Agriingkayo!​—ti Pakaibasaran ti Maysa a Pannubok

IDI linukatan dagiti estudiante iti pagilian ti Sud America a Suriname ti bokleta a pageksaminanda agpaay iti iseserrekda iti high school idi Hulio 1993, natakuatanda a nagunggonaan dagiti managbasa ti magasin nga Agriingkayo! Daytoy ket agsipud ta gistay kagudua kadagiti amin a saludsod iti 36-panid a bokleta, nga insagana ti Examination Bureau ti Ministry of Education, ket naibasar iti dua nga artikulo manipud iti Agriingkayo!

Imparang ti panid 1 agingga iti 9 ti artikulo a “Dagiti Iskuater​—Narigat a Biag iti Siudad,” a nagparang iti Agriingkayo! nga Oktubre 8, 1992. Adda 21 a saludsod a nangsubok ti pannakaawat iti dayta a material. Naglaon ti panid 10 aginggat’ 16 ti bokleta a pageksaminan ti 14 a salsaludsod iti artikulo a “Ti Capybara​—Biddut Wenno Pagsidsiddaawan ti Panamarsua?,” a nagparang iti Agriingkayo! a Setiembre 22, 1992.

“Babaen ti panangusar kadagitoy nga artikulo a mangsubok iti pannakaawat dagiti estudiante kadagiti salaysay iti intero a pagilian,” kinuna ti maysa a prinsipal iti makinlaud a paset ti Suriname, “ipakita dagiti autoridad ti eskuelaan a matmatanda ti Agriingkayo! kas maysa a pagtuladan ti umiso a grammar ken naurnos a panagsurat.”

No kayatyo ti maysa a kopia ti Agriingkayo! wenno kayatyo nga adda sumarungkar iti pagtaenganyo a mangilawlawag itoy a banag, pangngaasiyo ta agsuratkayo iti Watch Tower, P.O. Box 2044, 1099 Manila wenno iti maitutop a direksion a nailista iti panid 5.