‘Nasungbatan ti Amin a Saludsod’

Iti panagkomentona kadagiti serye a “Nasaysayaat a Pannakaawat iti Menopause,” iti Pebrero 22, 1995 nga Agriingkayo!, nagsurat ti maysa a managbasa a taga Kentucky, E.U.A.: “Nabiit pay a tinabunuak ti tallo-oras a seminar maipapan itoy a tema. Inyurnos dayta dagiti departamento ti edukasion iti dua a kadakkelan nga ospital. Makaisuro unay ti programa, ngem ad-adut’ nasursurok iti 30 minuto a panagbasak iti Agriingkayo! ngem ti nasursurok iti tallo oras a seminar (ken saanak a nakagastos iti $15).”

Insurat ti sabali pay a managbasa ti Agriingkayo!: “Adu a libro ken artikulo ti nabasakon maipapan iti menopause iti napalabas a tallo a tawen. Kalpasanna kanayon nga adda saludsodko a di nasungbatan. Nasungbatan dagiti artikuloyo ti isuamin a saludsodko maipapan itoy a tema.”

Mangipaay ti Agriingkayo! iti impormasion a tumulong kadagiti managbasana a mangsaranget kadagiti parikut itatta. Kangrunaanna, pabpabilgen [daytoy a magasin] ti panagtalek iti kari ti Namarsua maipaay iti natalna a baro a lubong. No kayatyo a maammuan ti ad-adu pay maipapan iti patpatien ken aktibidad dagiti Saksi ni Jehova, dagiti managipablaak iti daytoy a magasin, pangngaasiyo ta makiumankayo kadakuada iti Kingdom Hall-da iti lugaryo wenno agsuratkayo iti kaasitgan a direksion a nailista iti panid 5.