebanias; 15 ni Adna iti pamilia ni Harim;+ ni Helkai iti pamilia ni Meraiot; 16 ni Zacarias iti pamilia ni Iddo; ni Mesulam iti pamilia ni Gineton; 17 ni Zikri iti pamilia ni Abias;+ ni . . . ;* iti pamilia ni Miniamin; ni Piltai iti pamilia ni Moadias; 18 ni Samua iti pamilia ni Bilga;+ ni Jehonatan iti pamilia ni Semaias; 19 ni Matenai iti pamilia ni Joiarib; ni Uzi iti pamilia ni Jedaias;+ 20 ni Kallai iti pamilia ni Salai; ni Eber iti pamilia ni Amok; 21 ni Hasabias iti pamilia ni Hilkias; ni Netanel iti pamilia ni Jedaias.

22 Nailista ti nagan dagiti ulo dagiti pamilia dagiti Levita ken dagiti papadi manipud idi kaaldawan da Eliasib, Joiada, Johanan, ken Jaddua+ agingga iti panagari ni Dario a Persiano.

23 Ti nagnagan dagiti Levita nga ulo dagiti pamilia ket naisurat iti libro dagiti pasamak idi a panawen agingga idi tiempo ni Johanan nga anak ni Eliasib. 24 Ti pangulo dagiti Levita ket da Hasabias, Serebias, ken Jesua+ nga anak ni Kadmiel.+ Dagiti guardia a padada a Levita ket agtakder a nagrupogrupo tapno agdaydayaw ken agyaman iti Dios maitunos kadagiti imbilin ni David+ nga adipen ti pudno a Dios. 25 Da Matanias,+ Bakbukias, Abdias, Mesulam, Talmon, ken Akub+ ti parabantay iti ruangan+ ken agguardia kadagiti siled a pagidulinan nga asideg kadagiti ruangan ti templo. 26 Dagitoy ti nagserbi idi kaaldawan ni Joiakim, nga anak ni Jesua+ ken apoko ni Jozadak, ken idi tiempo ni Nehemias a gobernador ken ni Esdras+ a padi ken parakopia.*

27 Idi inagurasion ti pader ti Jerusalem, sinapulda dagiti Levita iti amin a lugar a pagnanaedanda tapno umayda iti Jerusalem ken selebraranda a siraragsak ti inagurasion, babaen kadagiti kanta ti panagyaman+ a danggayan dagiti piangpiang, dekuerdas a pagtokar, ken arpa. 28 Ket naguummong ti annak dagiti kumakanta* manipud iti distrito,* iti aglawlaw ti Jerusalem, iti purpurok dagiti Netofatita,+ 29 iti Bet-gilgal,+ ken manipud iti kataltalonan ti Geba+ ken Azmavet,+ ta agnanaed dagiti kumakanta kadagiti purok iti aglawlaw ti Jerusalem. 30 Ket inaramid dagiti papadi ken Levita ti seremonia a panangdalus iti bagbagida, kadagiti umili,+ ruruangan,+ ken iti pader.+

31 Kalpasanna, inayabak dagiti prinsipe ti Juda nga umulida iti rabaw ti pader sa nangbukelak iti dua a grupo dagiti agkanta iti panagyaman, ken dagiti makipagmartsa kadakuada. Ti maysa a grupo ket agpakannawan iti pader agingga iti Ruangan Dagiti Gabsuon a Dapo.+ 32 Ni Osaias ken ti kagudua dagiti prinsipe ti Juda ket nakipagmartsa iti likudan dagiti kumakanta, 33 agraman da Azarias, Esdras, Mesulam, 34 Juda, Benjamin, Semaias, ken Jeremias. 35 Nakipagmartsa met a nakatrumpeta ti dadduma nga annak ti papadi:+ ni Zacarias nga anak ni Jonatan nga anak ni Semaias nga anak ni Matanias nga anak ni Mikaias nga anak ni Zacur nga anak ni Asaf,+ 36 ken ti kakabsatna a da Semaias, Azarel, Milalai, Gilalai, Maai, Netanel, Juda, ken Hanani. Nakaiggemda kadagiti pagtokar a kas kadagiti instrumento ni David+ nga adipen ti pudno a Dios. Sarsarunuenda ni Esdras+ a parakopia.* 37 Manipud iti Ruangan ti Ubbog,+ nagdiretsoda iti Agdan+ ti Siudad ni David+ iti paset ti pader a ngatuen ti Balay ni David ken agingga iti Ruangan ti Danum+ iti daya.

