Nakaskasdaaw a Masakbayan Para iti Planeta a Daga
“IPAKITA ti panagsirarak a nakapudpudot ita ti Daga ngem iti napalabas nga 600 a tawen,” ireport ti Globe and Mail ti Toronto. Idi 1995, ti sobra a pudot idiay makintengnga nga Estados Unidos ti nanggudas iti biag ti nasurok a 500 a tattao idiay Chicago. Rimsua idiay India ken Australia dagiti umasping a nakaro a kasasaad, idinto ta napadasan ti Inglatera “ti maikatlo a katitikagan a kalgaw iti 200 a tawen.”
Aniat’ pakaigapuan daytoy? Kuna ni Henry Hengeveld, maysa nga eksperto iti klima iti Environment Department ti gobierno ti Canada: “Itudo ti kaaduan a pammaneknek ti kinapudno nga adda nalawag a natauan nga impluensia iti sangalubongan a klima.” Sigun iti report ti Globe and Mail, “ti karkarna a panniempo ti mayataday kadagiti modelo ti computer a mangtulad kadagiti epekto ti panagbara ti daga, a naipagarup a pakaigapuan kangrunaanna iti pannakausar dagiti fossil fuel.”
Mapagdedebatean pay laeng ti panagbara ti daga iti gunglo dagiti sientista. Nupay kasta, kuna ti The New Encyclopædia Britannica: “Naparpartak ti panangabuso ti sangatauan iti atmosperiko nga aglawlaw ngem ti pannakaawatna iti dayta.”
Makaparagsak ta saritaen ti Biblia kadatayo a ti daga “agtaeng iti agnanayon.” (Eclesiastes 1:4) Daytoy ket maigapu ta saan nga ipalubos ti Namarsua, ni Jehova a Dios, ti tao wenno aniaman a natural a puersa a mangdadael iti dayta. Maisupadi, “iyeg[nanto] iti pannakadadael dagidiay mangdaddadael iti daga.”—Apocalipsis 11:17, 18.
Kasta met nga ipatalged kadatayo ti Biblia nga insagana ni Jehova a Dios ti nakaskasdaaw a masakbayan para iti planetatayo a Daga ken iti amin a natulnog a sangatauan. “Dagiti naemma tawidendanto ti daga, ket maay-ayatandanto iti kinaruay ti talna.” Anian a ragsaktayo ta adda iti biang ti Dios ti masanguanan ti daga, saan nga iti tao!—Salmo 37:11; 72:16; Isaias 65:17-25; 2 Pedro 3:13.
No kayatyo ti umawat kadagiti masakbayan a ruar ti Agriingkayo!, pangngaasiyo ta makiumankayo kadagiti Saksi ni Jehova iti lugaryo wenno agsuratkayo iti kaasitgan a direksion a nailista iti panid 5.
[Picture Credit Line iti panid 32]
Rinetrato ti NASA