Dagiti Gagayyem ti Dios Agaramidda iti Naimbag

No adda gayyemmo a kaykayatmo ken raraemem, ikagkagumaam a tuladen. “Naimbag ken nalinteg ni Jehova,” kuna ti Biblia (Salmo 25:8) Tapno agbalintayo a gayyem ti Dios, masapul a naimbag ken nalintegtayo. Kastoy ti kuna ti Biblia: “Agbalinkayo a tumutulad iti Dios, kas annak a dungdunguen, ket itultuloyyo ti magna iti ayat.” (Efeso 5:1, 2) Adtoy ti sumagmamano a pamay-an ti panangaramid iti dayta:

Tumulongka kadagiti sabsabali. “Aramidentayo koma ti naimbag kadagiti isuamin.”​—Galacia 6:10.

Nagaget nga agtrabaho. “Ti agtatakaw saan koma nga agtakawen, ngem imbes ketdi agtrabaho koma a sipipinget, nga ar-aramidenna babaen kadagiti imana ti aramid a naimbag.”​—Efeso 4:28.

Agtalinaed a nadalus iti pisikal ken moral. “Dalusantayo koma dagiti bagbagitayo iti tunggal pakatulawan iti lasag ken iti espiritu, nga an-anayentayo ti kinasanto iti panagbuteng iti Dios.”​—2 Corinto 7:1.

Ayatem ken raemem dagiti miembro ti pamiliam. ‘Tunggal maysa kadakayo . . . ayatenna koma ti asawana a babai a kas iti bagina; iti sabali a bangir, ti babai addaan koma iti nauneg a panagraem iti asawana. Annak, agtulnogkayo kadagiti nagannak kadakayo.’​—Efeso 5:33–6:1.

Ipakita ti panagayat kadagiti sabsabali. “Itultuloytayo koma nga ayaten ti maysa ken maysa, agsipud ta ti ayat naggapu iti Dios.”​—1 Juan 4:7.

Agtulnogka kadagiti linteg ti pagilian. “Tunggal kararua paiturayan koma kadagiti [gobierno] . . . Ipaayyo kadagiti isuamin dagiti karbenganda, kenkuana a [mangkalikagum] iti buis, ti buis.”​—Roma 13:1, 7.