ABANA

Maysa kadagiti dua a karayan ti Damasco a dinakamat ti Sirio a komandante ti buyot a ni Naaman idi linaisna dagiti pammilin ni Eliseo nga agdigus iti dandanum ti Jordan kas pangagas iti kukutelna.​—2Ar 5:12.

Daytoy a karayan ket kadawyan a maikunkuna nga isu ti Nahr Barada, nga aggapu iti bambantay ti Anti-Libano nga agturong iti amianan a laud ti Damasco ket, kalpasan ti panagayusna a lumasat iti bambantay, rummuar manipud iti maysa a baw-ang iti mismo a laud ti Damasco. Kalpasanna aglaylayon iti makin-amianan a paset ti siudad ket agsaknap iti nadumaduma a direksion a mangpadanum iti nalawa a disso sakbay nga agngudon kadagiti aluguog iti daya ti siudad. Ti dandanumna, a naaramat a mangpadanum kadagiti talon ken minuyongan babaen kadagiti kanal ken kalasugan, mangpataud iti nakalawlawa a lugar a nalangto ti mulmulana. Maikuna ngarud a ti Damasco ket bibiagen ti Barada. Nabayagen a paggapgapuan dayta ti danum dagiti bubon, ubbog, ken pagdigusan ti siudad. Dagiti klasikal a mannurat inawaganda dayta iti Nabalitokan a Karayan (Chrysorrhoas). Gapuna, agparang nga adda nabileg a rason no apay a kaykayat ni Naaman dayta a karayan.

Iti 2 Ar-ari 5:12 iti An American Translation nausar ti sao nga “Amana” wenno “Amanah” imbes nga “Abana”, kasta met iti patarus nga impablaak ti The Jewish Publication Society of America, ken dayta met ti mabasa iti nota ti Masoretiko a teksto kasta met iti Syriac a Peshitta. Iti adu a patarus, nadakamat ti “Amana” iti Kanta ni Solomon 4:8, ket matarusan a tumukoy daytoy iti bambantay ti Anti-Libano a naggubuayan ti karayan a nausig ditoy. Ngarud, mabalin a ti nagan ti karayan ket namunganay iti nagan ti bambantay a nagtaudanna.