BAAL-MEON

[napaababa a porma ti Bet-baal-meon].

Nalatak nga ili iti tanap ti makin-amianan a Moab a naituding iti tribu ni Ruben a karaman iti Nebo, Kiriataim, ken dadduma pay nga ili iti rehion. (Nu 32:37, 38; 1Cr 5:8) Tinarigagayan unay dagiti Rubenita daytoy a rehion gapu ta adda nagsayaat a pagpaarabanna ket nabatad a binangon manen ken binaliwanda a pinanaganan dagiti il-ili. Iti immun-una a listaan iti Numeros 32:3, 4, ti Baal-meon mabalin nga irepresentar ti nagan a “Beon.” Kalpasanna, tukoyen dayta ni Josue kas Bet-baal-meon, nalabit isu ti kompleto a nagan dayta a lugar.​—Jos 13:17.

Agparang a ti Baal-meon ket innala manen dagiti Moabita bayat ti panagturay ni Ari Mesa ti Moab, nabatad nga iti naud-udi a paset ti maikasangapulo a siglo K.K.P. Ti kitikit iti Bato a Moabita (linia 9) dakamatenna a ni Mesa “binangonna [nalabit, sinarikedkedanna] ti Baal-meon, a nangaramid sadiay iti pagurnongan iti danum,” ket iti linia 30 tinukoyna dayta iti ad-adda a kompleto a nagan a Bet-baal-meon. Kanayonanna pay, iti maysa a tipping ti nakitikitan a damili a nasarakan idiay Samaria (Ostraca 27 ti Samaria) adda nadakamat a “Baala a Baal-meonita.”

Idi maikapito a siglo K.K.P. nangipaay ni mammadto Jeremias iti nadibinuan a pakdaar iti Moab nga impakpakaunana ti pannakasamsam ti daga babaen ti Babilonia, nga espesipiko a nangdakamat iti il-ili, agraman ti Bet-meon (nalabit ti Baal-meon). (Jer 48:20-23) Maysa ti Baal-meon kadagiti disso ti Moab nga inraman ni Ezequiel a tagikuaen dagiti “taga Daya” (wenno, “annak ti Daya”). (Eze 25:9, 10) Pasingkedan ti sekular a pakasaritaan ken ti panagsukimat ti arkeolohia a natungpal dagitoy a padto.​—Kitaenyo ti MOAB, DAGITI MOABITA Num. 2.

Ti Baal-meon ket naikuna nga isu dagiti rebba ti Maʽin, a mangbukel iti dakkel a munturod nga agarup 6 km (3.5 mi) iti laud nga abagatan-a-laud ti Medeba ken 12 km (7 mi) iti daya ti Natay a Baybay. Ti nangato a lantag nga ayan ti Maʽin ket agarup 800 m (2,600 pie) ti kangatona.