Agimtuod Dagiti Agtutubo

Kasano a Madaerak ti Parikutko iti Salun-at?

“TI DAYAW dagiti agtutubo a lallaki isu ti kinapigsada,” kuna ti Proverbio 20:29. (Ti Biblia) No masakitka wenno adda depekto ti bagim, mabalin a mariknam a di pulos agaplikar kenka dayta a teksto ti Biblia. Ngem saan a kasta! Kinapudnona, adu nga agtutubo nga addaan depekto iti bagi ken nakaro a sakit ti naballigi a nangdaer kadagiti kakaruan a parikut. Kinasarita ti Agriingkayo! ti uppat kadagita nga agtutubo.

Ni Hiroki a taga-Japan ket agsagsagaban iti cerebral palsy sipud pay idi nayanak. “Kanayon a nakatingig ti ulok gapu ta saan a masuportaran dagiti masel ti tengngedko, ken diak makontrol ti panagkuti dagiti imak,” kunana. “Kasapulan a kanayon nga agpannurayak iti tulong ti sabsabali.”

Ni Natalie ken ti adingna a ni James ket naipasngay a naidumduma ti kinapandekda. Ni Natalie ket addaan pay iti scoliosis isu a saan a makatakder a diretso. Kinunana: “Namimpaten a naopera ti durik, ket nakapuy ti barak gapu iti kinakubbok.”

Ni Timothy a taga-Britania ket naammuan nga addaan iti chronic fatigue syndrome idi isu ket agtawen iti 17. Kinunana: “Iti kurang a dua a bulan, napukawko ti dati a kinasalun-at ken kinaganaygayko agingga a diak kabaelanen ti tumakder.”

Ni Danielle a taga-Australia ket naammuan nga addaan iti diabetes idi isu ket agtawen iti 19. Kinunana: “Yantangay saan a madlaw dagiti sintomas ti diabetes, adda dagiti saan a makaammo no kasano kagrabe dayta. Kinapudnona, mabalin nga ipatayko dayta.”

No agsagsagabaka iti maysa a kita ti sakit wenno adda depekto ti bagim, maparegtaka la ketdi kadagiti komento da Hiroki, Natalie, Timothy, ken Danielle. Ngem no nasalun-atka, mabalin a makatulong dagiti komentoda tapno agbalinka nga ad-adda a mannakaawat kadagidiay mangib-ibtur iti sakit wenno pisikal a depekto.

Agriingkayo!: Ania ti pakarigatam unay iti kasasaadmo?

Natalie: Ti pakarigatak unay ket ti reaksion dagiti tattao no makitadak. Alusiisenak. Kasla siak ti kanayon a kitkitaenda.

Danielle: Para kaniak a diabetiko, dakkel a karit ti panangammo no ania ti kanek, no kasano kaadu ti kanek, ken no ania dagiti taraon a nasken a limitarak. No saanak nga agdieta, mabalin nga agresulta dayta iti hypoglycemia (abnormal a panagbaba ti asukar iti dara), a mabalin a pakaigapuan ti napaut a pannakapukaw ti puotko.

Hiroki: Adda wheelchair a nairanta para kaniak, ket agarup 15 nga oras iti kada aldaw a maymaysa ti posision ti bagik. Saanak met a makaturturog. Mariingak uray iti bassit laeng nga uni.

Timothy: Idi damo, saanko a maawat nga adda sakitko. Ibainko idi ti kasasaadko.

Agriingkayo!: Ania pay ti dadduma a pakarigatam?

Danielle: Nagbiitak a mabannog gapu iti sakitko a diabetes. Kasapulan a napapaut ti pannaturogko ngem kadagiti kaedadko. Kasta met a ti diabetes ket maysa a nakaro a sakit nga awan agasna.

Natalie: Siempre, marigrigatanak gapu iti kinapandekko. Marigatanak a mangaramid kadagiti gagangay a banag kas iti pananggaw-at kadagiti gatangek iti groseria. Adu ti aramidek a panagregget no agmaymaysaak a makitienda.

