Pakauna

KADA aldaw sarangtentayo dagiti moral a desision maipapan iti salun-at: panangisulbong iti organo, aborsion, ti “kalintegan a matay.” Sapay koma ta dikay maipasango kadagita a problema.

Kaskasdi, adda maysa nga isyu a masapul nga asikasuenyo: Kasano a mausar ti dara a mangispal iti biag?

Nainkalintegan, adu itat’ agimtuod, ‘Kasanot’ katalged ti panangyalison iti dara?’ Ngem saan a medikal nga isyu laeng daytoy. Nagdinamag daytoy a nakainaigan dagiti Saksi ni Jehova. Inutobyon aya no apay a dagitoy a tao a nangatot’ moralidadda, a mamatida iti umno a medisina, ket dida akseptaren ti dara?

Kas makitayonto, ti medikal ken moral nga aspeto ti panangusar iti dara direktamente a nainaig iti wagas a panangispalyo ti kapatgan a sanikuayo: BIAG.