Kasanok a Mapagballigian ti Panangpilit Dagiti Kapatadak?
Ti surat a naggapu iti maysa a polis ti Chicago, E.U.A., iyilustrarna ti kinapateg ti panangammo ti sungbat. Insuratna:
“Idi Enero 15, 1990, as-asikasuek ti maysa a 18-años a balud a naisublit’ Chicago manipud Mississippi nga addaan mandamiento ti pugante. Paset ti panangasikaso isut’ panangala ti amin a sanikua ti balud. Adda iti ikutna ti libro nga Iyimtuod ti Agtutubo—Dagiti Sungbat nga Epektibo.
“Binasamon aya daytoy a libro?’ insaludsodko.
“‘Wen,’ insungbatna. ‘Bayat nga aglemlemmengak idiay Mississippi, nagtrabahoak iti maysa a pagtalonan, ket dua kadagiti Saksi ni Jehova ti nangted kaniak itoy a libro.’ Kalpasanna agsangiten, a dandani dina matngelan ti panaganug-ogna. Iti baet ti panagsangsangitna, kunana: ‘Nabasakon a namin-adu daytoy a libro, ket ti kapitulo nga inulit-ulitko ket daydiay “Kasanok a Mapagballigian ti Panangpilit dagiti Kapatadak?”’ Sana innayon pay: ‘No la koma adda kaniakon daytoy nga impormasion tallo wenno uppat a tawen sakbayna, awanak koma ditoy itatta.’
“Ti balud naipanawen, ket binasak ti report ti polis ken ti panagipudnona iti polisia. Iti dayta kunana: ‘Ti lider ti barkadami ti nagkuna kaniak nga innak idiay ngudo ti kalsada ket paltogak ti maysa a kameng ti karibal ti barkadami nga aglaklako ti cocaine iti teritoriami. Inaramidko ti kunana kaniak. Agbutengak a dagiti dadduma a miembro panunotenda a takrutak. Kayatko nga awatendak.’
“Daytoy a 18-años a balud napabasol iti pammapatay, ket no masentensiaan, isut’ maikadua kadagiti balud a maiparbeng a mabitay gaput’ panangaramidna iti imbaga dagiti kapatadanna nga aramidenna.”
Ti Biblia mangipaay kadagiti mapagtalkan a pagalagadan ken nainsiriban a balakad agpaay kadagiti adu a parparikut itatta. No kayatyo ti gumun-od iti ad-adu pay nga impormasion wenno ti libre a panagadal iti Biblia iti pagtaengan, pangngaasiyo ta agsuratkayo iti Watch Tower, P.O. Box 2044, 1099 Manila, wenno iti maitutop a direksion a nailista iti panid 5.