Timothy: Kasapulan a daerak ti patinayon nga ut-ot, agraman dagiti nabayag a panagleddaang. Sakbay a nagsakitak, nakagangganaygayak. Adda trabahok ken agmanmanehoak. Agay-ayamak idi iti football ken squash. Ngem ita, naidalitakon iti wheelchair.

Hiroki: Adda depekto ti panagsaok. Makapaupay dayta isu a bumdengak a mangirugi iti saritaan. No dadduma, adda masikilko gapu ta diak makontrol ti panaggaraw dagiti imak. No mapasamak dayta, diak pay ketdi maibaga ti “dispensarennak,” gapu ta marigatanak nga agsao.

Agriingkayo!: Ania ti nakatulong kenka a mangdaer iti kasasaadmo?

Danielle: Ikagumaak a panunoten dagiti nasayaat bambanag iti biagko. Nakaim-imbag ti pamiliak, adda gagayyemko iti kongregasion a mangay-ayat kaniak ken, kangrunaan iti amin, adda ni Jehova a Dios a tumultulong kaniak. Kanayon met nga ammuek dagiti kaudian nga impormasion maipapan iti panangtaming iti diabetes. Bigbigek a responsabilidadko nga aywanan ti salun-atko ket ar-aramidek ti kabaelak a mangaramid iti dayta.

Natalie: Ti kararag ti maysa a mangpabpabileg kaniak. Saggaysa laeng a tamingek dagiti parikutko. Babaen ti panagtultuloyko nga okupado, diak unay mapampanunot dagiti makapaupay a bambanag. Ken addaanak met kadagiti nagimbag a nagannak a mabalinko a pangyebkasan kadagiti marikriknak.

Timothy: Iti kada aldaw, mangaramidak iti aniaman a banag a mainaig iti panagdayaw iti Dios, uray no apagbiit laeng. Kas pagarigan, iti tunggal agsapa, usigek ti inaldaw a teksto. Nakapatpateg kaniak ti personal a panagadal iti Biblia ken ti panagkararag, nangruna no malmaldayak.

Hiroki: Saanko a pagdanagan dagiti banag a diak kabaelan a risuten. Mangsayang laeng dayta iti panawen. Iti sabali a bangir, ikagkagumaak a pabilgen ti relasionko iti Dios, ken diak liwayan ti agadal iti Biblia uray no kastoy ti kasasaadko. No diak makaturog, usarek dayta a gundaway tapno agkararag.—Kitaem ti Roma 12:12.

Agriingkayo!: Kasano ti panangparegta kenka ti sabsabali?

Hiroki: Kanayon a komendarandak dagiti panglakayen kadagiti kabaelak nga aramiden kasano man kabassit dagita. Ikuyogdak met dagiti kakongregasionko no mapanda agsarungkar wenno mangyadal iti Biblia.​—Kitaem ti Roma 12:10.

Danielle: Ti nalabit a makatukay unay kaniak ket ti napasnek a panangkomendar dagiti kakongregasionko. Gapu iti dayta, mariknak a napategak ken maparegtaak nga agtultuloy.

Timothy: Adda baket a kabsat a kanayon a mangikagkagumaan a makisarita kaniak kadagiti gimong. Parparegtaen ken balbalakadandak met dagiti panglakayen ken dagiti assawada. Maysa a panglakayen, nga agtawen iti 84, ti timmulong kaniak a mangipasdek kadagiti kalat a kabaelak a ragpaten. Adda ministerial nga adipen a nangawis kaniak a makikadua kenkuana iti ministerio, ken inyurnosna ti panangasabami iti maysa a patag a lugar a mabalinko a madanon babaen ti wheelchair.​—Kitaem ti Salmo 55:22.

Natalie: Apaman a sumrekak iti Kingdom Hall, kablaawandak dagiti kakongregasionko buyogen ti nabara nga isem. Kanayon nga adda makaparegta a banag a mairanud kaniak dagiti natataengan, nupay adda met pakarigatanda.​—Kitaem ti 2 Corinto 4:16, 17.

