Ti Adut’ Pakausaranna a Chitenge
BABAEN TI KORESPONSAL TI AGRIINGKAYO! IDIAY NAMIBIA
TI CHITENGE—ammom kadi no ania dayta? No adda saparmo, umayka man biit agpasiar iti purok dagiti Africano ket kitaem ti adut’ pakausaranna a chitenge bayat a mausar dayta iti pagtrabahuan ken pagay-ayaman.
Ti purok a pagpasiarantayo ket ti Rundu, Namibia. Dumagastayo nga umuna iti naarimbangaw a palengke. Makitinnawar, aggatang, aglako, wenno basta dumagas tapno makiinnestoria dagiti babbai a naragsak ti ruprupada. Ngem kitaem a naimbag, ket madlawmo a gistay aminda ket nakaaruat iti naisangsangayan a kita ti kawes, ti bidang a pagaammo kas chitenge.
Ti katsa a chitenge ket dua a metro ti kaatiddogna ken 1.5 a metro ti kaakabana ken maus-usar ti nagadu a kita ti kolor ken disenio. Dadduma ti naarkosan iti ladawan dagiti animal, ken dagiti dadduma, iti tattao wenno buya ti aglawlaw.
Ti sumaganad a pasiarentayo ket ti sumagmamano a pumurok nga agnanaed iti balbalay a naurnos ti pannakaaramidna manipud iti pitak ken pan-aw. Makumikom dagiti babbai kadagiti trabahoda—nga agkarkaraid iti nadarat a sanguanan ti balayda wenno agar-arun iti paglutuanda iti kanen ti pamiliada. Daddumat’ nakaaruat laeng iti chitenge, nga ita ket naingato ken naibidang iti barukong a kas kettay bestida. No agpelles dagiti babbai—nalabit agisuotda iti blusa ken palda—agbidangda ti chitenge tapno saan a marugitan ti paldada no magnada kadagiti natapok a kalsada iti purok.
Nadlawmo kadi dayta napintas nga agtutubo a babai? Nangabel iti chitenge—ag-2 a metro amin dayta—kas komplikado ken napintas a tapungor. Ket kitaem no kasano nga ubbaenna ti anakna. Nangigalut iti sabali a chitenge kas alimbayung ket iyabadayna dayta. Talaga a maragsakan ti anakna a maubba iti kastoy a pamay-an iti bukot ni Nanangna. No mangrugin nga agsangit, basta guyodenna ti alimbayung iti sanguananna ket pasusuen wenno ay-aywenna bayat nga itultuloyna ti magna.
Mabalin a nakitam payen a nangisiglot iti kuartana iti suli ti bidangna—maysa a kombiniente a pitaka. Kalpasan a makagatang, warwarenna ti maysa pay a chitenge, ikabilna dagiti nateng iti dayta, sa sisisigo a siglotenna ida iti lupot, ken susuonenna nga agawid ti lupot a pinagbalinna a pakitienda a bag.
No sumreken iti balayna, mapaliiwmonto ti dadduma pay a nagsayaat nga usar daytoy adut’ pakausaranna a lupot. Iti sanguanan ti tunggal ruangan, nakabitin ti narangrang a chitenge. Kas makitam, awan dibision. Maikabit ti atiddog a galut iti agsinnumbangir a pungto ti balay, ket maibitin ti uppat a chitenge iti dayta, a mamagsina iti salas ken pagturogan.
Idisson ti mangpasangbay kadatayo dagiti natengna ket maamirisna nga awan gayam pagsungrodna. Sakbay a mapan iti kakaykaywan a mangayo iti sangareppet, siguraduenna nga adda itugotna nga ekstra a chitenge. Kalpasan a nakaurnong iti pagtungo, mangusar iti maysa a chitenge a pangreppet iti amin a kayo. Kalpasanna mangala iti sabali pay a chitenge ken kunikonenna dayta a naimbag tapno agbalin a nabengbeng a dikenna. Agserbi daytoy a nagsayaat a kutson inton susuonenna ti dakkel a reppet ti kayo sana iyawid.
Apaman a napagbureken ti gayyemtayo ti lutlutuenna a taraon, ikeddengna nga adda pay orasna a mangarruba biit. Bayat a makiinnestoria, iyaplagna ti chitenge-na iti daga a kasla ules sa idissona iti dayta ti anakna. Paragsaken ti ubing ni nanangna babaen ti makaay-ayo nga isem bayat nga ikkan ni nanangna iti ruting nga ay-ayamenna.
Di agbayag agawiden ti gayyemtayo tapno kitaenna ti lutlutuenna. Ngem yimmuyem ti langit, ket kellaat nga agtudon. Dina inkankano dayta tangay inubbanan ti anakna iti maysa a takiagna sa impamuspusanna nga idalungdong ti chitenge. Babaen ti giddato a payongna, makaawiden tapno kitaenna ti lutlutuenna.
Palda, kawes, pitaka, pakitienda a bag, diken, ules, payong, pangubba, tapungor—kasla awan patingga ti pakausaran ti chitenge kas pammaneknek iti kinamanangipamuspusan dagitoy nga umili nga Africano.
[Dagiti ladawan iti panid 23]
Adut’ pakausaran ti “chitenge”: pangreppet iti sungrod, alimbayung a pangubba iti ubing, napintas a tapungor, namaris nga ules