ONESIMO

[Makagunggona].

Adipen a nagtalaw ngem tinulongan ni Pablo nga agbalin a Kristiano. Ni Onesimo ket adipen idi ni Filemon a maysa a Kristiano a taga Colosas, ngem nagtalaw ni Onesimo manipud Colosas ket nagpa-Roma. Mabalin a tinakawanna pay nga umuna ti apona tapno adda usarenna nga agbiahe. (Col 4:9; Flm 18) Dakkel ti posibilidadna a sakbayna pay, nagam-ammodan ken Pablo wenno nangnangngegnan ken Filemon ti maipapan ken Pablo; ta nupay saan nga espesipiko a nadakamat a bimmisita ni Pablo idiay Colosas bayat dagiti panagdaliasatna kas misionero, mismo a limmasat ni Pablo iti dayta a rehion ken agam-ammoda ken Filemon. (Ara 18:22, 23; Flm 5, 19, 22) Aniaman ti napasamak, nagkita da Onesimo ken Pablo idiay Roma nupay saan a naibaga no kasano, ket di nagbayag nagbalinen a Kristiano. (Flm 10) Nupay sigud nga awan serserbina ken Filemon kas adipen, dakkel ti maitulongnan ken Pablo kas ministro, maysa a ‘matalek ken dungdungnguen a kabsat’ nga inawagan ni Pablo iti “bukodko a kinalailo.”​—Col 4:9; Flm 11, 12.

Uray pay kasta, maysa latta ni Onesimo a nagtalaw nga adipen, ket gapu iti kadawyan nga urnos napilitan ni Pablo a mangibaon kenkuana nga agsubli iti apona, nupay madi koma gapu ta nasayaat unay a kadua ni Onesimo. Nupay kasta, saanna a mabalin a piliten nga agsubli ni Onesimo, isu nga agpannuray dayta ken Onesimo ken no kayatna a mismo ti agsubli. Idi pinagawidnan ni Onesimo, inyurnosna a kaduaen ni Tiquico ken awitenda ti maysa a surat ken maysa a damag nga agpaay iti Colosas. (Col 4:7-9) Kasta met, impaw-itna ken Onesimo ti suratna ken Filemon, nupay namnamaenen ni Pablo ti pannakaluk-atna ta nabayag metten a sibabalud ket segseggaannan ti sumarungkar a mismo ken Filemon. (Flm 22) Daytoy a surat ken Filemon ket mabalin nga ibilang kas pangipresenta manen ken Onesimo ken pangirekomenda kenkuana ni Pablo, nga iti dayta ket patpatalgedanna ken Filemon ti nagsayaat a Nakristianuan a ministerio ken baro a personalidad ni Onesimo, ken impakaasina a ti panagkitada manen ket kasla koma panagkita ti dua a Kristiano imbes a panagkita manen ti adipen ken ti apona. Imbaga ni Pablo nga isu laengen ti pakaisingiran ti aniaman nga utang ni Onesimo a saanna pay nabayadan ken Filemon. (Flm 12-22) Iti sabali a bangir, inlawlawag ni Pablo dagiti Nakristianuan a prinsipio mainaig iti relasion ti adipen ken apo iti suratna kadagiti taga Colosas nga inawit da Onesimo ken Tiquico.​—Col 3:22–4:1.