Agduadua Ngem Kaskasdi nga Agbirbirok

ITI maysa a surat iti sanga nga opisina dagiti Saksi ni Jehova idiay Slovenia, kiniddaw ti maysa a lalaki a nagkuna nga isut’ nabuniagan kas Romano Katoliko: “Pangngaasiyo ta patulodandak iti broshur nga Ania ti Kalikaguman ti Dios Kadatayo? Pakaammuandak met koma no kasano a kanayon a makaawatak iti Agriingkayo! ditoy balayko.”

Inlawlawag ti lalaki: “Pangngaasiyo ta diyo koma tagidaksen. Managduaduaak no maipapan iti relihion, ngem dandaniak nakigtot idi nabasak ti Agriingkayo! tangay saan a dogmatiko no di ket direkta ken makaisuro unay ti panangilawlawagna kadagiti bambanag.” Kalpasanna, dinakamatna ti maysa nga agdinamag a narelihiosuan a magasin a kinunana a literal a mangim-impluensia kadagiti tattao.

Inlawlawag ti lalaki no apay a dina sinuratan ti kupon iti likudan ti Agriingkayo! tapno agkiddaw iti broshur a Kalikaguman no di ket inkeddengna laengen ti agsurat. “Diak kayat a dadaelen ti magasin nga Agriingkayo!,” kinunana. “Kayatko a saan a maan-ano dayta!”

Ti 32 ti panidna a broshur nga Ania ti Kalikaguman ti Dios Kadatayo? ket addaan iti 16 a leksion. Ilawlawagda dagiti kangrunaan a sursuro ti Biblia ken ipakitada dagiti impormasion manipud Biblia a mangisuro no ania ti masapul nga aramidentayo tapno magun-odantayo ti anamong ti Dios. No kayatmo met ti agkiddaw iti kopia daytoy a broshur, suratam ti naipakuyog a kupon ken ibusonmo iti address a naipakita iti kupon wenno iti maitutop nga address a nailista iti panid 5 daytoy a magasin.

□ Pangngaasiyo ta patulodandak iti kopia ti broshur nga Ania ti Kalikaguman ti Dios Kadatayo?

□ Interesadoak iti libre a panagadal iti Biblia iti pagtaengan.

[Ladawan iti panid 32]

113 a milion a kopia iti 240 a lenguahe