Maseknan Aya ti Dios?

Apay a palubosanna ti panagsagaba?

Agpatingganto pay aya?

Makapagagar a salsaludsod, saan kadi? Agparangda iti akkub ti maysa a broshur nga impablaak dagiti Saksi ni Jehova. Nabasayon aya? Nakaipaayen dayta ti liwliwa ken namnama kadagiti adu. Nagsurat ti maysa a babai manipud Philadelphia, Pennsylvania, E.U.A., maipapan iti daytoy a broshur:

“Diak ammo no kasano a nagpintas ti panamagsusurotda kadagiti sao iti makapikapik-puso a pamay-an. Kasla arignat’ addaak iti nasipnget a kuarto ken pagammuan adda bigla a nangsindi ti silaw; naamirisko a: ‘pudno a maseknan ti Dios!’

“Maysaak a tao a kanayon a nairuam iti siensia. Gapuna, no adda panawen a maupayak, mabang-aranak babaen kadagiti diskurso, artikulo, wenno pelikula a nainaig iti siensia. Nupay kasta, saannak laeng a liniwliwa daytoy a broshur, no di ket tinukaynak iti natanang, naayat a pamay-an.

“Ti umuna a makaawis ti atensionyo isu ti akkub. Epektibo daytoy agsipud ta dagita ket pudnoda a tattao. Ti rupa ti tunggal maysa iyanninawna ti pannakaseknan iti salsaludsod a napatak ti pannakaisuratna, ‘Pudno Aya a Maseknan ti Dios Kadatayo?’ Ti langa ti rupada iladawanna ti panagrikna dagiti isuamin kadagitoy nga al-aldaw.

“Nakalaklaka a maawatan dayta nga artikulo. Daytat’ simple, maikanatad, ken adda mamaayna. Nainkalintegan dayta. Makaay-ayo unay ken naglaka a basaen nga apaman a rinugiamon a basaen dayta, dikan kayat nga isardeng ti agbasa.”

No kayatyo pay ti kanayonan nga impormasion, pangaasiyo ta agsuratkayo iti Watch Tower, P.O. Box 2044, 1099 Manila, wenno iti maitutop a direksion a nailista iti panid 5.

[Ladawan iti panid 32]

PUDNO AYA A MASEKNAN TI DIOS KADATAYO?

No kasta, apay a palubosanna ti panagsagaba?

Agpatingganto pay aya?