Binalbaliwan ti Maestra ti Panangmatmatna

◼ Sumagmamano a tawen ti napalabas, maysa a maestra idiay Batumi iti pagilian ti Georgia kiniddawna nga isurat dagiti estudiantena ti Sangapulo a Bilin. Nasdaaw ti maestra ta kabesado dayta ti maysa kadagiti estudiantena a ni Anna. Sisisigo met a nasungbatanna ti dadduma a saludsod mainaig iti Biblia. Ti masmasdaaw a maestra insaludsodna ken Anna no apay a nagadu ti ammona. Idi imbagana a makipagad-adal iti Biblia kadagiti Saksi ni Jehova, bimmalaet ti maestra ket kunana nga ibilangna a panatiko dagiti Saksi.

Naminsan, kiniddaw ti maestra kadagiti estudiantena a mangsangalda iti maysa a salaysay maipapan iti biag idiay Georgia ken iti nagduduma a parikut ti pagilian. Iti maudi a paset ti salaysay ni Anna, insuratna: “Saanto nga agballigi ti aniaman a panagregget dagiti tattao a mangaramid iti dakkel a panagbalbaliw iti kagimongan gapu ta kinuna ti Jeremias 10:23: ‘Saan a kukua ti naindagaan a tao ti dalanna. Saan a kukua ti tao a magmagna uray ti panangiturong iti addangna.’ Ti laeng Pagarian ti Dios ti makarisut iti amin a parikut.”

Kabigatanna, kinomendaran ti maestra iti sanguanan ti klase ti insurat ni Anna a salaysay, a kunkunana: “Nagustuak ti naidumduma a salaysay ni Anna, nga insuratna iti bukodna a sasao. Inlawlawagna no kasano a posible a mabalbaliwan dagiti kasasaad iti lubong.” Apresiaren met ti maestra ti kababalin ni Anna, a pinadayawanna iti sanguanan ti intero a klase gapu iti mapagwadan nga ugalina ken nanakman a panagkawkawesna.

Idi adda nangasaba a Saksi ni Jehova iti pagtaengan ti maestra, imbagana a matmatanna idi a panatikoda ngem nagbaliwen ti panangmatmatna kadakuada gapu iti estudiantena a ni Anna. Idi 2007, nakikadua ti maestra kadagiti Saksi ni Jehova iti Pananglaglagip iti ipapatay ni Jesu-Kristo ken immimdeng a naimbag kabayatan ti programa.

Kalpasan dayta a Pananglaglagip, inamin ti maestra ni Anna nga apresiarenna unay ti nauneg a pannakaammo dagiti Saksi ni Jehova maipapan iti Biblia. Isu ket regular itan nga iyad-adalan dagiti Saksi iti Biblia. Kas iti daytoy a maestra, awan duadua a kayatyo met a maammuan no apay a kasta dagiti patpatien ken kababalin ti dadduma a tattao. Apay a dikay agpayadal iti Biblia kadagiti Saksi ni Jehova?

[Ladawan iti panid 21]

Bayat nga isursurat ni Anna ti salaysayna