ABDI

[napaababa a porma ti Abdiel].

1. Levita iti balay ni Merari. Isu ti ama ni Kisi ken nalabit kapanawenan ni Saul, a ti panagturayna nangrugi manipud 1117 agingga iti 1078 K.K.P.​—1Cr 6:31, 33, 39, 44.

2. Maysa pay a Levita iti balay ni Merari. Isu ti ama ni Kis. (2Cr 29:12) Gapu iti panagpada ti nagan ti annakda, daytoy nga Abdi ken daydiay nadeskribir iti ngato naibilangda kas maymaysa a tao iti sumagmamano a diksionario ti Biblia. Nupay kasta, yantangay ni Kis, ti maikadua nga anak ni Abdi, ket nagbiag idi tiempo ni Ari Ezekias agarup 250 a tawen kalpasan ti tiempo ni David, ngarud saan a nainkalintegan ti kasta a konklusion. Daytoy maikadua nga Abdi ket nalabit kapanawenan da Ari Jotam ken Acaz, a dagiti panagturayda saklawenna ti periodo manipud 777 K.K.P. agingga iti agarup 746 K.K.P.

3. Maysa a lalaki iti pamilia ni Elam a nagbiag kadagidi tiempo kalpasan ti pannakaidestiero. (Esd 10:26) Isu karaman kadagidiay Israelita a nangala iti ganggannaet nga assawa a babbai ngem pinagtalawda dagita kas panangipangag iti pammagbaga ni Esdras kalpasan ti isusublina idiay Jerusalem idi maikapito a tawen ni Ari Artaxerxes (Longimanus) (468 K.K.P.).​—Esd 7:8; 10:1-4, 10-12, 26, 44.