Daytat’ Nangtignay Kenkuana nga Agkararag

Kinuna ni Karen, maysa kadagiti Saksi ni Jehova idiay Estado ti Nueva York, a pinatulodanna ni nanangna iti libro a Panagimdeng iti Naindaklan a Mannursuro. “Intedko ken Mommy ti libro,” insurat ni Karen, “tapno basaen ti siam ti tawenna a kaanakak a ni Jamie no rabii.” Inlawlawag ni Karen: “Nagsuratak ken Jamie ket kinunak a basaenna koma dayta iti kada rabii idiay balay ni Lolana, ket addanto nasayaat a pampanunotenna sakbay a maturog.”

Idi agangay, imbaga ti nanang ni Karen, a di Saksi ni Jehova, a binasa ni Jamie ti libro sakbay a naturog. Kabigatanna, imbagana nga inkararaganna ti adingna a barito (a maopera idi) sakbay a naturog. Medio naragsakan ti ina ni Karen yantangay pagaammona a di pay pulos nagkarkararag ni Jamie.

Insurat ni Karen: “Nabileg unay dayta a libro no matignayna ti siam-ti-tawenna nga agkararag kalpasan ti panangbasa iti sumagmamano laeng a pasetna. Daytoy ti nangtignay kaniak nga ad-adda a mangapresiar iti bileg daytoy a libro. Ammok nga uray ni nanangko ket naallukoy gapu ta kinunana nga adu ti iyimtuod ti libro ken nabatad a mangisuro iti nasayaat a kababalin ken saan laeng a basta estoria.”

No kayatyo ti maaddaan iti kopia ti Panagimdeng iti Naindaklan a Mannursuro wenno maysa a libre a panagadal iti Biblia iti pagtaenganyo, pangaasiyo ta agsuratkayo iti Watch Tower, P.O. Box 2044, 1099 Manila, wenno iti maitutop a direksion a nailista iti panid 5.