38 Ti sabali a grupo dagiti kumakanta iti panagyaman ket nagna iti bangir.* Simmarunoak kadakuada a kaduak ti kagudua ti bilang dagiti tattao. Linabsanmi ti Torre Dagiti Pugon+ agingga a nakadanonkami iti Akaba a Pader.+ 39 Intultuloymi ti nagmartsa agingga iti Ruangan ti Efraim,+ iti Ruangan ti Daan a Siudad,+ iti Ruangan ti Ikan,+ iti Torre ni Hananel,+ iti Torre ti Mea, agingga iti Ruangan ti Karnero.+ Nagsardengkami idi makadanonkami iti Ruangan ti Guardia.

40 Nagsinnabat ti dua a grupo dagiti kumakanta iti panagyaman ket nagtakderda iti sanguanan ti balay ti pudno a Dios. Kasta met ti inaramidko agraman dagiti kagudua kadagiti opisial a kakaduak, 41 ken uray dagiti nakatrumpeta a papadi a da Eliakim, Maasias, Miniamin, Mikaias, Elioenai, Zacarias, ken Hananias. 42 Kasta met da Maasias, Semaias, Eleazar, Uzi, Jehohanan, Malkias, Elam, ken Ezer. Ket impigsa dagiti kumakanta ti panagkantada nga indauluan ni Izrahias.

43 Iti dayta nga aldaw, adu ti indatonda ken nakaragragsakda,+ ta pinaragsak unay ida ti pudno a Dios. Nakipagragsak met dagiti babbai ken ubbing,+ ket nangngeg iti adayo ti panagraragsak iti Jerusalem.+

44 Iti dayta nga aldaw, adda dagiti nadutokan a lallaki a mangasikaso kadagiti siled a pagidulinan+ iti kontribusion,+ umuna a bungbunga,+ ken apagkapullo.+ Dita ti pagikabilanda iti bingay dagiti papadi ken Levita+ a maala iti taltalon kadagiti siudad, kas imbilin ti Linteg.+ Maragragsakan dagiti umili ti Juda gapu ta agserserbi dagiti papadi ken Levita. 45 Rinugianda nga aramiden dagiti pagrebbenganda iti Diosda ken ti seremonia ti panagdalus, ket kasta met ti inaramid dagiti kumakanta ken parabantay iti ruangan, maitunos kadagiti imbilin ni David ken ti anakna a ni Solomon. 46 Ta idi kaaldawan da David ken Asaf, adda dagiti mangidadaulo* kadagiti kumakanta ken iti panangkanta kadagiti pangidaydayaw ken panagyaman iti Dios.+ 47 Idi kaaldawan ni Zerubabel+ ken idi kaaldawan ni Nehemias, ipapaay ti amin nga Israelita ti bingay dagiti kumakanta+ ken parabantay iti ruangan,+ sigun iti inaldaw a kasapulan. Intedda met ti bingay dagiti Levita,+ ket inted met dagiti Levita ti bingay para kadagiti kaputotan ni Aaron.

