Posible ti Maaddaan iti Naragsak a Biag ti Pamilia!

MAYSA a 23 ti tawenna a babai idiay siudad ti Maladzyechna, sadi Belarus, ti nagsurat iti sanga nga opisina dagiti Saksi ni Jehova idiay Russia. Inlawlawagna nga adda dua nga annakda ken ni lakayna. Kastoy ti insuratna: “Agin-innayatkami ken ni lakayko. Ngem nadlawko a bayat a bumaybayag ti panagasawami, nalaklakakami a masuron ken agsubang, uray no awan a pulos ti aniaman a makagapu. Sumagmamano a bulan ti napalabas, adda estranghero a nakisarita kaniak iti dalan ket inikkannak iti tract a napauluan iti Tagiragsakenyo ti Biag ti Pamilia. Idi damo, nagustuak ti napintas a ladawan ti naragsak a pamilia iti dayta. Idi agangay, binasak ket intedko ken ni lakayko tapno basaenna met.

“Kasla milagro, saan laeng a simmayaat ti kasasaad ti pamiliami no di ket makunak a naan-anay a nagbalbaliw. Maawatanmi itan a saan unay a narigat ti agbalin a naragsak. Ti kasapulan laeng ket bassit a kinapinget, naimpusuan a panagdinnungngo ken panagrinnanud. Ti napateg isut’ panagbiag a maitunos kadagiti bilin ti Dios, panagayat iti Dios ken kadagiti tattao, agraman iti pamilia ken kadagiti estranghero.”

Kastoy ti maudi a kinunana: “Ad-adda a makaay-ayo ken naragragsak ti panagbiagmi itan. Kayatmi nga itultuloy ti agadal iti Biblia ken isuro dagiti annakmi.”

Patienmi a matulongannakanto met ti tract a Tagiragsakenyo ti Biag ti Pamilia. Maragsakankami met a mangiraman iti 192 ti panidna a libro a napauluan Ti Sekreto ti Kinaragsak iti Pamilia. Tapno maaddaanka iti tract ken libro, pangngaasim ta suratam ti naipakuyog a kupon ken ibusonmo dayta iti address a makita iti kupon wenno iti maitutop nga address iti panid 5 daytoy a magasin.

□ Ikkandak iti tract a Tagiragsakenyo ti Biag ti Pamilia ken ti libro a Ti Sekreto ti Kinaragsak iti Pamilia.

□ Interesadoak iti libre a panagadal iti Biblia.