Maysa a Pasken a Dikay Sayangen

“Itultuloyyo nga aramiden daytoy a panglaglagip kaniak.” Dagidiay a sasao ni Apotayo a Jesu-Kristo, a masarakan idiay Lucas 22:19, ket naisaoda idi inyusuatna ti panglaglagip ti ipapatayna. Ti ipapatay ni Jesus ti nangilukat iti sangatauan ti namnama a magun-odan ti biag nga agnanayon iti Praiso a kasasaad. Gapuna ti ipapatayna ti rebbeng nga intay laglagipen. Salimetmetanyonto aya ti panglaglagip iti dayta itoy a tawen?

Pangngaasiyo ta awatenyo daytoy nga imbitasion manipud kadagiti Saksi ni Jehova a tumipon a kaduada iti panglaglagip itoy importante a pasken. Daytoy a panglaglagip ket kalpasanto ti ilelennek ti init iti petsa a katupag ti Nisan 14 iti lunar a kalendario ti Biblia. Ikor-ityo ti petsa iti kalendarioyo tapno dikay malipatan. Daytantot’ Sabado, Marso 30, 1991. Ti nangted kadakayo itoy nga imbitasion ti makaibaga kadakayo ti eksakto a lugar ken oras ti panagtataripnong.