13 Iti dayta nga aldaw, naibasa ti libro ni Moises kadagiti umili+ ket naammuanda nga awan ti mapalubosan nga Ammonita wenno Moabita+ a makikadua iti ummong dagiti agdaydayaw iti pudno a Dios,+ 2 ta saanda nga inikkan dagiti Israelita iti taraon ken danum. Tinangdananda ketdi ni Balaam a mangilunod kadagiti Israelita,+ ngem pinagbalin ti Diostayo a bendision dayta a lunod.+ 3 Idi nangngegda ti Linteg, insinada iti Israel ti amin a ganggannaet.*+

4 Sakbay dayta, ni Eliasib+ a padi a kabagian ni Tobias+ ti agay-aywan idi kadagiti siled a pagidulinan* iti balay* ti Diostayo.+ 5 Impausar ni Eliasib ken Tobias ti maysa a dakkel a siled a pagidulinan, a dati a pagikabilan kadagiti daton a bukbukel, olibano, alikamen, apagkapullo dagiti bukbukel, baro nga arak, ken lana+ a para laeng kadagiti Levita,+ kumakanta, ken parabantay iti ruangan, agraman dagiti kontribusion para iti papadi.+

6 Idi mapaspasamak dagita, awanak idiay Jerusalem ta napanak idiay Babilonia iti maika-32 a tawen+ ti panagturay ni Ari Artaxerxes.+ Idi agangay, dimmawatak iti pammalubos ti ari a mapanak idiay Jerusalem. 7 Idi addaakon idiay Jerusalem, nakitak ti nagdakes nga inaramid ni Eliasib+ ta impalubosna nga usaren ni Tobias+ ti maysa a siled a pagidulinan iti paraangan ti balay ti pudno a Dios. 8 Nakapungtotak unay isu nga amin a muebles ni Tobias ket impuruakko iti ruar ti siled a pagidulinan.* 9 Kalpasanna, imbilinko a dalusanda dagiti siled a pagidulinan,* ket insublik sadiay dagiti alikamen ti balay ti pudno a Dios,+ agraman ti daton a bukbukel ken ti olibano.+

10 Naammuak met a saan a mait-ited kadagiti Levita+ dagiti bingayda+ isu a pimmanaw dagiti agserserbi a Levita ken kumakanta tapno agtrabahoda iti bukodda a talon.+ 11 Gapu iti dayta, binabalawko dagiti opisial+ ket kinunak: “Apay a nabaybay-an ti balay ti pudno a Dios?”+ Kalpasanna, inayabak dagiti Levita ken pinagsublik ida kadagiti naituding a trabahoda iti templo. 12 Ket impan ti amin a taga-Juda ti apagkapullo+ ti bukbukel, baro nga arak, ken lana kadagiti siled a pagidulinan.+ 13 Pinilik da Selemias a padi, Zadok a parakopia,* ken Pedaias a Levita nga agaywan kadagiti siled a pagidulinan, ken ni Hanan nga anak ni Zacur ken apoko ni Matanias kas katulonganda, ta mapagtalkan dagitoy a lallaki. Pagrebbenganda ti pannakaibunong ti bingay dagiti kakabsatda.

14 O Diosko, laglagipennak+ koma maigapu iti daytoy, ken dimo liplipatan dagiti ar-aramidek a mangipakita iti napudno a panagayatko para iti balaymo ken kadagiti serbisio* a maar-aramid idiay.+

15 Kadagidi a tiempo, nakakitaak kadagiti tattao iti Juda nga agpespespes iti ubas iti aldaw ti Sabbath.+ Adda met dagiti agikarkarga iti bukbukel, arak, ubas, higos, ken dadduma pay a karga kadagiti asnoda a maipan idiay Jerusalem iti aldaw ti Sabbath.+ Isu a pinakdaarak ida a dida aglako iti aniaman iti dayta nga aldaw.* 16 Dagiti taga-Tiro nga agnanaed iti siudad ket agiserserrekda kadagiti ikan ken amin a kita ti tagilako nga ilakoda kadagiti umili iti Juda ken iti Jerusalem iti Sabbath.+ 17 Binabalawko dagiti natan-ok iti Juda ket kinunak: “Ania daytoy nagdakes nga ar-aramidenyo? Saanyo payen a ngilngilinen ti aldaw ti Sabbath! 18 Saan kadi a kastoy ti inar-aramid dagidi ammayo, isu nga inyeg ti Diostayo dagitoy a didigra kadatayo ken iti daytoy a siudad? Rubrubrobanyo ti pungtot ti Dios iti Israel ta saanyo a ngilngilinen ti Sabbath.”+

