Ti Agurnong iti Danum a Kalub ti Payak ti Namib Beetle

● Iti intero a lubong, agarup 900 a milion a tattao ti awanan pagalaan iti nadalus a danum a mainum. Iti adu a lugar, magna ti babbai ken ubbing iti nakaad-adayo tapno agbirok iti danum sada awiten nga iyawid. “Nakakaasi dagiti nakurapay ta kasapulan a magnada iti adu nga oras kada aldaw tapno laeng magun-odda ti maysa a kangrunaan a kasapulanda,” kuna ni Shreerang Chhatre nga inheniero idiay Massachusetts Institute of Technology. Tapno makatulongda, ad-adalen ni Chhatre ken ti kakaduana ti tay-ak ti siensia a panagala iti danum manipud iti angep. Ad-adalenda no kasanoda a matulad ti Namib beetle​—insekto a kaar-arngi ti abal-abal.

Usigem: Kada agsapa, maabbungotan iti angep ti desierto ti Namibia idiay Africa. Gundawayan ti Namib beetle dayta nga apagbiit a kanito. Sanguenna ti angin iti umiso a posision.a Dagiti tambukor iti kalub ti payakna ket addaan iti substansia a mangatrakar iti agneb. Dumakkel dagita agingga nga agbalin a tedted. Gapu iti grabidad ken di agagsep a pannakakanal iti nagbabaetan dagiti tambukor, agayus dagita a tedted kadagiti kalub ti payak sa agdiretso iti ngiwat daytoy nga insekto.

Kayat ni Chhatre ken ti kakaduana nga usaren ti kasta met laeng a prinsipio tapno makaalada iti danum a mainum ti tattao. Siempre, ad-adu a danum ti kasapulan ti tao tapno agbiag ngem iti Namib beetle. Nagdakkel met ti kasapulan a pondo iti kasta a proyekto. Agingga ita, kuna ni Chhatre a “maad-adal pay laeng” ti panagala iti danum manipud iti angep para iti tattao.

Ania ti makunam? Babaen kadi iti ebolusion a timmaud ti agurnong iti danum a kalub ti payak ti Namib beetle? Wenno nadisenio dayta?

[Footnote]

[Ladawan iti panid 22]

Mabukel dagiti tedted ti danum sa agayus iti ngiwat ti insekto

[Picture Credit Lines iti panid 22]

Retrato: Chris Mattison Photography/photographersdirect.com