Agriingkayo!: Kasanom a tagtaginayonen ti positibo a kababalinmo?

Hiroki: Kas maysa kadagiti Saksi ni Jehova, naitimpuyogak iti maysa nga organisasion dagiti tattao nga addaan iti naraniag a namnama. Ti pananglaglagipko a kamengak ti kasta nga organisasion ti tumultulong kaniak nga agtalinaed a positibo.​—Kitaem ti 2 Cronicas 15:7.

Danielle: Pampanunotek nga addaanak iti nagsayaat a pribilehio gapu ta naawatak ti panggep ti Dios. Adda dagiti tattao a nasalun-at, ngem saanda a kas kaniak a naragsak.​—Kitaem ti Proverbio 15:15.

Natalie: Naammuak a napateg ti kanayon a makitimpuyog kadagiti positibo a tattao. Makaparegta met a basaen ti kapkapadasan dagidiay agserserbi ken Jehova iti laksid dagiti pakasuotan. Ken no mapanak idiay Kingdom Hall, ammok lattan a mapabilegak ken maipalagip manen kaniak a nagdakkel a pribilehio ti panagbalin a maysa kadagiti Saksi ni Jehova.​—Kitaem ti Hebreo 10:24, 25.

Timothy: Sigun iti 1 Corinto 10:13, saan nga ipalubos ni Jehova a mapasarantayo ti ditay kabaelan. No ngarud agtalek ti Namarsua kaniak a kabaelak a daeran daytoy a pakasuotan, apay koma nga agduaduaak?

Ad-adu pay nga artikulo ti serye nga “Agimtuod Dagiti Agtutubo” ti masarakan iti Web site a www.watchtower.org/​ype

UTOBEM DAGITOY

◼ Agpada da Hiroki ken Timothy a naidalit iti wheelchair. No kasta met ti kasasaadmo, kasano a makatulong dagiti komentoda tapno mataginayonmo ti positibo a kababalin?

◼ Kinuna ni Danielle a “yantangay saan a madlaw dagiti sintomas ti diabetes, adda dagiti saan a makaammo no kasano kagrabe dayta.” Agsagsagabaka met kadi iti sakit a “saan a nakadkadlaw”? No kasta, ania dagiti masursurom iti kinuna ni Danielle?

◼ Kuna ni Natalie a ti maysa kadagiti kakaruan a pakarigatanna ket ti nakaro a bainna gapu iti reaksion dagiti tattao a makakita kenkuana. Kasanom a matulongan ti kas kenni Natalie tapno saan nga alusiisen kenka? No mapaspasaram ti narikna ni Natalie gapu iti pisikal a depekto wenno iti sagsagabaem a sakit, kasanom a matulad ti positibo a kababalinna?

◼ Ilistam iti baba ti nagnagan dagiti am-ammom nga addaan iti depekto iti bagi wenno nakaro a sakit.

․․․․․

◼ Ania ti maaramidam tapno matulongam ti tunggal maysa kadakuada?

․․․․․

[Kahon iti panid 27]

Panangliwliwa ti Biblia

◼ Napudno ti pannakaseknan ni Jesus kadagidiay masaksakit.​—Marcos 1:41.

◼ Babaen ti ‘panangagasna iti tunggal kita ti sagubanit ken tunggal kita ti an-annayen,’ impakita ni Jesus ti panangpaimbag a maaramidto iti sidong ti Pagarian ti Dios.​—Mateo 4:23.

◼ Iti baro a lubong ti Dios, “awanto ti agtataeng nga agkuna: ‘Masakitak,’” ken awanton ti ut-ot.​—Isaias 33:24; Apocalipsis 21:1-4.

◼ Uray ni patay “mapukawto.”​—1 Corinto 15:25, 26.

[Ladawan iti panid 26]

Ni Hiroki, 23 Japan

[Ladawan iti panid 26]

Ni Natalie, 20 South Africa

[Ladawan iti panid 26]

Ni Timothy, 20 Britania

[Ladawan iti panid 26]

Ni Danielle, 24 Australia