19 Imbilinko a maiserra dagiti ruangan ti Jerusalem apaman a sumipnget—sakbay a mangrugi ti Sabbath. Imbagak met a saanda a lukluktan dagita agingga a malpas ti Sabbath. Pinagbantayko kadagiti ruangan ti dadduma a katulongak tapno awan ti maiserrek a tagilako iti aldaw ti Sabbath. 20 Isu a naminsan wenno namindua nga imyan iti ruar ti Jerusalem dagiti komersiante ken aglaklako iti amin a kita ti tagilako. 21 Impakdaarko kadakuada: “Apay nga um-umyankayo iti sango ti pader? No aramidenyo pay dayta, papanawenkayo.” Manipud idin, saandan nga im-immay iti Sabbath.

22 Imbagak kadagiti Levita a masapul a kanayon nga aramidenda ti seremonia a panangdalus iti bagida ken umayda agguardia kadagiti ruangan tapno agtalinaed a nasantuan ti aldaw ti Sabbath.+ O Diosko, laglagipennak koma met maigapu iti daytoy ken kaasiannak gapu ta dakkel ti napudno nga ayatmo.+

23 Kadagidi nga aldaw, nakitak met a nangasawa* dagiti Judio kadagiti babbai nga Asdodita,+ Ammonita, ken Moabita.+ 24 Kagudua iti bilang dagiti annakda ti agsasao iti lengguahe dagiti Asdodita ken kagudua ti agsasao iti nadumaduma a lengguahe, ngem awan kadakuada ti makapagsao iti lengguahe dagiti Judio. 25 Binabalaw ken tinubngarko ida ken kinabilko ti dadduma kadagiti lallaki+ ken pinarutko ti dadduma a buokda, ket kinunak kadakuada: “Ikariyo iti Dios a saanyo nga ited dagiti annakyo a babbai kas assawa dagiti annakda a lallaki, ken saanyo nga awaten ti annakda a babbai kas assawa ti annakyo a lallaki wenno kas assawayo a mismo.+ 26 Saan kadi a dayta ti makagapu a nagbasol ni Ari Solomon iti Israel? Kadagiti adu a nasion, awan idi ti ari a kas kenkuana.+ Inay-ayat ti Diosna+ isu a pinagari ti Dios iti intero nga Israel. Ngem nagbasol gapu kadagiti ganggannaet nga assawana.+ 27 Saan kadi a nakababain unay daytoy nakadakdakes nga inaramidyo a simmukirkayo iti Diostayo babaen ti panangasawayo kadagiti ganggannaet a babbai?”+

28 Pinagtalawko ti maysa kadagiti annak a lallaki ni Joiada,+ ken apoko ni Eliasib+ a nangato a padi, ta nagbalin a manugang ni Sanbalat+ a Horonita.

29 O Diosko, laglagipem a dusaen ida, ta rinugitanda ti kinapadi ken ti tulag kadagiti papadi+ ken Levita.+

30 Inaramidko ti seremonia a panangdalus kadakuada iti amin a narugit nga impluensia dagiti ganggannaet, ken imbagak kadagiti papadi ken Levita dagiti pagrebbengan ken trabaho ti tunggal maysa.+ 31 Inyurnosko met no kaano a maipan dagiti abasto a kayo a pagsungrod+ ken dagiti umuna a naluom a bunga.

O Diosko, laglagipennak ken bendisionannak.*+