BETFAGE

[manipud Heb., nalabit kaipapananna ti “Balay Dagiti Nasapa a Higos”].

Naitampok ti Betfage iti salaysay maipapan ken Jesus idi asidegen iti Jerusalem ken sadiay ti ayanna idi imbaonna dagiti adalanna tapno alaenda ti asno a nagsakayanna bayat ti naballigi nga iseserrekna iti Jerusalem, idi Nisan 9, ti tawen 33 K.P. (Mt 21:1, 2; Mr 11:1, 2; Lu 19:29, 30) Ipakita dagiti reperensia a masarakan dayta iti Bantay dagiti Olibo, asideg iti Jerusalem, ken asideg met iti Betania. Nupay pagarupen ti dadduma a ti Betfage ket masarakan iti ballasiw ti baw-ang iti abagatan a daya ti Betania iti agdama nga Abu Dis, ti naikunkunan nga ayanna ket iti nagbaetan ti Betania ken Jerusalem idiay et-Tur, iti makin-abagatan a daya a darisdis ti Bantay dagiti Olibo. Manipud ditoy, pangasidegen laeng ti maysa kadagiti alimpatok ti Bantay dagiti Olibo. No sumalog ti maysa manipud sadiay, naan-anay a mabuyana ti siudad ti Jerusalem.​—Idiligyo ti Lu 19:37, 41.

Kadagiti pannakadakamat ti Betfage iti Talmud, naibilang nga adda dayta iti pagpatinggaan a lugar a masakupan ti sabbath iti aglikmut ti siudad ti Jerusalem.​—Talmud ti Babilonia, Menahot 78b; idiligyo ti Ara 1:12, Rbi8 ftn.