Pinaimbag ti “Nakadadaanen a Libro”

◼ Maysa kadagiti Saksi ni Jehova idiay Brazil, Abagatan nga America ti mangaskasaba iti binalaybalay. Nakasaona ti maysa a babai a nagkuna nga immimbag ti katuganganna a babai gapu iti maysa a libro. Dinamag ti Saksi no ania dayta a libro. “Nakadadaanen a libro dayta,” kinuna ti babai, sana inruar ti mapirpirpiren a kopia Ti Librok Dagiti Estoria ti Biblia a kukua ti anakna.

Inlawlawag ti babai a nagsagaba ti katuganganna iti depresion ken napalalo ti panagbutengna iti ipapatay ken sipnget, nga uray la dinan kayat ti pumanaw iti iddana. Ti anak dayta a babai ket nakagun-od iti kopia ti libro nga Estoria ti Biblia ket rinugianna nga imbasaan ni lolana. Naparegta ken napabileg unay ti baket kadagiti imbasa ti apokona isu nga immimbag iti sakitna.

Insalaysay ti Saksi: “Idi imbagak iti babai a ti libro ket impablaak dagiti Saksi ni Jehova ken mabalinko nga iyalaan iti baro a kopia, kiniddawna nga ikkak iti dua​—maysa para ken katuganganna ken maysa para kenkuana. Idi impanko dagiti libro, nagkiddaw pay iti ad-adu. Nagangayanna, nakagun-od iti 16 a kopia ti libro agpaay kadagiti gagayyemna!”

Mabalinmo ti agkiddaw iti kopia Ti Librok Dagiti Estoria ti Biblia. Naglaon dayta iti 116 nga estoria maipapan kadagiti tattao ken paspasamak iti Biblia. Sipud idi naipablaak dayta a libro 30 a tawenen ti napalabas, nasuroken a 72 a milion a kopia ti nayimprenta. No kayatmo ti agkiddaw, suratam laeng ti naipakuyog a kupon ken ipatulodmo dayta iti adres a makita iti baba wenno iti maitutop nga adres a nailista iti panid 5 daytoy a magasin.

□ Kayatko ti maaddaan iti kopia ti libro a Ti Librok Dagiti Estoria ti Biblia.

□ Interesadoak iti libre a panagadal iti Biblia.