Ti Surat iti Diding

Idi agangay, nagbalin nga ari ti Babilonia ni Belsazar. Maysa a rabii, inimbitaranna ti sangaribu a nangato nga opisialna iti maysa a selebrasion. Impairuarna dagiti balitok a baso nga innala ni Nabucodonosor iti templo ni Jehova. Inusar ni Belsazar ken dagiti bisitana dagiti baso a naginuman iti arak, ken indaydayawda dagiti diosda. Idi kuan, adda nagparang nga ima ti tao ket nagsurat iti misterioso a sasao iti diding ti panganan.

Nagbuteng ni Belsazar. Pinaayabanna dagiti adipenna nga agar-aramid iti milagro ket inkarina: ‘Ti makaibaga iti kaipapanan dagitoy a sasao pagbalinekto a maikatlo a kangatuan nga agturay iti Babilonia.’ Pinadasda nga ibaga ti kaipapanan dagiti sasao, ngem dida maibaga. Idi kuan, simrek ti reyna ket kinunana: ‘Adda lalaki nga agnagan Daniel a mangibagbaga idi ken Nabucodonosor iti kaipapanan dagiti bambanag. Mailawlawagna dagitoy a sasao.’

Napan ni Daniel iti ari. Imbaga kenkuana ni Belsazar: ‘No mabasam ken mailawlawagmo dagitoy, ikkanka iti balitok a kuentas ken pagbalinenka a maikatlo a kangatuan nga agturay iti Babilonia.’ Kinuna ni Daniel: ‘Diak kasapulan ti regalo, ngem ibagak kenka ti kaipapanan dagitoy a sasao. Napangato ni Nabucodonosor nga amam ket pinagpakumbaba ni Jehova. Ammom ti amin a napasamak kenkuana, ngem dimo rinespeto ni Jehova ta naginumam iti arak dagiti balitok a baso a naggapu iti templona. Isu nga insurat ti Dios dagitoy a sasao: Mene, Mene, Tekel, ken Parsin. Kaipapanan dagitoy a sakupento dagiti Medo ken Persiano ti Babilonia, ket maikkatkanto nga ari.’

Kasla awan idi ti makasakup iti Babilonia ta napuskol dagiti paderna ken napalawlawan iti adalem a karayan. Ngem iti dayta met la a rabii, rimmaut dagiti Medo ken Persiano. Binaliwan ti ari ti Persia a ni Ciro ti turong ti ayus ti karayan tapno makaballasiw dagiti soldadona ket makapanda kadagiti ruangan ti siudad. Idi nakadanondan, nakalukat dagiti ruangan! Simrek dagiti soldado, sinakupda ti siudad, ken pinatayda ti ari. Kalpasanna, nagturay ni Ciro iti Babilonia.

Iti umuna a tawen a panagturay ni Ciro, impakaammona: ‘Binilinnak ni Jehova a mangbangon manen iti templona idiay Jerusalem. Mabalin a mapan dagiti adipenna a mayat a tumulong.’ Kas iti inkari ni Jehova, adu a Judio ti nagsubli idiay Jerusalem 70 a tawen kalpasan a nadadael. Impaisubli ni Ciro dagiti balitok ken pirak a baso ken dagiti alikamen nga innala ni Nabucodonosor iti templo. Makitam kadi no kasano nga inusar ni Jehova ni Ciro a mangtulong kadagiti adipenna?