Magun-odan Aya ti Ad-adu Pay?

“NASAPA pay idi Nobiembre,” kuna ti maysa a babai idiay Michigan, E.U.A., “kaduak ti katugangak a babai a nagpa-xerox iti maysa a pagimprentaan idiay Grand Rapids idi nadlawko ti maysa a babai a nagpa-xerox iti adu a kopia maipapan iti chronic fatigue syndrome (CFS). Dinamagko no adda gundawayna a nangbasa iti artikulo ti magasin nga Agriingkayo! a nangtaming iti CFS.

“‘Awan. Nadamagko ti maipapan iti dayta ngem diak pulos nakaawat iti kopia,” kinunana.

“Sinaludsodko no kayatna ti maaddaan ti maysa.

“‘Maiyalaannak kadi iti maysa?’ inimtuodna.

“Inlawlawagko a maysaak a Saksi ni Jehova ket naiparna nga addaanak iti dua a sobra a kopia iti dayta a ruar. Bueno, intedna ti direksionna, ket kalpasanna imbusonko ti kopia. Dinawatko no mabalin nga agsuratto kaniak tapno maammuak no aniat’ makunana maipapan iti artikulo.”

Sumagmamano nga aldaw kalpasanna, nagsurat ti babai: “Agyamanak iti kasta unay. Nagsayaat ti artikulo nga impatulodmo. Nagsayaat ti pannakasirarak ken pannakaisuratna. . . . Adda kadi pamusposan a pannakagun-od iti agarup 1,000 a kopia kadagitoy? Bayadak ida ken kayatko nga iraman ti impormasion kadagiti amin.”

Idi naammuan ti babai a mabalin nga agkontribusion dagiti tattao iti sangalubongan a trabaho a panangasaba nga ar-aramiden dagiti Saksi ni Jehova, isut’ nangaramid iti tseke para iti Watchtower Bible & Tract Society. Kinunana nga ibunongna dagiti magasin kadagiti 17 a nagduduma a grupo dagiti tattao nga addaan CFS ken nagunggonaan iti panagpipinnaregta ken panagsasarita iti intero a Michigan.

Saan laeng nga ipakita ti Agriingkayo! kadagiti managbasa no kasano a makapagballigida kadagiti parikut itatta. Pabilgenna met ti panagtalek iti kari ti Namarsua maipapan iti natalna ken natalged a baro a lubong.

No kayatyo ti maaddaan iti ad-adu pay nga impormasion wenno libre a panagadal iti Biblia, pangngaasiyo ta agsuratkayo iti Watch Tower, P.O. Box 2044, 1099 Manila, wenno iti maitutop a direksion a nailista iti panid 5.