‘Lawlawaganda ti Panangmatmatmi’

Ti publikasion dagiti Saksi ni Jehova ket dinayaw ti panguluen ti departamento dagiti ganggannaet a lenguahe idiay Karakol Institute of Management sadi Kyrgyzstan, maysa a dati a republika ti Soviet Union. Insuratna ti sumaganad iti sanga nga opisina dagiti Saksi ni Jehova idiay Russia:

“Dakkel unay ti maitulong dagiti libro ken broshuryo iti panangisuromi kadagiti lenguahe nga Ingles, Aleman, Ruso, Kyrgyz, ken Turko iti sidong dagiti nariribuk ita a kasasaad ti kagimongan ken ekonomia. . . . Dagiti broshuryo ti kangrunaan a kidkiddawen dagidiay agad-adal iti praktikal a panagipatarus . . . Pagyamanan kadagiti libro a Life​—How Did It Get Here? By Evolution or by Creation?, Ti Sekreto ti Kinaragsak iti Pamilia, ken Dagiti Saludsod nga Iyimtuod ti Agtutubo​—Dagiti Sungbat nga Epektibo.

“Adu ti Saksi ni Jehova kadagiti estudiantemi. Interesadoda a mangbasa kadagiti artikulo ti Agriingkayo! ken us-usarenda dagitoy no maikkanda iti homework.”

Nangnangruna a pinadayawan ti mannurat ti Agriingkayo!: “Pagyamanan kadagiti makapainteres ken makaisuro nga artikulo. . . . Ipaayandakami iti namnama ken lawlawaganda ti pangkaaduan a panangmatmatmi. . . . Maragsakankam amin a mangbasa iti paset ti Agriingkayo! a ‘Panangmatmat iti Lubong.’”

No kayatmo ti umawat iti kopia ti Agriingkayo! wenno kayatmo nga adda maysa kadagiti Saksi ni Jehova nga umay iti pagtaengam tapno ilawlawagna ti Biblia kenka, pangngaasim ta agsuratka iti Watch Tower, P.O. Box 2044, 1060 Manila, wenno iti maitutop a direksion iti panid 5.