“Impaimalditna Dayta”
Kasta ti kinuna ti manangapresiar a balasang a taga Canada iti maysa a surat ti panagyaman iti Watch Tower Society. Nakipaset iti maysa a salip ti panagdiskurso idiay eskuelaan, ket ti imparangna ti nakaragsakan unay ti maysa kadagiti hurado ti panel isu a kiniddawna ti pammalubos a maimaldit dayta iti maysa a lokal a periodiko.
Kasanot’ panangpili ti balasang iti temana? “Adda problema ti klasek nangnangruna dagiti babbai, maipapan iti panagtsismis,” inlawlawagna. Isu nga inkugnalna ti diskursona iti impormasion a nabasana iti Agriingkayo! Naipablaak ti paset ti bitlana iti The Review, maysa a lokal a periodiko iti Niagara Falls, Ontario, iti sidong ti paulo a “Makapasair ti Panagtsismis; Kasanot’ Panagriknam?”
Aniat’ nagustuan unay ti hurado iti grupo? Usigenyo ti sumagmamano a naadaw iti bitla ti balasang: “Kadawyan unay ita ti panagtsismis iti kagimongan. Pakaigapuan dayta ti adu a panagsakit ti ulo, adu a rabii a di pannakaturog ken kangrunaan iti amin, nasair a rikrikna. . . .
“Imposible ti panangisardeng iti panagtsismis agsipud ta nakaparsuaan ti tao ti agsao. Ti maysa a maaramidantayo isut’ panangkontrol iti dayta. Ti sumagmamano a palagip no kasano nga aramiden daytoy ket: 1. Dika rubroban ti naisaon. 2. Dika dumngeg iti tsismis. . . . No dumngegka iti tsismis, agparang a kaslattay ay-ayonam ti maisaosao. 3. Ti makadadael a tsismis pagbalinennaka a managulbod. 4. Ti kapapatgan a balakad ket agpanunotka sakbay nga agsaoka! Damagem iti bagim, ‘Kasanot’ panagriknak no naisaosao daytoy maipapan kaniak?’”
“Iyaplikarmo ti uppat a singasing,” inngudo ti balasang, “ket sigurado nga agbalinkanto a nasaysayaat a tao.”
Anian a nagsayaat a balakad para iti amin, saan laeng a kadagiti agtutubo iti eskuelaan! Ikagkagumaan ti Agriingkayo! ti mangiparang kadagiti naintiempuan ken kabaruan nga impormasion maipapan iti nagadu a nadumaduma a tema. No kayatmo ti regular nga umawat iti daytoy a magasin, agkiddawka iti maysa kadagiti Saksi ni Jehova inton sumaganad nga iyaayda, wenno agsuratka iti maitutop a direksion a nailista iti panid 5.