ABILINIA

Distrito ti Roma, wenno tetrarkia, iti rehion a kabambantayan ti Anti-Libano iti amianan ti Bantay Hermon. Naipasurot ti naganna iti kabeserana nga Abila, maysa a siudad nga adda iti maysa a nangayed ti buyana a baw-ang iti igid ti karayan Abana (agdama a Barada).

Kunaen kadatayo ti Lucas 3:1 a ti distrito ket inturayan ni Lisanias idi maika-15 a tawen ni Tiberio Cesar (28/29 K.P.). Pasingkedan daytoy ti maysa a kitikit a nasarakan idiay Abila nga adda pakainaiganna iti pannakaidedikar ti maysa a templo, a dayta a kitikit ket naaramid idi panawen ti panagturay ni Tiberio. Naglaon daytoy a kitikit iti nagan a “Lisanias a tetrarka.” Sakbayna, ti Abilinia ket maysa a paset ti pagarian ni Herodes a Dakkel, ngem nairaman dayta iti probinsia ti Siria kalpasan ti ipapatayna idi agarup tawen 1 K.K.P. Inlanad ni Josephus a ti tetrarkia ni Lisanias ket naitipon iti Palestina, idi 37 K.P., iti sidong ni Herodes Agripa I, ket idi agangay, ni Claudio intedna dayta ken Herodes Agripa II idi 53 K.P.